Makapakigsuod Ka ba sa Usa ka Diyos nga Dili Makita?

‘Sa unsang paagi akong maugmad ang usa ka suod nga relasyon sa usa nga dili nako makita?’ tingali mangutana ka. Daw makataronganon kana nga pangutana. Apan tagda:

UNSA ka hinungdanon ang panan-aw aron makaugmad ug mahigugmaon ug malungtarong mga relasyon? Dili ba ang dili makita nga mga butang sama ra ka hinungdanon, kon dili man ugaling molabaw pa? Hinungdanon gayod! Tungod nianang maong katarongan ang pipila ka tawo nakaugmad ug suod nga relasyon sa uban pinaagig regular nga pagsinulatay—ang ilang mga sulat matinud-anong nagpahayag sa ilang mga gusto, dili gusto, tumong, prinsipyo, pagkasiaw, ug ubang mga kinaiya o mga interes.

Gipasundayag usab sa mga tawong buta nga ang panan-aw dili importante sa pag-ugmad ug suod nga relasyon sa laing tawo. Tagda ang pananglitan ni Edward ug Gwen, usa ka magtiayong buta. * Nahimamat ni Edward si Gwen diha sa usa ka eskuylahan alang sa mga buta, diin siya usa ka hamtong nga estudyante usab. Nakadayeg siya sa mga hiyas ni Gwen, ilabina sa iyang pagkamatinud-anon sa sinultihan ug panggawi, ug ang iyang ekselenteng tinamdan sa trabaho. Sa baylo, nadani si Gwen kang Edward tungod kay, matod pa niya, “siya nagpasundayag sa tanang hiyas nga maoy gimatuto kanako nga akong tuohang hinungdanon.” Nagkatrato sila, ug tulo ka tuig sa ulahi sila naminyo.

“Kon magkauban kamo,” matod pa ni Edward, “dili gayod makaapektar ang pagkabuta sa pag-ugmad ug relasyon uban sa laing tawo. Tingali dili ninyo makita ang usag usa, apan ang pagbati dili buta.” Karon, 57 ka tuig sa ulahi, sila dulot gihapon nga naghigugmaay. Ilang gisaysay nga ang sekreto sa ilang suod nga relasyon sa labing menos naglangkit sa upat ka butang: (1) pagmatikod sa mga hiyas sa laing tawo, (2) paghunahuna ug pagkadani ngadto nianang mga hiyasa, (3) padayong pagbaton ug maayong komunikasyon, ug (4) pagbuhat sa mga butang nga magkauban.

Kining upat ka punto hinungdanon sa bisan unsang maayong relasyon, tali ba kaha sa managhigala, magtiayon o, labing hinungdanon, tali sa mga tawo ug sa Diyos. Sa sunod nga artikulo, atong makita kon sa unsang paagi ang pagpadapat niining mga puntoha makatabang kanato sa pag-ugmad ug suod nga relasyon sa Diyos, bisan pag dili nato siya makita. *

[Mga footnote]