Kita ang Matang nga May Pagtuo

Pagsangyaw sa Gingharian Diha sa Altiplano sa Peru

TALI sa sidlakan ug kasadpang lumbay sa Kabukirang Andes—diin nag-abot ang Bolivia ug Peru—nahimutang ang Altiplano. Ang ngalan niini nagkahulogang “hataas nga patag,” o “tagaytay.” Ang kinadak-ang bahin niini nahimutang sa Bolivia.

Ang Altiplano may gilapdon nga 100 kilometros ug gitas-on nga kapin sa 1,000 kilometros, ug ang aberids nga kahabogon niini maoy mga 3,700 metros ibabaw sa lebel sa dagat. Kon magsakay ug ayroplano paingon didto gikan sa Lima, ang kaulohang siyudad sa baybayon sa Peru, imong maagian ang natabonag-niyebe nga El Misti, usa ka bolkan nga moabot sa kapanganoran sa kahabogon nga 5,822 metros. Mituybo sa kapin sa 6,000 metros mao ang halayo nga naputos-sa-niyebeng mga tayuktok sa Nevado Ampato ug Nevado Coropuna. Kalit nga motungha sa panan-aw ang usa ka halapad nga tagaytay—ang Altiplano sa habagatang Peru.

Ang kaulohan sa Altiplano sa Peru mao ang Puno, nga nahimutang sa amihanan-kasadpang tumoy sa Lake Titicaca, ang kinatas-an nga puwedeng malawigan nga lanaw sa kalibotan. Sanglit ang rehiyon nahimutang kapin sa tulo ka kilometros sa itaas, nagkinahanglag panahon ang mga bisita sa pagpasibo sa menos nga hangin. Nagpuyo duol sa Lake Titicaca mao ang mga Indian nga Quechua ug Aymara. Nagsul-ob ug mabulokon nga pula, berde, o asul nga mga sinina, makita sila nga nagtikad sa ilang chacras, o gagmayng uma. Bisan tuod Kinatsila ang pangunang pinulongan sa Peru, ang Quechua ug Aymara ginasulti usab sa Altiplano.

Nanguna sa Buluhatong Pagsangyaw

Daghan sa mapainubsanon, kugihang mga tawo nga nagsulti ug Quechua ug Aymara di pa dugay nga nakakab-ot sa tukmang kahibalo sa kamatuoran sa Bibliya. Tungod kini ilabina sa panalangin ni Jehova sa masibotong mga paningkamot sa bug-os-panahong mga magmamantala sa Gingharian nga nag-alagad ingong mga espesyal payunir.

Pananglitan, ang mga espesyal payunir nga si José ug Silvia giasayn sa lungsod sa Putina, mga 50 kilometros gikan sa Lake Titicaca. Sulod sa duha ka bulan, si Silvia nakadumalag 16 ka pagtuon sa Bibliya sa balay, ug si José, 14. Sa unom ka bulan lamang, ang gidaghanon sa mga magmamantala sa kongregasyon miuswag gikan sa 23 ngadto sa 41. Kasamtangan, ang nanambong sa panagkatigom misaka gikan sa 48 ngadto sa kinatas-ang ihap nga 132.

“Sa pagsugod ug mga tigom sa kongregasyon niining nahilit nga mga komunidad,” matod ni José, “among nakitang praktikal nga sugdan kini sa Miting Publiko ug sa Pagtuon sa Libro sa Kongregasyon. Magpasayon kini sa bag-ong mga interesado sa pagsugod pagtambong sa mga tigom.”

Duha ka magsoong babaye—ang usa payunir—unang nagdala sa maayong balita sa nahilit nga komunidad sa Muñani, mga 20 kilometros gikan sa Putina. Didto nakasugod silag pagtuon sa Bibliya uban sa usa ka buta nga lalaki nga ginganlag Lucio. a Iyang gidapit ang iyang igsoong lalaki nga si Miguel, usa ka layko nga misyonaryong Katoliko ug lider sa komunidad gikan sa usa ka sikbit nga lugar. Sa dihang ang usa ka higala nangutana kang Miguel kon nganong mag-adtoan siya sa Muñani kada semana, siya moingon nga aron makakat-on bahin kang Jehova ug sa iyang Pulong. Dayon mitungha ang pangutana: “Nganong dili man kita magtuon sa Bibliya dinhi?” Tungod sa interes nga gipakita sa mga tawo sa komunidad ni Miguel, ang mga Saksi sa wala madugay naghikay nga himoon ang mga tigom didto.

Si Miguel misugod pagpaambit sa iyang nakat-onan sa uban. Apan komosta ang iyang katungdanan isip layko nga misyonaryong Katoliko ug tenyente gobernador? Sa usa ka miting sa tigomanan sa komunidad, iyang gipahibalo ang iyang pagluwat ingong misyonaryong Katoliko. Aduna bay laing tawo nga ipuli? May usa ka babaye sa pundok ang miingon: “Nganong nagkinahanglan pa man kita ug laing misyonaryo nga ato mang nakat-onan ang kamatuoran?” Tinuod, kini maoy pagtumong sa mga butang nga gitudlo sa mga Saksi ni  Jehova. Laing tawo ang midugang: “Dili kami mouyon nga ikaw lang ang moluwat. Nganong dili man kitang tanan ang moluwat?” Ang tanan nga mitambong sa tigom naghiusa sa pagsinggit: “Moluwat kitang tanan!”

Wala madugay gihisgotan sa usa ka tigom sa komunidad ang maylabot sa mga idolo ug mga krusipiho. Usa ka tawo ang mihangyo nga ang tanang presente mobasa sa Deuteronomio 7:25, nga nagkanayon: “Ang kinulit nga mga larawan sa ilang mga diyos inyong sunogon sa kalayo. Dili mo tinguhaon ang plata ug ang bulawan nga anaa kanila, ni kuhaon mo kini alang sa imong kaugalingon, aron dili ka malit-agan niini; kay butang kini nga dulumtanan kang Jehova nga imong Diyos.”

Dayon ang tawo mihangyo nga iisa ang kamot niadtong mouyon nga sunogon ang tanang idolo. Dihadiha ang tanang kamot giisa. (Buhat 19:19, 20) Karon 23 sa 25 ka pamilya sa komunidad nagtuon na sa Pulong sa Diyos. Duha ka tawo ang nag-alagad ingong di-bawtismadong mga magmamantala, ug lima ka magtiayon ang nagplano nga himoong legal ang ilang kaminyoon aron makabaton ug hinlong baroganan atubangan ni Jehova.—Tito 3:1; Hebreohanon 13:4.

Pagtudlo Ginamit ang mga Rekording sa “Cassette”

Sanglit daghan ang dili makamaong mobasa ug mosulat sa Altiplano, ang mga rekording sa video ug cassette sa Watch Tower diha sa lokal nga pinulongan dakog tabang—bisan sa pagdumala ug mga pagtuon sa Bibliya sa balay. Sa tabang sa audio cassette, usa ka espesyal payunir nga ginganlag Dora nagdumalag mga pagtuon sa brosyur nga Unsay Gikinahanglan sa Diyos Kanato? Pinaagig pagpatokar ug usa ka parapo sa matag higayon, iyang pangutan-on ang estudyante sa Bibliya maylabot sa mga butang nga bag-o lang nadungog.

Usa ka lokal nga estasyon sa radyo ang kanunayng magsibya ug mga bahin sa brosyur nga Gikinahanglan sa Quechua nga pinulongan. Ingon usab niana ang gihimo sa mga bahin sa magasing Pagmata! diha sa Kinatsila. Busa, daghang tawo ang modawat sa mensahe sa Gingharian ug buot nga makakat-on ug dugang sa dihang moduaw ang mga Saksi ni Jehova sa ilang mga balay.

Ang Altiplano wala kaayo mamatikdi sa kadaghanang tawo sa kalibotan apan dili ingon niana sa mga mata sa Diyos. Tungod sa gugma ni Jehova alang sa katawhan, daghang tawo nga nagpuyo sa hataas nga Altiplano sa Andes ang nahimong bahin sa panon sa katawhan nga naghimaya sa iyang halangdon nga balay sa matuod nga pagsimba.—Hageo 2:7.

[Footnote]