Unsay Imong Pagsukod sa Kalamposan?

GIHUBIT sa usa ka diksiyonaryo ang kalamposan ingong “ang pagkabaton ug bahandi, kahimuot, o kadungganan.” Bug-os na ba kana nga kahubitan? Ang bahandi, kahimuot, o kadungganan mao ba lamang ang mga sukdanan sa kalamposan? Sa dili ka pa motubag, palandonga kini: Si Jesu-Kristo wala makabaton ug materyal nga bahandi panahon sa iyang bug-os nga kinabuhi. Wala niya maangkon ang kahimuot sa kadaghanang tawo; ni taas ug pagtamod kaniya ang mga tawong tigpasunod sa uso sa iyang panahon. Bisan pa niana, si Jesus maoy usa ka malamposong tawo. Ngano?

Samtang dinhi pa sa yuta, si Jesus “dato ngadto sa Diyos.” (Lucas 12:21) Human nga siya gibanhaw, siya gigantihan sa Diyos pinaagi sa pagpurongpurong kaniya ug “himaya ug dungog.” Si Jehova nagbayaw sa iyang Anak “ngadto sa usa ka labaw nga katungdanan ug sa maluloton mihatag kaniya sa ngalan nga labaw sa tanang uban pa nga ngalan.” (Hebreohanon 2:9; Filipos 2:9) Ang dalan sa kinabuhi ni Jesus nakalipay sa kasingkasing ni Jehova. (Proverbio 27:11) Ang iyang yutan-ong kinabuhi malamposon tungod kay kini nakakab-ot sa katuyoan niini. Gituman ni Jesus ang kabubut-on sa Diyos ug nakahatag ug himaya sa  Iyang ngalan. Sa baylo, gipasidunggan sa Diyos si Jesus pinaagig bahandi, kahimuot, ug kadungganan sa usa ka matang nga wala gayoy edukador, politiko, o bayani sa mga dula ang makasinati. Si Jesus maoy tinuod nga labing malamposong tawo nga nakalakaw sukad sa yuta.

Ang Kristohanong mga ginikanan nahibalo nga kon ang ilang gagmayng kabataan mosunod sa mga tunob ni Kristo, nga mahimong dato ngadto sa Diyos sa matang sa pagkadato ni Jesus, maani nila ang dagkong mga panalangin karon ug tagamtamon ang dili mahanduraw nga mga ganti diha sa umaabot nga sistema sa mga butang. Wala nay mas maayong paagi alang sa usa ka batan-on nga makasunod sa mga tunob ni Kristo kay sa pagbuhat sa buluhaton nga gihimo ni Jesus—pinaagi sa pagpakigbahin sa bug-os-panahong ministeryo kon kana posible.

Apan, diha sa ubang mga kultura, ang naandang batasan sa mga batan-on dili ang pagpakigbahin sa bug-os-panahong ministeryo. Sa dihang makatapos ang usa ka batan-ong lalaki sa iyang pagtungha, siya gidahom nga mangitag bug-os-panahong trabaho, magminyo, ug magpondo sa pagpanimuyo. Usahay, ang mga batan-on nga gikan niining matanga sa kinabuhi sa pagkasayop nagpanuko sa pagsulod sa bug-os-panahong ministeryo. (Proverbio 3:27) Ngano? Tungod sa pagpit-os, sila mosunod sa naandang mga sukdanan sa kultura. Mao kanay nahitabo kang Robert. a

Sa Dihang ang Kultura ug Konsensiya Magkasumpaki

Gipadako si Robert ingong usa sa mga Saksi ni Jehova. Sa mga tuig sa iyang pagkatin-edyer, ang iyang batasan ug pagpilig mga higala dili kaayo maayo. Ang iyang inahan nabalaka kaniya. Busa, iyang gihangyo ang usa ka payunir, usa ka bug-os-panahong ministro sa mga Saksi ni Jehova, nga dasigon siya. Gisaysay ni Robert ang sunod nga nahitabo.

“Gipabilhan ko gayod ang interes nga gipakita kanako sa usa ka igsoong lalaki nga payunir. Ang iyang maayong panig-ingnan nakapalihok kanako sa paghimo sa pagpayunir ingong karera sa dihang makatapos ako sa pagtungha. Diha niana nabalaka na usab si Mama—apan sa lahi nga rason. Abi god nimo, sa among kultura walay sapayan kon magpayunir dayon ang usa ka babaye human sa pagtungha, apan ang lalaki gidahom nga makabaton una ug pinansiyal nga kasegurohan, ug dayon siya mahimo nang maghunahuna sa pagpayunir.

“Nakakita ako ug trabaho ug nagbukas ug akong kaugalingong negosyo. Wala magdugay nalinga kaayo ako sa negosyo ug gihimo ko na lang nga rutina ang pagtambong sa mga tigom ug pagsangyaw. Gihasol ako sa akong konsensiya—nahibalo ako nga makahimo ako sa pag-alagad kang Jehova nga mas bug-os pa. Bisan pa niana, lisod kaayo ang paglingkawas gikan nianang gidahom sa uban kanako, apan nalipay ako nga nahimo ko kadto. Minyo na ako karon, ug ang akong asawa ug ako maoy mga payunir na sa milabayng duha ka tuig. Dili pa dugay, gitudlo ako ingong ministeryal nga alagad sa kongregasyon. Makaingon gayod ako nga gibati nako karon ang tinuod nga katagbawan nga nag-alagad kang Jehova uban sa akong bug-os nga kasingkasing, sa akong bug-os nga katakos.”

Kining magasina masubsob nga nagdasig sa mga batan-on nga magtuon ug kapangabuhian o maghanas ug pipila ka mapuslang mga katakos—samtang magtungha kon mahimo. Alang sa unsang katuyoan? Aron mahimong sapian? Dili. Ang pangunang katarongan mao nga aron makasuportar silag maayo sa ilang kaugalingon ingong mga hamtong ug mag-alagad kang Jehova kutob sa ilang maarangan, ilabina diha sa bug-os-panahong ministeryo. Apan, ang mahitabo kanunay mao nga ang batan-ong mga lalaki ug babaye nalinga pag-ayo sa pagpangagpas ug sekular nga karera nga sa ingon anam-anam nga nagkawala ang pagkahinungdanon sa ministeryo. Ang uban wala  gayod magpalandong sa pagsulod sa bug-os-panahong pag-alagad. Nganong wala?

Ang giingon ni Robert makahatag ug katin-awan bahin niini. Sa dihang nahanas siya sa iyang trabaho, si Robert nagbukas ug negosyo. Wala madugay, siya naglakaw diha sa daw treadmill nga walay dulnganan. Nangagpas siya nga mahimong may kasegurohan sa pinansiyal. Apan aduna bay tawo sa sulod o sa gawas sa Kristohanong kongregasyon ang bug-os makakab-ot nianang tumonga? Ang mga Kristohanon angayng mangagpas nga mahimong responsable sa pinansiyal, maningkamot pag-ayo nga makaatiman sa ilang pinansiyal nga mga obligasyon; apan angay usab nilang mahibaloan nga niining walay katinoan nga mga panahon, pipila lamang ang makaabot sa usa ka punto nga maisip gayod nila ang ilang kaugalingon nga may kasegurohan sa pinansiyal. Maoy hinungdan nga ang saad ni Jesus nga natala sa Mateo 6:33 makahupay kaayo sa mga Kristohanon.

Si Robert malipayon nga siya midesidir sa pagsunod sa tinguha sa iyang kasingkasing kay sa diktar sa iyang kultura. Karon, siya malipayon sa usa ka karera diha sa bug-os-panahong pag-alagad. Oo, ang bug-os-panahong ministeryo maoy usa ka dungganong karera. Si Robert may kalinaw sa iyang kaugalingon tungod kay siya nag-alagad kang Jehova, ‘sa bug-os niyang katakos,’ matod pa niya.

Pahimusli ang Imong mga Abilidad

Adunay daghang tawong abilidaran sa mga Saksi ni Jehova. Ang uban hait ug pangutok; ang uban hawod sa mga gimbuhaton sa kamot. Kining tanang gasa nagagikan kang Jehova, kinsa naghatag ‘ngadto sa tanan nga mga tawo ug kinabuhi ug gininhawa ug tanang butang.’ (Buhat 17:25) Kon walay kinabuhi, kining mga gasaha walay kapuslanan.

Nan, angay na lang nga atong gamiton ang atong dedikadong mga kinabuhi diha sa pag-alagad kang Jehova. Mao kanay gihukom nga buhaton sa usa ka abilidarang batan-on nga lalaki. Siya nagkinabuhi sa unang siglo K.P. Usa ka sakop sa prominenteng pamilya, siya nagdako diha sa iladong siyudad sa Tarso sa Cilicia. Bisan natawo nga Hudiyohanon, iyang napanunod ang Romanhong pagkalungsoranon gikan sa iyang amahan. Tungod niana siya nakabaton ug daghang katungod ug mga pribilehiyo. Sa dihang siya nagkahamtong, nagtuon siya ug Abogasiya uban sa usa sa hawod nga “mga propesor” sa maong panahon—si Gamaliel. Daw dili magdugay, ‘ang bahandi, kahimuot, ug kadungganan’ iya nang mabatonan.—Buhat 21:39; 22:3, 27, 28.

Kinsa kining maong batan-ong lalaki? Ang iyang ngalan mao si Saulo. Apan si Saulo nahimong usa ka Kristohanon ug sa ngadtongadto nahimong si apostol Pablo. Iyang gihiklin ang iyang unang gipangagpas ug gipahinungod ang iyang tibuok kinabuhi sa pag-alagad kang Jehova ingong Kristohanon. Si Pablo nabantog, dili ingong hawod nga abogado, kondili ingong madasigong magwawali sa maayong balita. Human makagugol ug halos 30 ka tuig ingong misyonaryo, si Pablo nagsulat ug sulat ngadto sa mga higala sa Filipos. Diha niini iyang gisubli ang pipila sa iyang nakab-ot sa miagi una pa siya nahimong Kristohanon, ug dayon siya miingon: ‘Tungod [kang Jesu-Kristo] akong nadawat ang kapildihan sa tanang butang ug giisip kini nga mga basura, aron akong maangkon si Kristo.’ (Filipos 3:8) Wala, si Pablo wala magbasol sa paagi sa iyang paggamit sa iyang kinabuhi!

Komosta ang pagbansay nga nadawat ni Pablo gikan kang Gamaliel? Napuslan ba niya kini? Oo! Sa daghang okasyon siya nakatabang sa “pagdepensa ug sa legal nga pagpundar sa maayong balita.” Apan ang pangunang buluhaton ni Pablo mao ang pagkahimong magwawali sa maayong balita—usa ka butang nga dili gayod niya makat-onan gikan sa iyang unang nakat-onan.—Filipos 1:7; Buhat 26:24, 25.

Sa susama karon, ang uban makagamit sa ilang mga katakos ug mga abilidad ug bisan sa ilang edukasyon sa pagpalambo sa intereses sa Gingharian. Si Amy, pananglitan, adunay titulo sa komersiyo diha sa unibersidad ug laing titulo sa abogasiya. Siya kaniadto dunay dakog kita nga trabaho diha sa usa ka kompaniya sa mga abogado, apan karon siya nag-alagad ingong walay suweldo nga boluntaryong ministro sa usa sa mga sangang buhatan sa Watch Tower Society. Kini ang paghubit ni Amy sa iyang kinabuhi karon: “Nagtuo ako nga nahimo ko ang labing maayong pagpili sa kinabuhi. . . . Ako walay tinguha nga makig-ilis ug dapit kang bisan kinsa sa akong katalirongan diha sa unibersidad. Magarbohon ako sa akong napiling karera. Akong nabatonan ang tanan nga akong gikinahanglan ug gusto—usa ka kontento, malipayong kinabuhi ug usa ka karera nga makalipay ug makatagbaw.”

Si Amy mipili ug usa ka karera nga nakahatag kaniya ug kalinaw sa hunahuna, katagbawan, ug panalangin ni Jehova. Siyempre mao gayod kini ang tinguha sa Kristohanong mga ginikanan alang sa ilang mga anak!

 Kalamposan Diha sa Kristohanong Ministeryo

Sa pagkatinuod, hinungdanon nga adunay hustong tinamdan sa kalamposan diha sa Kristohanong ministeryo mismo. Dili lisod nga mobating malamposon sa dihang nakagugol kita ug malipayong panahon diha sa pag-alagad sa kanataran, pagpahimutang ug literatura sa Bibliya o pag-aghat sa mga tagbalay sa pagpakigbahin sa makapaikag nga mga diskusyon sa Bibliya. Apan kon panagsa ra kitang makakita ug tawo nga mamati, basin matental kita sa paghinapos nga nag-usik-usik lamang kita sa atong panahon. Apan, hinumdomi nga ang usa sa mga kahubitan sa kalamposan mao ‘ang pagkabaton ug kahimuot.’ Kansang kahimuot ang atong gitinguhang maangkon? Kang Jehova, siyempre. Maangkon nato kini mamati man o dili ang mga tawo sa atong mensahe. Gitudloan ni Jesus ang iyang mga tinun-an ug usa ka dakong leksiyon niining bahina.

Imong mahinumdoman nga gisugo ni Jesus ang 70 ka magwawali sa Gingharian ‘ngadto sa matag siyudad ug dapit nga iyang adtoan.’ (Lucas 10:1) Sila gisugo sa pagwali ngadto sa kalungsoran ug kabaryohan nga wala si Jesus. Bag-o kini nga kasinatian kanila. Busa, gihatagan sila ni Jesus ug detalyadong mga instruksiyon sa wala pa sila ipadala. Kon makahibalag sila ug ‘usa ka higala sa kalinaw,’ hatagan nila siya ug bug-os nga pagpamatuod mahitungod sa Gingharian. Apan, kon sila ayran, sila gisugo sa pagpadayon sa ilang pagwali sa uban, nga dili mabalaka. Si Jesus mipatin-aw nga kadtong dili mamati kanila sa pagkatinuod nagsalikway kang Jehova mismo.—Lucas 10:4-7, 16.

Sa natapos ang 70 sa ilang buluhatong pagwali, sila mitaho ug balik kang Jesus ‘uban ang kalipay, nga nag-ingon: “Ginoo, bisan ang mga demonyo nailalom kanamo pinaagi sa paggamit sa imong ngalan.”’ (Lucas 10:17) Seguro kulbahinam kaayo kadto alang sa mga tawong dili-hingpit nga nakahimo sa pagpagawas ug gamhanang espiritu nga mga linalang! Apan, gipasidan-an ni Jesus ang iyang masibotong mga tinun-an: “Ayaw pagmaya tungod niini, nga ang mga espiritu napailalom kaninyo, apan pagmaya tungod kay ang inyong mga ngalan nangakudlit na sa mga langit.” (Lucas 10:20) Tingali ang 70 dili sa tanang panahon adunay gahom nga makapagawas ug mga demonyo, ni sa tanang panahon makasinati sila ug positibong mga resulta diha sa ministeryo. Apan kon sila magpabiling matinumanon, maangkon gayod nila kanunay ang kahimuot ni Jehova.

Gipabilhan Mo ba ang Bug-os-Panahong mga Alagad?

Gisultihan kas-a sa usa ka batan-ong lalaki ang usa ka Kristohanong ansiyano: “Iniggraduwar nako sa hayskul, mangita ako ug trabaho. Kon dili ako makakita ug trabaho, nan akong palandongon ang pagsulod sa usa ka matang sa bug-os-panahong pag-alagad.” Apan, kana dili mao ang hunahuna sa kadaghanan nga misulod sa payunir nga pag-alagad. Aron makapayunir, gitalikdan sa uban ang mga kahigayonan nga makapadayon sa dakog kita nga mga karera. Gibalibaran sa uban ang maayong edukasyonal nga mga kahigayonan. Sama kang apostol Pablo, sila nagsakripisyo, apan sama kang Pablo, Robert, ug Amy, wala sila magbasol sa mga pagpili nga ilang gihimo. Ilang gipabilhan ang ilang pribilehiyo sa paggamit sa ilang mga katakos sa pagdayeg kang Jehova, kinsa takos sa labing maayo nga ilang ikatanyag.

Tungod sa nagkalainlaing katarongan, daghang matinumanong mga Saksi ni Jehova dili makapayunir. Tingali sila dunay Kasulatanhong mga kaakohan nga pagaatimanon. Bisan pa, kon sila nag-alagad sa Diyos uban sa ilang bug-os ‘kasingkasing, kalag, ug hunahuna,’ si Jehova nahimuot kanila. (Mateo 22:37) Bisan pag dili sila makapayunir, sila nahibalo nga kadtong makapayunir nakapili ug maayong karera.

Si apostol Pablo nagsulat: “Hunong na sa pagpaumol sumala niining sistemaha sa mga butang.” (Roma 12:2) Nahiuyon sa tambag ni Pablo, dili gayod nato tugotan nga ang kultural o sekular nga mga sukdanan niining sistemaha maoy mag-umol sa atong panghunahuna. Makapayunir ka man o dili, himoa ang pag-alagad kang Jehova nga sentro sa imong kinabuhi. Ikaw molampos basta imong maangkon ang kahimuot ni Jehova.

[Footnote]

[Hulagway sa panid 19]

Ayaw pagpaungot diha sa daw usa ka treadmill nga walay dulnganan