Ipakita ang Nagahulat nga Tinamdan!
Ipakita ang Nagahulat nga Tinamdan!
“Magpakita akog nagahulat nga tinamdan alang sa Diyos sa akong kaluwasan. Ang akong Diyos magpatalinghog kanako.”—MIQUEAS 7:7.
1, 2. (a) Sa unsang paagi ang sayop nga tinamdan nakadaot sa mga Israelinhon sa kamingawan? (b) Unsay mahimong mahitabo sa usa ka Kristohanon nga dili mag-ugmad sa hustong tinamdan?
DAGHANG butang sa kinabuhi ang mahimong pagaisipon sa positibo o sa negatibong paagi, nga depende sa atong tinamdan. Sa dihang ang mga Israelinhon didto sa kamingawan, gitagan-an silag mana sa milagrosong paagi. Angay untang ipaliraw ang ilang panan-aw sa umawng kayutaan ug magmapasalamaton kaayo kang Jehova tungod sa pagtagana sa ilang pagkaon. Ipaaninag niana ang usa ka positibong tinamdan. Sa kapulihay, gihinumdoman nila ang nagkadaiyang mga pagkaon sa Ehipto ug mireklamo nga walay lami ang mana. Pagkanegatibo nga tinamdan!—Numeros 11:4-6.
2 Ang tinamdan sa usa ka Kristohanon karong adlawa susamang makapadayag sa mga kahimtang ingon nga sadya kaha o mingaw. Kon wala ang hustong tinamdan, ang usa ka Kristohanon daling mawad-an sa iyang kalipay, ug kana mahimong seryoso tungod kay, sumala sa giingon ni Nehemias: “Ang kalipay ni Jehova mao ang inyong salipdanan.” (Nehemias 8:10) Ang positibo, mangayaong tinamdan motabang kanato sa pagpabiling malig-on ug mopalambo sa kalinaw ug panaghiusa sa kongregasyon.—Roma 15:13; Filipos 1:25.
3. Sa unsang paagi ang hustong tinamdan nakatabang kang Jeremias sulod sa lisod nga kapanahonan?
3 Bisan pag nagkinabuhi sa lisod nga kapanahonan, si Jeremias nagpasundayag ug positibong tinamdan. Bisan pag nasaksihan niya ang mga makalilisang nga hitabo sa pagkapukan sa Jerusalem sa 607 W.K.P., nakakita siyag positibong mga butang. Dili kalimtan ni Jehova ang Israel, ug makalahutay ang nasod. Si Jeremias misulat sa basahon sa Lamentaciones: “Maoy mga buhat sa mahigugmaong-kalulot ni Jehova nga kita wala malaglag, tungod kay ang iyang mga kaluoy dili gayod matapos. Sila bag-o sa matag buntag. Ang imong pagkamatinumanon dagaya.” (Lamentaciones 3:22, 23) Sa tibuok kasaysayan, ang mga alagad sa Diyos nagtinguha sa paghupot ug positibo, mangayaon pa nga tinamdan diha sa labing lisod nga mga kahimtang.—2 Corinto 7:4; 1 Tesalonica 1:6; Santiago 1:2.
4. Unsang tinamdan ang padayong nahuptan ni Jesus, ug sa unsang paagi nakatabang kadto kaniya?
4 Unom ka gatos ka tuig pagkatapos sa adlaw ni Jeremias, si Jesus natabangan sa pag-agwanta tungod sa iyang positibong tinamdan. Mabasa nato: “Tungod sa kangaya nga gibutang atubangan [ni Jesus] siya miagwanta ug sakitanang estaka, nagpakawalay-bili sa kaulaw, ug milingkod na sa tuong kamot sa trono sa Diyos.” (Hebreohanon 12:2) Sa bisan unsang pagsupak o paglutos nga giatubang ni Jesus—bisan ang hingaping kasakitan sa sakitanang estaka—gibutang niya sa iyang hunahuna ang “kangaya nga gibutang atubangan kaniya.” Ang maong kangaya mao ang pribilehiyo sa pagbayaw sa pagkasoberano ni Jehova ug pagbalaan sa iyang ngalan ingon man ang palaaboton nga ipatungha ang talagsaong mga panalangin alang sa masinugtanong katawhan sa umaabot.
Pagsagop sa Nagahulat nga Tinamdan
5. Unsa ang usa ka kasagarang kahimtang diin ang nagahulat nga tinamdan motabang kanato aron mahuptan ang hustong panghunahuna bahin sa mga butang?
5 Kon ugmaron nato ang tinamdan sa hunahuna nga sama sa kang Jesus, dili kita mawad-an sa kalipay ni Jehova bisan pag dili kanunayng mahitabo ang mga butang sumala ug sa panahong atong gidahom. Ang manalagnang si Miqueas miingon: “Apan bahin kanako, ako magalantaw kang Jehova. Magpakita akog nagahulat nga tinamdan alang sa Diyos sa akong kaluwasan.” (Miqueas 7:7; Lamentaciones 3:21) Kita usab makapakitag nagahulat nga tinamdan. Sa unsang paagi? Sa daghang paagi. Sa usa ka bahin, mahimong mobati kita nga ang usa ka igsoong may awtoridad milihok nga sayop ug kinahanglang tul-iron dihadiha. Ang nagahulat nga tinamdan magpahinabo nga kita mamalandong, ‘Tinuod ba nga siya nasayop, o ako ang nasayop? Kon siya nasayop, mahimo kahang gitugot ni Jehova nga mahitabo ang maong mga panghitabo tungod kay gibati niyang magbag-o ang maong indibiduwal ug nga ang grabeng mga lakang sa pagtul-id dili na kinahanglan?’
6. Sa unsang paagi ang nagahulat nga tinamdan motabang sa usa nga nagapakigbisog sa usa ka personal nga suliran?
6 Ang nagahulat nga tinamdan mahimong gikinahanglan kon kita gisamok sa usa ka personal nga problema o nagapanlimbasog bahin sa usa ka kahuyangan. Pananglitan kon nangayo na kita sa tabang ni Jehova, apan ang problema nagpadayon. Nan unsa man? Kinahanglang ipadayon nato ang pagbuhat sa atong maarangan aron masulbad ang suliran ug unya magpakitag pagtuo sa mga pulong ni Jesus: “Magpadayon sa pagpangayo, ug kini igahatag kaninyo; magpadayon sa pagpangita, ug kamo makakaplag; magpadayon sa pagpanuktok, ug kini pagabuksan kaninyo.” (Lucas 11:9) Magpadayon sa pag-ampo, ug maghulat kang Jehova. Sa nahiangayng panahon ug sa iyang kaugalingong paagi, tubagon ni Jehova ang imong mga pag-ampo.—1 Tesalonica 5:17.
7. Sa unsang paagi ang nagahulat nga tinamdan motabang sa atong panghunahuna bahin sa mauswagong tukmang pagsabot sa Bibliya?
7 Samtang nagakatuman ang mga tagna sa Bibliya, ang atong pagsabot sa Kasulatan nahimong matin-aw. Ugaling, mahimong maghunahuna kita usahay nga nalangan ang usa ka katin-awan. Kon dili kini moabot sa panahong atong gusto, andam ba kitang mohulat? Hinumdomi, giisip ni Jehova nga angayng ibutyag “ang sagradong tinago sa Kristo” nga tinagdiyutay sa usa ka panahon ug latas sa yugto sa mga 4,000 ka tuig. (Efeso 3:3-6) Nan, aduna ba kitay katarongan nga dili makapailob? Nagduhaduha ba kita nga ang usa ka ‘matinumanon ug maalamong ulipon’ natudlo aron sa paghatag sa katawhan ni Jehova sa “ilang pagkaon sa hustong panahon”? (Mateo 24:45) Nganong hikawan nato ang atong kaugalingon sa diyosnong kalipay tungod kay dili ang tanang butang bug-os nga hisabtan? Hinumdomi, si Jehova maoy magahukom kon kanus-a ug kon sa unsang paagi ipadayag ang iyang ‘tinagoang mga butang.’—Amos 3:7.
8. Sa unsang paagi ang pailob ni Jehova napamatud-ang makaayo sa daghan?
8 Ang pipila tingali maluya tungod kay gibati nila nga pagkatapos sa daghang katuigan sa matinumanong pag-alagad, basin dili na sila buhi aron makakita sa “dako ug makalilisang nga adlaw ni Jehova.” (Joel 2:30, 31) Bisan pa niana, sila mahimong madasig kon motan-aw sila sa positibong bahin. Si Pedro mitambag: “Isipa ang pailob sa atong Ginoo ingong kaluwasan.” (2 Pedro 3:15) Ang pailob ni Jehova nakapaposible nga milyonmilyon pang tawong matarong ug kasingkasing nakakat-on sa kamatuoran. Dili ba kahibulongan kana? Dugang pa, kon si Jehova magpasundayag ug pailob sa mas taas nga panahon, mas dako ang atong panahon nga ‘magpadayon sa pagpanlimbasog sa [atong] kaugalingong kaluwasan uban ang kahadlok ug pagpangurog.’—Filipos 2:12; 2 Pedro 3:11, 12.
9. Kon kita limitado sa atong mahimo diha sa buluhaton ni Jehova, sa unsang paagi ang nagahulat nga tinamdan motabang kanato sa pag-agwanta sa kahimtang?
9 Ang nagahulat nga tinamdan moabag kanato nga dili maluya sa dihang ang pagsupak, sakit, pagkatigulang, o ubang mga suliran mobabag kanato sa buluhaton sa Gingharian. Ginadahom ni Jehova nga alagaron nato siya sa bug-os nga kasingkasing. (Roma 12:1) Bisan pa niana, ang Anak sa Diyos, kinsa ‘maluoy sa timawa ug sa kabos,’ dili mangayo ug labaw kay sa atong makataronganong ikahatag; mao man usab si Jehova. (Salmo 72:13) Busa, ginadasig kita sa pagbuhat kon unsay atong maarangan, nga mapailobong maghulat hangtod nga mausob ang mga kahimtang—mahimong niining sistema sa mga butang o nianang umaabot. Hinumdomi: “Ang Diyos dili usang dili-matarong nga kalimtan ang inyong buhat ug ang gugma nga inyong gipakita alang sa iyang ngalan, sa pagkaagi nga kamo nakaalagad sa mga balaan ug padayong nagaalagad.”—Hebreohanon 6:10.
10. Unsang dili-diyosnong kinaiya ang malikayan sa usa nga may nagahulat nga tinamdan? Ipatin-aw.
10 Ang nagahulat nga tinamdan moabag usab kanato sa paglikay sa pagkamapangahason. Ang pipila nga nahimong apostata dili gustong mohulat. Mahimong gibati nila nga gikinahanglan ang mga pagpasibo, sa pagsabot kaha sa Bibliya o sa organisasyonal nga mga butang. Bisan pa niana, napakyas sila sa pag-ila nga ang espiritu ni Jehova magatukmod sa matinumanon ug maalamong ulipon aron sa paghimog mga pagpasibo sa Iyang gitakdang panahon, dili sa panahong gibati tingali nato nga gikinahanglan kini. Ug ang bisan unsang mga pagpasibo kinahanglang mahiuyon sa kabubut-on ni Jehova, dili sa personal natong mga ideya. Gitugotan sa mga apostata nga ang mapangahasong tinamdan magdaot sa ilang panghunahuna ug makapandol kanila. Apan kon gisagop pa nila ang tinamdan sa hunahuna ni Kristo, nahuptan unta nilang malig-on ang ilang kalipay ug nakapabilin taliwala sa katawhan ni Jehova.—Filipos 2:5-8.
11. Sa unsang paagi magamit natong mapuslanon ang panahong gigugol sa paghulat, nga magasunod sa kang kansang mga panig-ingnan?
11 Siyempre, ang padayong paghupot sa nagahulat nga tinamdan wala magpasabot sa pagkatapolan o pagkawalay-gibuhat. Kita adunay mga buluhaton nga pagabuhaton. Pananglitan, kinahanglang magmapuliki kita sa personal nga pagtuon sa Bibliya ug sa ingon magpakita sa samang dulot nga interes sa espirituwal nga mga butang nga gipakita sa matinumanong mga manalagna ug bisan sa mga manulonda. Sa paghisgot sa maong interes, si Pedro nag-ingon: ‘Mahitungod niini mismo nga kaluwasan ang makugihong pagpakisayod ug mainampingong pagtuki gihimo sa mga manalagna . . . Niini mismong mga butanga ang mga manulonda nangandoy sa pagsud-ong.’ (1 Pedro 1:10-12) Dili lamang personal nga pagtuon ang gikinahanglan kondili mao usab ang regular nga pagtambong sa tigom ug ang pag-ampo. (Santiago 4:8) Kadtong magpakitag kaamgohan bahin sa ilang espirituwal nga panginahanglan pinaagi sa regular nga pagkaon ug espirituwal nga pagkaon ug pagpakig-uban sa isigka-Kristohanon magpasundayag nga sila nagsagop sa tinamdan sa hunahuna ni Kristo.—Mateo 5:3.
Magbaton ug Realistikong Hunahuna
12. (a) Unsang independensiya ang gitinguha ni Adan ug Eva? (b) Unsay sangpotanan sa pagsunod sa katawhan sa dalan ni Adan ug Eva?
12 Sa gilalang sa Diyos ang unang tawhanong magtiayon, gigahin niya sa iyang kaugalingon ang katungod sa paghimo sa mga sukdanan sa matarong ug daotan. (Genesis 2:16, 17) Gusto ni Adan ug Eva ang independensiya gikan sa paggiya sa Diyos, ug miresulta kini sa kalibotan nga atong makita alirong nato karong adlawa. Si apostol Pablo miingon: “Pinaagi sa usa ka tawo ang sala misulod sa kalibotan ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala.” (Roma 5:12) Ang unom ka libo ka tuig nga kasaysayan sa tawo sukad sa panahon ni Adan nagpasundayag sa kamatuoran sa mga pulong ni Jeremias: “Ako nahibalo pag-ayo, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Ang pag-ila nga ang mga pulong ni Jeremias maoy tinuod dili kay pagdawat sa kapildihan. Kini realistiko. Mohatag kinig katin-awan nianang tanang dugayng kasiglohan nga “ang tawo nagmando sa tawo sa iyang kadaotan” tungod kay ang mga tawo nagamando nga bulag sa Diyos.—Ecclesiastes 8:9.
13. Unsang realistikong hunahuna ang nabatonan sa mga Saksi ni Jehova bahin sa butang nga mahimo sa mga tawo?
13 Tungod sa kahimtang sa katawhan, ang mga Saksi ni Jehova nakaamgo nga adunay mga limitasyon sa butang makab-ot niining presenteng sistema sa mga butang. Ang positibong tinamdan makatabang sa pagpatunhay sa atong kalipay, apan dili kini ang kasulbaran sa tanang butang. Sa sinugdanan sa katuigang 1950, ang usa ka Amerikanong klerigo nagpatik sa usa ka himalitan-kaayong basahon nga nag-ulohang The Power of Positive Thinking. Ang basahon nagsugyot nga mahimong mabuntog ang kadaghanang kababagan kon himoon ang pasiunang lakang uban ang positibong tinamdan. Tinong dalayegon ang positibong panghunahuna. Apan ginapakita sa kasinatian nga ang kahibalo, kahanas, materyal nga kahinguhaan, ug daghan pang ubang mga hinungdan makalimite kon unsay mahimo nato ingong mga indibiduwal. Ug sa tibuok-kalibotang gidak-on, ang mga suliran maoy labihan ka dagko aron masulbad nga malamposon sa mga tawo—bisan unsa pa ka positibo ang ilang panghunahuna!
14. May negatibo bang tinamdan ang mga Saksi ni Jehova? Ipatin-aw.
14 Tungod sa ilang realistikong hunahuna bahin sa maong mga butang, ang mga Saksi ni Jehova usahay iakusar nga may negatibong tinamdan. Sa kapulihay, sila maikagong mosulti sa mga tawo mahitungod sa bugtong Usa nga makapabag-o nga malungtaron sa kahimtang sa katawhan. Niini usab ginasundog nila ang tinamdan sa hunahuna ni Kristo. (Roma 15:2) Ug sila puliki sa pagtabang sa mga tawo aron makabaton ug maayong relasyon uban sa Diyos. Sila nahibalo nga sa kadugayan, kini makapahinabo sa labawng kaayohan.—Mateo 28:19, 20; 1 Timoteo 4:16.
15. Sa unsang paagi ang buluhaton sa mga Saksi ni Jehova makapabag-o sa mga indibiduwal?
15 Ang mga Saksi ni Jehova dili kay walay pagtagad sa mga suliran sa katilingban—ilabina ang dili-kasulatanhong hugawng mga bisyo—alirong nila. Una pa mahimong Saksi ni Jehova ang usa ka tawong interesado, himoon niya ang mga kausaban, nga kadaghanan magabuntog sa mga bisyong makapagiyan nga dili kahimut-anan sa Diyos. (1 Corinto 6:9-11) Busa ang mga Saksi ni Jehova nagtabang sa masanongong mga tawo sa pagbuntog sa paghuboghubog, pagkagiyan sa droga, imoralidad, ug pagkagumon sa sugal. Ang maong nagbag-o nang mga indibiduwal nakakat-on sa pagsuportar sa ilang mga pamilya sa kasaligan ug maminatud-ong paagi. (1 Timoteo 5:8) Sa dihang ang mga indibiduwal ug mga pamilya matabangan niining paagiha, makunhoran ang mga suliran sa komunidad—adunay diyutayng mga giyanon sa droga, diyutay rang mga kaso sa kapintasan sa pamilya, ug uban pa. Pinaagi sa pagkahimong masinundanon-sa-balaod nga mga lungsoranon mismo ug pinaagi sa pagtabang sa uban nga magbag-o sa ilang kinabuhi sa pagkahimong mas maayo, ang mga Saksi ni Jehova makapagaan sa trabaho sa mga ahensiya kansang trabaho mao ang pagsulbad sa mga suliran sa katilingban.
16. Nganong ang mga Saksi ni Jehova dili mag-apil-apil sa sekular nga mga kalihokan sa pagreporma?
16 Busa, ginabag-o ba sa mga Saksi ni Jehova ang moral nga kahimtang sa kalibotan? Buweno, sa miaging dekada, ang gidaghanon sa aktibong mga Saksi miuswag gikan sa menos ug diyutay sa 3,800,000 ngadto sa hapit 6,000,000. Kana maoy pag-uswag nga duolag 2,200,000, nga kadaghanan kanila mibiya sa dili-matarong nga mga bisyo sa dihang sila nahimong mga Kristohanon. Nabag-o ang daghang kinabuhi! Sa gihapon, kining numeroha gamay kaayo kon itandi sa pag-uswag sa populasyon sa kalibotan sulod sa samang yugto—875,000,000! Nasayran sa mga Saksi ni Jehova nga usa ka tinubdan sa kalipay ang pagtabang sa mosanong nga mga indibiduwal, bisan pag nakaamgo nga diyutay ra nga mga tawo ang mosubay sa dalan paingon sa kinabuhi. (Mateo 7:13, 14) Samtang ang mga Saksi nagpaabot sa tibuok-kalibotang mga kausaban alang sa maayo pang kahimtang nga Diyos lamay makahimo, sila dili mag-apil-apil sa sekular nga mga kalihokan sa pagreporma, nga kasagarang mosugod uban ang maayong mga katuyoan apan mosangpot sa kalugda ug bisan sa kapintasan.—2 Pedro 3:13.
17. Unsay gihimo ni Jesus sa pagtabang niadtong alirong kaniya, apan unsay wala niya buhata?
17 Sa paghimo niini, ang mga Saksi ni Jehova nagpasundayag sa samang pagsalig diha kang Jehova sama sa gihimo ni Jesus samtang dinhi sa yuta. Sa unang siglo, si Jesus mihimog mga milagro sa pagpang-ayo. (Lucas 6:17-19) Iya ganing gibanhaw ang patay. (Lucas 7:11-15; 8:49-56) Apan wala niya wagtanga ang suliran sa sakit o buntoga ang kaawayng kamatayon. Nasayod siya nga kadto dili pa mao ang gitakdang panahon sa Diyos sa pagbuhat niini. Tungod sa labawng mga katakos sa usa ka hingpit nga tawo, lagmit si Jesus dakog mahimo sa pagsulbad sa mga suliran sa politika ug sa katilingban. Mopadayag nga ang pipila sa iyang mga katalirongan buot nga magbaton siyag gahom ug molihok niining paagiha, apan mibalibad si Jesus. Mabasa nato: “Sa dihang nakita sa mga tawo ang mga ilhanan nga iyang gihimo, sila miingon: ‘Kini siya mao gayod ang manalagna nga moanhi sa kalibotan.’ Busa si Jesus, nga nahibalong sila moduol na ug mosakmit kaniya aron himoon siyang hari, mipahawa pag-usab paingon sa bukid nga nag-inusara.”—Juan 6:14, 15.
18. (a) Sa unsang paagi si Jesus sa kanunay nagpakitag nagahulat nga tinamdan? (b) Sa unsang paagi ang kalihokan ni Jesus nabag-o sukad sa 1914?
18 Si Jesus midumili nga malangkit sa politika o sa lunlon nga katilingbanong buluhaton tungod kay nasayod siya nga wala pa moabot ang panahong magbaton siyag harianong gahom ug maghimog mga buhat sa pagpang-ayo alang sa tanan sa bisan diin. Bisan human sa iyang pagkayab ngadto sa dili-mamatay nga espiritung kinabuhi sa kalangitan, siya andam nga mohulat sa tinudlong panahon ni Jehova sa dili pa molihok. (Salmo 110:1; Buhat 2:34, 35) Bisan pa niana, sukad sa iyang pagkaentrono ingon nga Hari sa Gingharian sa Diyos sa 1914, siya nagalihok nga “nagpangdaog ug sa pagbug-os sa iyang pagpangdaog.” (Pinadayag 6:2; 12:10) Pagkamapasalamaton nato sa pagpasakop sa iyang pagkahari, samtang ang uban nga nag-angkong mga Kristohanon nagpili nga magpabiling walay-alamag bahin sa mga pagtulon-an sa Bibliya mahitungod sa Gingharian!
Paghulat—Tinubdan sa Kahigawad o sa Kalipay?
19. Kanus-a ba nga ang paghulat ‘makapasakit sa kasingkasing,’ ug kanus-a kini maoy tinubdan sa kalipay?
19 Si Solomon nasayod nga ang paghulat mahimong makapahigawad. Misulat siya: “Ang pagdahom nga maoktaba makapasakit sa kasingkasing.” (Proverbio 13:12) Sa pagkatinuod, kon ang usa ka tawo nagahambin ug way-pasikaranang mga pagdahom, ang kasingkasing masakit tungod sa kahiubos. Hinunoa, ang paghulat sa malipayong mga hitabo—tingali usa ka kasal, pagkatawo sa usa ka anak, o reunyon uban sa mga tawong atong gimahal—mahimong maghupong kanato sa mahinamong kalipay dugay na una pa sa adlaw sa katumanan. Mosamot ang maong kalipay kon gamiton natong maalamon ang panahon sa paghulat, nga maghimog mga pangandam alang sa umaabot nga hitabo.
20. (a) Unsang kahibulongang mga hitabo ang masaligong gidahom nato nga makita? (b) Sa unsang paagi makakaplag kitag kalipay samtang nagahulat nga mamatuman ang mga katuyoan ni Jehova?
20 Kon kita adunay bug-os nga pagsalig nga matuman ang atong mga pagdahom—bisan pag wala kita mahibalo kon kanus-a kana matuman—ang yugto sa paghulat dili ‘makapasakit sa kasingkasing.’ Ang matinumanong mga magsisimba sa Diyos nahibalo nga ang Milenyong Paghari ni Kristo haduol na. Sila masaligon nga makakita sila sa pagkahanaw sa kamatayon ug sakit. Uban ang maikagong pagdahom sila malipayong maghulat sa panahon nga pagadawaton na usab nila ang binilyon gikan sa mga patay, lakip ang ilang namatayng mga minahal. (Pinadayag 20:1-3, 6; 21:3, 4) Niining kapanahonan sa krisis sa ekolohiya, naghinamhinam sila sa tinong palaaboton sa pagtan-aw nga ang Paraiso magalungtad sa yuta. (Isaias 35:1, 2, 7) Nan, pagkamaalamon ang paggamit nga maalamon sa panahon sa paghulat, “nga kanunay may daghang buhaton diha sa buluhaton sa Ginoo”! (1 Corinto 15:58) Magpadayon sa pagkaon sa espirituwal nga pagkaon. Ugmara ang labi pang suod nga relasyon uban kang Jehova. Pangitaa ang uban kansang mga kasingkasing nagtukmod kanila sa pag-alagad kang Jehova. Dasiga ang isigkamagtutuo. Pahimusli sa bug-os ang bisan unsang panahon nga itugot pa ni Jehova. Unya, ang paghulat kang Jehova dili gayod ‘makapasakit sa imong kasingkasing.’ Sa kapulihay, kini maghupong kanimo sa kalipay!
Makapatin-aw Ka Ba?
• Giunsa pagpakita ni Jesus ang nagahulat nga tinamdan?
• Sa unsang mga kahimtang nga gikinahanglan sa mga Kristohanon ang nagahulat nga tinamdan?
• Nganong ang mga Saksi ni Jehova kontento nga maghulat kang Jehova?
• Sa unsang paagi ang paghulat kang Jehova mahimong tinubdan sa kalipay?
[Mga Pangutana sa Pagtuon]
[Mga hulagway sa panid 12]
Si Jesus nag-agwanta tungod sa kalipay nga gibutang sa iyang atubangan
[Hulagway sa panid 13]
Bisan human sa katuigan nga pag-alagad, mahuptan natong padayon ang atong kalipay
[Mga hulagway sa panid 15]
Nabag-o ang kinabuhi sa minilyon tungod sa pagkahimong mga Saksi ni Jehova