Moadto sa Kaislahan sa Pasipiko—Aron Motrabaho!

 ANG dapit diin dunay mga lingkoranan alang sa lumalargahay nga mga pasahero sa internasyonal nga mga erport sa Brisbane ug Sydney, Australia, natugob sa mas pang kahinam kay sa naandan. Usa ka grupo sa 46 ka tawo ang andam nang mobiyahe ngadto sa mainit nga Samoa aron makigtagbo sa 39 pa gikan sa New Zealand, Hawaii, ug Tinipong Bansa. Ang ilang bagahe talagsaon kaayo—gilangkoban ilabina sa mga himan, sama sa mga martilyo, gabas, ug barina—dili ang matang sa mga butang nga kasagarang dad-on diha sa usa ka panaw ngadto sa usa ka maanindot nga isla sa Pasipiko. Apan, unya, ang ilang misyon talagsaon usab.

Nagbiyahe nga ilang gasto, sila mogugol ug duha ka semana ingong walay-suweldong mga boluntaryo sa usa ka programa sa konstruksiyon nga gidumala sa Regional Engineering Office sa sangang buhatan sa mga Saksi ni Jehova sa Australia. Ang programa, nga gigastohan sa boluntaryong mga kontribusyon, naglakip sa pagtukod ug mga Kingdom Hall, Assembly Hall, mga puy-anan sa mga misyonaryo, ug mga pasilidad sa sanga o sa paghubad alang sa tuling nag-uswag nga mga kongregasyon sa mga Saksi ni Jehova sa kaislahan sa Pasipiko. Himamaton nato ang pipila sa mga trabahante, kinsa bahin sa mga tem nga magtukod ug mga Kingdom Hall diha sa ilang kaugalingong mga nasod.

Si Max, nga usa ka mangangatop, taga-Cowra sa New South Wales, Australia. Siya minyo ug dunay lima ka anak. Si Arnold taga-Hawaii. Siya ug ang iyang asawa dunay duha ka anak nga lalaki, ug siya usa usab ka payunir, o bug-os-panahong ministro. Sama kang Max, si Arnold nag-alagad ingong ansiyano sa iyang kongregasyon. Dayag, kining mga tawhana—ug kasagaran kini sila sa kadaghanan diha sa maong programa—dili mga boluntaryo tungod kay duna silay sobrang panahon. Hinunoa, sila ug ang ilang mga pamilya nakasabot sa panginahanglan, ug buot nilang himoon ang ilang mahimo aron makatabang.

Mga Trabahante Gikan sa Lainlaing mga Nasod Nagtagbaw sa Hinungdanong Panginahanglan

Usa ka dapit diin ang ilang mga kahanas ug mga serbisyo gikinahanglan maoy sa Tuvalu, usa ka nasod sa Pasipiko nga dunay mga 10,500 ka tawo nga nahimutang sa usa ka hilit nga grupo sa siyam ka pulong katakotan nga duol sa ekwetor ug amihanan-kasadpan sa Samoa. Ang mga isla, o mga pulong katakotan, matag usa nag-aberids ug mga 2.5 kilometro kuwadrado ang gidak-on. Sa 1994, ang 61 ka Saksi didto dunay dinaliang panginahanglan sa usa ka bag-ong Kingdom Hall ug mas dakong opisina para sa paghubad.

 Niining dapita sa tropikanhong Pasipiko, ang mga tinukod kinahanglang disenyohon ug tukoron nga makasugakod sa kanunayng mahitabo nga kusog nga mga bagyo ug mga urakan. Apan diyutay lamang nga dekalidad nga materyales nga igtutukod ang mabatonan diha sa maong mga isla. Ang sulbad? Ang tanang materyales—gikan sa atop ug mga katsaw ngadto sa mga muwebles ug mga kortina, mga inodoro ug shower, bisan mga tornilyo ug mga lansang—gikarga sa mga kontiner ug gipadala gikan sa Australia.

Una pa moabot ang materyales, usa ka gamayng tem nga nag-una didto ang nag-andam sa lokasyon ug nagpahiluna sa pundasyon. Unya ang internasyonal nga mga trabahante nangabot aron magtukod, mamintal, ug magsangkap sa mga tinukod.

Lain pay ato, kining tanang kalihokan sa Tuvalu nakapalagot sa lokal nga klerigo kinsa nagsibya sa radyo nga ang mga Saksi nagtukod ug usa ka “Torre sa Babel”! Apan, unsa ba ang mga kamatuoran? “Sa dihang ang mga tawo nga nagtukod sa Biblikanhong Torre sa Babel dili na magkasinabtanay tungod kay ang ilang pinulongan gilahugay sa Diyos, kinahanglang hunongon nila ang ilang proyekto ug biyaan ang torre nga wala mahuman,” matod pa sa usa ka boluntaryong trabahante nga si Graeme. (Genesis 11:1-9) “Apan lahi gayod kon magtrabaho alang kang Jehova nga Diyos. Bisan pa sa mga kalainan sa pinulongan ug kultura, ang mga proyekto kanunayng matapos.” Ug mao usab kining proyektoha—sa duha lamang ka semana. Sa pagkatinuod, 163 ka tawo, lakip sa asawa sa primer ministro, ang mitambong sa pagpahinungod niana.

Si Doug, ang superbisor sa proyekto, nga nahinumdom sa maong eksperyensiya, miingon: “Makalilipay nga motrabaho uban sa mga boluntaryo gikan sa ubang mga nasod. Lainlain kamig mga paagi sa paghimo sa mga butang, lainlain ug termino, lainlain ganig mga sistema sa pagsukod, apan walay usa niining mga butanga ang nagpahinabo ug bisan unsang mga suliran.” Kay nakatrabaho na sa ubay-ubayng proyekto, siya midugang: “Kini nagpalig-on diha sa akong hunahuna nga uban sa pagpaluyo ni Jehova ang iyang katawhan makapatindog ug tinukod bisan asa niining yutaa, bisan unsa pa ka hilit o ka lisod tingali sa usa ka dapit. Tinuod, daghan kitag mga tawo nga may katakos, apan ang espiritu ni Jehova ang nagpaposible niana.”

Ang espiritu sa Diyos nagpalihok usab sa mga pamilyang Saksi diha sa kaislahan sa pagtagana ug pagkaon ug mga sak-anan, nga, alang sa pipila, usa ka dakong pagsakripisyo. Ug gipabilhan kini pag-ayo niadtong nakadawat sa maong pagkamaabiabihon. Si Ken, nga taga-Melbourne, Australia, nakatrabaho na sa susamang proyekto sa French Polynesia. Siya miingon: “Miabot kami ingong mga alagad, apan gitratar kami samag mga hari.” Diin posible, ang lokal nga mga Saksi motabang usab sa buluhaton sa konstruksiyon. Sa Solomon Islands, ang mga babaye nagmasa ug semento—nga manomano. Usa ka gatos ka lalaki ug babaye ang mikatkat sa nabasa-sa-ulan nga kabukiran ug naghakot paingon sa ubos sa kapin sa 40 ka toneladang troso. Ang mga batan-on mitabang usab. Usa ka trabahante nga taga-New  Zealand nahinumdom: “Nahinumdoman nako ang usa ka batan-ong igsoong lalaki sa isla nga nagpas-an ug duha o tulo ka sakong semento sa usa ka higayon. Ug nagpala siya ug graba sa tibuok adlaw mag-init ug mag-ulan.”

Dunay laing benepisyo ang pagtabang sa lokal nga mga Saksi sa buluhaton. Ang sangang buhatan sa Watch Tower Society sa Samoa nagtaho: “Ang mga igsoon sa isla nakakat-on ug mga kahanas sa trabaho nga ilang magamit sa pagtukod ug mga Kingdom Hall ug pagpang-ayo human sa urakan ug pagpanukod pag-usab. Makatabang usab kini kanila sa pagpanginabuhi diha sa usa ka komunidad diin daghan ang malisdan niana.”

Ang Programa sa Pagpanukod Naghatag ug Maayong Pamatuod

Si Colin didto sa Honiara ug nakita ang Assembly Hall sa Solomon Islands nga gitukod. Nakadayeg, misulat siya sa lokal nga sangang buhatan sa Watch Tower Society: “Ang tanan nagkahiusa ug walay nagmug-ot, sila usab samag usa ka pamilya.” Wala madugay human niana, pagpauli niya sa iyang balangay sa Aruligo, 40 kilometros ang gilay-on, siya ug ang iyang pamilya nagtukod sa ilang kaugalingong Kingdom Hall. Unya nagpadala sila ug laing mensahe ngadto sa sangang buhatan: “Ang among Kingdom Hall, lakip na gani ang plataporma, andam na, busa mahimo bang dunay himoong panagkatigom diri?” Gihikay dayon kini, ug kapin sa 60 ka tawo ang regular nga magtambongan.

Usa ka magtatambag sa European Union nakakita sa proyekto sa Tuvalu. “Sa akong hunahuna mao gihapon kiniy giingon sa tanan kaninyo,” siya miingon ngadto sa usa ka trabahante, “apan alang kanako kini usa gayod ka milagro!” Usa ka babaye nga nagtrabaho sa telephone exchange nangutana sa laing nagaduawng boluntaryo: “Unsa bang hitaboa nga malipayon man kaayo mong tanan? Init kaayo dinhi!” Sukad masukad wala pa gayod sila makakita nga ang Kristiyanidad nagalihok sa praktikal ug nagsakripisyo-sa-kaugalingon nga paagi.

Ang mga Pagsakripisyo Wala Basoli

“Siya nga nagapugas nga madagayaon magaani usab nga madagayaon,” matod pa sa Bibliya sa 2 Corinto 9:6. Ang mga trabahante, ilang mga pamilya, ug ilang mga kongregasyon nagpadayon sa pagpugas nga madagayaon sa pagtabang sa mga isigka-Saksi sa Pasipiko. “Ang akong kongregasyon miamot ug kapin sa un-tersiya sa akong plete sa ayroplano,” matod ni Ross, usa ka ansiyano nga taga-Kincumber, duol sa Sydney, “ug ang akong bayaw nga lalaki, nga mikuyog usab, miamot ug dugang $500.” Laing trabahante ang migasto sa iyang panaw pinaagi sa pagbaligya sa iyang sakyanan. Ang lain pa nagbaligya ug yuta. Si Kevin nagkinahanglan ug dugang $900, busa mihukom siya sa pagbaligya sa iyang 16 ka dos-anyos nga mga pati. Pinaagi sa usa ka kaila, nakakita siya ug mopalitay nga mitanyag kaniya ug eksaktong $900 alang niana!

“Takos ba kini sa kantidad sa plete sa ayroplano ug sa madawat unta nga mga suhol, nga mikabat ug mga $6,000?” Si Danny ug Cheryl gipangutana. “Oo! Bisan pag doblehon ang maong kantidad, kini mas takos pa gayod niana,” sila mitubag. Si Alan, nga taga-Nelson, New Zealand, midugang: “Sa akong nagasto sa pag-adto sa Tuvalu, makaadto na unta ako sa Uropa ug may mahibilin pang kuwarta. Apan makadawat kaha ako sa mga panalangin, o makahigala ug daghan kaayo nga lainlain ug mga kagikan, o makahimo ug usa ka butang alang sa lain imbes alang sa akong kaugalingon? Dili! Bisan pa niana, bisan unsa pay akong gihatag sa among mga igsoon sa isla, sila nagbalos kanako ug labaw pa.”

Ang laing yawi sa kalamposan sa maong programa mao ang pagpaluyo sa pamilya. Bisan tuod ang pipila ka asawa makakuyog sa ilang mga bana ug motabang gani sa pagtukod, ang uban dunay atimanon nga mga anak nga nagtungha o dunay mga alatimanon sa pamilya. “Ang pagkaandam sa akong asawa sa pag-atiman sa mga bata ug sa panimalay samtang wala ako,” matod ni Clay, “mao gayod ang mas dakong sakripisyo kay sa akoa.” Sa pagkatinuod, ang tanang bana kansang mga asawa wala makakuyog kinasingkasing gayod nga mouyon niana!

Sukad sa pagkakompleto sa proyekto sa Tuvalu, ang boluntaryong mga trabahante nakatukod na ug mga Kingdom Hall, mga Assembly Hall, mga puy-anan sa misyonaryo, ug mga opisina sa paghubad sa Fiji, Tonga, Papua New Guinea, New Caledonia, ug ubang mga dapit. Daghang proyekto, lakip na ang pipila nga tukoron sa Habagatan-sidlakang Asia, ang giplano pa. Duna ba unyay igong mga trabahante?

Dayag nga dili kana suliran. “Ang tanan dinhi nga nakasalmot sa internasyonal nga mga proyekto sa pagpanukod mihangyo nga hinumdoman sila kon magplano ug laing proyekto,” misulat ang sangang buhatan sa Hawaii. “Sa dihang nakauli na sila, nagsugod dayon sila sa pagtigom ug salapi alang niana.” Ngano god nga dili molampos ang programa kon idugang nimo ang dagayang panalangin ni Jehova ngadto sa dili-mahakogong dedikasyon nga sama niana?

[Hulagway sa panid 9]

Mga materyales alang sa proyekto

[Mga hulagway sa panid 9]

Mga trabahante diha sa gitukoran

[Mga hulagway sa panid 10]

Sa natapos ang mga proyekto, kami nagmaya tungod sa napalampos sa espiritu sa Diyos