Pagpalit ug Panahon Alang sa Pagbasa ug Pagtuon
Pagpalit ug Panahon Alang sa Pagbasa ug Pagtuon
‘Palita ang nahiangayng panahon alang sa inyong kaugalingon, tungod kay ang mga adlaw tuman-kadaotan.’—EFESO 5:16.
1. Nganong maalamon nga atong bahinbahinon ang atong panahon, ug unsay gipadayag bahin kanato sa paagi nga gigamit nato ang atong panahon?
GIKAINGON nga “ang pagpili ug panahon maoy pagdaginot ug panahon.” Ang usa ka tawo nga maggahin ug tinong gitas-on sa panahon sa mga butang nga iyang gikinahanglang buhaton kasagarang dakog mahimo sa iyang panahon. Ang maalamong Haring Solomon misulat: “Ang tanan dunay tinudlong takna, dunay panahon alang sa tanang butang sa silong sa langit.” (Ecclesiastes 3:1, Moffatt) Kitang tanan managsama ug gitas-on sa panahon nga atong magamit; anaa ra nato kon unsaon nato paggamit kini. Ang atong paagi sa pagtino sa atong mga prioridad ug pagbahinbahin sa atong panahon magpadayag gayod kon unsay gipabilhan pag-ayo sa atong kasingkasing.—Mateo 6:21.
2. (a) Sa iyang Wali sa Bukid, unsay giingon ni Jesus bahin sa atong espirituwal nga panginahanglan? (b) Unsang pagsusi-sa-kaugalingon ang angayng buhaton?
2 Obligado kitang mogugol ug panahon sa pagkaon ug pagkatulog tungod kay kini maoy pisikal nga mga panginahanglan. Apan komosta ang atong espirituwal nga mga panginahanglan? Nahibalo kita nga kinahanglang matagbaw usab kini. Sa iyang Wali sa Bukid, si Jesus miingon: “Malipayon kadtong mahunahunaon sa ilang espirituwal nga panginahanglan.” (Mateo 5:3) Mao nga ‘ang matinumanon ug maalamong ulipon’ kanunayng nagpahinumdom kanato bahin sa kahinungdanon sa paggugol ug panahon sa pagbasa ug pagtuon sa Bibliya. (Mateo 24:45) Tingali naamgohan nimo kon unsa kini ka hinungdanon, apan bation tingali nimo nga wala ka gayoy panahon sa pagtuon o pagbasa sa Bibliya. Kon mao, susihon nato ang mga paagi ug mga galamiton aron kita makagahin ug panahon sa pagbasa sa Pulong sa Diyos, sa personal nga pagtuon, ug sa pagpamalandong.
Pagpangitag Panahon Alang sa Pagbasa ug Pagtuon sa Bibliya
3, 4. (a) Unsang tambag ang gihatag ni apostol Pablo bahin sa paggamit sa atong panahon, ug unsay nalakip niini? (b) Unsay gipasabot ni Pablo sa dihang nagtambag siya kanato nga ‘paliton ang nahiangayng panahon alang sa atong kaugalingon’?
3 Tungod sa panahon nga atong gikinabuhian, kitang tanan kinahanglang magpatalinghog sa mga pulong ni apostol Pablo: “Padayong magbantay pag-ayo nga ang inyong paglakaw dili ingon sa dili-maalamon kundili ingon sa maalamon nga mga tawo, nga magapalit sa nahiangayng panahon alang sa inyong kaugalingon, tungod kay ang mga adlaw tuman-kadaotan. Tungod niini hunong na sa pagkadili-makatarunganon, apan padayong sabta kon unsa ang kabubut-on ni Jehova.” (Efeso 5:15-17) Siyempre, kining tambaga nagkobre sa tanang bahin sa atong kinabuhi ingong dedikadong mga Kristohanon, lakip na sa pagpangitag panahon alang sa pag-ampo, pagtuon, pagtambong sa mga tigom, ug pagpakig-ambit sa bug-os kutob sa maarangan diha sa pagsangyaw sa “maayong balita sa gingharian.”—Mateo 24:14; 28:19, 20.
4 Daghang alagad ni Jehova karon ang morag nalisdan sa pagpahaom sa pagbasa ug seryosong pagtuon sa Bibliya diha sa ilang kinabuhi. Dayag, dili kita makadugang ug laing oras sa atong adlaw, busa nagpasabot gayod ug laing butang ang tambag ni Pablo. Sa Grego, ang mga pulong nga “magapalit sa nahiangayng panahon” nagpasabot ug pagpalit niana ginamit ang lain. Sa iyang Expository Dictionary, si W. E. Vine naghubit niana nga “pagpahimulos sa matag kahigayonan, nga himoon ang matag usa niana alang sa labing ikaayo, sanglit ang nawalang mga kahigayonan dili na mahibalik pa.” Gikan sa unsa o asa kita makapalit ug nahiangayng panahon alang sa pagbasa ug pagtuon sa Bibliya?
Kinahanglang Tinoon Nato ang mga Prioridad
5. Ngano ug sa unsang paagi angay natong ‘tinoon ang mas hinungdanong mga butang’?
5 Dugang pa sa atong sekular nga mga obligasyon, daghang espirituwal nga mga kalihokan ang kinahanglan natong hatagag pagtagad. Ingong dedikadong mga alagad ni Jehova, kita adunay “daghang buhaton diha sa buluhaton sa Ginoo.” (1 Corinto 15:58) Tungod niini, gisugo ni Pablo ang mga Kristohanon sa Filipos nga ‘tinoon ang mas hinungdanong mga butang.’ (Filipos 1:10) Nagpasabot kini nga kinahanglang tinoon ang mga prioridad. Ang espirituwal nga mga butang kinahanglang maoy unahon inay ang materyal nga mga butang. (Mateo 6:31-33) Bisan pa niana, gikinahanglan usab ang pagkatimbang diha sa pagtagbaw sa atong espirituwal nga mga obligasyon. Sa unsang paagi gibahinbahin nato ang atong panahon tali sa lainlaing bahin sa atong Kristohanong kinabuhi? Ang nagapanawng mga magtatan-aw nagtaho nga lakip sa “mas hinungdanong mga butang” nga angayng atimanon sa usa ka Kristohanon, ang personal nga pagtuon ug pagbasa sa Bibliya kasagarang maoy napasagdan.
6. Unsay nalakip sa pagpalit sa nahiangayng panahon maylabot sa sekular nga trabaho o buluhaton sa panimalay?
6 Sa ato nang nasabtan, ang pagpalit sa nahiangayng panahon naglakip sa ‘pagpahimulos sa matag higayon’ ug ‘paghimo sa matag usa niana alang sa labing ikaayo.’ Busa kon dili maayo ang atong mga batasan sa pagbasa ug pagtuon sa Bibliya, maayong mohimog pagsusi sa kaugalingon aron matino kon sa unsang paagi gigugol ang atong panahon. Kon nagkinahanglag dakong panahon ang atong sekular nga trabaho, nga naggamit ug dakong bahin sa atong panahon ug kusog, kinahanglang hisgotan nato kini diha sa atong pag-ampo kang Jehova. (Salmo 55:22) Basin makaarang kita sa paghimog mga kausaban nga maghatag nato ug taastaas nga panahon alang sa hinungdanong mga butang maylabot sa pagsimba kang Jehova, lakip na sa pagtuon ug pagbasa sa Bibliya. Husto ang giingon nga ang trabaho sa usa ka babaye dili gayod mahuman. Busa ang Kristohanong mga igsoong babaye kinahanglan usab nga magtino sa ilang mga prioridad ug maggahin ug tinong mga yugto alang sa pagbasa sa Bibliya ug sa seryosong pagtuon.
7, 8. (a) Gikan sa unsang mga kalihokan nga ang panahon kasagarang mapalit alang sa pagbasa ug pagtuon? (b) Unsay katuyoan sa lulinghayaw, ug sa unsang paagi ang paghinumdom niini makatabang kanato sa pagtino sa atong mga prioridad?
7 Ngadtongadto, kadaghanan kanato makapalit ug panahon alang sa pagtuon gikan sa dili-hinungdanong mga kalihokan. Mahimo natong pangutan-on ang atong kaugalingon, ‘Unsa ka dugay ang akong gigugol sa pagbasa sa sekular nga mga magasin o mga mantalaan, sa pagtan-aw sa mga programa sa telebisyon, sa pagpamati sa musika, o pagdula sa mga dula sa video? Mas taas bang panahon ang akong gigugol atubangan sa kompiyuter kay sa akong pagbasa sa Bibliya?’ Si Pablo miingon: “Hunong na sa pagkadili-makatarunganon, apan padayong sabta kon unsa ang kabubut-on ni Jehova.” (Efeso 5:17) Ang dili-makataronganong pagtan-aw sa telebisyon morag maoy dakong rason kon nganong daghang Saksi ang wala makagugol ug igong panahon sa personal nga pagtuon ug pagbasa sa Bibliya.—Salmo 101:3; 119:37, 47, 48.
8 Ang uban moingon tingali nga dili sila mahimong magtuon sa tanang panahon, nga sila nagkinahanglan ug diyutayng lulinghayaw. Bisan tinuod kini, maayo tingaling tagdon ang gitas-on sa panahon nga atong gigugol sa pagpahayahay ug itandi kini sa panahon nga gigugol sa aktuwal nga pagtuon o pagbasa sa Bibliya. Makapatingala tingali ang resulta. Ang lulinghayaw ug pagpahayahay, bisan tuod kinahanglanon, kinahanglang anaa sa lugar. Ang katuyoan niini mao ang pagrepresko kanato alang sa bag-ong espirituwal nga mga kalihokan. Daghang programa sa telebisyon ug mga dula sa video ang makapakapoy sa usa ka tawo, samtang ang pagbasa ug pagtuon sa Pulong sa Diyos makaparepresko ug makapalagsik.—Salmo 19:7, 8.
Kon sa Unsang Paagi ang Pipila Nakagahin ug Panahon sa Pagtuon
9. Unsa ang mga kaayohan sa pagsunod sa tambag nga gihatag diha sa bokletang Pagsusi sa Kasulatan sa Adlaw-Adlaw—1999?
9 Ang pasiuna sa 1999 nga edisyon sa bokletang Pagsusi sa Kasulatan sa Adlaw-Adlaw nag-ingon: “Labing mapuslanon ang pagtagad sa inadlaw nga teksto ug mga komento gikan niini nga bokleta sa buntag. Bation nimong ingon sa daw si Jehova, ang Dakong Instruktor, ang nagpukaw kanimo pinaagi sa iyang mga instruksiyon. Si Jesu-Kristo matagnaong gihisgotan nga nakabaton ug kaayohan gikan sa mga instruksiyon ni Jehova kada buntag: ‘Siya [Jehova] nagapukaw kada buntag; siya nagapukaw sa akong igdulungog aron makadungog sama sa mga tinudloan.’ Ang maong mga instruksiyon naghatag kang Jesus sa ‘dila sa mga tinudloan’ aron siya ‘mahibalo kon unsaon pagtubag sa usa nga gikapoy pinaagi sa pulong.’ (Isa. 30:20; 50:4; Mat. 11:28-30) Ang pagkahimong gipukaw kada buntag pinaagi sa tukma-sa-panahong tambag gikan sa Pulong sa Diyos dili lamang motabang kanimo sa pagsagubang sa imong kaugalingong mga problema kondili usab magsangkap kanimo uban sa ‘dila sa mga tinudloan’ sa pagtabang sa uban.” a
10. Sa unsang paagi ang uban nakagahin ug panahon alang sa pagbasa ug pagtuon sa Bibliya, ug uban sa unsang mga benepisyo?
10 Daghang Kristohanon ang nagsunod niining tambaga pinaagi sa pagbasa sa inadlaw nga teksto ug mga komento ug pinaagi sa pagbasa sa Bibliya o pagtuon sa buntag sayo. Sa Pransiya usa ka matinumanong payunir ang mobangon matag buntag sayo ug mogugol ug 30 minutos sa pagbasa sa Bibliya. Unsay nakapaarang kaniya sa paghimo niini sulod sa katuigan? Matod niya: “Ako napalihok pag-ayo, ug ako nagsunod sa akong eskedyul sa pagbasa bisan unsa pay mahitabo!” Bisan unsang panahon sa adlaw ang atong pilion, ang hinungdanon mao nga kita nagsunod sa atong eskedyul. Si René Mica, nga nagpayunir sulod na sa 40 ka tuig sa Uropa ug sa Habagatang Aprika, nag-ingon: “Sukad sa 1950 maoy akong tumong ang pagbasa sa tibuok Bibliya tuigtuig, nga nabuhat nako sa 49 ka beses. Akong gibati nga hinungdanon kini sa akong pagmentinar ug suod nga relasyon uban sa akong Maglalalang. Ang pagpalandong sa Pulong sa Diyos nakatabang kanako nga mas masabtan ang hustisya ni Jehova ug ang iyang ubang mga hiyas ug nahimong tuboran sa talagsaong kusog.” b
“Taganang Pagkaon sa Hustong Panahon”
11, 12. (a) Unsang espirituwal nga “taganang pagkaon” ang gitagana sa “kasaligang tinugyanan”? (b) Sa unsang paagi ang “taganang pagkaon” gitagana sa hustong panahon?
11 Sama ra nga ang regular nga mga batasan sa pagkaon makaamot sa maayong pisikal nga panglawas, ang regular nga eskedyul sa pagtuon ug pagbasa sa Bibliya makatampo sa maayong espirituwal nga kahimsog. Sa Ebanghelyo ni Lucas, atong mabasa ang mga pulong ni Jesus: “Kinsa sa pagkatinuod ang kasaligang tinugyanan, ang usa nga mabuot, kinsa itudlo sa iyang agalon ibabaw sa iyang hugpong sa mga tig-alagad aron padayong maghatag kanila sa sukod sa taganang pagkaon sa hustong panahon?” (Lucas 12:42) Sulod na sa kapin sa 120 ka tuig, ang espirituwal nga “taganang pagkaon sa hustong panahon” gitagana diha sa Ang Bantayanang Torre, maingon man sa ubang pinasikad-sa-Bibliya nga mga libro ug mga publikasyon.
12 Matikdi ang ekspresyong “sa hustong panahon.” Sa tukmang yugto, ang atong “Dakong Instruktor,” si Jehova, pinaagi sa iyang Anak ug sa ulipon nga matang, naggiya sa iyang katawhan sa mga butang maylabot sa doktrina ug panggawi. Morag kita sa tingob nakadungog ug tingog nga nag-ingon kanato: “‘Kini mao ang dalan. Lakaw kamo diha niana,’ sa inyong pagliko sa tuo o sa inyong pagliko sa wala.” (Isaias 30:20, 21) Dugang pa, sa dihang ang mga tawo magmahunahunaon sa pagbasa sa Bibliya ug sa tanang publikasyon sa Bibliya, sila kanunayng mobati nga ang mga hunahuna nga gipahayag diha niana ilabinang gitumong kanila. Oo, ang diyosnong tambag ug pagtultol moabot kanato sa hustong panahon, nga magpaarang kanato sa pagsukol sa tentasyon o sa paghimog maalamong desisyon.
Ugmara ang Maayong mga Batasan sa Pagkaon
13. Unsa ang pipila ka dili maayong mga batasan sa pagkaon sa espirituwal nga paagi?
13 Aron makabenepisyo sa bug-os gikan nianang maong “taganang pagkaon” nga gitagana sa hustong panahon, kinahanglang duna kitay maayong mga batasan sa pagkaon. Hinungdanon nga dunay regular nga eskedyul alang sa pagbasa sa Bibliya ug sa personal nga pagtuon ug sundon kana. Duna ka bay maayong mga batasan sa pagkaon sa espirituwal nga paagi ug regular nga mga yugto sa seryosong personal nga pagtuon? O taphaw lang ang imong pagbasa sa materyal nga mainampingong giandam alang kanato, nga magdalidali ug kaon, ingnon ta, o dili gayod mokaon? Ang dili maayong mga batasan sa pagkaon sa espirituwal nga paagi nagpahinabo sa pipila nga maluya sa pagtuo—nga mitalikod pa gani.—1 Timoteo 1:19; 4:15, 16.
14. Nganong hinungdanon nga mainampingong sublion ang materyal nga morag sinati na nato?
14 Ang uban mobati tingali nga nahibalo na sila sa sukaranang mga doktrina ug nga dili ang tanang artikulo nagpresentar ug bug-os bag-ong butang. Busa, ang sistematikong pagtuon ug pagtambong sa tigom dili kinahanglanon. Apan, gipakita sa Bibliya nga kinahanglang pahinumdoman kita sa mga butang nga natun-an na. (Salmo 119:95, 99; 2 Pedro 3:1; Judas 5) Maingon nga ang maayong kosinero mag-andam sa mao gihapong sukaranang mga sangkap diha sa daghang lamiang mga paagi, ang ulipon nga matang nagtagana ug makapahimsog nga espirituwal nga pagkaon diha sa nagkadaiyang mga paagi. Bisan diha sa mga artikulo nga nagkobre sa mga ulohan nga kanunayng gikomentohan sa una, dunay mas maayong mga puntos nga dili nato buot nga masayloan. Ang tinuod mao nga ang atong makuha gikan sa atong basahon nagdepende ug dako kon unsa ka taas ang panahon ug unsa ka dakong paningkamot ang atong gigugol sa pagtuon niana.
Espirituwal nga mga Benepisyo Gikan sa Pagbasa ug Pagtuon
15. Sa unsang paagi ang pagbasa ug pagtuon sa Bibliya motabang kanato nga mahimong mas maayong mga ministro sa Pulong sa Diyos?
15 Daghan ang mga benepisyo nga atong makuha gikan sa pagbasa ug pagtuon sa Bibliya. Gitabangan kita nga makab-ot ang usa sa atong sukaranang Kristohanong mga responsibilidad, nga mao, nga kita sa tinagsatagsa mahimong “usa ka mamumuo nga walay angay ikaulaw, nga sa husto nagagamit sa pulong sa kamatuoran.” (2 Timoteo 2:15) Kon mas taas nga panahon ang atong gigugol sa pagbasa ug pagtuon sa Bibliya, mas matugob ang atong hunahuna sa mga hunahuna sa Diyos. Nan, sama kang Pablo, makaarang kita sa ‘pagpangatarongan uban sa mga tawo gikan sa mga Kasulatan, nga nagapatin-aw ug nagapamatuod pinaagig mga pagpangutlo’ sa kahibulongang kamatuoran bahin sa mga katuyoan ni Jehova. (Buhat 17:2, 3) Ang atong kahanas sa pagtudlo mapauswag, ug ang atong mga kabildohay, mga pakigpulong, ug tambag mas makapalig-on sa espirituwal.—Proverbio 1:5.
16. Sa unsang personal nga mga paagi nga kita makabenepisyo gikan sa pagbasa ug pagtuon sa Pulong sa Diyos?
16 Dugang pa, ang panahon nga gigugol sa pagsusi sa Pulong sa Diyos makapaarang kanato sa pagpahiuyon sa atong kinabuhi nga mas bug-os pa diha sa mga dalan ni Jehova. (Salmo 25:4; 119:9, 10; Proverbio 6:20-23) Magpalig-on kini sa atong espirituwal nga mga hiyas, sama sa pagkamapaubsanon, pagkamaunongon, ug kalipay. (Deuteronomio 17:19, 20; Pinadayag 1:3) Sa dihang ipadapat nato ang kahibalo nga atong mabatonan gumikan sa pagbasa ug pagtuon sa Bibliya, matagamtam nato ang dagayang pag-agos sa espiritu sa Diyos diha sa atong kinabuhi, nga moresulta sa mas daghan pang bunga sa espiritu diha sa tanan natong gibuhat.—Galacia 5:22, 23.
17. Sa unsang paagi ang gitas-on sa panahong gigugol ug ang kalidad sa atong personal nga pagbasa ug pagtuon sa Bibliya makaapektar sa atong relasyon uban kang Jehova?
17 Labing hinungdanon, ang panahon nga gipalit gikan sa ubang mga kalihokan aron makabasa ug makatuon sa Pulong sa Diyos maghatag ug dagayang mga ganti maylabot sa atong relasyon sa Diyos. Si Pablo nag-ampo nga ang iyang mga isigka-Kristohanon “mapuno [unta] sa tukmang kahibalo sa kabubut-on [sa Diyos] diha sa tanang kaalam ug espirituwal nga panabot, aron magalakaw nga takos kang Jehova sa katuyoan nga makapahimuot kaniya sa bug-os.” (Colosas 1:9, 10) Sa susama, aron kita ‘makalakaw nga takos kang Jehova,’ kita kinahanglang “mapuno sa tukmang kahibalo sa iyang kabubut-on diha sa tanang kaalam ug espirituwal nga panabot.” Tin-aw, ang atong pagkaangkon sa panalangin ug pag-uyon ni Jehova magdepende pag-ayo sa gitas-on sa panahon nga gigugol ug sa kalidad sa atong personal nga pagbasa ug pagtuon sa Bibliya.
18. Unsang mga panalangin ang atong maangkon kon sundon nato ang mga pulong ni Jesus nga gisulat diha sa Juan 17:3?
18 “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Usa kana sa mga kasulatan nga labing kaylap nga gigamit sa mga Saksi ni Jehova sa pagtabang sa uban nga makasabot sa kahinungdanon sa pagtuon sa Pulong sa Diyos. Tinong hinungdanon usab nga ang matag usa kanato mohimo niana sa personal. Ang ato mismong paglaom nga mabuhing walay kataposan nag-agad sa atong pag-uswag diha sa kahibalo bahin kang Jehova ug sa iyang Anak, si Jesu-Kristo. Ug hunahunaa lang kon unsay ipasabot niana. Wala na unyay kataposan ang atong pagkat-on ug dugang bahin kang Jehova—ug walay kinutbanan ang pagtuon bahin kaniya!—Ecclesiastes 3:11; Roma 11:33.
[Mga footnote]
a Gipatik sa Watchtower Bible and Tract Society of New York, Inc.
b Tan-awa ang artikulong “Kon Kanus-a Nila Ginabasa Kini ug sa Unsang Paagi Sila Nakabenepisyo,” nga gipatik sa Mayo 1, 1995 nga isyu sa Ang Bantayanang Torre, mga panid 20-1.
Mga Pangutana Agig Pagsubli
• Unsay gipadayag sa paagi sa paggamit nato sa atong panahon?
• Gikan sa unsang mga kalihokan nga mahimong paliton ang panahon alang sa pagbasa ug pagtuon sa Bibliya?
• Nganong angay natong bantayan ang atong mga batasan sa pagkaon sa espirituwal nga paagi?
• Unsang mga benepisyo ang makuha gikan sa pagbasa ug pagtuon sa Kasulatan?
[Mga Pangutana sa Pagtuon]
[Mga hulagway sa panid 20, 21]
Ang regular nga pagbasa ug pagtuon sa Bibliya makapaarang kanato sa ‘pagdumala sa pulong sa kamatuoran sa hustong paagi’
[Hulagway sa panid 23]
Ang pagbalanse sa ubang mga kalihokan sa atong puliki nga kinabuhi ug sa espirituwal nga mga buluhaton maghatag ug dagayang mga ganti