‘Maghisgot Sila Bahin sa Pagkamaayo ug Gugma’

SA KATUIGANG bag-o pa, ang mga Saksi ni Jehova sa Pransiya nahimong tumong sa kusog nga kampanya sa pagpangdaot. Gigamit sa ilang mga magsusupak ang mga pamulong nga dili bug-os tinuod ug sayop nga impormasyon aron sa pagdaot kanila sa atubangan sa kadaghanan. Sa sinugdanan sa 1999, ang mga Saksi ni Jehova sa tibuok Pransiya nanagtag ug 12 ka milyong kopya sa usa ka tract nga nag-ulohang Katawhan sa Pransiya, Kamo Ginalimbongan! Sa maong tract, ilang gipahayag nga sayop ang makapakaulaw nga mga pulong nga gipahayag batok kanila.

Pipila ka adlaw human sa kampanya, si G. Jean Bonhomme, usa ka medikal nga doktor ug kanhi membro sa Parliamento, nagpadalag usa ka mabasa-sa-tanan nga sulat ngadto sa usa ka lokal nga mantalaan. Misulat siya: “Matag karon ug unya, ang mga Saksi ni Jehova moanha sa akong balay. Moanha sila aron makighisgot kanako bahin sa pagkamaayo ug tibuok-kalibotan nga gugma. . . . Dili sila mopugos sa pagsulod. Mopahayag sila sa ilang kaugalingon sa malumong paagi ug mamating maluloton sa akong pagkamaduhaduhaon.”

Sa paghisgot bahin sa espirituwal nga panghunahuna sa mga Saksi ni Jehova, si G. Bonhomme nag-ingon: “Ang pagkadili-kalibotanon, sa ilang kahimtang, dili gayod makahimog bisan unsang kadaot. Sa laing bahin, ang pagkawalay-alamag sa pipila ka politiko labi pang usa ka hulga sa kalinaw sa mga lungsoranon ug sa harmonya sa katilingban.”