Nahinumdom Ka Ba?

Imo bang gipabilhan ang pagbasa sa dili pa dugayng mga isyu sa Ang Bantayanang Torre? Buweno, sulayi kon imo bang matubag ang mosunod nga mga pangutana:

• Nganong makaseguro kita nga ang katumanan sa tagna sa “bag-ong mga langit ug usa ka bag-ong yuta” sa Isaias 65:17-19 naglangkit ug labaw pa kay sa pagbalik sa mga Hudiyo gikan sa pagkabinihag?

Tungod kay ang mga apostoles nga si Pedro ug Juan, nga nagsulat sa unang siglo K.P., nagpunting sa umaabot nga katumanan, nga naglangkit sa mga panalangin nga umalabot pa. (2 Pedro 3:13; Pinadayag 21:1-4)—4/15, mga panid 10-12.

• Unsa ang mahimong pasukaranan sa mga sugilambong sa karaang Grego bahin sa mapintas nga mga samag-diyos?

Kini mahimong mga bulakbulak ug mga pagtuis sa kamatuoran nga sa wala pa ang Lunop, ang pipila ka manulonda nagpakatawo ug nagsubay sa mapintas, imoral nga mga kinabuhi dinhi sa yuta. (Genesis 6:1, 2)—4/15, panid 27.

• Unsa ang pipila ka kapeligrohan nga bantayan sa hamtong nga mga Kristohanon diha sa mga kasal?

Hinungdanon nga likayan ang banha nga hudyaka, nga mahimong mahitabo kon dunay pagpatuyang sa pag-inom ug alkoholikong ilimnon ug kon dunay mapatuyangon nga pagsayaw dinuyogan sa kusog nga musika. Gawas kon giklaro nga ang salosalo bukas alang sa tanan, ang wala dapita dili angayng motambong. Kinahanglang seguradohon sa pamanhonon nga presente ang responsableng mga Kristohanon hangtod matapos ang selebrasyon sa rasonableng oras.—5/1, mga panid 19-22.

• Unsay ipasabot sa paghisgot sa Salmo 128:3 bahin sa mga anak nga “sama sa mga turok sa mga kahoyng olibo” palibot sa lamesa sa usa ka tawo?

Kasagarang motubo ang bag-ong mga subol gikan sa tiilan sa punoan sa kahoyng olibo. Sa dihang ang inahang punoan dili na mamungag daghan, ang bag-ong mga turok mahimong malig-on nga mga punoan palibot niini. Sa susama, malipay ang mga ginikanan nga dunay mabungahong mga anak nga nag-alagad kang Jehova diha sa ilang kiliran.—5/15, panid 27.

• Unsa ang pipila ka kaayohang makuha sa mga bata gikan sa maayong atmospera sa pamilya?

Makatukod kinig pundasyon alang sa maayong panglantaw maylabot sa awtoridad, pagpabili sa hustong mga prinsipyo, ug malipayong relasyon sa uban. Ang ingon niana nga atmospera makatabang usab kanila nga makaugmad ug pagpakighigala sa Diyos.—6/1, panid 18.

• Diha sa usa ka yuta sa Halayong Sidlakan, unsay gihimo sa pagpasiugda sa ideya nga ang tanang Kristohanon managsoon?

Giawhag ang tanang kongregasyon nga dili magtawag sa pipila ka igsoon ginamit ang mapasidunggon nga mga termino. Hinunoa, ang tanan angay nga walay pili nga tawgon nga mga igsoon.—6/15, mga panid 21, 22.

• Ang mga Saksi ni Jehova modawat ba ug bisan unsang medikal nga mga produkto gikan sa dugo?

Kami nagtuo nga ang sugo sa Bibliya sa ‘pag-ayad sa dugo’ naglakip sa paglikay nga magpaabono sa kompletong dugo o sa pangunang mga sangkap niini (plasma, pulang mga selula, puting mga selula, ug mga platelet). (Buhat 15:28, 29) Kon bahin sa mga tipik nga makuha gikan sa pangunang mga sangkap sa dugo, ang matag Kristohanon mohukom sa personal, nga hunahunaon ang gisulti sa Bibliya ug ang iyang relasyon sa Diyos.—6/15, mga panid 29-31.

• Posible ba gayod nga makabaton ug kalinaw sa galamhan karon?

Oo. Pinaagi sa Bibliya, gigiyahan ni Jesu-Kristo ang mga tawo ngadto sa dalan sa putli nga pagsimba ug sa kalinaw nga gibatbat sa Isaias 32:18. Dugang pa, kadtong makabaton sa maong kalinaw may paglaom nga makatagamtam ug permanenteng kalinaw sa yuta ingong katumanan sa Salmo 37:11, 29.—7/1, panid 7.

• Unsay papel ni George Young sa modernong teokratikanhong kasaysayan?

Sugod sa 1917, siya napamatud-an nga usa ka tigdalag kahayag sa maayong balita sa Gingharian diha sa daghang yuta. Ang iyang ministeryo nagdala kaniya sa tibuok Canada, ngadto sa mga isla sa Caribbeano, sa Brazil ug sa ubang kayutaan sa Amerika del Sur, Sentral Amerika, Espanya, Portugal, kanhing Unyon Sobyet, ug sa Tinipong Bansa.—7/1, mga panid 22-7.

• Unsay ipasabot sa 1 Corinto 15:29 sa dihang naghisgot kini bahin sa uban nga ‘bawtismohan sa katuyoan sa pagkahimong ingon nga mga patay’?

Ang punto mao nga sa dihang ang mga Kristohanon dihogan sa balaang espiritu, sila puliki kaayo sa dalan sa kinabuhi nga mosangko sa ilang kamatayon ug sa pagkabanhaw ngadto sa langitnong kinabuhi.—7/15, panid 17.

• Unsay gihimo ni apostol Pablo panahon nianang gihubit nga iyang wala-hisgoting mga tuig?

Siya mahimong nagtabang sa pagtukod o pagpalig-on sa mga kongregasyon sa Sirya ug Cilicia. Ang daghang kalisdanan nga gihisgotan sa 2 Corinto 11:23-27 mahimong nahitabo niining yugtoa, nga nagpakita nga siya nagpadayon sa aktibong ministeryo.—7/15, mga panid 26, 27.

• Unsay makatabang kanato nga magmakataronganon sa atong mga pagdahom?

Hinumdomi nga si Jehova masinaboton. Ang pag-ampo kaniya makatabang kanato sa pagbalanse sa atong hunahuna, ug kini nagpakitag pagkamakasaranganon. Ang laing tabang mao ang pagkuhag lahing panglantaw pinaagi sa pagpakig-estorya sa usa ka hamtong nga higala.—8/1, mga panid 29, 30.