Sa Dili Madugay—Usa ka Kalibotan Diin Mahanaw na ang Kawalay Paglaom

NAGKAANAM ka lisod ang kinabuhi, ug daghan ang hinungdan sa kawalay paglaom. Sa dihang mahigawad, kita malisdan tingali sa pagkontrolar sa atong emosyon. Ngani, bisan ang mga tawong nahigugma sa kinabuhi mahimong mobatig hilabihang kaguol! Tagda ang pipila ka pananglitan.

Sa karaang mga panahon, ang manalagnang si Moises nawad-an gayod ug kadasig maoy hinungdan nga iyang giingnan ang Diyos: “Palihog patya na lang ako, kon ako nakapahimuot sa imong mga mata, ug ayaw ako patan-awa sa akong katalagman.” (Numeros 11:15) Sa dihang mikalagiw gikan sa iyang mga kaaway, ang manalagnang si Elias mipatugbaw: “Igo na! Karon, Oh Jehova, kuhaa ang akong kalag [kinabuhi].” (1 Hari 19:4) Ug ang manalagnang si Jonas miingon: “Oh Jehova, kuhaa, palihog, ang akong kalag gikan kanako, kay mas maayo pa nga ako mamatay kay sa ako mabuhi.” (Jonas 4:3) Apan wala maghikog si Moises, si Elias, ni si Jonas. Silang tanan nahibalo sa sugo sa Diyos: “Dili ka magbuno.” (Exodo 20:13) Tungod kay may lig-ong pagtuo sa Diyos, sila nahibalo nga ang tanang malisod nga kahimtang dunay kasulbaran ug ang kinabuhi maoy usa ka gasa gikan sa Diyos.

Komosta na man ang mga problema nga atong ginaatubang  karon? Dugang pa sa emosyonal nga kagul-anan o mga sakit, usahay tingali kinahanglan natong sagubangon ang pagmaltratar kanato sa mga membro sa pamilya, mga silingan, o mga kauban sa trabaho. Ang Bibliya naghisgot bahin sa mga tawo nga puno “sa tanang pagkadili-matarong, tumang-pagkadaotan, hakog nga kaibog, kangil-ad, nga puno sa kasina, pagbuno, panag-away, limbong, mapangdaotong tinamdan, nga mga tighuluhungihong, mga tiglibak, mga tigdumot sa Diyos, mga bagis, mga mapahitas-on, mga mapasiatabon-sa-kaugalingon, mga tigmugnag makadaot nga mga butang, mga dili-masinugtanon sa mga ginikanan, mga walay pagsabot, mga dili-motuman ug kasabotan, mga walay kinaiyanhong pagbati, mga walay-kaluoy.” (Roma 1:28-31) Morag bug-at kaayo ang kinabuhi tungod kay gilibotan ug ingon nianang matanga sa mga tawo sa adlaw-adlaw. Sa unsang paagi kita makatabang niadtong nanginahanglag paglipay ug kahupayan?

Pagkaandam nga Maminaw

Ang mga kalisdanan ug pag-antos mahimong hinungdan nga mawad-an ang tawo sa iyang pagkatimbang sa hunahuna. Ang maalamong tawo miingon: “Ang pagpanglupig makapabuang sa usa ka maalamon.” (Ecclesiastes 7:7) Busa angayng hatagag pagtagad ang tawong maghisgot sa paghikog. Ang iyang mga problema, kini kaha emosyonal, pisikal, mental, o espirituwal, nagkinahanglan ug dihadihang pagtagad. Tinuod, nagkalainlain ang propesyonal nga mga pagtambal ug mga terapiya, ug kinahanglang mohimog personal nga desisyon mahitungod sa mga matang sa terapiya.—Galacia 6:5.

Kon unsa man ang hinungdan nga gustong maghikog ang usa ka tawo, dunay maayong epekto kon may masinaboton, maluluy-on, ug mapailobong tawo nga iyang kasumbongan sa problema. Tingali makatabang ang mga membro sa pamilya ug mga higala nga andam maminaw. Dugang pa sa empatiya ug kalulot, ang makapalig-ong mga hunahuna gikan sa Pulong sa Diyos makatabang pag-ayo niadtong nawad-an ug paglaom.

Espirituwal nga Tabang Alang sa Naguol

Basin matingala ka sa pagkahibalo kon unsa ka makapadasig ang pagbasa sa Bibliya. Bisan pag dili kini basahong naghisgot sa kahimsog sa hunahuna, ang Bibliya makatabang kanato sa pagpabili sa kinabuhi. Si Haring Solomon nag-ingon: “Akong nasayran nga walay mas maayo alang kanila kay sa pagmaya ug sa pagbuhat ug maayo samtang buhi pa; ug usab nga ang matag tawo mokaon ug moinom ug magpahimulos ug maayo sa tanan niyang kahago. Kini ang gasa sa Diyos.” (Ecclesiastes 3:12, 13) Gawas pa sa makapatagbawng buluhaton nga naghatag ug kahulogan sa kinabuhi, ang yanong mga butang—sama sa preskong hangin, kahayag sa adlaw, mga bulak, mga kahoy, ug mga langgam—maoy hinatag sa Diyos nga mga gasa nga atong kalipayan.

Labi pang makapadasig mao ang pasalig sa Bibliya nga si Jehova nga Diyos ug iyang Anak, si Jesu-Kristo, may pagtagad kanato. (Juan 3:16; 1 Pedro 5:6, 7) Sa kahaom, ang salmista nag-ingon: “Dalayegon si Jehova, nga sa adlaw-adlaw nagapas-an sa atong luwan, ang matuod nga Diyos sa atong kaluwasan.” (Salmo 68:19) Bisan tuod kita mobati tingali nga walay bili ug walay pulos, ang Diyos nagdapit kanato sa pag-ampo kaniya. Makasalig kita nga dili pagatamayon ang si bisan kinsa nga mapaubsanon ug sinsero nga mangayog tabang kaniya.

Wala gayoy usa ang makadahom ug usa ka kinabuhing walay problema karong panahona. (Job 14:1) Bisan pa niana, gipakita sa kamatuoran sa Pulong sa Diyos ngadto sa daghang tawo nga ang paghikog maoy sayop nga paagi sa pagsulbad sa ilang mga suliran. Tagda kon sa unsang paagi gitabangan ni apostol Pablo ang usa ka desperadong tigbilanggo kinsa, ‘nahigmata gikan sa pagkatulog ug nga nakakita sa mga pultahan sa prisohan nga nabuksan, mihulbot sa iyang espada ug diriyot nang maghikog, kay naghunahuna nga ang mga binilanggo nakaikyas.’ Dihadiha, nakahinapos ang maong tigbilanggo nga ang paghikog mas maayo pa kay sa makauulaw ug basin dugay nga ipahamtang nga silot nga kamatayon tungod sa iyang sayop. Ang apostol mipatugbaw: “Ayawg unsaa ang imong kaugalingon, kay ania ra kaming tanan!” May gihimo pa si Pablo gawas sa pagsulti sa maong mga pulong. Sa pagkatinuod, gihupay niya ug ni Silas ang tigbilanggo ug gitubag ang iyang pangutana: “Senyores, unsay kinahanglan kong buhaton aron maluwas?” Sila mitubag: “Tumuo sa Ginoong Jesus ug ikaw maluwas, ikaw ug ang imong panimalay.” Dayon ilang gisulti ang pulong ni Jehova ngadto kaniya ug sa iyang panimalay, nga miresulta sa ‘dihadiha nga pagpabawtismo niya ug sa iyang pamilya.’ Ang maong tigbilanggo ug ang tibuok niyang pamilya nalipay kaayo ug nakakaplag ug bag-ong kahulogan sa kinabuhi.—Buhat 16:27-35.

Karong adlawa, pagkadakong kahupayan ang pagkahibalo nga ang Diyos dili maoy hinungdan sa pagkadaotan! Gipaila diha sa iyang Pulong ang usa ka daotang espiritu, “ang usa nga gitawag Yawa ug Satanas,” nga mao ang “nagapahisalaag sa tibuok gipuy-ang yuta.” Apan hapit nang maupos ang iyang panahon. (Pinadayag 12:9, 12) Sa dili madugay, ang tanang  kaguol nga gipaagom ni Satanas ug sa iyang mga demonyo ngadto sa mga molupyo sa yuta pagataposon pinaagi sa pagpangilabot sa Diyos. Dayon ang bag-ong kalibotan sa pagkamatarong nga gisaad sa Diyos magpahinabog permanenteng kataposan sa mga hinungdan sa pagkawalay paglaom ug paghikog.—2 Pedro 3:13.

Kahupayan Alang Niadtong Nanginahanglan ug Tabang

Bisan karon, kadtong nakabsan ug paglaom makakuhag kahupayan gikan sa Kasulatan. (Roma 15:4) Si salmistang David miawit: “Usa ka kasingkasing nga gun-ob ug dugmok, Oh Diyos, dili mo pagatamayon.” (Salmo 51:17) Tinuod, dili nato kalikayan nga masugamak sa pipila ka pagsulay ug mabati ang mga epekto sa pagkadili-hingpit. Apan ang pagkuhag tukmang kahibalo bahin sa atong maluloton, mahigugmaon, ug makataronganon nga langitnong Amahan maghatag kanatog pasalig nga bililhon kita sa iyang mga mata. Ang Diyos mahimong atong pangunang Higala ug Instruktor. Kon atong ugmaron ang usa ka suod nga relasyon uban kang Jehova nga Diyos, dili gayod niya kita pakyason. “Ako, si Jehova, mao ang imong Diyos,” nag-ingon ang atong Maglalalang, “ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan.”—Isaias 48:17.

Ang pagsalig sa Diyos nakatabang sa daghang tawo. Sa pag-ilustrar: Naluya na si Mara tungod sa dugay nang depresyon sa dihang namatay ang iyang bugtong nga anak nga lalaki tungod sa usa ka aksidente sa trapiko. a Natarantar siya ug misulay sa paghikog. Apan, karon mobangon siyag sayo kada adlaw aron sa pag-atiman sa iyang buluhaton sa balay. Malipay siyang maminaw sa musika ug motabang sa uban. Ang paglaom nga “aduna unyay pagkabanhaw sa mga matarong ug sa mga dili-matarong” nakawagtang sa ubang kasakit nga gipahinabo sa makapasubong kamatayon sa iyang pinalanggang anak ug nakapalig-on sa iyang pagtuo sa Diyos. (Buhat 24:15) Sanglit si Mara wala gayoy pangandoy nga mahimong sama sa usa ka manulonda sa langit, ang mga pulong sa Salmo 37:11 nakatandog sa iyang kasingkasing: “Ang mga maaghop mismo magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait.”

Ang laing babaye nga taga-Brazil, si Sandra, naningkamot gayod nga mahimong maayo kaayong inahan ngadto sa iyang tulo ka anak. Siya miadmitir: “Puliki ko kaayo nga sa dihang namatay sa kalit lang ang akong amahan ug, sa samang higayon, nadiskobre nga may laing babaye ang akong bana, wala gani ko maghunahuna nga mag-ampo sa Diyos aron mangayog tabang.” Tungod kay nawad-an ug paglaom, si Sandra  misulay sa paghikog. Unsay nakatabang kaniya nga maulian? Ang iyang pagpabili sa espirituwal nga mga butang. “Matag gabii sa dili pa ako matulog, akong basahon ang Bibliya, ug akong sulayan sa paghanduraw ang akong kaugalingon nga anaa sa kahimtang sa mga tawong akong gibasa. Basahon usab nako ang mga magasing Ang Bantayanang Torre ug Pagmata!, ug ganahan kaayo ko sa mga sugilanon sa kinabuhi tungod kay nakatabang kini kanako nga magmakontento sa akong kahimtang sa kinabuhi.” Kay nahibalo nga si Jehova mao ang iyang suod nga higala, nakakat-on siya nga magmaespesipiko diha sa iyang mga pag-ampo.

Usa ka Palaaboton Diin Mahanaw na ang Kawalay Paglaom

Pagkadakong kahupayan ang pagkahibalo nga temporaryo lang ang pag-antos sa tawo! Sa ilalom sa pagmando sa Gingharian sa Diyos, magmalipayon ang mga bata ug mga hamtong nga sa pagkakaron mga biktima sa krimen, inhustisya, o pagkamapihigon. Sumala sa gitagna diha sa usa ka matagnaong salmo, ang tinudlo nga Hari ni Jehova, si Jesu-Kristo, “magaluwas sa kabos nga nagatuaw alang sa tabang, ingon man ang sinakit ug si bisan kinsa nga walay magtatabang.” Dugang pa, “maluoy siya sa timawa ug sa kabos, ug pagaluwason niya ang mga kalag sa mga kabos.” Sa pagkatinuod, “gikan sa pagpanglupig ug sa kapintasan tubson niya ang ilang kalag, ug ang ilang dugo mahimong bililhon sa iyang mga mata.”—Salmo 72:12-14.

Haduol na ang panahon sa katumanan nianang matagnaong mga pulong. Makapadani ba kanimo ang paghunahuna bahin sa pagtagamtam ug walay kataposang kinabuhi ilalom sa ingon nianang mga kahimtang? Kon mao, may katarongan kang malipay ug pabilhan ang kinabuhi ingong usa ka gasa gikan sa Diyos. Ug kon imong ipaambit kining makapahupay nga Kasulatanhong mga saad ngadto sa uban, makahatag ka ug dakong kalipay sa kinabuhi niadtong nanginahanglan ug tabang niining walay pagbati, walay gugma nga kalibotan.

[Footnote]

[Hulagway sa panid 6]

Dunay daghang kahimtang nga makahatag ug kalipay karon

[Hulagway sa panid 7]

Nagpaabot ka ba sa usa ka kalibotan diin mahanaw na ang kawalay paglaom?