Nanginahanglan ug Tabang

“GIKALIMTAN na ako sa Diyos!” mituaw ang usa ka babaye nga taga-Brazil. Human sa kalit nga kamatayon sa iyang bana, iyang gibati nga wala nay kahulogan ang iyang kinabuhi. Nakasulay ka na ba sukad sa paghupay sa usa ka tawong ingon niana ang gibating kaguol o kaha nanginahanglan ug tabang?

Ang uban nawad-an na gayod ug paglaom nga maoy hinungdan sa ilang paghikog—ug ubay-ubay kanila maoy mga batan-on. Sumala pa sa mantalaang Folha de S. Paulo, gipakita sa usa ka pagtuon sa Brazil nga “ang paghikog sa mga batan-on miuswag sa 26 porsiyento.” Pananglitan, tagda ang kahimtang ni Walter, a usa ka batan-ong lalaki sa São Paulo. Wala siyay mga ginikanan, balay, pribasiya, walay mga higala nga iyang masaligan. Aron matapos ang iyang kaalaot, mihukom si Walter sa pag-ambak gikan sa taytayan.

Usa ka nag-inusarang inahan si Edna nga may duha na ka anak sa dihang nakahimamat siya ug laing lalaki. Human sa usa lang ka bulan, nag-ipon sila diha sa balay sa inahan sa lalaki, kinsa nalangkit sa espiritismo ug palahubog. Nanganak na usab si Edna, nagsugod sa paghuboghubog, ug nag-antos sa tumang depresyon mao nga misulay siya sa paghikog. Sa kataposan, nawad-an siyag katungod sa pag-atiman sa iyang mga anak.

Komosta man ang mga tigulang? Masadyaon ug estoryador kanhi si Maria. Apan, samtang siya nagkatigulang misugod siya sa pagkabalaka bahin sa iyang trabaho ingong nars tungod kay nahadlok siya nga masayop. Nakapaguol kini kaniya. Human mosulay sa pagtambal sa iyang kaugalingon, nagpatambal siya sa doktor, ug ang pagtambal nga iyang nadawat daw nakatabang. Apan sa dihang nawad-an siyag trabaho sa edad nga 57, mibalik ang iyang depresyon nga mas grabe pa nga wala na siyay makitang solusyon. Si Maria naghunahuna sa paghikog.

“Mga 10 porsiyento sa mga tawong may depresyon ang mosulay sa paghikog,” matod pa ni Propesor José Alberto Del Porto sa São Paulo University. “Lisod tuohan nga mas daghang tawo ang nangamatay gumikan sa paghikog kay sa pagbuno, apan kana maoy usa ka makapaguol nga kamatuoran,” nagtaho ang siruhano heneral sa T. B., nga si Dr. David Satcher.

Usahay ang pagsulay nga maghikog, sa pagkatinuod, maoy usa ka pagpangayog tabang. Ug siyempre ang mga membro sa pamilya ug mga higala gustong mohimo sa hustong butang alang sa usa nga nawad-an ug paglaom. Tinuod, dili makatabang ang paggamit sa mga pulong sama sa: “Hunongi na ang pagsigeg kaluoy sa imong kaugalingon,”  “Daghang tawo ang mas grabe pag kahimtang kay kanimo” o, “Makasinati man gyod kitang tanan ug dili maayong adlaw matag karon ug unya.” Hinunoa, nganong dili mahimong usa ka tinuod nga higala ug maayong tigpaminaw? Oo, paningkamot sa pagtabang sa tawong nawad-ag paglaom aron iyang masabtan nga may pulos diay ang kinabuhi.

Ang Pranses nga awtor nga si Voltaire misulat: “Ang tawo nga, tungod sa pagbul-og sa kasubo, naghikog karong adlawa, mangandoy gayod unta nga mabuhi kon naghulat lang siyag usa ka semana.” Nan, sa unsang paagi mahibaloan sa nawad-ag paglaom nga mga tawo nga may pulos ang kinabuhi?

[Footnote]

[Hulagway sa panid 3]

Nagkadaghang batan-on ug hamtong ang naghikog

[Hulagway sa panid 4]

Sa unsang paagi imong matabangan ang tawong nawad-an ug paglaom?