“Ang Takna Miabot Na!”

“Ang iyang takna miabot na aron siya mobiya gikan niining kalibotana paingon sa Amahan.”—JUAN 13:1.

1. Sa nagkaduol na ang Paskuwa sa 33 K.P., ang Jerusalem nagkisaw sa unsang mga pangagpas, ug ngano?

 SA PAGBAWTISMO kaniya sa 29 K.P., gisugdan ni Jesus ang buluhaton nga motultol ngadto sa “takna” sa iyang kamatayon, pagkabanhaw, ug kahimayaan. Tingpamulak na niadtong tungora sa 33 K.P. Pipila pa lang ka semana ang milabay sukad nga ang Hudiyohanong hataas nga hukmanan, ang Sanhedrin, nagsabot sa pagpatay kang Jesus. Kay nahibalo sa ilang plano, tingali gikan kang Nicodemo nga usa ka membro sa Sanhedrin nga nagmahigalaon kaniya, nakagikan na si Jesus sa Jerusalem ug miadto sa kabanikanhan tabok sa Suba sa Jordan. Sa nagkaduol na ang Pista sa Paskuwa, daghang tawo nga gikan sa banika nangadto sa Jerusalem, ug ang siyudad nakisaw sa mga pangagpas bahin kang Jesus. “Unsay inyong opinyon?” nangutana ang mga tawo sa usag usa. ‘Nga dili gayod siya moanhi sa pista?’ Ang hataas nga mga saserdote ug mga Pariseo nakadugang sa kagubot pinaagi sa pagpakanaog ug sugo nga kinahanglang ipahibalo ngadto kanila si bisan kinsa nga makakita kang Jesus kon hain siya.—Juan 11:47-57.

2. Unsay gihimo ni Maria nga nakapukaw ug panaglalis, ug ang tubag ni Jesus sa pagdepensa kaniya nagpaila ug unsa bahin sa iyang pagkasayod mahitungod sa “iyang takna”?

 ² Sa Nisan 8, unom ka adlaw una pa sa Paskuwa, si Jesus mibalik sa kasikbitan sa Jerusalem. Siya miabot sa Betania—ang lungsod sa iyang minahal nga mga higalang si Marta, Maria, ug Lazaro—usa ka dapit nga nahimutang mga tulo ka kilometros gawas sa Jerusalem. Biyernes sa gabii kadto, ug didto nagpalabay si Jesus sa Igpapahulay. Sa pagkasunod gabii sa dihang gialagaran siya ni Maria ginamit ang mahal nga humot nga lana, ang mga tinun-an mitutol. Si Jesus mitubag: ‘Pasagdi siya, aron iyang mabuhat kining nabatasan alang sa adlaw sa paglubong kanako. Kay ang mga kabos kanunayng kauban ninyo, apan ako dili kanunayng makauban ninyo.’ (Juan 12:1-8; Mateo 26:6-13) Si Jesus nahibalo nga ‘ang iyang takna miabot na aron siya mobiya niining kalibotana ug moadto sa Amahan.’ (Juan 13:1) Lima na lang ka adlaw ug iyang ‘ihatag ang iyang kalag nga usa ka lukat baylo sa daghan.’ (Marcos 10:45) Gikan karon, ang pagkadinalian sa panahon nakaapektar sa tanan nga gihimo ug gitudlo ni Jesus. Pagkamaayong panig-ingnan ang nahatag niini alang kanato samtang kita mahinamong naghulat sa kataposan niini nga sistema sa mga butang! Palandonga kon unsay nahitabo sa kahimtang ni Jesus sa pagkasunod gayod nga adlaw.

Ang Adlaw sa Madaogong Pagsulod ni Jesus

3. (a) Sa unsang paagi misulod si Jesus sa Jerusalem sa Dominggo, Nisan 9, ug unsay reaksiyon sa kadaghanang tawo nga nag-alirong kaniya? (b) Unsay gitubag ni Jesus sa mga Pariseo nga nagreklamo bahin sa mga tawo?

³ Sa Dominggo, Nisan 9, si Jesus madaogong miabot sa Jerusalem. Samtang nagkaduol siya sa siyudad—nagsakay sa nating asno agig katumanan sa Zacarias 9:9—ang kadaghanan sa mga tawo nga nag-alirong kaniya nagbuklad sa ilang panggawas nga mga besti diha sa dalan, samtang ang uban namutol ug mga sanga sa kahoy ug gibuklad kini. ‘Bulahan ang Usa nga nagaanhi ingon nga Hari sa ngalan ni Jehova!’ sila naninggit. Buot sa pipila ka Pariseo taliwala sa panon sa mga tawo nga badlongon ni Jesus ang iyang mga tinun-an. Apan, si Jesus mitubag: ‘Ako magsulti kaninyo, Kon kini sila pabiling maghilom, ang mga bato maoy managpaninggit.’—Lucas 19:38-40; Mateo 21:6-9.

4. Nganong naukay ang Jerusalem sa dihang misulod si Jesus sa siyudad?

⁴ Sa pipila pa lang ka semanang milabay, daghang tawo ang nakakita kang Jesus nga nagbanhaw kang Lazaro. Karon kining mga tawhana nagpadayon sa pagsulti ngadto sa uban bahin sa maong milagro. Busa sa dihang misulod si Jesus sa Jerusalem, ang tibuok siyudad naukay. “Kinsa ba kini?” nangutana ang mga tawo. Ug ang mga tawo nagpadayon sa pag-ingon: ‘Mao kini ang manalagna nga si Jesus, nga taga-Nasaret sa Galilea!’ Sa pagkakita sa nahitabo, ang mga Pariseo nagmulo: “Ang kalibotan nagasunod na kaniya.”—Mateo 21:10, 11; Juan 12:17-19.

5. Unsay nahitabo sa dihang miadto si Jesus sa templo?

⁵ Sama sa iyang nabatasan sa dihang moduaw sa Jerusalem, si Jesus, ang Dakong Magtutudlo, miadto sa templo aron manudlo. Didto ang mga buta ug mga bakol miduol kaniya, ug iyang giayo sila. Sa dihang nakita kini sa pangulong mga saserdote ug mga eskriba ug ilang nadungog ang mga batang lalaki sa templo nga naninggit, “Luwasa, kami nagaampo, ang Anak ni David!” sila naglagot. “Imo bang nadungog ang ginaingon nila?” sila miprotesta. “Oo,” mitubag si Jesus. “Wala ba gayod ninyo mabasahi kini, ‘Gikan sa baba sa mga bata ug mga masuso ikaw nagtagana ug pagdayeg’?” Samtang  nagpadayon si Jesus sa pagpanudlo, gipanid-an niya pag-ayo ang nagakahitabo diha sa templo.—Mateo 21:15, 16; Marcos 11:11.

6. Sa unsang paagi lahi na karon ang paagi ni Jesus gikan niadtong sa miagi, ug ngano?

⁶ Pagkalahi na sa paagi karon ni Jesus gikan niadtong unom ka bulan sa miagi! Sa miagi siya miadto sa Jerusalem alang sa Pista sa mga Balongbalong “dili sa dayag apan sa tago.” (Juan 7:10) Ug siya mangita kanunay ug paagi nga makaikyas sa dihang mameligro ang iyang kinabuhi. Karon siya dayag nga misulod sa siyudad diin gipakanaog na ang sugo sa pagdakop kaniya! Dili usab batasan ni Jesus ang pagbandilyo sa iyang kaugalingon ingon nga mao ang Mesiyas. (Isaias 42:2; Marcos 1:40-44) Dili siya buot ug saba nga pagbandilyo o tinuis nga mga taho bahin kaniya nga ipasa gikan sa lainlaing mga baba. Karon ang mga tawo dayag nga nanagsulti nga siya ang Hari ug Manluluwas—ang Mesiyas—ug wala niya tagda ang hangyo sa relihiyosong mga pangulo sa pagpahilom kanila! Unsay katarongan niini nga kausaban? Tungod kay “ang takna miabot na aron ang Anak sa tawo pagahimayaon,” nga gipamulong ni Jesus sa pagkasunod gayod nga adlaw.—Juan 12:23.

Maisogong Lihok—Dayon Makaluwas ug Kinabuhi nga mga Pagtulon-an

7, 8. Sa unsang paagi ang gihimo ni Jesus sa Nisan 10, 33 K.P., nagpabanaag sa iyang gihimo diha sa templo sa Paskuwa sa 30 K.P.?

⁷ Sa pag-abot diha sa templo sa Lunes, Nisan 10, si Jesus may gihimo labot nianang iyang nakita sa miaging hapon. Nagsugod siya sa ‘pag-abog niadtong nagbaligya ug namalit diha sa templo, ug gipanglintuwad niya ang mga lamesa sa mga tig-ilis ug salapi ug ang mga lingkoranan niadtong nagbaligyag mga salampati; ug wala siyay gitugotan nga dunay magdalag galamiton agi sa templo.’ Gisaway ang mga mamumuhat ug daotan, siya miingon: “Dili ba nahisulat man kini, ‘Ang akong balay tawgon nga balay ampoanan alang sa tanang kanasoran’? Apan gihimo ninyo kining langob sa mga tulisan.”—Marcos 11:15-17.

⁸ Ang gihimo ni Jesus nagpabanaag sa iyang gihimo tulo ka tuig sa miagi sa dihang miadto siya sa templo sa Paskuwa sa 30 K.P. Apan, ang pagsaway mas halang niining higayona. Ang mga magpapatigayon sa templo gitawag niining higayona ug “mga tulisan.” (Lucas 19:45, 46; Juan 2:13-16) Sila mga tulisan tungod kay taas kaayong kantidad ang ilang gipangayo niadtong kinahanglang mamalit ug mga hayop alang sa halad. Ang pangulong mga saserdote, mga eskriba, ug mga kadagkoan sa mga tawo nakadungog sa gihimo ni Jesus ug nangita na usab ug mga paagi aron ipapatay siya. Bisan pa niana, naglibog sila kon unsaon sa pagpatay kang Jesus, kay ang tanang tawo, nga nahingangha sa iyang pagpanudlo, wala mobulag kaniya aron sa pagpatalinghog kaniya.—Marcos 11:18; Lucas 19:47, 48.

9. Unsang pagtulon-an ang gitudlo ni Jesus, ug unsang imbitasyon ang iyang gipaabot ngadto sa iyang mga mamiminaw diha sa templo?

⁹ Samtang nagpadayon si Jesus sa pagpanudlo diha sa templo, siya miingon: “Ang takna miabot na  aron ang Anak sa tawo pagahimayaon.” Oo, siya nahibalo nga pipila na lamang ka adlaw ang nahibilin sa iyang tawhanong kinabuhi. Human sa pag-asoy kon sa unsang paagi ang lugas sa trigo kinahanglang mamatay aron mamunga—katugbang sa iyang kaugalingong kamatayon ug pagkahimong usa ka kasangkapan aron makahatag ug kinabuhing walay kataposan ngadto sa uban—gipaabot ni Jesus ang imbitasyon ngadto sa iyang mga mamiminaw, nga nag-ingon: “Kon ang usa moalagad kanako, pasunda siya kanako, ug kon asa man ako atua usab didto ang akong alagad. Kon ang usa moalagad kanako, ang Amahan magpasidungog kaniya.”—Juan 12:23-26.

10. Unsay gibati ni Jesus bahin sa masakit nga kamatayon nga naghulat kaniya?

¹⁰ Naghunahuna bahin sa iyang masakit nga kamatayon nga sa upat na lamang ka adlaw mahitabo na, si Jesus nagpadayon: ‘Karon ang akong kalag nasamok, ug unsay akong igaingon? Amahan, luwasa ako gikan niining taknaa.’ Apan ang anaa sa unahan ni Jesus dili gayod malikayan. “Bisan pa man,” siya miingon, ‘kini ang hinungdan nga ako nahiabot niining taknaa.’ Sa pagkatinuod, si Jesus nahiuyon sa tibuok nga kahikayan sa Diyos. Siya determinado sa pagtugot sa kabubut-on sa Diyos nga maoy mogahom sa iyang mga lihok hangtod sa iyang haladnong kamatayon. (Juan 12:27) Pagkamaayong panig-ingnan ang iyang gipakita kanato—usa nga bug-os nga nagpasakop sa kabubut-on sa Diyos!

11. Unsang mga pagtulon-an ang gihatag ni Jesus ngadto sa mga tawo nga mao pay pagkadungog sa tingog gikan sa langit?

¹¹ Nabalaka pag-ayo nga maapektohan ang dungog sa iyang Amahan tungod sa iyang kamatayon, si Jesus miampo: “Amahan, himayaa ang imong ngalan.” Sa kahibulong sa mga tawo nga nagtigom sa templo, usa ka tingog migula gikan sa langit, nga nag-ingon: “Gihimaya ko na kini ug pagahimayaon ko kini pag-usab.” Gigamit sa Dakong Magtutudlo kining higayona sa pagsulti sa mga tawo kon nganong may nadungog nga tingog, kon unsay pagasangpotan sa iyang kamatayon, ug kon nganong kinahanglang magpasundayag sila ug pagtuo. (Juan 12:28-36) Ang kataposang duha ka adlaw puliki gayod alang kang Jesus. Apan ang kritikal nga adlaw anaa pa sa unahan.

Ang Adlaw sa mga Pagsaway

12. Sa Martes, Nisan 11, sa unsang paagi naningkamot ang relihiyosong mga pangulo sa pagbitik kang Jesus, ug unsay resulta?

¹² Sa Martes, Nisan 11, si Jesus miadto na usab sa templo aron manudlo. Didto niadtong tungora ang masukihong tumatambong. Naghisgot sa gihimo ni Jesus sa miaging adlaw, ang pangulong mga saserdote ug mga tigulang sa mga tawo nangutana kaniya: “Pinaagi ba sa unsang awtoridad nga ikaw nagabuhat niining mga butanga? Ug kinsay naghatag kanimo niini nga awtoridad?” Gilibog sila sa Labawng Magtutudlo sa iyang tubag, ug iyang giasoy ang tulo ka tin-awng mga ilustrasyon—duha niini maoy maylabot sa parasan ug ang usa maoy bahin sa kombira sa kasal—nga nagyagyag kon unsa ka daotan ang iyang mga magsusupak. Nangasuko sa ilang nadunggan, ang relihiyosong mga pangulo nagtinguha sa pagdakop kaniya. Apan nahadlok sila sa mga tawo, kinsa naglantaw kang Jesus nga usa ka manalagna. Busa naningkamot sila sa pagbitik kaniya aron makasulti ug usa ka butang nga pinaagi niini mahimo nilang ipadakop siya. Sila wala  makatingog sa mga tubag ni Jesus.—Mateo 21:23–22:46.

13. Unsang tambag ang gihatag ni Jesus sa iyang mga mamiminaw mahitungod sa mga eskriba ug mga Pariseo?

¹³ Sanglit ang mga eskriba ug mga Pariseo nangangkon man nga nanudlo sa Balaod sa Diyos, si Jesus niining higayona nag-awhag sa iyang mga mamiminaw: “Ang tanang butang nga ilang isulti kaninyo, buhata ug sunda, apan ayaw pagbuhat sumala sa ilang mga buhat, kay sila nagapanulti apan dili mohimo.” (Mateo 23:1-3) Pagkapuwersado nga pagsaway atubangan sa katilingban! Apan wala pa matapos si Jesus sa iyang pagsaway kanila. Kini maoy iyang kataposang adlaw diha sa templo, ug maisogon niyang gipahayag ang sunodsunod nga pagyagyag—usag usang milanog samag dalugdog.

14, 15. Unsang mahalang nga mga pagsaway ang gipahayag ni Jesus batok sa mga eskriba ug mga Pariseo?

¹⁴ ‘Alaot kamo, mga eskriba ug mga Pariseo, mga salingkapaw!’ Kini unom ka beses nga gisulti ni Jesus. Sila mga maot tungod kay, matod pa niya, ilang gitakpan ang Gingharian sa mga langit atubangan sa mga tawo, kay wala nila tugoti kadtong nagapaingon didto sa pagsulod. Kining mga salingkapaw nagtadlas sa dagat ug mamalang yuta aron makahimog usa ka kinabig, ug sa makabig na ipaagom lang siya sa walay kataposang kalaglagan. Samtang wala magtagad sa “mas bug-at nga mga butang sa Balaod, nga mao, ang hustisya ug kaluoy ug pagkamatinuohon,” gihatagan nilag dakong pagtagad ang pagbayad sa ikapulo. Sa pagkatinuod, sila naghinlo “sa gawas sa kopa ug sa pinggan, apan sa sulod kini sila puno sa inagaw ug paghingapin” sa pagkaagi nga ang ilang pagkadunot natago sa likod sa salingkapaw nga pagpasundayag sa pagkadiyosnon. Dugang pa, sila malipayng mohimog mga lubnganan alang sa mga manalagna ug dayandayanan kini aron matagad ang ilang kaugalingong mga buhat sa kaluoy, bisag sila ‘mga anak diay niadtong mga nagbuno sa mga manalagna.’—Mateo 23:13-15, 23-31.

¹⁵ Gisaway ang kakulang ug espirituwal nga mga sukdanan sa bahin sa iyang mga kaaway, si Jesus miingon: ‘Alaot kamo, buta nga mga tiggiya.’ Sila buta sa moral tungod kay ilang gihatagan ug mas dakong importansiya ang bulawan sa templo inay ang espirituwal nga sukdanan nianang maong dapit sa pagsimba. Nagpadayon, gipamulong ni Jesus ang iyang tuman ka hait nga mga pulong sa pagsaway. “Mga halas, kaliwat sa mga bitin,” matod niya, “unsaon ba ninyo pagkalagiw gikan sa paghukom sa Gehenna?” Oo, gisultihan sila ni Jesus nga gumikan sa pagpadayon sa paglakaw diha sa ilang daotang dalan, ilang pagaagoman ang walay kataposang kalaglagan. (Mateo 23:16-22, 33) Hinaot nga kita usab magpasundayag ug kaisog sa pagwali sa mensahe sa Gingharian, bisan pag nalangkit niini ang pagyagyag sa bakak nga relihiyon.

16. Samtang naglingkod sa Bukid sa mga Olibo, unsang hinungdanong tagna ang gihatag ni Jesus ngadto sa iyang mga tinun-an?

¹⁶ Si Jesus niining higayona mibiya sa templo. Sa nagkasalop ang adlaw sa kahaponon, siya ug ang iyang mga apostoles mitungas sa Bukid sa mga Olibo. Samtang naglingkod didto, gihatag ni Jesus ang tagna bahin sa kagun-oban sa templo ug sa ilhanan sa iyang presensiya ug sa konklusyon sa sistema sa mga butang. Ang kahulogan niining matagnaong mga pulong miabot pa hangtod sa atong panahon. Niadtong gabhiona, gisultihan usab ni Jesus ang iyang mga tinun-an: ‘Nahibalo kamo nga duha na lamang ka adlaw gikan karon mao na ang paskuwa, ug ang Anak sa tawo igatugyan aron ilansang.’—Mateo 24:1-14; 26:1, 2.

Si Jesus ‘Nahigugma sa mga Iyaha Hangtod sa Kataposan’

17. (a) Panahon sa Paskuwa sa Nisan 14, unsang pagtulon-an ang gitudlo ni Jesus sa 12? (b) Unsang pagsaulog ang gisugdan ni Jesus human sa pagpalakaw kang Judas Iscariote?

¹⁷ Sa misunod nga duha ka adlaw—Nisan 12 ug 13—si Jesus wala magpakita sa templo sa dayag. Ang relihiyosong mga pangulo naningkamot sa pagpatay kaniya, ug dili niya buot nga may makababag sa iyang pagsaulog sa Paskuwa uban sa iyang mga apostoles. Ang pagsalop sa adlaw sa Huwebes nagsugod sa Nisan 14—ang kataposang adlaw sa kinabuhi ni Jesus sa yuta ingong tawo. Niadtong gabhiona, si Jesus ug ang iyang mga apostoles nagtipon diha sa usa ka balay sa Jerusalem diin nahikay na ang tanan alang sa ilang pagsaulog sa Paskuwa. Samtang nangaon sila sa Paskuwa, iyang gitudloan ang 12 ug maayong pagtulon-an sa pagkamapainubsanon pinaagi sa paghugas sa ilang mga tiil. Human sa pagpalakaw kang Judas Iscariote, kinsa misugot sa pagbudhi sa iyang Agalon baylo sa 30 ka pirasong salapi—ang kantidad sa usa ka yanong ulipon sumala sa Moisesnong Balaod—gisugdan ni Jesus ang Memoryal sa iyang kamatayon.—Exodo 21:32; Mateo 26:14, 15, 26-29; Juan 13:2-30.

18. Unsang dugang mga pagpanudlo ang mahigugmaong gihatag ni Jesus ngadto sa iyang 11 ka matinumanong mga apostoles, ug sa unsang paagi giandam niya sila alang sa iyang nagkaduol nga kamatayon?

¹⁸ Human masugdan ang Memoryal, ang mga  apostoles grabeng naglalis kon kinsa kanila ang labing dako. Imbes kasab-an sila, mapailobong gitudloan sila ni Jesus bahin sa kahinungdanon sa pag-alagad sa uban. Nagpasalamat nga sila miunong kaniya panahon sa iyang mga pagsulay, siya naghimog personal nga pakigtugon uban kanila alang sa usa ka gingharian. (Lucas 22:24-30) Gisugo usab sila ni Jesus nga maghigugmaay sa usag usa sama sa iyang paghigugma kanila. (Juan 13:34) Samtang nagpabilin siya ug dugay sa maong lawak, mahigugmaong giandam sila ni Jesus alang sa iyang nagkaduol nga kamatayon. Iyang gipasaligan sila sa iyang pagkahigala, nagdasig kanila sa pagpasundayag ug pagtuo, ug nagsaad kanila sa tabang sa balaang espiritu. (Juan 14:1-17; 15:15) Sa wala pa mogawas sa balay, si Jesus mihangyo sa iyang Amahan: “Ang takna miabot na; himayaa ang imong anak, aron ang imong anak magahimaya kanimo.” Sa pagkatinuod, naandam na ni Jesus ang mga apostoles alang sa iyang pagbiya, ug iya gayod nga ‘gihigugma ang mga iyaha hangtod sa kataposan.’—Juan 13:1; 17:1.

19. Nganong nasakit pag-ayo si Jesus diha sa tanaman sa Getsemane?

¹⁹ Tingali lapas na sa tungang gabii sa dihang si Jesus ug ang iyang 11 ka matinumanong mga apostoles nakaabot sa tanaman sa Getsemane. Daghang higayon na nga nakaadto siya didto uban sa iyang mga apostoles. (Juan 18:1, 2) Sa pipila ka oras, si Jesus mamatay nga daw usa siya ka talamayong kriminal. Ang kasakit niining gidahom nga kasinatian ug ang dakong pasipala nga mahimong mahatag niini sa iyang Amahan grabe kaayo nga samtang nag-ampo si Jesus, ang iyang singot nahimong sama sa mga tinulo sa dugo nga nangatagak sa yuta. (Lucas 22:41-44) “Ang takna miabot na!” Miingon si Jesus sa iyang mga apostoles. ‘Tan-awa! Ang akong magbubudhi nagsingabot na.’ Samtang nagsulti pa siya, si Judas Iscariote miabot, uban sa daghang tawo nga nagdalag mga sulo ug mga lampara ug mga hinagiban. Sila miabot aron sa pagdakop kang Jesus. Wala siya mosukol. ‘Kon mao,’ siya miingon, ‘unsaon pagkatuman sa mga Kasulatan nga sa ingon niini kinahanglang mahitabo kini?’—Marcos 14:41-43; Mateo 26:48-54.

Ang Anak sa Tawo Nahimaya!

20. (a) Unsang mabangis nga mga buhat ang naagoman ni Jesus human siya gidakop? (b) Sa mga gutlo una pa mamatay, nganong si Jesus mituaw: “Natuman na”?

²⁰ Human sa pagdakop kaniya, si Jesus giakusar sa bakak nga mga saksi, gihukman ug kamatayon sa mapihigong mga maghuhukom, gisentensiyahan ni Poncio Pilato, gibiaybiay sa mga saserdote ug sa mga tawong magubtanon, ug gibugalbugalan ug gisakit sa mga sundalo. (Marcos 14:53-65; 15:1, 15; Juan 19:1-3) Sa pagka-Biyernes sa udto, si Jesus gilansang sa estaka sa pagsakit ug nag-antos sa hilabihan nga kasakit samtang ang kabug-at sa iyang lawas naggisi sa samad nga inagian sa lansang diha sa iyang mga kamot ug mga tiil. (Juan 19:17, 18) Sa mga alas tres sa hapon, si Jesus mituaw: “Natuman na!” Oo, iyang natuman ang tanan nga iyang gianhi sa yuta nga pagabuhaton. Gitugyan ang iyang espiritu ngadto sa Diyos, iyang giduko ang iyang ulo ug namatay. (Juan 19:28, 30; Mateo 27:45, 46; Lucas 23:46) Sa ikatulo ka adlaw human niadto, gibanhaw ni Jehova ang iyang Anak. (Marcos 16:1-6) Kap-atan ka adlaw human sa iyang pagkabanhaw, mikayab si Jesus sa langit ug gihimaya.—Juan 17:5; Buhat 1:3, 9-12; Filipos 2:8-11.

21. Sa unsang paagi masundog nato si Jesus?

²¹ Sa unsang paagi atong ‘masunod pag-ayo ang mga tunob ni Jesus’? (1 Pedro 2:21) Sama kaniya, magkugi gayod kita sa buluhatong pagwali sa Gingharian ug paghimog tinun-an ug magmaisogon ug walay kahadlok sa pagsulti sa pulong sa Diyos. (Mateo 24:14; 28:19, 20; Buhat 4:29-31; Filipos 1:14) Dili gayod nato iwala sa atong panan-aw kon hain na kita sa dagan sa panahon o mapakyas sa pagdasig sa usag usa sa paghigugma ug sa maayong mga buhat. (Marcos 13:28-33; Hebreohanon 10:24, 25) Hinaot nga ang atong bug-os nga lihok magamhan sa kabubut-on ni Jehova nga Diyos ug sa pagkasayod nga kita nagkinabuhi na sa “panahon sa kataposan.”—Daniel 12:4.

Unsaon Nimo Pagtubag?

• Ang pagkasayod ni Jesus nga nagkaduol na ang iyang kamatayon adunay unsang epekto sa iyang kataposang ministeryo diha sa templo sa Jerusalem?

• Unsay nagpakita nga si Jesus ‘nahigugma sa mga iyaha hangtod sa kataposan’?

• Ang mga hitabo sa kataposang pipila ka oras sa kinabuhi ni Jesus nagpaila ug unsa bahin kaniya?

• Sa unsang paagi atong masundog si Kristo Jesus diha sa atong ministeryo?

[Mga Pangutana sa Pagtuon]

[Hulagway sa panid 18]

Si Jesus ‘nahigugma kanila hangtod sa kataposan’