Aduna ba Gayoy Mahimo ang Pag-ampo?

MATAG karon ug unya, halos tanan mobati nga kinahanglang mag-ampo. Sa pagkatinuod, ang mga tawo sa hapit tanang tinuohan kinasingkasing nga nagaampo. Pananglitan, libolibo ka higayon sa usa ka adlaw, ang usa ka Budhista magbalikbalik ug ampo ug “Mituo ako kang Amida Budha.”

Tungod sa mga problema nga ginaagoman sa tibuok yuta, makataronganong mangutana: Unsay gipaabot sa mga tawo nga makuha pinaagi sa pag-ampo? Aduna ba gayoy mahimo kining tanang pag-ampo?

Nganong Mag-ampo ang mga Tawo?

Daghang taga-Sidlakan ang nag-ampo sa ilang mga kagikan ug sa mga diyos sa Shinto o Tao. Sila nag-ampo tungod kay gusto silang makapasar sa mga eksaminasyon sa tunghaan, makaani ug daghan, o mapugngan ang mga sakit. Tungod sa ilang pagpaningkamot, ang mga Budhista naglaom nga makabaton ug kadan-agan. Ang mga Hindu tim-os nga nag-ampo sa ilang paboritong mga diyos ug mga diyosa alang sa kahibalo, bahandi, ug panalipod.

Ang ubang mga Katoliko gustong makahatag ug kaayohan sa mga tawo pinaagi sa pagdeboto sa ilang kinabuhi ingong mga monghe o mga madre diha sa siradong mga monasteryo o mga kombento, nga mag-ampo kanunay. Milyonmilyong Katoliko ang mangayog mga pabor kang Maria pinaagi sa pagsag-ulo sa mga pag-ampo, tingali pinaagi sa tabang sa mga rosaryohan. Diha sa kayutaan sa Sidlakan, gigamit sa daghang tawo ang mga ligid sa pag-ampo. Sumaysumayon sa mga Protestante ang mga pulong sa Pag-ampo sa Ginoo, ug tingali mopahayag usab sila sa ilang mga pagbati ngadto sa Diyos nga kinasingkasing. Daghang Hudiyo  mobiyahe ug layo aron mag-ampo diha sa Western Wall sa Jerusalem, nga naglaom nga mapasig-uli ang templo ug moabot ang bag-ong panahon sa kauswagan ug kalinaw.

Bisan pag ang milyonmilyon mainampoon kaayo, ang tawhanong katilingban dugang nga gihampak sa mga problema sa kalisod, pagkagiyanon, bungkag nga mga pamilya, krimen, ug gubat. Mahimo kaha nga kining mga tawhana wala mag-ampo sa hustong paagi? Busa, aduna ba gayoy mamati sa mga pag-ampo?

Aduna bay Mamati sa mga Pag-ampo?

Ang mga pag-ampo wala gayoy mahimo gawas kon kini pagadunggon. Sa dihang ang tawo mag-ampo, siya nagtuo gayod nga adunay usa diha sa dili-makita nga gingharian sa espiritu ang mamati. Apan, ang mga pag-ampo dili mapasa pinaagi lamang sa mga balod sa tingog. Daghang tawo ang nagtuo nga adunay usa nga makabasa bisan sa mga hunahuna sa tawong nag-ampo. Kinsa kaha kini siya?

Kon sa unsang paagi ang mga hunahuna nagsugod diha sa binilyong neuron nga naglangkob sa cerebral cortex sa atong utok maoy usa ka dakong misteryo sa mga tigdukiduki. Apan, sa pagkamakataronganon, ang Usa nga nagdisenyo sa utok makabasa sa maong mga hunahuna. Kanang maong usa walay lain kondili ang atong Maglalalang, si Jehova nga Diyos. (Salmo 83:18; Pinadayag 4:11) Ang mga pag-ampo kinahanglang ipatumong ngadto kaniya. Apan magpatalinghog ba si Jehova sa maong mga pag-ampo?

Dunggon ba ang Tanang Pag-ampo?

Si Haring David sa karaang Israel maoy usa ka tawong mainampoon. Ingong dinasig sa Diyos nga salmista, siya miawit: “Oh Tigpatalinghog sa pag-ampo, nganha kanimo moduol ang tanang matang sa katawhan.” (Salmo 65:2) Si Jehova makasabot sa mga pag-ampo nga gibungat diha sa bisan unsang libolibong pinulongan nga gisulti sa katawhan. Ang kamatuoran nga walay tawhanong hunahuna ang makadumalag hilabihan ka daghang impormasyon wala magpasabot nga ang Diyos dili makapatalinghog sa tanan nga nag-ampo kaniya sa dalawatong paagi.

Bisan pa niana, si Jesu-Kristo—usa ka tawo usab nga mainampoon—nagpadayag nga dili tanang pag-ampo kahimut-an sa Diyos. Matikdi kon unsay giingon ni Jesus bahin sa popular kanhi nga batasan sa pagsumaysumay sa sinag-ulo nga mga pag-ampo. Sumala sa Jerusalem Bible sa Katoliko, siya miingon: “Sa inyong mga pag-ampo ayaw pagpatakag yamyam sama sa mga pagano, kay nagtuo sila nga dunggon sila tungod sa ilang paggamit ug daghang pulong.” (Mateo 6:7) Dili kita makadahom nga dunggon ni Jehova ang mga pag-ampo nga layo sa atong tinuod nga gibati.

Nagpakita kon nganong ang ubang mga pag-ampo dili kahimut-anan sa Diyos, usa ka sanglitanan sa Bibliya nag-ingon: “Siya nga nagapahilayo sa iyang igdulungog gikan sa pagpamati sa balaod—bisan ang iyang pag-ampo maoy dulumtanan.” (Proverbio 28:9) Ang laing sanglitanan nag-ingon: “Si Jehova halayo sa mga daotan, apan siya nagapamati sa pag-ampo sa mga matarong.” (Proverbio 15:29) Sa panahon nga ang mga pangulo sa karaang Juda nakasala ug dako, si Jehova miingon: “Sa dihang inyong bayawon ang inyong mga kamot, akong tagoan ang akong mga mata gikan kaninyo. Bisan pa kon kamo maghimog daghang pag-ampo, ako dili mamati; ang inyong mga kamot napuno sa pag-ula ug dugo.”—Isaias 1:1, 15.

Si apostol Pedro naghisgot ug laing butang nga maghimo sa mga pag-ampo nga dili dalawaton sa Diyos. Si Pedro nagsulat: ‘Kamong mga bana, magpadayon sa pagpuyo sa samang paagi uban [sa inyong mga asawa] sumala sa kahibalo, nga magahatag kanila ug kadungganan samag ngadto sa usa ka sudlanan nga mas mahuyang, ang usa nga babaye, sanglit kamo mga manununod man usab uban kanila sa dili-takos nga pabor sa kinabuhi, aron nga dili mababagan ang inyong mga pag-ampo.’ (1 Pedro 3:7) Ang mga pag-ampo sa usa ka tawo nga dili magtagad niining tambaga lagmit dili pagadunggon!

Tin-aw, kinahanglang makab-ot ang pipila ka kinahanglanon aron pagadunggon ang mga pag-ampo. Apan, daghan niadtong nag-ampo walay pagtagad bahin sa pagtuman sa mga gikinahanglan sa Diyos kanato. Mao kanay hinungdan kon nganong ang daghang tim-os nga pag-ampo wala gayod mosangpot ug mas maarang-arang nga kalibotan.

Nan, unsay gikinahanglan sa Diyos aron pagadunggon ang atong mga pag-ampo? Ang tubag nalangkit gayod sa ato mismong katarongan sa pag-ampo. Sa pagkatinuod, kon buot kitang mahibalo kon duna ba gayoy mahimo ang mga pag-ampo, kinahanglang makasabot kita sa katuyoan niini. Nganong gipaposible ni Jehova nga kita makapakigsulti kaniya?

[Picture Credit Line sa panid 3]

G.P.O., Jerusalem