Ang mga Kristohanon Nakakaplag ug Kalipay sa Pag-alagad

“Adunay labaw nga kalipay sa paghatag kay sa pagdawat.”—BUHAT 20:35.

1. Unsang sayop nga tinamdan ang kaylap karong adlawa, ug nganong kini makadaot?

 SA PANAHON sa kataposang mga dekada sa katuigang 1900, ang pulong “maki-ako” kanunayng madunggan. Ang “maki-ako” nagkahulogan, sa pagkatinuod, “ako una” ug nagtumong sa usa ka tinamdan nga nagsagol ang kahakog ug kadalo nga walay pagkabalaka sa uban. Kita makatino nga sa tuig 2000, ang maki-ako nga tinamdan seguradong magpabilin. Kapila ka na nakadungog sa mga pangutanang, “Unsa may labot nako ana?” o, “Unsa may makuha nako ana?” Kining hakog nga tinamdan makadaot sa kalipay. Kasukwahi gayod kini sa prinsipyo nga gipamulong ni Jesus: “Adunay labaw nga kalipay sa paghatag kay sa pagdawat.”—Buhat 20:35.

2. Sa unsang paagi nadayag nga makahatag ug kalipay ang paghatag?

² Tinuod ba nga makahatag ug dakong kalipay ang paghatag kay sa pagdawat? Oo. Hunahunaa si Jehova nga Diyos. Anaa kaniya “ang tuboran sa kinabuhi.” (Salmo 36:9) Siya nagtagana sa tanang butang nga atong gikinahanglan aron kita magmalipayon ug magmabungahon. Sa pagkatinuod, siya ang Tuboran sa “matag maayong gasa ug matag hingpit nga hatag.” (Santiago 1:17) Si Jehova, ang “malipayong Diyos,” kanunayng nagahatag. (1 Timoteo 1:11) Gihigugma niya ang iyang tawhanong kalalangan, nga kanila daghan kaayo siyag gihatag. (Juan 3:16) Palandonga, usab, ang tawhanong pamilya. Kon ikaw usa ka ginikanan, ikaw nahibalo kon unsa ka daghan ang mga pagsakripisyo, kon unsa ka daghan ang paghatag, ang gikinahanglan aron magpadako ug usa ka anak. Ug sa daghang tuig ang anak walay kalibotan sa mga pagsakripisyo nga imong gihimo. Gibalewala lamang niya kini. Bisan pa niana, makapalipay kanimo ang pagtan-aw sa imong anak nga midako tungod sa imong dili-mahakogong paghatag. Ngano? Tungod kay imo siyang gihigugma.

3. Nganong makapalipay ang pag-alagad kang Jehova ug sa atong isigkamagtutuo?

³ Sa samang paagi, ang matuod nga pagsimba mailhan pinaagi sa paghatag nga gipasukad sa gugma. Sanglit atong gihigugma si Jehova ug atong gihigugma ang atong mga isigkamagtutuo, makapalipay ang pag-alagad kanila, sa paghatag sa atong kaugalingon ngadto kanila. (Mateo 22:37-39) Ang bisan kinsa nga magsimba nga dunay hakog nga mga motibo wala kaayoy kalipay. Apan kadtong nag-alagad nga dili-mahakogon, nga mas nabalaka sa kon unsay ilang ikahatag kay sa ilang gilaomang madawat, malipayon gayod. Kining kamatuorana masabtan pinaagi sa pagpalandong kon sa unsang paagi ang pipila ka pulong sa Bibliya nga nalangkit sa atong pagsimba gigamit diha sa Kasulatan. Atong hisgotan ang tulo niining mga pulonga niining artikuloha ug sa sunod.

Ang Publikong Pag-alagad ni Jesus

4. Unsay kinaiyahan sa “publikong pag-alagad” sa Kakristiyanohan?

⁴ Sa orihinal nga Grego, ang usa ka importanteng pulong may kalabotan sa pagsimba mao ang lei·tour·giʹa, nga gihubad nga “publikong pag-alagad” diha sa New World Translation. Sa Kakristiyanohan ang lei·tour·giʹa  maoy tinubdan sa pulong “liturhiya.” a Apan, ang seremonyal nga mga liturhiya sa Kakristiyanohan dili gayod mapuslanong pag-alagad sa publiko.

5, 6. (a) Unsang publikong pag-alagad ang gihimo sa Israel, uban sa unsang mga kaayohan? (b) Unsang mas dakong publikong pag-alagad ang mipuli nianang gihimo sa Israel, ug ngano?

⁵ Gigamit ni apostol Pablo ang Gregong pulong nga nalangkit sa lei·tour·giʹa may kalabotan sa mga saserdote sa Israel. Siya miingon: “Ang matag saserdote moanha sa iyang puwesto sa adlaw-adlaw aron sa paghatag ug publikong pag-alagad [usa ka matang sa lei·tour·giʹa] ug sa pagtanyag nga subsob sa sama rang mga halad.” (Hebreohanon 10:11) Ang mga saserdoteng Levihanon nagtanyag ug hinungdanon kaayong publikong pag-alagad sa Israel. Sila nagtudlo sa Balaod sa Diyos ug nagtanyag ug mga halad nga nagtabon sa mga sala sa mga tawo. (2 Cronicas 15:3; Malaquias 2:7) Kon ang mga saserdote ug ang mga tawo motuman sa Balaod ni Jehova, ang nasod may mga katarongan nga magmalipayon.—Deuteronomio 16:15.

⁶ Ang pagtanyag ug publikong pag-alagad ilalom sa Balaod maoy usa gayod ka pribilehiyo alang sa mga saserdoteng Israelinhon, apan ang ilang pag-alagad nawad-an ug bili sa dihang gisalikway ang Israel tungod sa pagkadili-matinumanon. (Mateo 21:43) Si Jehova naghikay ug usa ka butang nga mas dako—ang publikong pag-alagad nga gihimo ni Jesus, ang dakong Hataas nga Saserdote. Mahitungod kaniya, atong mabasa: ‘Tungod sa pagpadayong buhi hangtod sa hangtod siya naghupot sa iyang pagkasaserdote nga walay mga manununod. Tungod niana siya makahimo usab sa pagluwas sa bug-os kanila nga nagaduol sa Diyos pinaagi kaniya, tungod kay siya buhi man kanunay aron sa pagpangamuyo alang kanila.’—Hebreohanon 7:24, 25.

7. Nganong ang publikong pag-alagad ni Jesus mohatag ug walay-sama nga mga kaayohan?

⁷ Si Jesus nagpadayon ingong saserdote sa walay kataposan, nga walay mga manununod. Busa, siya lamang ang bug-os makaluwas sa mga tawo. Iyang gihimo ang walay-sama nga publikong pag-alagad, dili diha sa hinimog-tawo nga templo, kondili sa antitipikong templo, ang dakong kahikayan ni Jehova sa pagsimba nga nagsugod sa paglihok sa 29 K.P. Si Jesus karon nag-alagad diha sa Labing Balaan niana nga templo, sa langit. Siya maoy “usa ka publikong alagad [lei·tour·gosʹ] sa balaang dapit ug sa matuod nga tolda, nga gipatindog ni Jehova, ug dili sa tawo.” (Hebreohanon 8:2; 9:11, 12) Bisan pag hataas ang posisyon ni Jesus, siya maoy “usa ka publikong alagad” gihapon. Iyang gigamit ang iyang hataas nga awtoridad aron sa paghatag, dili sa pagkuha. Ug nakahatag ug kalipay kaniya ang maong paghatag. Kini maoy bahin sa ‘kalipay nga gibutang sa iyang atubangan’ ug kana nakapalig-on kaniya sa paglahutay sa iyang tibuok nga kinabuhi dinhi sa yuta.—Hebreohanon 12:2.

8. Sa unsang paagi gihimo ni Jesus ang publikong pag-alagad aron mapulihan ang Balaodnong pakigsaad?

⁸ Adunay laing bahin sa publikong pag-alagad ni Jesus. Si Pablo nagsulat: ‘Si Jesus nakabaton ug mas hamili nga publikong pag-alagad, mao nga siya usab ang tigpataliwala sa usa ka katugbang nga mas maayong pakigsaad, nga legal nga gipundar diha sa mas maayong mga saad.’ (Hebreohanon 8:6) Si Moises ang nagpataliwala sa pakigsaad nga maoy pasikaranan sa relasyon sa Israel uban kang Jehova. (Exodo 19:4, 5) Si Jesus nagpataliwala sa usa ka bag-ong pakigsaad, nga maoy nagpahimugso sa usa ka bag-ong nasod, ang “Israel sa Diyos,” nga gilangkoban sa dinihogan-sa-espiritu nga mga Kristohanon gikan sa daghang kanasoran. (Galacia 6:16; Hebreohanon 8:8, 13; Pinadayag 5:9, 10) Pagkamaayong publikong pag-alagad kadto! Pagkamalipayon nato nga kita may nahibaloan bahin kang Jesus, usa ka publikong alagad nga pinaagi kaniya kita makatanyag ug kahimut-anang pagsimba ngadto kang Jehova!—Juan 14:6.

Ang mga Kristohanon Usab Nagtanyag ug Publikong Pag-alagad

9, 10. Unsa ang pipila ka matang sa publikong pag-alagad ang gihimo sa mga Kristohanon?

⁹ Walay tawo ang makahimo ug publikong pag-alagad nga sama ka dalayegon nianang nahimo ni Jesus. Apan, sa dihang ang dinihogang mga Kristohanon makadawat sa ilang langitnong ganti, sila molingkod tupad ni Jesus ug makigbahin sa iyang publikong pag-alagad ingong langitnong mga hari ug mga saserdote. (Pinadayag 20:6; 22:1-5) Bisan pa, ang mga Kristohanon dinhi sa yuta nagahimo ug publikong pag-alagad, ug kini nakahatag kanila ug dakong kalipay. Pananglitan, sa dihang nagnihit ang pagkaon sa Palestina, si apostol Pablo nagdala ug mga donasyon gikan sa mga igsoon sa Uropa aron maalibyohan ang kalisod sa Hudiyohanong mga Kristohanon sa Judea. Usa kadto ka publikong pag-alagad. (Roma 15:27; 2 Corinto 9:12) Karong panahona, ang mga Kristohanon malipay sa pagbuhat sa samang pag-alagad, nga naghatag ug dihadihang tabang sa dihang ang ilang mga igsoon mahiagom sa kalisod, mga katalagman  sa kinaiyahan, o ubang mga kalamidad.—Proverbio 14:21.

¹⁰ Si Pablo naghisgot ug laing publikong pag-alagad sa dihang siya nagsulat: ‘Bisan kon ako gibubo nga samag halad-nga-ilimnon ibabaw sa halad ug publikong pag-alagad nga niana ang pagtuo nagtultol kaninyo, ako nalipay ug nagmaya uban kaninyong tanan.’ (Filipos 2:17) Ang paghago ni Pablo alang sa mga taga-Filipos maoy usa ka publikong pag-alagad nga gihimo tungod sa gugma ug pagkamakugihon. Ang samang publikong pag-alagad ginahimo karon, ilabina sa dinihogang mga Kristohanon, kinsa nag-alagad ingong ‘matinumanon ug maalamong ulipon,’ nga nagatagana ug espirituwal nga pagkaon sa hustong panahon. (Mateo 24:45-47) Dugang pa, ingong pundok, kini sila maoy “usa ka balaang pagkasaserdote,” nga gisugo “aron magtanyag ug espirituwal nga mga halad nga dalawaton sa Diyos pinaagi kang Jesu-Kristo” ug aron ‘kaylap nga ipahayag ang mga kahamili sa usa nga nagtawag [kanila] gikan sa kangitngit ngadto sa iyang katingalahang kahayag.’ (1 Pedro 2:5, 9) Sama kang Pablo, sila nalipay niining mga pribilehiyoa samtang sila ‘nagkugi pag-ayo’ sa pagtuman sa ilang mga responsabilidad. Ug ang ilang mga kauban nga “ubang mga karnero” nagaduyog kanila ug nagasuportar kanila sa buluhaton sa pagsugid sa mga tawo bahin kang Jehova ug sa iyang mga katuyoan. b (Juan 10:16; Mateo 24:14) Pagkahamili ug pagkamalipayong publikong pag-alagad kana!—Salmo 107:21, 22.

Pagtanyag ug Sagradong Pag-alagad

11. Sa unsang paagi ang manalagnang si Ana naghatag ug maayong panig-ingnan alang sa tanang Kristohanon?

¹¹ Laing Gregong pulong may kalabotan sa atong pagsimba mao ang la·treiʹa, nga gihubad nga “sagradong pag-alagad” diha sa New World Translation. Ang sagradong pag-alagad nalangkit sa mga buhat sa pagsimba. Pananglitan, ang 84-anyos nga balo ug manalagnang si Ana gibatbat nga ‘wala gayod mopalta sa templo, nga nagahatag ug sagradong pag-alagad [usa ka Gregong pulong nga nalangkit sa la·treiʹa] adlaw ug gabii uban ang mga pagpuasa ug mga pangamuyo.’ (Lucas 2:36, 37) Si Ana walay hunong nga nagsimba kang Jehova. Siya maoy usa ka maayong panig-ingnan kanatong tanan—batan-on ug tigulang, lalaki ug babaye. Sama kang Ana nga kinasingkasing nga nag-ampo kang Jehova ug regular nga nagsimba kaniya diha sa templo, ang atong sagradong pag-alagad naglakip sa pag-ampo ug pagtambong sa miting.—Roma 12:12; Hebreohanon 10:24, 25.

12. Unsa ang usa ka dakong bahin sa atong sagradong pag-alagad, ug sa unsang paagi usa usab kini ka publikong pag-alagad?

¹² Si apostol Pablo naghisgot ug usa ka dakong bahin sa atong sagradong pag-alagad sa dihang siya nagsulat: ‘Ang Diyos, nga akong gihatagan ug sagradong pag-alagad uban sa akong espiritu maylabot sa maayong balita bahin sa iyang Anak, mao ang akong saksi kon sa unsang paagi sa walay hunong ako naghisgot kanunay kaninyo diha sa akong mga pag-ampo.’ (Roma 1:9) Oo, ang pagsangyaw sa maayong balita dili lamang usa ka publikong pag-alagad alang niadtong mamati niana kondili usa usab ka buhat sa pagsimba kang Jehova nga Diyos. Makakita man kita ug tawong mamati o dili, ang buluhatong pagsangyaw maoy sagradong pag-alagad ngadto kang Jehova. Ang atong pagpaningkamot sa pagsulti sa uban bahin sa maayong mga hiyas ug mapuslanong mga katuyoan sa atong minahal nga langitnong Amahan makahatag gayod kanato ug dakong kalipay.—Salmo 71:23.

Asa Kita Magtanyag ug Sagradong Pag-alagad?

13. Unsay paglaom niadtong naghatag ug sagradong pag-alagad diha sa sulod nga sawang sa espirituwal nga templo ni Jehova, ug kinsa ang nalipay uban kanila?

¹³ Ngadto sa dinihogang mga Kristohanon, si Pablo nagsulat: ‘Sanglit pagadawaton nato ang usa ka gingharian nga dili matay-og, magpadayon kita sa pagbaton  sa dili-takos nga kalulot, nga pinaagi niini kita makahatag ug sagradong pag-alagad nga dalawaton sa Diyos uban ang diyosnong kahadlok ug kalisang.’ (Hebreohanon 12:28) Uban sa masaligong pagpaabot nga makapanunod sa Gingharian, ang mga dinihogan adunay dili-matarog nga pagtuo samtang nagsimba sila sa Labing Hataas. Sila lamang ang makatanyag kaniya ug sagradong pag-alagad diha sa Balaang lawak ug sa sulod nga sawang sa espirituwal nga templo ni Jehova, ug sila naghinamhinam nga nagpaabot sa pag-alagad uban kang Jesus diha sa Labing Balaan, ang langit mismo. Ang ilang mga kauban, ang ubang mga karnero nga matang, nalipay duyog kanila sa ilang katingalahang paglaom.—Hebreohanon 6:19, 20; 10:19-22.

14. Sa unsang paagi ang dakong panon makabaton ug kaayohan sa publikong pag-alagad ni Jesus?

¹⁴ Nan, komosta kadtong sakop sa ubang mga karnero? Sama sa nakitang-daan ni apostol Juan, usa ka dakong panon kanila ang nanungha niining kataposang mga adlaw, ug ‘ilang gilabhan ang ilang mga taas nga besti ug nagpaputi niini sa dugo sa Kordero.’ (Pinadayag 7:14) Kini nagkahulogan nga, sama sa ilang dinihogang kaubang mga magsisimba, sila nagpasundayag ug pagtuo sa publikong pag-alagad ni Jesus, sa iyang pagtanyag sa iyang hingpit nga tawhanong kinabuhi alang sa katawhan. Ang ubang mga karnero makabaton usab ug kaayohan sa publikong pag-alagad ni Jesus sa pagkaagi nga sila “nangupot sa pakigsaad [ni Jehova].” (Isaias 56:6) Wala, sila walay kalabotan sa bag-ong pakigsaad, apan sila nangupot niini sa pagkaagi nga sila nagsunod sa mga balaod maylabot niini ug nakigtambayayong sa mga kahikayan nga gihimo pinaagi niini. Sila nakig-uban sa Israel sa Diyos, nagkaon diha sa samang espirituwal nga lamesa ug nag-alagad uban sa mga sakop niini, nga nagdayeg sa Diyos diha sa publiko ug nagtanyag ug espirituwal nga mga halad nga makapahimuot kaniya.—Hebreohanon 13:15.

15. Diin nagtanyag ang dakong panon ug sagradong pag-alagad, ug sa unsang paagi kini nga panalangin nakaapektar kanila?

¹⁵ Sa ingon, ang dakong panon nakit-an nga ‘nagbarog atubangan sa trono ug atubangan sa Kordero, nga nagsininag puting taas nga mga besti.’ Dugang pa, “sila anaa sa atubangan sa trono sa Diyos; ug sila nagahatag kaniya ug sagradong pag-alagad adlaw ug gabii diha sa iyang templo; ug ang Usa nga naglingkod sa  trono magabuklad sa iyang tolda ibabaw kanila.” (Pinadayag 7:9, 15) Sa Israel, ang mga kinabig nagsimba sa gawas nga sawang sa templo ni Solomon. Sa samang paagi, ang dakong panon nagsimba kang Jehova diha sa gawas nga sawang sa iyang espirituwal nga templo. Ang pag-alagad didto makahatag kanila ug kalipay. (Salmo 122:1) Bisan human madawat sa ilang kataposang dinihogang mga kauban ang iyang langitnong panulondon, sila magpadayon sa pagtanyag ug balaang pag-alagad kang Jehova ingong iyang katawhan.—Pinadayag 21:3.

Sagradong Pag-alagad nga Dili Dalawaton

16. Unsang mga pasidaan ang gihatag maylabot sa sagradong pag-alagad?

¹⁶ Sa mga adlaw sa karaang Israel, ang sagradong pag-alagad kinahanglang itanyag subay sa balaod ni Jehova. (Exodo 30:9; Levitico 10:1, 2) Maingon man karon, dunay mga kinahanglanon nga pagasundon aron ang atong sagradong pag-alagad mahimong dalawaton kang Jehova. Maoy hinungdan nga gisulatan ni Pablo ang mga taga-Colosas: ‘Kami . . . wala mohunong sa pag-ampo alang kaninyo ug sa paghangyo nga kamo unta mapuno sa tukmang kahibalo sa iyang kabubut-on diha sa tanang kaalam ug espirituwal nga panabot, aron magalakaw nga takos alang kang Jehova aron bug-os makapahimuot kaniya samtang padayon kamong magapamunga sa tanang maayong buhat ug magalambo diha sa tukmang kahibalo sa Diyos.’ (Colosas 1:9, 10) Dili kita ang magbuot sa hustong paagi sa pagsimba sa Diyos. Ang tukmang kahibalo sa Kasulatan, espirituwal nga panabot, ug diyosnong kaalam hinungdanon. Kay kon dili, ang mga resulta mahimong makadaot.

17. (a) Sa unsang paagi ang sagradong pag-alagad gidaot sa panahon ni Moises? (b) Sa unsang paagi ang sagradong pag-alagad sayop nga ginatanyag karon?

¹⁷ Hinumdomi ang mga Israelinhon sa mga adlaw ni Moises. Atong mabasa: “Ang Diyos miliso ug nagtugyan kanila aron maghatag ug sagradong pag-alagad ngadto sa panon sa langit.” (Buhat 7:42) Ang mga Israelinhon nakakita sa gamhanang mga buhat nga gihimo ni Jehova alang kanila. Bisan pa niana, sila miliso ngadto sa ubang mga diyos sa dihang sa ilang hunahuna kini makahatag kanila ug bentaha. Sila dili maunongon, ug ang pagkamaunongon hinungdanon aron pagakahimut-an sa Diyos ang atong sagradong pag-alagad. (Salmo 18:25) Tinuod, pipila lang karon ang mitalikod kang Jehova aron sa pagsimba sa mga bituon o bulawang mga baka, apan adunay ubang mga matang sa idolatriya. Si Jesus nagpasidaan batok sa pag-alagad sa mga “Bahandi,” ug gitawag ni Pablo ang pagkamaibogon nga idolatriya. (Mateo 6:24; Colosas 3:5) Giduso ni Satanas ang iyang kaugalingon ingong diyos. (2 Corinto 4:4) Kining mga matanga sa idolatriya kaylap ug mga lit-ag. Hunahunaa, pananglitan, ang usa ka tawo nga nag-angkong nagsunod kang Jesus apan ang iyang tinuod nga tumong sa kinabuhi mao ang pagkahimong sapian o ang iyang tinuod nga pagsalig maoy sa iyang kaugalingon ug sa iyang kaugalingong mga ideya. Kinsa man gayoy iyang gialagaran? Unsay iyang kalainan gikan sa mga Hudiyo sa panahon ni Isaias kinsa nanumpa sa ngalan ni Jehova apan nagpasidungog sa iyang dagkong mga buhat ngadto sa mahugaw nga mga idolo?—Isaias 48:1, 5.

18. Sa unsang paagi sayop nga pagkatuman ang sagradong pag-alagad sa nangagi ug karon?

 ¹⁸ Si Jesus nagpasidaan usab: “Ang takna nagasingabot sa dihang ang matag usa nga mopatay kaninyo magahunahuna nga siya nakahatag ug sagradong pag-alagad sa Diyos.” (Juan 16:2) Si Saulo, kinsa nahimong si apostol Pablo, sa walay duhaduha nagtuo nga siya nag-alagad sa Diyos sa dihang siya ‘miuyon sa pagbuno kang Esteban’ ug “nagapangusmo pa gihapon ug hulga ug pagbuno batok sa mga tinun-an sa Ginoo.” (Buhat 8:1; 9:1) Karong panahona, ang ubang tigpasiugda sa paglunsay ug pagpuo sa tribo nangangkon usab nga nagsimba sa Diyos. Daghang tawo ang nangangkon nga nagsimba sa Diyos, apan ang ilang pagsimba sa pagkatinuod gitumong ngadto sa mga diyos sa nasyonalismo, tribalismo, sa bahandi, sa kaugalingon, o sa ubang diyos.

19. (a) Sa unsang paagi gilantaw nato ang atong sagradong pag-alagad? (b) Unsang matanga sa sagradong pag-alagad ang mohatag kanato ug kalipay?

¹⁹ Si Jesus miingon: “Si Jehova nga imong Diyos ang imong pagasimbahon, ug kaniya lamang ikaw magahatag ug sagradong pag-alagad.” (Mateo 4:10) Siya nakigsulti kang Satanas, apan pagkahinungdanon nga patalinghogan natong tanan ang iyang mga pulong! Ang pagtanyag ug balaang pag-alagad ngadto sa Soberanong Ginoo sa uniberso maoy usa ka tinuboy, makapukaw ug kahadlok nga pribilehiyo. Ug unsay ikaingon bahin sa paghimog publikong pag-alagad nga nalangkit sa atong pagsimba? Ang pagbuhat niini alang sa atong isigkatawo maoy usa ka makapalipayng buluhaton nga mohatag ug dakong kalipay. (Salmo 41:1, 2; 59:16) Bisan pa, kini nga pag-alagad mohatag lamang ug tinuod nga kalipay kon itanyag kini nga kinasingkasing ug sa hustong paagi. Kinsa man gayod ang nag-alagad sa Diyos sa hustong paagi? Kang kinsang sagradong pag-alagad ang dawaton ni Jehova? Atong matubag kining mga pangutanaha kon atong palandongon ang ikatulong pulong sa Bibliya nga may kalabotan sa atong pagsimba. Atong himoon kini sa sunod nga artikulo.

[Mga footnote]

Unsaon Nimo Pagtubag?

• Unsang dakong publikong pag-alagad ang gihimo ni Jesus?

• Unsang publikong pag-alagad ang ginahimo sa mga Kristohanon?

• Unsa ang Kristohanong sagradong pag-alagad, ug diin kini ginahimo?

• Unsa ang atong gikinahanglan aron ang atong sagradong pag-alagad pagakahimut-an sa Diyos?

[Mga Pangutana sa Pagtuon]

[Hulagway sa panid 10]

Ang mga ginikanan makatagamtam ug dakong kalipay sa paghatag

[Mga hulagway sa panid 12, 13]

Ang mga Kristohanon nagtanyag ug publikong pag-alagad sa dihang tabangan nila ang uban ug sa dihang iwali nila ang maayong balita

[Hulagway sa panid 14]

Atong gikinahanglan ang tukmang kahibalo ug pagsabot aron matino nga ang atong sagradong pag-alagad dalawaton sa Diyos