Nganong Angayng Magmasakripisyohon-sa-Kaugalingon?

Si Bill maoy usa ka tawong de pamilya nga nag-edad ug mga 50 anyos kinsa usa ka magtutudlo sa teknolohiya labot sa pagpanukod. Sa tibuok tuig, sa iyang kaugalingong gasto, mogugol siya ug daghang semana sa pagtabang sa pagplano ug pagtukod ug mga Kingdom Hall alang sa mga kongregasyon sa mga Saksi ni Jehova. Si Emma maoy usa ka edukada ug maayog kuwalipikasyon nga dalaga nga nag-edad ug 22 anyos. Inay mangagpas sa lunlon personal nga mga tumong ug mga kalipayan, mogugol siya ug kapin sa 70 ka oras kada bulan ingong ministro, nga nagtabang sa mga tawo sa pagsabot sa Bibliya. Si Maurice ug Betty maoy mga retirado. Inay magrelaksrelaks na lang, mibalhin sila sa laing nasod aron sa pagtabang sa mga tawo didto nga mahibalo bahin sa katuyoan sa Diyos alang sa yuta.

KINING mga tawhana wala mag-isip sa ilang kaugalingon nga espesyal o talagsaon. Sila maoy normal lamang nga mga tawo nga nagbuhat sa ilang gihunahuna nga maoy hustong buhaton. Nganong gigamit nila ang ilang panahon, kusog, mga katakos, ug kahinguhaan alang sa intereses sa uban? Ang lalom nga gugma alang sa Diyos ug sa ilang silingan maoy nagpalihok kanila. Kining maong gugma nagpatungha diha sa matag usa kanila sa tinuod nga espiritu sa pagsakripisyo-sa-kaugalingon.

Unsay buot natong ipasabot sa espiritu sa pagsakripisyo-sa-kaugalingon? Aw, ang pagkahimong masakripisyohon-sa-kaugalingon wala magkinahanglan ug hilabihan ka yano o pig-ot nga pagkinabuhi. Dili kinahanglang maglakip kini ug sobrang paghikaw-sa-kaugalingon nga magwagtang sa atong kalipay o katagbawan. Sumala sa pagpahayag niini sa The Shorter Oxford English Dictionary, ang pagsakripisyo-sa-kaugalingon nagpasabot lamang ug “pag-una sa atong katungdanan o sa kaayohan sa uban inay kay sa atong kaugalingong intereses, kalipay, ug mga tinguha.”

Si Jesu-Kristo—Ang Kinamaayohang Ehemplo

Ang bugtong Anak sa Diyos, si Jesu-Kristo, mao ang kinamaayohang ehemplo sa usa nga dunay espiritu sa pagsakripisyo-sa-kaugalingon. Sa iyang una-tawhanong paglungtad, ang iyang kinabuhi lagmit gayod nga makapadasig ug makapatagbaw kaayo. Siya may suod kaayong pakig-uban sa iyang Amahan ug sa espiritung mga linalang. Dugang pa, ang Anak sa Diyos migamit sa iyang mga katakos diha sa makaiikag ug kulbahinam nga mga kalihokan ingong “batid nga magbubuhat.” (Proverbio 8:30, 31) Tino nga nagkinabuhi siya sa mga kahimtang nga labaw sa bisan unsa nga napahimuslan sukad bisan sa labing adunahang tawo sa yuta. Sunod kang Jehova nga Diyos, nahuptan niya ang binayaw ug pribilehiyado nga posisyon didto sa langit.

Bisan pa niana, “gihaw-asan [sa Anak sa Diyos]  ang iyang kaugalingon ug mihupot sa dagway sa usa ka ulipon ug nahisama sa mga tawo.” (Filipos 2:7) Andam niyang talikdan ang tanan niyang personal nga mga bentaha pinaagi sa pagkahimong tawo ug paghalad sa iyang kinabuhi ingong lukat aron matul-id ang kadaot nga gipahinabo ni Satanas. (Genesis 3:1-7; Marcos 10:45) Nagpasabot kana ug pagkinabuhi taliwala sa makasasalang katawhan diha sa kalibotan nga nahiluna sa gahom ni Satanas nga Yawa. (1 Juan 5:19) Nagpasabot usab kini ug pag-antos sa personal nga kalisod ug kahasol. Apan, bisan unsa pay mawala kaniya, si Jesu-Kristo determinado nga motuman sa kabubut-on sa iyang Amahan. (Mateo 26:39; Juan 5:30; 6:38) Gisulayan niini ang gugma ug pagkamaunongon ni Jesus hangtod sa kinutbanan sa iyang pag-agwanta. Unsa ka dako ang andam niyang isakripisyo? “Siya mipaubos sa iyang kaugalingon,” matod ni apostol Pablo, “ug nagmasinugtanon hangtod sa kamatayon, oo, kamatayon diha sa sakitanang estaka.”—Filipos 2:8.

“Hupti Kini nga Tinamdan sa Pangisip Diha Kaninyo”

Gidasig kita sa pagsunod sa ehemplo ni Jesus. “Hupti kini nga tinamdan sa pangisip diha kaninyo nga diha usab kang Kristo Jesus,” nag-awhag si Pablo. (Filipos 2:5) Sa unsang paagi mahimo nato kini? Ang usa ka paagi mao ang ‘pagtan-aw, dili sa personal nga kaayohan nianang mga butang labot sa inyong kaugalingon lamang, kondili usab sa personal nga kaayohan nianang ila sa uban.’ (Filipos 2:4) Ang tinuod nga gugma “dili magapangita sa kaugalingon niining kaayohan.”—1 Corinto 13:5.

Ang mga tawong may pagtagad kasagarang nagpakita ug dili-hakog nga paggugol sa ilang panahon sa pag-alagad sa uban. Apan, karon daghang tawo ang mahunahunaon-sa-kaugalingon. Ang kalibotan dunay tinamdan nga ako-una. Kinahanglan kitang magbantay batok sa espiritu sa kalibotan tungod kay kon molampos kini sa paghulma sa atong panglantaw ug tinamdan, lagmit nga hatagan natog dakong importansiya ang atong kaugalingong mga tinguha. Unya ang tanan nga atong buhaton—kon unsaon nato paggugol ang atong panahon, atong kusog, atong kahinguhaan—mandoan sa mahunahunaon-sa-kaugalingon nga mga kalihokan. Busa kinahanglang makigbisog kita pag-ayo batok niining maong impluwensiya.

Bisan ang maayog-tuyo nga tambag makapaluya usahay sa atong espiritu sa pagsakripisyo-sa-kaugalingon. Kay nakaamgo kon unsay dangatan sa nagsakripisyo-sa-kaugalingon nga dalan ni Jesus, si apostol Pedro miingon: “Magmaluloton ka sa imong kaugalingon, Ginoo.” (Mateo 16:22) Lagmit nalisdan siya sa pagdawat sa pagkaandam ni Jesus nga mamatay alang sa intereses sa pagkasoberano sa iyang Amahan ug sa kaluwasan sa katawhan. Busa gisulayan niya pagbugnaw si Jesus nga dili subayon ang maong dalan.

‘Dumilii ang Imong Kaugalingon’

Unsay reaksiyon ni Jesus? Ang asoy nag-ingon: “Siya miliso, mitan-aw sa iyang mga tinun-an ug gibadlong si Pedro, ug miingon: ‘Palikod kanako, Satanas, tungod kay ikaw nagahunahuna, dili sa mga hunahuna sa Diyos, kundili nianang sa mga tawo.’” Unya gipaduol ni Jesus ang panon sa katawhan ngadto kaniya uban sa iyang mga tinun-an ug miingon: “Kon si bisan kinsa buot mosunod kanako, padumilia siya pag-angkon sa iyang kaugalingon ug paalsaha sa iyang sakitanang estaka ug mosunod kanako nga mapinadayonon.”—Marcos 8:33, 34.

Mga 30 ka tuig human niya gihatag kining maong tambag kang Jesus, gipakita ni Pedro nga nianang tungora nasabtan na niya ang kahulogan sa pagsakripisyo-sa-kaugalingon. Wala niya dasiga ang mga isigkamagtutuo nga morelaks sa ilang mga paningkamot ug magmaluloton sa ilang kaugalingon. Hinunoa, gipahimangnoan sila ni Pedro nga lig-onon ang ilang mga kaisipan alang sa buluhaton ug mohunong na sa pagpahiuyon sa ilang kanhing kalibotanong mga tinguha. Bisan pa sa mga pagsulay, kinahanglang unahon nila ang pagtuman sa kabubut-on sa Diyos diha sa ilang kinabuhi.—1 Pedro 1:6, 13, 14; 4:1, 2.

Ang labing magantihong dalan nga masubay ni bisan kinsa kanato mao ang pagtugyan sa tanan natong nabatonan ngadto kang Jehova, nga matinumanong nagsunod kang Jesu-Kristo ug tugotan ang Diyos nga maoy motultol sa atong mga kalihokan. Bahin niini, si Pablo nagpakita ug maayong ehemplo. Ang iyang pagbati sa pagkadinalian ug ang iyang pagkamapasalamaton kang Jehova nagtukmod kaniya  nga talikdan ang kalibotanong mga ambisyon o mga kalaoman nga makapalinga unta kaniya gikan sa pagtuman sa kabubut-on sa Diyos. “Alang kanako,” miingon siya, “labihan kong ikasaya nga magagasto ug bug-os pagagastohon” sa pag-alagad sa intereses sa uban. (2 Corinto 12:15) Gigamit ni Pablo ang iyang mga katakos sa pagpauswag sa intereses sa Diyos, dili sa iyaha.—Buhat 20:24; Filipos 3:8.

Sa unsang paagi tingali nato susihon ang atong kaugalingon aron masuta kon nabatonan ba nato ang panglantaw nga sama nianang kang apostol Pablo? Mahimong suknaon nato ang atong kaugalingon sa mga pangutana nga sama niini: Giunsa nako paggamit ang akong panahon, akong kusog, akong mga katakos, ug akong kahinguhaan? Gigamit ba nako kini ug ang ubang bililhong mga gasa aron lamang sa pagpauswag sa akong kaugalingong mga intereses, o gigamit nako kini sa pagtabang sa uban? Gihunahuna ba nako ang pagpakig-ambit nga mas bug-os pa diha sa nagaluwas-kinabuhing buluhaton sa pagwali sa maayong balita, tingali ingong bug-os-panahong magmamantala sa Gingharian? Mahimo bang mas bug-os akong malangkit sa mga kalihokan sama sa pagtukod o pagmentinar sa mga Kingdom Hall? Ako bang gipahimuslan ang mga kahigayonan sa pagtabang sa mga nanginahanglan? Gihatag ba nako kang Jehova ang akong kinamaayohan?—Proverbio 3:9.

“Labaw nga Kalipay sa Paghatag”

Bisan pa niana, maalamon ba gayod ang pagkamasakripisyohon-sa-kaugalingon? Maalamon gayod kini! Nahibalo si Pablo gikan sa personal nga kasinatian nga ang maong espiritu maghatag ug dagayang mga ganti. Naghatag kini kaniya ug dakong kalipay ug way-sukod nga personal nga katagbawan. Iyang gisaysay kini ngadto sa mga tigulang nga taga-Efeso sa dihang nahimamat niya sila sa Mileto. Matod ni Pablo: “Akong gikapasundayag kaninyo sa tanang butang nga pinaagi sa ingon nga paghago [sa masakripisyohon-sa-kaugalingon nga paagi] kinahanglang inyong abagan kadtong mga maluya, ug igabutang sa hunahuna ang mga pulong sa Ginoong Jesus, sa dihang siya mismo miingon, ‘Adunay labaw nga kalipay sa paghatag kay sa pagdawat.’” (Buhat 20:35) Minilyong tawo ang nakakaplag nga ang pagpasundayag niining matanga sa espiritu maghatag ug dakong kalipay bisan karon. Maghatag usab kini ug kalipay sa umaabot sa dihang gantihan ni Jehova kadtong nag-una sa iyang mga intereses ug nianang sa uban kay sa ilaha.—1 Timoteo 4:8-10.

Sa dihang gipangutana kon nganong naghago siya sa pagtabang sa uban sa pagtukod ug mga Kingdom Hall, si Bill miingon: “Ang pagtabang sa kasagarang mas gagmayng mga kongregasyon niining paagiha naghatag kanakog dakong katagbawan sa kaugalingon. Malipay ako nga gamiton ang bisan unsang mga kahanas ug kabatid nga akong nabatonan alang sa kaayohan sa uban.” Nganong  gipili ni Emma ang paggugol sa iyang kusog ug mga katakos sa pagtabang sa uban nga mahibalo bahin sa Kasulatanhong kamatuoran? “Dili nako mahanduraw nga nagbuhat ako ug lain pa. Samtang bata pa ug makaarang sa pagbuhat niana, buot ko lang himoon ang kutob sa akong maarangan sa pagpahimuot kang Jehova ug sa pagtabang sa uban. Walay sapayan nga mosakripisyo ug pipila ka materyal nga mga bentaha. Ginabuhat ko lang ang angay nakong buhaton tungod sa nahimo ni Jehova alang kanako.”

Si Maurice ug Betty wala magbasol nga wala sila magkinabuhing haruhay, human sa katuigan sa paghago sa pagmatuto ug pagtagana sa ilang pamilya. Karon nga sila retirado na, buot nilang magpadayon sa paghimo sa ilang kinabuhi nga mapuslanon ug makahuloganon. “Dili namo gusto nga magrelaksrelaks na lang karon,” matod nila. “Ang pagtabang sa uban nga mahibalo bahin kang Jehova diha sa usa ka langyaw nga nasod naghatag kanamo ug kahigayonan sa pagpadayon pagbuhat sa usa ka butang nga may katuyoan.”

Determinado ka ba nga magmasakripisyohon-sa-kaugalingon? Dili kini sayon. Dunay kanunayng pakigbugno tali sa atong dili-hingpit nga tawhanong mga tinguha ug sa atong tim-os nga tinguha nga pahimut-an ang Diyos. (Roma 7:21-23) Apan usa kini ka pakigbugno nga madaog kon tugotan nato si Jehova nga mogiya sa atong kinabuhi. (Galacia 5:16, 17) Seguradong mahinumdoman niya ang atong nagsakripisyo-sa-kaugalingon nga buluhaton sa pag-alagad kaniya ug panalanginan kita nga madagayaon. Sa pagkatinuod, si Jehova nga Diyos ‘mag-abli sa mga tamboanan sa langit ug magbubo gayod kanato sa panalangin sa pagkaagi nga wala nay panginahanglan pa.’—Malaquias 3:10; Hebreohanon 6:10.

[Hulagway sa panid 23]

Nabatonan ni Jesus ang espiritu sa pagsakripisyo-sa-kaugalingon. Nabatonan mo ba usab kini?

[Mga hulagway sa panid 24]

Gisentro ni Pablo ang iyang mga paghago diha sa buluhatong pagsangyaw-sa-Gingharian