Pag-us-os sa Moral nga mga Prinsipyo

“KANANG butanga wala gayod mahitabo kaniadto,” mikomento si Helmut Schmidt, kanhing kansilyer sa Alemanya. Nasubo siya sa di pa dugayng mga kaso sa tataw nga pagkadi-matinud-anon sa publikong mga opisyales nga nahimong ulohang mga balita. “Ang mga sukdanan sa moral nawala tungod sa kadalo,” matod pa niya.

Daghan ang mouyon kaniya. Ang moral nga mga prinsipyo nga gipasukad sa Pulong sa Diyos, ang Bibliya, ug nga dugay nang gidawat nga kaylap ingong giya kon unsay husto ug sayop karon gibalewala. Kini ang kahimtang bisan sa mga nasod nga konohay gilangkit sa Kristiyanidad.

Hinungdanon ba ang Moralidad sa Bibliya?

Ang moralidad nga gipasukad sa mga pagtulon-an sa Bibliya naglakip sa pagkamatinud-anon ug integridad. Apan, nagkaylap ang panikas, korapsiyon, ug panglimbong. Ang The Times sa London nagtaho nga ang pipila ka tiktik “gikaingon nga nakasapi ug mokabat sa £100,000 sa bisan unsang higayon sa pagbaligya sa naembargo nga mga droga o sa pagwagtang sa ebidensiya batok sa mga kadagkoan sa sindikato.” Sa Austria ang panglimbong sa insyurans gikaingon nga maoy naandang paagi. Ug sa

 Alemanya ang mga siyentipiko nakurat sa dihang ang mga tigdukiduki di pa dugay nakakaplag sa “usa sa labing makauulawng mga kaso sa panglimbong sa siyensiya sa Alemanya.” Ang usa ka propesor, nga “tinahod taliwala sa mga geneticist sa Alemanya,” giakusar tungod sa pagpalsipikar o pagmaomao ug ubay-ubayng impormasyon.

Ang moralidad nga gipasukad sa Bibliya naglakip usab sa pagkamatinumanon diha sa kaminyoon, nga gituyo nga mahimong permanenteng relasyon. Apan ang nag-uswag nga gidaghanon sa mga magtiayon misangko sa korte sa diborsiyo. Ang Katolikong mantalaang Christ in der Gegenwart (Ang Kontemporaryong Kristohanon) nagtaho nga “bisan sa ‘konserbatibong’ Switzerland, nagkadaghan ang mga kaminyoon nga nabungkag.” Sa Netherlands, 33 porsiyento sa tanang kaminyoon misangko sa diborsiyo. Usa ka babaye nga nakamatikod sa kausaban sa katilingban sa Alemanya sa miaging pipila ka tuig misulat sa iyang kabalaka: “Ang kaminyoon karon giisip nga wala na sa uso ug kinaraan. Ang mga tawo dili na magminyo ug ikauban alang sa tibuok nga kinabuhi.”

Sa laing bahin, milyonmilyon ang nag-isip sa moral nga mga sukdanan nga gitudlo sa Bibliya nga kasaligan ug hinungdanon sa kinabuhi sa atong modernong kalibotan. Usa ka magtiayon nga nagpuyo sa utlanan sa Switzerland ug Alemanya nakakaplag nga ang pagkakat-on sa pagkinabuhi sumala sa moralidad sa Bibliya nakahimo nilang mas malipayon. Para kanila, “duna lamay usa ka giya alang sa tanang bahin sa kinabuhi. Kana nga giya mao ang Bibliya.”

Unsay imong hunahuna? Ang Bibliya makasilbi ba ingon nga hinungdanong giya? Ang moralidad nga gipasukad sa Bibliya praktikal ba karong adlawa?