Mga Magmamantala sa Gingharian Nagtaho

Pagbisibis sa mga Binhi sa Kamatuoran sa Chile

SA DESYERTO sa amihanang Chile, dangtan tingalig mga tuig una moulan. Apan inig-abot niini, ang nauga, nakatagan-ug-bato nga yuta mabalhin ngadto sa samag alpombra nga kabulakan sa nagkalidadis nga mga kolor. Kining talagsaong pasundayag modanig mga turista gikan sa tibuok nasod.

Bisan pa niana, ang usa ka labing makapaikag nga panghitabo nagakahitabo taliwala sa katawhan sa Chile. Ang mga tubig sa kamatuoran sa Bibliya nagaagos ngadto sa matag suok sa nasod, ug daghang sinserong katawhan “nagabuswak” sa pagkahimong mga tinun-an ni Jesu-Kristo. Usa ka paagi nga gigamit sa pagsabwag niining mga tubig sa kamatuoran mao ang telepono. Ang mosunod nga mga kasinatian mag-ilustrar sa maayong mga resulta nga nakab-ot sa maong metodo sa pagsangyaw.

• Usa ka bug-os-panahong tig-ebanghelyo nga ginganlag Karina gipapasundayag panahon sa programa sa usa ka sirkitong asembliya kon unsaon pagsangyaw pinaagig telepono. Bisan pa niana, si Karina wala pa gayod makahimo nianang bahina sa buluhatong pagsangyaw. Aron sa pagdasig kaniya nga mosalmot sa programa sa asembliya, ang usa ka ansiyano uban sa iyang asawa naghisgot uban kang Karina sa pipila ka punto kon unsaon pagsangyaw pinaagig telepono. Giawhag usab nila siya sa pag-ampo sa pagtultol ni Jehova bahin niana. Gihimo niya kana ug sa kataposan mihukom sa pagsulay sa pagtelepono.

Gipili ni Karina ang usa ka numero sa telepono sa usa ka kanait nga balangay. Mitubag ang usa ka operitor sa telepono, ug gipatin-aw ni Karina ang katuyoan sa pagtelepono. Maayo ang sanong sa operitor ug gihimo ang kahikayan sa pagpakigsulti kaniya pag-usab human sa tulo ka adlaw. Ang balikduaw pinaagig telepono misangpot sa usa ka pagtuon sa Bibliya, nga gigamit ang brosyur nga Unsay Gikinahanglan sa Diyos Kanato? Sukad niadto, napahimuslan nila ang makaiikag ug bibo nga mga pagtuon, ug si Karina nagpadalag mga basahon aron sa pagtubag sa mga pangutana sa babaye.

• Si Bernarda nangarisgar sa pagsangyaw ngadto sa usa ka lalaki nga nasayop pagdayal sa numero sa iyang telepono. Inay ipaila ang pagkapikal, gipailaila ni Bernarda nga siya usa sa mga Saksi ni Jehova ug mitanyag sa pagtabang. Misangpot ang usa ka panagkabildo, ug ang lalaki namati kaniya samtang iyang gipatin-aw kon sa unsang paagi ang Gingharian sa Diyos hapit nang magwagtang sa inhustisya. Gihatag sa lalaki ang iyang numero sa telepono kang Bernarda, ug gihimo niya ang mga balikduaw pinaagig telepono. Panahon sa usa sa ilang mga panagkabildo, iyang gibasa kaniya ang usa ka bahin sa basahong Kahibalo nga Motultol sa Kinabuhing Walay Kataposan. Nangutana siya kon unsaon niya pagkabaton ug kopya, ug gipadad-an siya ni Bernarda ug usa ka kopya uban sa usa ka Bibliya. Ang mga kahikayan gihimo aron maduaw siya sa usa ka lokal nga igsoong lalaki, nga karon maoy nagapadayon sa “pagbisibis” niining malamboong “tanom.”

Oo, sa uga nga espirituwal nga yuta niining kalibotana, ang nalubong nga mga binhi nagapaabot nga moturok sa dihang maabot sa nagahatag-kinabuhing mga tubig sa kamatuoran. Linibong giuhaw nagpadayon sa “paggitib” ug “pagbuswak” ngadto sa pagkahimong matinumanong mga alagad ni Jehova nga Diyos.—Isaias 44:3, 4.