Ang Yuta—Usa ba Lamang ka Dapit sa Pagsulay?

PAGKADAKO sa iyang kalipay! Nakapasar siya. Ang estudyante nga nagkuhag malisod nga mga pasulit sulod sa duha ka semana sa kataposan nakadawat ug makapalipay nga taho. Makasugod na siya sa trabahong dugay na niyang gitinguha.

Daghang tawo ang naglantaw sa kinabuhi sa yuta sa samang paagi. Ila kining giisip ingong pasiunang pagsulay nga kinahanglang maagian sa tanan. Kadtong “makapasar” moadto sa mas maayong kahimtang diha sa usa ka dagway sa kinabuhi luyo sa kamatayon. Sa pagkatinuod, makapasubo gayod kon ang presenteng kinabuhi—nga usa ka paglungtad lamang alang sa daghan—mao ang kinamaayohang madahom sa mga tawo. Bisan pag himsog ug hamugaway sa dakong bahin sa iyang kinabuhi, ang karakter sa Bibliya nga si Job miingon: “Ang tawo, nga natawo sa usa ka babaye, mubo ug kinabuhi ug tugob sa kasamok.”—Job 14:1.

Sa pagpabanaag sa panghunahuna sa daghan, ang New Catholic Encyclopedia nag-ingon: “Ang langitnong himaya mao ang dulnganan nga gituyo sa Diyos alang sa tawo. . . . Ang kalipay sa tawo masabtan nga nag-agad sa iyang pagbaton ug langitnong kalipay.” Ang di pa dugayng surbi sa Church of Christ sa Tinipong Bansa mipahayag nga 87 porsiyento sa gipangutana ang nagtuo nga malagmit moadto sila sa langit human sila mamatay.

Daghang dili-Kristohanon ang naglaom usab nga mobiya sa yuta aron moadto sa usa ka mas maayong dapit human mamatay. Ang mga Muslim, pananglitan, naglaom nga moadto sa usa ka langitnong paraiso. Ang mga sumusunod sa Putling Yuta nga mga sekta sa Budhismo sa Tsina ug Hapon nagtuo nga pinaagi sa walay hunong nga pagyamyam sa “Amitabha,” ang ngalan sa Budha sa Walay-Kinutobang Kahayag, sila ihimugso pag-usab didto sa Putling Yuta, o Kasadpang Paraiso, diin sila magpuyo sa tumang kalipay.

Makaiikag, ang Bibliya, ang labing kaylap nga gihubad ug giapod-apod nga balaang basahon sa kalibotan, wala maghisgot sa yuta ingong dapit nga gikan niana mokalagiw ang tawo, nga maora bag usa ka tikanganang bato padulong sa laing dapit. Pananglitan, kini nag-ingon: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” (Salmo 37:29) Makaplagan usab diha sa Bibliya ang iladong mga pulong ni Jesus: “Bulahan ang mga maaghop: kay sila magapanunod sa yuta.”—Mateo 5:5, King James Version.

Ang kasagarang panglantaw nga temporaryo lang ang atong pagpuyo sa yuta nagpasabot nga ang kamatayon mao ang pultahan paingon sa mahimayaong kinabuhi luyo sa kamatayon. Kon mao, nan usa diay ka panalangin ang kamatayon. Apan ingon ba niana ang panglantaw sa kadaghanang tawo sa kamatayon, o sila ba naningkamot nga lugwayan pa kining kinabuhia? Gipakita sa kasinatian nga kon ang mga tawo nagtagamtam ug igong kahimsog ug kasegurohan, sila dili gustong mamatay.

Bisan pa niana, sanglit ang kinabuhi dinhi sa yuta puno sa pagkadaotan ug pag-antos, gilantaw gihapon sa daghan ang langit ingong bugtong dapit diin makaplagan ang tinuod nga kalinaw ug kalipay. Usa ba lamang ka dapit sa mahimayaong kalinaw ang langit, nga dili maapektohan sa pagkadaotan ug kawalay-panagkauyon? Ug mabatonan ba ang kinabuhi luyo sa kamatayon diha lamang sa usa ka langitnong dominyo? Basin matingala ka sa mga tubag sa Bibliya. Palihog padayon sa pagbasa.