Ipaaninag ang Tinamdan sa Hunahuna ni Kristo

“Hinaot ang Diyos nga nagahatag ug pag-agwanta ug paghupay magatugot kaninyo nga mabatonan taliwala kaninyo ang samang tinamdan sa pangisip nga gibatonan ni Kristo Jesus.”—ROMA 15:5.

1. Sa unsang paagi ang kinabuhi sa usa ka tawo maapektahan sa iyang tinamdan?

 ANG tinamdan makahimog dakong kalainan sa kinabuhi. Ang dili-matinagdanon o ang makugihong tinamdan, ang positibo o negatibong tinamdan, ang mabingkilon o matinabangong tinamdan, ang reklamador o mapasalamaton nga tinamdan kusog makaimpluwensiya sa kon unsaon pag-atubang sa usa ka tawo ang mga kahimtang ug sa kon unsay reaksiyon sa ubang mga tawo kaniya. Tungod sa maayong tinamdan, ang usa mahimong magmalipayon bisan diha sa lisod kaayong mga kahimtang. Alang sa usa ka tawong may sayop nga tinamdan, maorag walay bisan unsa nga husto, bisan pa kon—gikan sa dili-madapigong panglantaw—maayo ang kinabuhi.

2. Sa unsang paagi ang usa ka tawo makakat-on sa mga tinamdan?

² Ang mga tinamdan—maayo o daotan—mahimong makat-onan. Sa pagkamatuod, sila kinahanglang tun-an. Sa paghisgot bahin sa usa ka bata nga bag-ong natawo, ang Collier’s Encyclopedia nag-ingon: “Kon unsang mga tinamdan ang iyang mabatonan sa kadugayan kinahanglang mabatonan o makat-onan niya, nga samang kinahanglang mabatonan o makat-onan niya ang usa ka pinulongan o uban pang kahanas.” Sa unsang paagi makat-onan nato ang mga tinamdan? Bisan pag daghang butang ang malangkit sa paghimo niana, ang silinganan ug panag-uban makapaimpluwensiya pag-ayo. Ang gihisgotan nang ensiklopedia nag-ingon: “Atong makat-onan o masuhop, nga samag osmosis, ang mga tinamdan niadtong suod natong mga kauban.” Libolibo ka tuig kanhi, ang Bibliya nag-ingon sa susamang butang: “Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog masugamak sa kadaot.”—Proverbio 13:20; 1 Corinto 15:33.

Usa ka Sumbanan sa Hustong Tinamdan

3. Kinsa ang sulondan kon bahin sa iyang tinamdan, ug sa unsang paagi makasundog kita kaniya?

³ Ingon sa tanang ubang butang, kon bahin usab sa tinamdan, gihatag ni Jesu-Kristo ang labing maayong sumbanan. Siya miingon: “Ako nagtagana sa sumbanan alang kaninyo, nga, ingon sa akong gibuhat kaninyo, kamo angay usab nga mobuhat.” (Juan 13:15) Aron mahisama kang Jesus, kinahanglan unang makakat-on kita bahin kaniya. a Tun-an nato ang kinabuhi ni Jesus uban ang katuyoan nga buhaton ang gisugyot ni apostol Pedro: “Niini nga dalan kamo gitawag, tungod kay bisan si Kristo nag-antos alang kaninyo, nga nagbilin kaninyo ug sulondan aron inyong sundon pag-ayo ang iyang mga tunob.” (1 Pedro 2:21) Ang atong tumong mao nga mahisama kaayo kang Jesus kutob sa mahimo. Naglakip kana sa pag-ugmad sa iyang tinamdan sa hunahuna.

4, 5. Unsang bahin sa tinamdan sa hunahuna ni Jesus ang gipasiugda sa Roma 15:1-3, ug sa unsang paagi makasundog kaniya ang mga Kristohanon?

⁴ Unsay nalangkit sa pagbaton sa tinamdan sa hunahuna ni Kristo Jesus? Ang kapitulo 15 sa sulat ni Pablo ngadto sa mga taga-RomaRoma 15 motabang kanato sa pagtubag nianang pangutanaha. Sa unang pipila ka bersikulo niining kapituloha, si Pablo nagtumong sa usa ka talagsaong hiyas ni Jesus sa nag-ingon siya: “Hinunoa, kita nga mga lig-on angay  mopas-an sa mga kaluyahon niadtong mga dili lig-on, ug dili kay magpahimuot sa atong kaugalingon. Magpahimuot ang matag usa kanato sa iyang silingan sa kon unsay maayo aron sa paglig-on kaniya. Kay bisan gani si Kristo wala magpahimuot sa iyang kaugalingon; apan ingon sa nahisulat: ‘Ang mga pakaulaw niadtong mga nagpakaulaw kanimo nahulog kanako.’”—Roma 15:1-3.

⁵ Sa pagsundog sa tinamdan ni Jesus, ang mga Kristohanon gidasig nga mahimong andam nga moatiman sa mga panginahanglan sa uban nga mapaubsanon inay kay magtinguha nga pahimut-an ang ilang kaugalingon lamang. Sa pagkatinuod, ang maong mapaubsanong pagkaandam moalagad sa uban maoy usa ka kinaiya niadtong “mga lig-on.” Si Jesus, kinsa labaw nga malig-on sa espirituwal kay ni bisan kinsang tawo nga nabuhi sukad, miingon bahin sa iyang kaugalingon: “Ang Anak sa tawo mianhi, dili aron alagaran, kondili sa pag-alagad ug sa paghatag sa iyang kalag nga usa ka lukat baylo sa daghan.” (Mateo 20:28) Ingon nga mga Kristohanon, kita usab buot nga magtinguha sa pag-alagad sa uban, lakip “niadtong mga dili lig-on.”

6. Sa unsang paagi makasundog kita sa sanong ni Jesus sa pagsupak ug pakaulaw?

⁶ Ang laing maayong kinaiya nga gipadayag ni Jesus mao ang sumbanan sa hunahuna ug lihok nga kanunayng positibo. Wala gayod niya itugot nga ang negatibong tinamdan sa uban mag-impluwensiya sa iyang maayong tinamdan bahin sa pag-alagad sa Diyos; ni kita magpaimpluwensiya. Sa gipakaulawan ug gilutos tungod sa matinumanong pagsimba sa Diyos, mapailobong nag-antos si Jesus nga walay pagreklamo. Nahibalo siya nga ang pagsupak gikan sa kalibotan nga dili matinuohon ug dili makasabot madahom niadtong magtinguha nga pahimut-an ang ilang silingan diha sa “kon unsay maayo aron sa paglig-on kaniya.”

7. Giunsa pagpadayag ni Jesus ang pailob, ug nganong kinahanglang buhaton nato ang samang butang?

⁷ Gipasundayag ni Jesus ang hustong tinamdan diha sa ubang mga paagi. Wala gayod siya magpahayag sa pagkadili-mapailobon kang Jehova kondili mapailobong naghulat sa katumanan sa Iyang  mga katuyoan. (Salmo 110:1; Mateo 24:36; Buhat 2:32-36; Hebreohanon 10:12, 13) Dugang pa, si Jesus wala mahimong dili-mapailobon sa iyang mga sumusunod. Gisultihan niya sila: “Pagkat-on gikan kanako”; sanglit siya “malumog-buot,” ang iyang pagtudlo makapalig-on ug makapahayahay. Ug tungod kay siya “mapaubsanon sa kasingkasing,” siya dili gayod bombastiko o mapangahason. (Mateo 11:29) Gidasig kita ni Pablo sa pagsundog niining mga bahina sa tinamdan ni Jesus sa nag-ingon siya: “Hupti kini nga tinamdan sa pangisip diha kaninyo nga diha usab kang Kristo Jesus, kinsa, bisan tuod siya naglungtad diha sa dagway sa Diyos, wala mag-isip ug pagpangilog, nga mao, nga siya mahimong tupong sa Diyos. Wala, apan iyang gihaw-asan ang iyang kaugalingon ug gihuptan ang dagway sa usa ka ulipon ug nahisama sa mga tawo.”—Filipos 2:5-7.

8, 9. (a) Nganong kinahanglang maningkamot kita sa pag-ugmad sa dili-mahakogong tinamdan? (b) Nganong dili kita angayng maluya kon dili kita makasunod sa hingpit sa sumbanang gibilin ni Jesus, ug sa unsang paagi si Pablo usa ka maayong panig-ingnan niining bahina?

⁸ Sayon ang pag-ingon nga buot natong moalagad sa uban ug buot natong ibutang pag-una ang ilang mga panginahanglan kay sa atong kaugalingon. Apan ang maminatud-ong pagsusi sa atong tinamdan sa hunahuna basin magpadayag nga ang atong mga kasingkasing dili bug-os nakiling sa ingon. Nganong dili man? Una, tungod kay kita nakapanunod sa mahakogong mga taras gikan ni Adan ug Eva; ikaduha, tungod kay kita nagkinabuhi sa usa ka kalibotan nga nagpasiugda sa kahakog. (Efeso 4:17, 18) Ang pag-ugmad sa dili-mahakogong tinamdan kasagarang nagpasabot sa pag-ugmad sa sumbanan sa hunahuna nga kaatbang sa atong dili-hingpit nga kinaiya nga dala sa pagkatawo. Nagkinahanglan kanag determinasyon ug paningkamot.

⁹ Ang atong dayag nga pagkadili-hingpit, nga lahi kaayo sa hingpit nga sumbanan nga gibilin kanato ni Jesus, mahimong makapaluya usahay kanato. Basin magduhaduha pa gani kita nga posible ang pagbaton sa samang tinamdan sa hunahuna nga nabatonan ni Jesus. Apan matikdi ang makapadasig nga mga pulong ni Pablo: “Ako nahibalo nga kanako, nga mao, sa akong unod, walay nagpuyo nga bisan unsang maayo; kay ang katakos sa pagbuot ania uban kanako, apan ang katakos sa pagbuhat kon unsa ang maayo wala. Kay ang maayo nga buot ko wala ko buhata, apan ang daotan nga dili ko buot mao ang akong ginabuhat. Nahimuot gayod ako sa balaod sa Diyos sumala sa akong pagkatawo sa sulod, apan nakita ko sa akong mga sangkap ang laing balaod nga nakigbugno batok sa balaod sa akong hunahuna ug nagbihag kanako ngadto sa balaod sa sala nga ania sa akong mga sangkap.” (Roma 7:18, 19, 22, 23) Tinuod, ang pagkadili-hingpit ni Pablo sublisubling nagbabag kaniya sa pagtuman sa kabubut-on sa Diyos sumala sa iyang gusto, apan ang iyang tinamdan—ang panghunahuna ug pagbati niya bahin kang Jehova ug sa Iyang balaod—maoy sulondan. Ang atong panghunahuna ug pagbati mahimong sama usab niana.

Pagtul-id sa Sayop nga mga Tinamdan

10. Unsang tinamdan sa hunahuna ang gidasig ni Pablo nga ugmaron sa mga taga-Filipos?

¹⁰ Posible ba nga ang pipila kinahanglang magtul-id sa sayop nga tinamdan? Oo. Dayag nga matuod kini sa pipila ka Kristohanon sa unang siglo. Sa iyang sulat ngadto sa mga taga-Filipos, si Pablo naghisgot bahin sa pagbaton sa matarong nga tinamdan. Misulat siya: “Dili nga ako nakadawat na niini [langitnong kinabuhi pinaagi sa unang pagkabanhaw] o nahingpit na, apan akong ginapangagpas aron makita kon ako usab makahupot ba nianang alang niana ako usab gihuptan ni Kristo Jesus. Mga igsoon, wala ko pa isipa ang akong kaugalingon ingon nga nakahupot na niini; apan may usa ka butang bahin niini: Kalimtan ang mga butang sa luyo ug magapangab-ot sa mga butang sa unahan, nagapangagpas ako sa tumong alang sa ganti nga pagkatinawag sa Diyos ngadto sa itaas pinaagi ni Kristo Jesus. Busa, kitang tanan nga mga hamtong, managbaton niini nga tinamdan sa pangisip.”—Filipos 3:12-15.

11, 12. Sa unsang mga paagi ginapadayag ni Jehova kanato ang hustong tinamdan sa hunahuna?

¹¹ Ang mga pulong ni Pablo nagpadayag nga si bisan kinsa, kay nahimong Kristohanon, nga nag-isip nga dili na kinahanglang mouswag adunay sayop nga tinamdan. Napakyas siya sa pagsagop sa tinamdan sa hunahuna ni Kristo. (Hebreohanon 4:11; 2 Pedro 1:10; 3:14) Wala na bay paglaom ang kahimtang nianang tawhana? Dili hinuon. Ang Diyos makatabang kanato sa pagbag-o sa atong tinamdan kon gusto gayod nato. Si Pablo nagpadayon sa pag-ingon: “Kon sa bisan unsang bahina kamo may pangisip nga nakiling nga sukwahi, ipadayag sa Diyos kining ania sa itaas nga tinamdan nganha kaninyo.”—Filipos 3:15.

¹² Bisan pa niana, kon buot nato nga ang hustong tinamdan ipadayag ni Jehova kanato, kinahanglang  himoon nato ang atong bahin. Ang mainampoong pagtuon sa Pulong sa Diyos uban sa tabang sa Kristohanong mga basahon nga gitagana sa ‘matinumanon ug maalamong ulipon’ makapaarang niadtong “may pangisip nga nakiling nga sukwahi” sa pag-ugmad sa hustong tinamdan. (Mateo 24:45) Ang Kristohanong mga ansiyano, nga tinudlo sa balaang espiritu ‘aron magbantay sa kongregasyon sa Diyos,’ malipay nga mohatag sa pagpaluyo. (Buhat 20:28) Pagkamapasalamaton nato nga ginatagad ni Jehova ang atong mga pagkadili-hingpit ug mahigugmaong nagtanyag kanatog tabang! Dawaton nato kini.

Pagkakat-on Gikan sa Uban

13. Unsay makat-onan nato bahin sa hustong tinamdan gikan sa asoy sa Bibliya bahin kang Job?

¹³ Sa Roma kapitulo 15, si Pablo nagpakita nga ang pagpalandong sa makasaysayanhong mga panig-ingnan makatabang kanato sa pagpasibo sa atong tinamdan. Siya nagsulat: “Ang tanang butang nga gisulat kanhi gisulat alang sa atong instruksiyon, aron nga pinaagi sa atong pag-agwanta ug pinaagi sa paghupay gikan sa mga Kasulatan kita makabatog paglaom.” (Roma 15:4) Gikinahanglan sa pipila sa matinumanong mga alagad ni Jehova sa nangaging kapanahonan ang pagtul-id sa tinong mga bahin sa ilang tinamdan. Pananglitan, sa katibuk-an, si Job may maayong tinamdan. Wala gayod niya ipasangil kang Jehova ang kadaotan, ug sa bisan unsang panahon wala gayod niya itugot nga matarog ang iyang pagsalig sa Diyos. (Job 1:8, 21, 22) Bisan pa niana, nakiling siya sa pagpakamatarong sa iyang kaugalingon. Gisugo ni Jehova si Elihu sa pag-abag kang Job sa pagtul-id sa maong kiling. Inay mobating nainsulto, mapaubsanong gidawat ni Job ang panginahanglan nga usbon ang tinamdan ug sa gilayon misugod sa paghimo niana.—Job 42:1-6.

14. Sa unsang paagi mahisama kita kang Job kon tambagan kita bahin sa atong tinamdan?

¹⁴ Mosanong ba kita nga sama kang Job kon ang usa ka isigka-Kristohanon malulotong mosulti kanato nga nagpadayag kitag timailhan sa usa ka sayop nga tinamdan? Sama kang Job, hinaot nga dili gayod kita “mopasangil ug bisan unsang butang nga dili angay batok sa Diyos.” (Job 1:22) Kon magaantos kita nga dili makataronganon, hinaot nga dili gayod kita moreklamo o mag-isip nga si Jehova mao ang hinungdan sa atong mga kalisdanan. Hinaot nga molikay kita sa pagsulay sa pagpakamatarong sa atong kaugalingon, nga mahinumdom nga bisan unsa man ang atong mga pribilehiyo tingali diha sa pag-alagad kang Jehova, kita sa gihapon mao lamay “mga walay-pulos nga ulipon.”—Lucas 17:10.

15. (a) Unsang sayop nga tinamdan ang gipadayag sa pipila sa mga sumusunod ni Jesus? (b) Giunsa ni Pedro pagpakita ang maayong tinamdan?

¹⁵ Sa unang siglo, ang pipila nga nagpatalinghog kang Jesus nagpasundayag sa dili-hustong tinamdan. Sa usa ka higayon, may gisulti si Jesus nga lisod hisabtan. Ingon nga sanong, “daghan sa iyang  mga tinun-an, sa dihang ilang nadungog kini, miingon: ‘Makapakugang kini nga pamulong; kinsa ang makapamati niini?’” Kadtong misulti niini tin-aw nga may sayop nga tinamdan. Ug ang ilang sayop nga tinamdan mitultol sa paghunong nila sa pagpamati kang Jesus. Ang talaan nag-ingon: “Gumikan niini daghan sa iyang mga tinun-an ang mibalik sa mga butang sa likoran ug wala na molakaw uban kaniya.” Tanan ba may sayop nga tinamdan? Dili. Ang talaan nagpadayon: “Busa si Jesus miingon sa napulog-duha: ‘Dili ninyo buot nga mopahawa usab, mao ba?’ Si Simon Pedro mitubag kaniya: ‘Ginoo, kinsa man ang among adtoan?’” Sa pagkatinuod, si Pedro nagtubag sa iyang kaugalingong pangutana: “Anaa kanimo ang mga pulong sa kinabuhing walay kataposan.” (Juan 6:60, 66-68) Pagkamaayong tinamdan! Sa dihang mag-atubang ug mga katin-awan o mga pagtul-id sa pagsabot sa Kasulatan nga tingali sa sinugdan gilisdan kita sa pagdawat, dili ba maayo ang pagpadayag sa tinamdan nga gipakita ni Pedro? Pagkabinuang ang paghunong sa pag-alagad kang Jehova o pagsulti sa paaging sukwahi sa “sumbanan sa makapahimsog nga mga pulong” tungod lamang kay ang pipila ka butang sa sinugdan lisod hisabtan!—2 Timoteo 1:13.

16. Unsang makapakugang nga tinamdan ang gipadayag sa Hudiyong mga relihiyosong pangulo sa adlaw ni Jesus?

¹⁶ Ang Hudiyong mga relihiyosong pangulo sa unang siglo napakyas sa pagpadayag sa tinamdan sa hunahuna nga nabatonan ni Jesus. Ang hugot nilang determinasyon nga dili magpatalinghog kang Jesus gipasundayag sa dihang gibanhaw niya si Lazaro gikan sa mga patay. Alang kang bisan kinsa nga may husto nga tinamdan, kadtong milagroha maoy dili-malalis nga pamatuod nga si Jesus gipadala sa Diyos. Bisan pa niana, atong mabasa: “Niana gitigom sa pangulong mga saserdote ug sa mga Pariseo ang Sanhedrin ug miingon: ‘Unsay atong buhaton, tungod kay kining tawhana nagbuhat ug daghang ilhanan? Kon pasagdan lang nato siya niining paagiha, silang tanan magbutang ug pagtuo kaniya, ug ang mga Romano manganhi ug kuhaon ang atong dapit ug ang atong nasod.’” Ilang solusyon? “Sukad niadtong adlawa sila nagsabot sa pagpatay kaniya.” Gawas sa pagsabotsabot sa pagpatay kang Jesus, sila nagplano sa paglaglag sa buhing ebidensiya sa iyang pagkamaghihimog milagro. “Ang pangulong mga saserdote karon nagsabot nga patyon usab si Lazaro.” (Juan 11:47, 48, 53; 12:9-11) Pagkangil-ad kon palamboon nato ang susamang tinamdan ug mapikal o maglagot mahitungod sa mga butang nga tungod niana angay nga magmaya kita! Oo, ug pagkakuyaw!

Pagsundog sa Positibong Tinamdan ni Kristo

17. (a) Ubos sa unsang mga kahimtang nga si Daniel nagpadayag ug dili-mahadlokon nga tinamdan? (b) Sa unsang paagi gipakita ni Jesus nga siya maisogon?

¹⁷ Ang mga alagad ni Jehova naghupot kanunay ug positibong tinamdan. Sa dihang ang mga kaaway ni Daniel nagkunsabo nga maaprobahan ang usa ka balaod nga nagdili sa pagpangaliyupo ngadto sa bisan unsang diyos o tawo gawas sa hari sulod sa 30 ka adlaw, si Daniel nahibalo nga kadto nagdaot sa iyang relasyon uban kang Jehova nga Diyos. Dili ba siya moampo sa Diyos sulod sa 30 ka adlaw? Dili, sa pagkadili-mahadlokon siya mipadayon sa pag-ampo kang Jehova tulo ka higayon sa usa ka adlaw, sumala sa iyang nabatasan. (Daniel 6:6-17) Si Jesus samang wala mahadlok sa iyang mga kaaway. Usa ka adlawng Igpapahulay, iyang nahibalag ang usa ka tawong may kuyos nga kamot. Nahibalo si Jesus nga daghang Hudiyo nga presente didto dili mahimuot kon may ayohon siya sa Igpapahulay. Deretso niyang gihangyo sila nga ipahayag ang ilang hunahuna bahin niana. Sa midumili sila, si Jesus mipadayon ug giayo ang tawo. (Marcos 3:1-6) Si Jesus wala gayod mosibog sa pagtuman sa iyang tinudlong buluhaton dihang gibati niya nga angay kadto.

18. Nganong ang pipila mosupak man kanato, apan unsay angay natong sanong sa ilang negatibong tinamdan?

¹⁸ Nasabtan sa mga Saksi ni Jehova karong adlawa nga sila usab kinahanglang dili gayod mahadlok sa posibleng negatibong reaksiyon sa mga magsusupak. Kon mahadlok sila, sila dili makapasundayag  sa tinamdan sa hunahuna ni Jesus. Daghan ang mosupak sa mga Saksi ni Jehova, nga ang pipila tungod kay wala silay tukmang kahibalo ug ang uban tungod kay giayran nila ang mga Saksi o ang ilang mensahe. Apan dili gayod nato itugot nga ang ilang dili-mahigalaong tinamdan mag-apektar sa atong positibong tinamdan. Dili gayod nato itugot nga ang uban maoy magdiktar sa paagi sa atong pagsimba.

19. Sa unsang paagi makapadayag kita sa tinamdan sa hunahuna nga sama sa kang Jesu-Kristo?

¹⁹ Si Jesus kanunayng nagpadayag ug positibong tinamdan sa hunahuna maylabot sa iyang mga sumusunod ug sa mga kahikayan sa Diyos, bisan pag unsa ka lisod ang paghimo niana. (Mateo 23:2, 3) Angay nga sundogon nato ang iyang panig-ingnan. Tinuod, ang atong mga igsoon dili hingpit, apan mao usab kita. Ug asa ba kita makakaplag ug maayong mga kauban ug maunongon gayod nga mga higala kon dili diha sa tibuok-kalibotang panag-igsoonay? Si Jehova wala pa maghatag kanatog kompletong pagsabot sa iyang sinulat nga Pulong, apan unsang relihiyosong pundok ang may labaw nga pagsabot? Huptan nato kanunay ang matarong nga tinamdan sa hunahuna, ang tinamdan sa hunahuna nga nabatonan ni Jesu-Kristo. Apil sa ubang mga butang, kini naglakip sa pagkaantigo nga mohulat kang Jehova, ingon nga hisgotan nato sa sunod artikulo.

[Footnote]

Makapatin-aw Ka Ba?

• Sa unsang paagi ang atong kinabuhi maapektahan sa atong tinamdan?

• Batbata ang tinamdan sa hunahuna ni Jesu-Kristo.

• Unsay makat-onan nato gikan sa tinamdan ni Job?

• Unsang husto nga tinamdan ang batonan atubangan sa pagsupak?

[Mga Pangutana sa Pagtuon]

[Mga hulagway sa panid 7]

Ang Kristohanon nga may hustong tinamdan magtinguha sa pagtabang sa uban

[Hulagway sa panid 9]

Ang mainampoon nga pagtuon sa Pulong sa Diyos motabang nato sa pagsagop sa tinamdan sa hunahuna ni Kristo