Kinsa ang mga Ministro sa Diyos Karon?
Kinsa ang mga Ministro sa Diyos Karon?
‘Ang among pagkabaton ug igong katakos nagagikan sa Diyos, nga mao gayoy naghatag kanamo ug igong katakos aron mahimong mga ministro sa usa ka bag-o nga pakigsaad.’—2 CORINTO 3:5, 6.
1, 2. Unsang responsibilidad ang giambitan sa tanang unang-siglong mga Kristohanon, apan sa unsang paagi ang mga kahimtang nabag-o?
SA UNANG siglo sa atong Komong Panahon, ang tanang Kristohanon nakig-ambit sa usa ka dakong responsibilidad—ang obligasyon sa pagsangyaw sa maayong balita. Silang tanan dinihogan ug mga ministro sa bag-ong pakigsaad. Ang uban dunay dugang mga responsibilidad, sama sa pagpanudlo diha sa kongregasyon. (1 Corinto 12:27-29; Efeso 4:11) Ang mga ginikanan dunay bug-at nga mga obligasyon sulod sa pamilya. (Colosas 3:18-21) Apan ang tanan nakig-ambit sa paninugdan ug hinungdanon nga buluhaton sa pagsangyaw. Sa orihinal nga Grego sa Kristohanong Kasulatan, kini nga responsibilidad maoy di·a·ko·niʹa—usa ka pag-alagad, o ministeryo.—Colosas 4:17.
2 Sa midagan ang panahon, ang mga kahimtang nabag-o. Usa ka matang ang mitungha, nga nailhang ang klero, kinsa nagtagana alang sa ilang kaugalingon sa pribilehiyo sa pagsangyaw. (Buhat 20:30) Ang klero maoy usa ka gamayng minoriya niadtong nagtawag sa ilang kaugalingon ingong mga Kristohanon. Ang dakong mayoriya nailhan sa ulahi ingong layko. Bisan tuod ang layko gitudloan nga sila adunay pipila ka obligasyon, apil ang pag-amot alang sa pagmentinar sa klero, ang kadaghanan nahimong mga mamiminaw lamang kon bahin sa pagsangyaw.
3, 4. (a) Sa unsang paagi ang mga indibiduwal sa Kakristiyanohan mahimong mga ministro? (b) Kinsa ang giisip nga ministro diha sa Kakristiyanohan, ug nganong lahi ang mga kahimtang taliwala sa mga Saksi ni Jehova?
3 Ang klero nangangkon nga mga ministro (gikan sa minister, Latin nga hubad sa di·aʹko·nos, “alagad”). a Aron mahimong mga ministro, sila graduwado sa mga kolehiyo o mga seminaryo ug ordinado. Ang The International Standard Bible Encyclopedia nag-ingon: “Ang ‘ordinado’ ug ‘ordinasyon’ sagad nagtumong sa usa ka espesyal nga estado nga iya sa mga ministro o mga pari pinaagi sa giuyonan sa iglesya nga mga rituwal, nga nagpasiugda nga mao ang may katungod sa pagwali sa Pulong o sa pagdumala sa mga sakramento, o sa pagdumala niining duha.” Kinsay moordinar sa mga ministro? Ang The New Encyclopædia Britannica nag-ingon: “Diha sa mga iglesya nga nagtinir gihapon ug makasaysayanhong mga obispo, ang ministro nga moordinar mao gayod ang obispo. Sa mga relihiyong Presbyteriano, ang ordinasyon himoon sa mga ministrong presbytero.”
4 Busa, diha sa mga iglesya sa Kakristiyanohan, ang pribilehiyo sa pagkahimong usa ka ministro gilimitehan pag-ayo. Apan, dili ingon niini ang kahimtang taliwala sa mga Saksi ni Jehova. Nganong dili? Tungod kay dili ingon niini ang kahimtang sa unang-siglong Kristohanong kongregasyon.
Kinsa Gayod ang mga Ministro sa Diyos?
5. Sumala sa Bibliya, kinsay naapil niadtong nag-alagad ingong mga ministro?
5 Sumala sa Bibliya, ang tanang magsisimba ni Jehova—langitnon man ug yutan-on—maoy mga ministro. Ang mga manulonda nagministeryo, o nag-alagad, kang Jesus. (Mateo 4:11; 26:53; Lucas 22:43) Ang mga manulonda usab ‘nag-alagad niadtong magapanunod ug kaluwasan.’ (Hebreohanon 1:14; Mateo 18:10) Si Jesus maoy usa ka ministro. Siya miingon: “Ang Anak sa tawo mianhi, dili aron alagaran, kundili sa pag-alagad.” (Mateo 20:28; Roma 15:8) Busa, kay gisugo man ang mga sumusunod ni Jesus sa ‘pagsunod pag-ayo sa iyang mga tunob,’ dili ikatingala nga sila usab kinahanglang mahimong mga ministro.—1 Pedro 2:21.
6. Sa unsang paagi gipaila ni Jesus nga ang iyang mga tinun-an kinahanglang mahimong mga ministro?
6 Sa wala pa siya mokayab sa langit, si Jesus miingon sa iyang mga tinun-an: “Panglakaw kamo ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagsunod sa tanang butang nga akong gisugo kaninyo.” (Mateo 28:19, 20) Ang mga tinun-an ni Jesus gisugo nga mahimong mga tighimog tinun-an—mga ministro. Ang bag-ong mga tinun-an nga ilang mahimo makakat-on sa pagtuman sa tanang butang nga gisugo ni Jesus, apil ang sugo sa paglakaw ug paghimog mga tinun-an. Lalaki o babaye, hamtong o bata, ang tinuod nga tinun-an ni Jesu-Kristo mahimong usa ka ministro.—Joel 2:28, 29.
7, 8. (a) Unsang mga teksto ang nagpakita nga ang tanang matuod nga mga Kristohanon maoy mga ministro? (b) Unsang mga pangutana ang gipatugbaw bahin sa ordinasyon?
7 Nahiuyon niini, sa adlaw sa Pentekostes 33 K.P., ang tanang tinun-an ni Jesus nga atua didto, mga lalaki ug mga babaye, miduyog sa pagwali sa “halangdong mga butang sa Diyos.” (Buhat 2:1-11) Dugang pa, si apostol Pablo nagsulat: ‘Pinaagi sa kasingkasing ang usa nagapasundayag ug pagtuo alang sa pagkamatarong, apan pinaagi sa baba ang usa magapahayag ngadto sa publiko alang sa kaluwasan.’ (Roma 10:10) Gitumong ni Pablo kadtong mga pulonga, dili sa limitadong klerong matang, kondili “ngadto sa tanan nga anaa sa Roma ingong mga hinigugma sa Diyos.” (Roma 1:1, 7) Sa susama, ang tanang ‘mga balaan sa Efeso ug mga matinumanon nga nahiusa kang Kristo Jesus’ gisugo nga ang ilang ‘mga tiil sul-oban sa mga kasangkapan sa maayong balita sa pakigdait.’ (Efeso 1:1; 6:15) Ug ang tanan nga nakadungog sa sulat nga gitumong ngadto sa mga Hebreohanon gisugo nga ‘panguptan pag-ayo ang pagpahayag ngadto sa publiko sa ilang paglaom nga walay pagkatarog.’—Hebreohanon 10:23.
8 Apan, kanus-a ang usa ka tawo mahimong ministro? Sa laing pagkasulti, kanus-a siya ordinahan? Ug kinsay moordinar kaniya?
Ordinasyon Ingong Usa ka Ministro—Kanus-a?
9. Kanus-a si Jesus giordinahan, ug pinaagi ni kinsa?
9 Mahitungod sa kon kanus-a ug pinaagi ni kinsa ang usa ka tawo ordinahan, tagda ang panig-ingnan ni Jesu-Kristo. Siya walay diploma sa ordinasyon kun titulo gikan sa usa ka seminaryo sa pagpamatuod nga siya maoy usa ka ministro, ug siya wala maordinahi ni bisan kinsang tawo. Nan, nganong makaingon kita nga siya maoy usa ka ministro? Tungod kay ang dinasig nga mga pulong ni Isaias natuman diha kaniya: “Ang espiritu ni Jehova ania ibabaw kanako, tungod kay gidihogan niya ako aron magpahayag ug maayong balita.” (Lucas 4:17-19; Isaias 61:1) Kadtong mga pulonga nagpamatuod nga si Jesus gisugo sa pagsangyaw sa maayong balita. Pinaagi ni kinsa? Sanglit gidihogan siya sa espiritu ni Jehova alang sa buluhaton, si Jesus klarong giordinahan ni Jehova nga Diyos. Kanus-a kini nahitabo? Ang espiritu ni Jehova aktuwal nga mikunsad kang Jesus sa dihang siya gibawtismohan. (Lucas 3:21, 22) Busa, sa panahon sa iyang bawtismo nga siya giordinahan.
10. Pinaagi ni kinsa nga ang usa ka Kristohanong ministro makabaton ug ‘igong katakos’?
10 Komosta ang unang-siglong mga sumusunod ni Jesus? Ang ilang estado ingong mga ministro naggikan usab kang Jehova. Si Pablo nag-ingon: ‘Ang among pagkabaton ug igong katakos nagagikan sa Diyos, nga mao gayoy naghatag kanamo ug igong katakos aron mahimong mga ministro sa usa ka bag-o nga pakigsaad.’ (2 Corinto 3:5, 6) Sa unsang paagi gihimo ni Jehova nga takos ang iyang mga magsisimba sa pagkahimong mga ministro? Tagda ang panig-ingnan ni Timoteo, kinsa gitawag ni Pablo nga ‘ministro sa Diyos sa maayong balita bahin kang Kristo.’—1 Tesalonica 3:2.
11, 12. Sa unsang paagi si Timoteo miuswag sa pagkahimong usa ka ministro?
11 Ang mosunod nga mga pulong nga gisulti ngadto kang Timoteo makatabang kanato sa pagsabot kon sa unsang paagi siya nahimong usa ka ministro: ‘Hinunoa, magpadayon ka sa mga butang nga imong nakat-onan ug nakombinsir sa pagtuo, nga nahibalo kon gikan kang kinsa nga mga tawo nakat-onan mo kini ug nga sukad pa sa pagkamasuso ikaw nahibalo na sa balaang mga sinulat, nga makapahimo kanimong maalamon alang sa kaluwasan pinaagi sa pagtuo maylabot kang Kristo Jesus.’ (2 Timoteo 3:14, 15) Ang pundasyon sa pagtuo ni Timoteo, nga nagpalihok kaniya sa pagpahayag ngadto sa publiko, mao ang kahibalo sa Kasulatan. Ang personal nga pagbasa ba lamang ang gikinahanglan niini? Dili. Si Timoteo nagkinahanglan ug tabang aron makabaton ug tukmang kahibalo ug espirituwal nga pagsabot sa iyang gibasa. (Colosas 1:9) Busa si Timoteo ‘nakombinsir sa pagtuo.’ Sanglit nahibalo na siya sa Kasulatan ‘sukad pa sa pagkamasuso,’ dayag nga ang iyang unang mga magtutudlo mao ang iyang inahan ug apohang babaye, ang iyang amahan lagmit dili usa ka magtutuo.—2 Timoteo 1:5.
12 Apan, labaw pa ang nalangkit sa pagkahimo ni Timoteo nga usa ka ministro. Una, ang iyang pagtuo nalig-on pinaagi sa pagpakig-uban sa mga Kristohanon sa dug-ol nga mga kongregasyon. Sa unsang paagi nahibaloan nato kini? Tungod kay sa dihang unang nahibalag ni Pablo si Timoteo, ang batan-on ‘may maayong rekord sa mga igsoon sa Listra ug Iconio.’ (Buhat 16:2) Dugang pa, niadto dihay pipila ka igsoon nga nagpadalag mga sulat ngadto sa mga kongregasyon aron sa paglig-on kanila. Ug ang mga magtatan-aw nagduaw kanila aron lig-onon sila. Kini nga mga tagana nakatabang sa mga Kristohanon sama kang Timoteo sa pag-uswag sa espirituwal nga paagi.—Buhat 15:22-32; 1 Pedro 1:1.
13. Kanus-a si Timoteo giordinahan ingong ministro, ug nganong makaingon ka nga ang iyang espirituwal nga pag-uswag wala matapos didto?
13 Tungod sa sugo ni Jesus nga natala diha sa Mateo 28:19, 20, kita makatino nga sa usa ka yugto sa panahon ang pagtuo ni Timoteo nagtukmod kaniya sa pagsundog kang Jesus ug nagpabawtismo. (Mateo 3:15-17; Hebreohanon 10:5-9) Kini mao ang simbolo sa bug-os-kalag nga pagpahinungod ni Timoteo sa Diyos. Sa panahon sa iyang bawtismo si Timoteo nahimong usa ka ministro. Sukad niadto, ang iyang kinabuhi, ang iyang kusog, ug ang tanang butang nga iyang nabatonan iya na sa Diyos. Kini maoy usa ka dakong bahin sa iyang pagsimba, “usa ka sagradong pag-alagad.” Apan, alang kang Timoteo dili igo ang iyang pagkahimong usa ka ministro. Siya nagpadayon sa pag-uswag sa espirituwal nga paagi, nga nahimong usa ka hamtong nga Kristohanong ministro. Kini nahitabo tungod kay si Timoteo suod nga nakig-uban sa hamtong nga mga Kristohanon sama kang Pablo, sa iyang kaugalingong personal nga pagtuon, ug sa iyang madasigong pagsangyaw nga buluhaton.—1 Timoteo 4:14; 2 Timoteo 2:2; Hebreohanon 6:1.
14. Karong panahona, sa unsang paagi ang usa ka tawo nga ‘nakiling alang sa kinabuhing walay kataposan’ mouswag paingon sa pagkahimong usa ka ministro?
14 Karong panahona, ang ordinasyon sa Kristohanong ministro nahisama niana. Ang usa nga ‘nakiling alang sa kinabuhing walay kataposan’ ginatabangan nga makakat-on bahin sa Diyos ug sa iyang mga katuyoan pinaagi sa pagtuon sa Bibliya. (Buhat 13:48) Ang tawo makakat-on sa pagpadapat sa mga prinsipyo sa Bibliya diha sa iyang kinabuhi ug sa pag-ampo nga makahuloganon ngadto sa Diyos. (Salmo 1:1-3; Proverbio 2:1-9; 1 Tesalonica 5:17, 18) Siya makig-uban sa ubang mga magtutuo ug magpahimulos sa mga tagana ug mga kahikayan nga gihimo sa ‘matinumanon ug maalamong ulipon.’ (Mateo 24:45-47; Proverbio 13:20; Hebreohanon 10:23-25) Busa siya mouswag sa organisadong pamaagi sa edukasyon.
15. Unsay mahitabo sa dihang ang usa ka tawo magpabawtismo? (Tan-awa usab ang potnot.)
15 Sa ngadtongadto, ang estudyante sa Bibliya, kay nakaugmad sa paghigugma kang Jehova nga Diyos ug sa malig-ong pagtuo sa halad lukat, magtinguha sa pagpahinungod sa iyang kaugalingon sa bug-os ngadto sa iyang langitnong Amahan. (Juan 14:1) Iyang himoon kana nga pagpahinungod diha sa personal nga pag-ampo ug dayon magpabawtismo ingong publikong simbolo nianang pribadong buhat. Ang iyang bawtismo mao ang iyang seremonya sa ordinasyon tungod kay mao kanang panahona nga siya giila ingong usa ka bug-os nga napahinungod nga alagad, usa ka di·aʹko·nos, sa Diyos. Siya kinahanglang magpabiling bulag gikan sa kalibotan. (Juan 17:16; Santiago 4:4) Iyang natanyag ang iyang bug-os nga pagkatawo nga “usa ka halad nga buhi, balaan, dalawaton sa Diyos” nga walay pagpanagana o kondisyon. (Roma 12:1) b Siya maoy usa ka ministro sa Diyos, nga nagsundog kang Kristo.
Unsa ang Kristohanong Ministeryo?
16. Unsa ang pipila ka katungdanan ni Timoteo ingong ministro?
16 Unsay naapil sa ministeryo ni Timoteo? Siya dunay linain nga mga katungdanan ingong kauban ni Pablo sa pagpanaw. Ug sa dihang siya nahimong ansiyano, si Timoteo nagkugi sa pagpanudlo ug paglig-on sa kaubang mga Kristohanon. Apan ang pangunang bahin sa iyang ministeryo, sama sa kahimtang ni Jesus ug Pablo, mao ang pagsangyaw sa maayong balita ug paghimog mga tinun-an. (Mateo 4:23; 1 Corinto 3:5) Gisultihan ni Pablo si Timoteo: “Apan, ikaw, hupti ang imong panimuot sa tanang butang, antosa ang daotan, himoa ang buluhaton sa usa ka tig-ebanghelyo, buhata sa bug-os ang imong ministeryo.”—2 Timoteo 4:5.
17, 18. (a) Sa unsang ministeryo nga nagapakigbahin ang mga Kristohanon? (b) Unsa ka hinungdanon ang buluhatong pagsangyaw ngadto sa usa ka Kristohanong ministro?
17 Sama usab niini ang Kristohanong mga ministro karong panahona. Sila nagapakigbahin sa publikong pag-ministeryo, usa ka buluhaton sa pag-ebanghelyo, nga magtudlo sa uban sa dalan sa kaluwasan pinasukad sa halad ni Jesus ug magtudlo sa mga maaghop sa pagtawag sa ngalan ni Jehova. (Buhat 2:21; 4:10-12; Roma 10:13) Sila magpamatuod gikan sa Bibliya nga ang Gingharian mao lamang ang bugtong paglaom sa nag-antos nga katawhan ug magpakita nga bisan karon moarang-arang ang mga kahimtang kon kita magkinabuhi subay sa mga prinsipyo sa Diyos. (Salmo 15:1-5; Marcos 13:10) Apan ang Kristohanong ministro dili magwali may kalabotan sa pagpadapat sa Kristohanong mga prinsipyo diha sa mga suliran sa katilingban. Hinunoa, siya magtudlo nga ang ‘diyosnong pagkamahinalaron naghupot ug saad sa kinabuhi karon ug nianang sa umaabot.’—1 Timoteo 4:8.
18 Matuod, ang kadaghanang mga ministro adunay dugang mga paagi sa pag-alagad, nga magkalahi matag Kristohanon. Daghan ang adunay mga obligasyon sa pamilya. (Efeso 5:21–6:4) Ang mga ansiyano ug ministeryal nga mga alagad adunay mga kaakohan sa kongregasyon. (1 Timoteo 3:1, 12, 13; Tito 1:5; Hebreohanon 13:7) Daghang Kristohanon nagtabang sa pagtukod ug mga Kingdom Hall. Ang uban adunay maayo kaayong pribilehiyo sa pagtrabaho ingong mga boluntaryo diha sa usa sa mga puloy-anang Bethel sa Watch Tower Society. Apan, ang tanang Kristohanong mga ministro nakigbahin sa pagsangyaw sa maayong balita. Walay mga eksepsiyon. Ang pagpakigbahin niining buluhatona ang magpaila sa usa diha sa publiko ingong usa ka matuod nga Kristohanong ministro.
Ang Tinamdan sa Usa ka Kristohanong Ministro
19, 20. Unsang tinamdan ang angayng ugmaron sa Kristohanong mga ministro?
19 Ang kadaghanang mga ministro sa Kakristiyanohan nagpaabot nga hatagan ug linain nga pagtahod, ug sila adunay mga titulo sama sa “reverendo” ug “padre.” Apan, ang usa ka Kristohanong ministro nahibalo nga si Jehova lamang ang takos simbahon. (1 Timoteo 2:9, 10) Ang Kristohanong ministro dili magtinguha nga pagatamdon pag-ayo o mangandoy nga pagatawgon niining linain nga mga titulo. (Mateo 23:8-12) Siya nahibalo nga ang paninugdang kahulogan sa di·a·ko·niʹa maoy “pag-alagad.” Ang berbo nga nalangkit niini usahay gigamit sa Bibliya maylabot sa personal nga mga pag-alagad, sama sa pagkahimong serbidor. (Lucas 4:39; 17:8; Juan 2:5) Bisan pag ang paggamit niini may kalabotan sa Kristohanong ministeryo may pagkahalangdon, ang di·aʹko·nos maoy usa ka alagad gihapon.
20 Busa ang Kristohanong ministro walay katarongan nga magpaimportante sa kaugalingon. Ang matuod nga Kristohanong mga ministro—bisan kadtong adunay linain nga mga katungdanan sa kongregasyon—maoy mapaubsanong mga ulipon. Si Jesus miingon: ‘Si bisan kinsa nga buot mahimong dako sa inyong taliwala kinahanglang mahimong inyong alagad, ug si bisan kinsa nga buot mahimong una sa inyong taliwala kinahanglan nga mahimong inyong ulipon.’ (Mateo 20:26, 27) Sa dihang nagpakita sa iyang mga tinun-an sa hustong tinamdan nga pagaugmaron, si Jesus naghugas sa ilang mga tiil, nga nagbuhat sa buluhaton sa labing ubos nga ulipon. (Juan 13:1-15) Pagkamapaubsanong pag-alagad! Busa, ang Kristohanong mga ministro mapaubsanong mag-alagad kang Jehova nga Diyos ug kang Jesu-Kristo. (2 Corinto 6:4; 11:23) Sila magpakitag pagkamapaubsanon sa hunahuna sa pag-alagad sa usag usa. Ug sa dihang magsangyaw sila sa maayong balita, sila sa dili-mahakogon nag-alagad sa ilang dili-magtutuong mga isigkatawo.—Roma 1:14, 15; Efeso 3:1-7.
Lahutay Diha sa Ministeryo
21. Sa unsang paagi si Pablo gigantihan tungod sa paglahutay diha sa ministeryo?
21 Alang kang Pablo, ang pagkahimong ministro nagkinahanglag pagkamalahutayon. Iyang gisultihan ang mga taga-Colosas nga siya nag-antos pag-ayo aron makasangyaw sa maayong balita ngadto kanila. (Colosas 1:24, 25) Apan, tungod kay siya milahutay, daghan ang midawat sa maayong balita ug nangahimong mga ministro. Sila gianak ingong mga anak sa Diyos ug mga igsoon ni Jesu-Kristo, nga may palaaboton nga mahimong espiritung mga linalang tapad kaniya sa langit. Pagkadakong ganti tungod sa pagkamalahutayon!
22, 23. (a) Nganong ang Kristohanong mga ministro karong panahona nagkinahanglan ug pagkamalahutayon? (b) Unsang maayong mga bunga ang matagamtam tungod sa Kristohanong pagkamalahutayon?
22 Ang pagkamalahutayon hinungdanon karong panahona alang sa tinuod nga mga ministro sa Diyos. Daghan ang nakigbisog adlaw-adlaw sa balatian o mga kasakit sa pagkatigulang. Ang mga ginikanan nangamas munas ginhawa—daghan kanila walay kapikas—sa pagmatuto sa ilang mga anak. Sa maisogon, gisuklan sa kabataan sa tunghaan ang daotang mga impluwensiya nga naglibot kanila. Daghang Kristohanon nag-atubang ug mapait nga mga kalisod sa panalapi. Ug daghan ang nag-antos sa paglutos o nag-atubang ug mga kalisod tungod sa ‘makuyaw nga panahong lisod sagubangon’! (2 Timoteo 3:1) Oo, duolan sa unom ka milyong ministro ni Jehova karon ang makaingon duyog kang apostol Pablo: ‘Sa tanang paagi among ginarekomendar ang among kaugalingon nga mga ministro sa Diyos, pinaagi sa daghang pag-antos.’ (2 Corinto 6:4) Ang Kristohanong mga ministro dili mohunong. Sila tinuod nga dalayegon tungod sa ilang pagkamalahutayon.
23 Dugang pa, sama sa kahimtang ni Pablo, ang pagkamalahutayon mohatag ug maayong mga bunga. Pinaagi sa paglahutay, atong mapatunhay ang atong suod nga relasyon kang Jehova ug makahatag ug kalipay sa iyang kasingkasing. (Proverbio 27:11) Atong mapalig-on ang atong kaugalingong pagtuo ug maghimog mga tinun-an, nga makapalambo sa Kristohanong panag-igsoonay. (1 Timoteo 4:16) Gipalig-on ni Jehova ang iyang mga ministro ug gipanalanginan ang ilang ministeryo sulod niining kataposang mga adlaw. Tungod niini, ang mga nahibilin sa 144,000 natigom na, ug minilyon pa adunay masaligong paglaom nga makatagamtam ug kinabuhing walay kataposan sa usa ka paraisong yuta. (Lucas 23:43; Pinadayag 14:1) Matuod, ang Kristohanong ministeryo maoy usa ka pagpasundayag sa kaluoy ni Jehova. (2 Corinto 4:1) Hinaot nga atong pakahamilion kini ug magmapasalamaton nga ang bunga niini molungtad sa walay kataposan.—1 Juan 2:17.
[Mga footnote]
a Ang Gregong pulong di·aʹko·nos maoy tinubdan sa pulong “diakono,” usa ka opisyal sa iglesya. Diha sa mga iglesya diin ang mga babaye mahimong mga diakono, sila matawag nga mga diakonisa.
b Bisan tuod ang Roma 12:1 sa espesipiko ikapadapat diha sa dinihogang mga Kristohanon, ang prinsipyo ikapadapat usab sa “ubang mga karnero.” (Juan 10:16) Sila ‘miduyog kang Jehova sa pag-alagad kaniya ug sa paghigugma sa ngalan ni Jehova, aron mahimong mga alagad niya.’—Isaias 56:6.
Makapatin-aw Ka Ba?
• Unsang responsibilidad ang giambitan sa tanang unang-siglong mga Kristohanon?
• Kanus-a ug pinaagi ni kinsa maordinahan ang usa ka Kristohanong ministro?
• Unsang tinamdan ang angayng ugmaron sa usa ka Kristohanong ministro?
• Nganong angay nga magmalahutayon ang usa ka Kristohanong ministro atubangan sa mga kalisod?
[Mga Pangutana sa Pagtuon]
[Mga hulagway sa panid 16, 17]
Si Timoteo gitudloan sa Pulong sa Diyos sukad pa sa pagkamasuso. Siya nahimong usa ka ordinadong ministro sa dihang siya gibawtismohan
[Hulagway sa panid 18]
Ang bawtismo nagsimbolo sa pagpahinungod ngadto sa Diyos ug nagtimaan sa ordinasyon sa usa ingong ministro
[Hulagway sa panid 20]
Ang Kristohanong mga ministro malipayng moalagad