Walay-Kataposang Kalipay—Sa Langit o sa Yuta?

ANG imo bang kalipay sa dakong bahin nag-agad kon diin ka nagpuyo? Ang kadaghanang tawo mouyon gilayon nga ang kalipay nag-agad ug dako sa mga butang sama sa maayong panglawas, usa ka katuyoan sa kinabuhi, ug maayong relasyon sa uban. Ingon niini ang pagkasulti sa usa ka panultihon sa Bibliya: “Mas maayo pa ang kalan-on nga utanon diin anaay gugma kay sa usa ka pinatambok nga torong baka ug inubanan sa pagdumot.”—Proverbio 15:17.

Apan, ikasubo nga ang atong yutan-ong puy-anan dunay taas nga kasaysayan sa pagdumot, kapintasan, ug ubang mga matang sa pagkadaotan. Apan komosta ang langit, o ang espirituhanong dominyo, diin gilaoman nga adtoan sa daghang tawo human sila mamatay? Kini ba kanunayng usa ka dapit sa makapalipayng pakigdait ug kalinaw, nga walay bisan unsang kasamok, sumala sa kasagarang gituohan?

Ang Bibliya nagtudlo nga ang Diyos nagpuyo sa langit lakip sa minilyon ka espirituhanong mga linalang nga gitawag ug mga manulonda. (Mateo 18:10; Pinadayag 5:11) Gihubit sila ingong espirituhanong “mga anak sa Diyos.” (Job 38:4, 7) Sama sa mga tawo, ang mga manulonda may kagawasan usab sa pagpili; dili sila mga robot. Busa, sila usab makapili sa pagbuhat ug husto o pagbuhat ug sayop. Ang mga manulonda mopili kaha sa pagbuhat ug sayop? Basin matingala ang uban sa pagkahibalo nga linibo ka tuig kanhi, ubay-ubayng gidaghanon sa mga manulonda, sa pagkatinuod, nagpakasala batok sa Diyos—sila mirebelde batok kaniya!—Judas 6.

Mga Rebelde sa Langit

Mitungha ang sala sa espirituhanong dominyo tungod sa pagrebelde sa usa ka manulonda, nga gitawag sa ulahi nga Satanas (Magsusupak) ug Yawa (Mapasipalahon). Kining maong masinugtanon-kanhi nga manulonda mipili sa pagbuhat ug sayop sa iyang kaugalingong pagbuot. Human niana siya nahimong daotang impluwensiya sa ubang espirituhanong mga linalang, mao nga sa panahon ni Noe, sa wala pa ang Lunop, ubay-ubay kanila ang miduyog kang Satanas sa pagrebelde batok sa Diyos.—Genesis 6:2, potnot; 2 Pedro 2:4.

Kining nakasala nga mga manulonda wala papahawaa sa langit dihadiha. Hinunoa, ang ilang pagngadto-nganhi gitugotan—lagmit may pipila ka pagdili—sulod sa linibo ka tuig. a Apan, sa dihang ang pagtugot sa Diyos niining maong mga mamumuhat ug daotan natapos, sila “gitambog” gikan sa langit, nga sa ngadtongadto pagalaglagon. Dayon usa ka tingog gikan sa langit miingon: “Gumikan niini panagsaya, kamong mga langit ug kamong mga nagapuyo niini!” (Pinadayag 12:7-12) Tin-aw, ang matinumanong mga manulonda nalipay gayod nga, sa kataposan, kadtong daotang mga tigsamoksamok gipapahawa na gikan sa mga langit!

Sa pagkonsiderar niining maong mga detalye nga kasagarang wala mahibaloi, dayag nga walay tinuod nga kalinaw sa matag higayon nga dili panumbalingon sa intelihenteng mga linalang ang mga balaod ug mga prinsipyo sa Diyos. (Isaias 57:20, 21; Jeremias 14:19, 20) Sa laing bahin, sa dihang ang tanan motuman sa balaod sa Diyos, ang pakigdait ug kalinaw motunhay. (Salmo 119:165; Isaias 48:17, 18) Busa kon ang tanang tawo mahigugma ug motuman sa Diyos ug maghigugmaay sa usag usa, dili ba ang yuta mahimo gayod nga usa ka maanindot, makapalipayng puy-anan? Ang Bibliya nagatubag ug oo!

Apan komosta na man kadtong mahakogong  modumili sa pag-usab sa ilang daotang mga dalan? Sila ba way-kataposang magtugaw sa kalinaw niadtong buot gayod nga mobuhat sa kabubut-on sa Diyos? Dili, gisanta sa Diyos ang daotang mga manulonda sa langit, ug pagasantaon usab niya ang daotang mga tawo dinhi sa yuta.

Usa ka Yuta nga Nahinloan

“Ang mga langit mao ang akong trono, ug ang yuta mao ang tumbanan sa akong tiil,” nag-ingon ang Diyos. (Isaias 66:1) Tungod kay siya ang hingpit nga simbolo sa pagkabalaan, dili pagatugotan sa Diyos nga ang iyang “tumbanan” pagadaoton sa daotan hangtod sa hangtod. (Isaias 6:1-3; Pinadayag 4:8) Maingon nga iyang gihinloan ang mga langit sa daotang mga espiritu, iya usab nga hinloan ang yuta sa tanang daotang mga tawo, sumala sa gipakita sa mosunod nga mga teksto sa Bibliya:

“Kay ang mga mamumuhat ug daotan pagaputlon, apan ang mga nagalaom kang Jehova mao ang magapanag-iya sa yuta.”—Salmo 37:9.

“Ang mga matul-id mao ang magapuyo sa yuta, ug ang walay-ikasaway igapabilin diha niana. Kon mahitungod sa mga daotan, sila pagaputlon gikan sa yuta; ug kon bahin sa mga maluibon, sila pagalukahon gikan niini.”—Proverbio 2:21, 22.

“Maoy matarong sa bahin sa Diyos nga mobayad ug kasakitan kanilang mga nagasakit kaninyo, apan, kaninyo nga nagaantos ug kasakitan, kahupayan uban kanamo inigpadayag sa Ginoong Jesus gikan sa langit uban sa iyang gamhanang mga anghel sa nagadilaab nga kalayo, sa dihang siya magapanimalos kanilang wala makaila sa Diyos ug kanilang wala mosunod sa maayong balita bahin sa atong Ginoong Jesus. Kini sila mismo makaagom sa hudisyal nga silot sa kalaglagang walay-kataposan gikan sa atubangan sa Ginoo ug gikan sa himaya sa iyang kusog.”—2 Tesalonica 1:6-9.

“Ang kalibotan [sa daotang katawhan] nagataliwan maingon man ang tinguha niini, apan siya nga nagabuhat sa kabubut-on sa Diyos magapabilin hangtod sa hangtod.”—1 Juan 2:17.

Magpabilin ba nga Malinawon ang Yuta?

Bisan pag tin-aw nga gipakita sa Kasulatan nga dunay limite ang pagtugot sa Diyos sa paglungtad sa daotan, sa unsang paagi nato maseguro nga ang daotan, sa dihang wagtangon, dili na motungha pag-usab? Kon buot sabton, pagkahuman sa Lunop sa adlaw ni Noe, mitungha na usab kini wala madugay hangtod sa punto nga kinahanglang pakgangon sa Diyos ang daotang mga laraw sa mga tawo pinaagi sa paglibog sa ilang pinulongan.—Genesis 11:1-8.

Ang atong pangunang rason sa pagsalig nga dili na motungha pag-usab ang daotan mao nga ang yuta dili na pagagamhan sa mga tawo sama sa nahitabo niini sa wala madugay human sa Lunop. Hinunoa, kini pagagamhan sa Gingharian sa Diyos. Naggahom gikan sa langit, kining maong Gingharian mao na unya ang bugtong gobyerno sa yuta. (Daniel 2:44; 7:13, 14) Kini molihok dihadiha batok kang bisan kinsang buot mosulay nga sugdan pag-usab ang pagkadaotan. (Isaias 65:20) Sa pagkatinuod, kini sa ngadtongadto magalaglag sa tagmugna mismo sa pagkadaotan—si Satanas nga Yawa—lakip sa mga demonyo, ang daotang mga manulonda nga misunod kaniya.—Roma 16:20.

Dugang pa, ang mga tawo wala nay rason nga mabalaka pa bahin sa pagkaon, panapot, puy-anan, ug panarbaho—ang pagkadili mabatonan niini karon nagtukmod sa uban nga magkinabuhi ingong mga kriminal. Oo, ang tibuok yuta mahimo unyang usa ka mabungahong paraiso uban ang kadagaya alang sa tanan.—Isaias 65:21-23; Lucas 23:43.

Labing hinungdanon, ang Gingharian mag-edukar sa mga sakop niini sa malinawong paagi sa kinabuhi ug sa samang higayon magbayaw kanila ngadto sa kinapungkayan mismo sa tawhanong pagkahingpit. (Juan 17:3; Roma 8:21) Pagkahuman niana, ang mga tawo dili na kinahanglang makigbisog sa mga kahuyangan ug sa makasasala nga mga kiling, nga maghimo sa pagkamasinugtanon sa Diyos nga posible ug makapalipay, sama kaniadto sa kahimtang sa hingpit nga tawong si Jesus. (Isaias 11:3) Sa pagkamatuod, si Jesus nagpabiling maunongon sa Diyos bisan atubangan sa dakong  tentasyon ug pag-antos—mga butang nga dili na gayod maglungtad sa kinabuhi sa Paraiso.—Hebreohanon 7:26.

Kon Nganong May Pipila Gayod nga Moadto sa Langit

Apan, daghang magbabasa sa Bibliya ang nahibalo sa mga pulong ni Jesus: ‘Sa balay sa akong Amahan adunay daghang puy-anan. . . . Ako molakaw aron sa pag-andam ug dapit alang kaninyo.’ (Juan 14:2, 3) Dili ba sumpaki kini sa ideya bahin sa kinabuhing walay kataposan sa paraisong yuta?

Kining maong mga pagtulon-an wala magsumpakiay. Sa pagkatinuod, kining duha ka pagtulon-an nagsuportar sa usag usa. Sa pagsugod, ang Bibliya nag-ingon nga limitado lamang ang gidaghanon sa matinumanong mga Kristohanon—nga mao, 144,000 kanila—ang banhawon ingong espirituhanong mga linalang aron magpuyo sa langit. Ngano mang hatagan sila niining kahibulongang ganti? Tungod kay sila ang naglangkob sa grupo nga nakita ni Juan sa usa ka panan-awon nga “midangat sa kinabuhi ug nagmando ingong mga hari uban kang Kristo sulod sa usa ka libo ka tuig.” (Pinadayag 14:1, 3; 20:4-6) Kon itandi sa binilyon dinhi sa yuta, ang 144,000 maoy usa gayod ka “gamayng panon.” (Lucas 12:32) Dugang pa, sanglit nakasinati sa kasagarang mga problema sa mga tawo, sama ni Jesus sila “makasimpatiya sa atong mga kaluyahon” samtang ilang dumalahon ang kapasig-ulian sa mga tawo ug sa yuta.—Hebreohanon 4:15.

Yuta—Ang Puy-anan sa mga Tawo sa Walay Kataposan

Pinaagi sa pagtagana sa halad lukat ni Jesu-Kristo, gisugdan sa Diyos ang pagtigom sa 144,000 halos 2,000 ka tuig na kanhi, ug may mga timailhan nga kining grupoha kompleto na karon. (Buhat 2:1-4; Galacia 4:4-7) Apan, ang halad ni Jesus dili alang sa mga sala lamang sa 144,000, ‘kondili alang usab nianang sa tibuok kalibotan.’ (1 Juan 2:2) Busa, ang tanang nagpasundayag ug pagtuo kang Jesus may paglaom sa kinabuhing walay kataposan. (Juan 3:16) Kadtong nangatulog diha sa lubnganan apan anaa sa panumdoman sa Diyos pagabanhawon, dili ngadto sa langit, kondili ngadto sa kinabuhi diha sa nahinloang yuta. (Ecclesiastes 9:5; Juan 11:11-13, 25; Buhat 24:15) Unsay magpaabot kanila didto?

Ang Pinadayag 21:1-4 nagtubag, nga nag-ingon: “Tan-awa! Ang tolda sa Diyos anaa uban sa katawhan . . . Ug iyang pahiran ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa. Ang kanhing mga butang mitaliwan na.” Handurawa—ang mga tawo mapahigawas na sa kamatayon, ug ang kasakit ug pagbangotan nga ipahinabo niini mahanaw na hangtod sa hangtod! Sa kataposan, ang orihinal nga katuyoan ni Jehova alang sa yuta ug sa katawhan aduna na unyay mahimayaong katumanan.—Genesis 1:27, 28.

Atong Kapilian—Kinabuhi o Kamatayon

Si Adan ug Eva wala gayod hatagi sa kapilian nga moadto sa langit. Ang ilang kapilian mao ang pagtuman ba kaha sa Diyos ug magkinabuhing dayon diha sa usa ka paraisong yuta o pagsupak kaniya ug mamatay. Ikasubo, ilang gipili ang pagsupak ug busa mibalik sa “abog” sa yuta. (Genesis 2:16, 17; 3:2-5, 19) Dili gayod katuyoan sa Diyos nga ang tawhanong pamilya sa katibuk-an mamatay ug magpuyo sa langit apan moagi una sa lubnganan. Gilalang sa Diyos ang tinagpulo ka libo ka manulonda aron magpuyo sa langit; kining espirituhanong mga linalang dili mga tawong nangamatay ug gipamanhaw aron magkinabuhi sa langit.—Salmo 104:1, 4; Daniel 7:10.

Unsay angay natong buhaton aron madawat ang panalangin sa kinabuhing walay kataposan diha sa Paraiso sa yuta? Ang unang lakang mao ang pagtuon sa Pulong sa Diyos, ang Balaang Bibliya. “Kini nagakahulogan ug kinabuhing walay-kataposan,” matod pa ni Jesus diha sa pag-ampo, “ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”—Juan 17:3.

Ang pagpadapat sa maong kahibalo mao ang laing lakang padulong sa walay-kataposang kalipay diha sa Paraiso. (Santiago 1:22-24) Kadtong magkinabuhi subay sa Pulong sa Diyos adunay paglaom nga makakita mismo sa katumanan sa kulbahinam nga mga tagna sama nianang gitala diha sa Isaias 11:9, nga nag-ingon: “Dili sila [mga tawo] magadaot ni magagun-ob sa tibuok nakong bukid nga balaan; tungod kay ang yuta mapuno sa kahibalo kang Jehova ingon sa katubigan nga nagtabon sa dagat mismo.”

[Footnote]

 [Mga hulagway sa panid 7]

“Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”—Salmo 37:29