Ang Bibliya—Usa ka Librong Tun-anan Alang sa Pagkinabuhi

“ANG pulong sa Diyos buhi ug gamhanang nagalihok ug mas hait kay sa bisan unsang espada nga duhay-sulab . . . ug makaila sa mga hunahuna ug mga tuyo sa kasingkasing.” (Hebreohanon 4:12) Kining maong pagbatbat sa kon unsay mahimo sa Pulong sa Diyos tinong nagpaila sa Bibliya nga dili lang kay usa ka maayong basahon.

“Ang mensahe niini hinungdanon sa atong kinabuhi sama sa pagginhawa,” maoy pintok nga pagkasulti sa usa ka magsusulat sa relihiyon. Dayon siya midugang: “Kon imong tagdon ang atong pangandoy ug panginahanglan nga mahupay karon ug basahon ang Bibliya uban ang maong panglantaw, kini mopahinabog katingad-ang mga resulta.” Sama sa usa ka lamparahang hayag nga nagsiga, ang Bibliya naghatag ug kalamdagan sa daghang komplikadong mga pangutana ug mga problema sa modernong adlaw nga pagkinabuhi.—Salmo 119:105.

Sa pagkatinuod, ang kaalam nga gipahayag diha sa Bibliya dunay gahom sa pag-umol sa atong hunahuna, pagtabang kanato aron masulbad ang mga problema, pagpauswag sa kalidad sa atong kinabuhi, ug pagsangkap kanato sa mga katakos aron masagubang ang mga kahimtang nga dili nato mausab. Labing hinungdanon, ang Bibliya magpaarang kanato nga mailhan ug higugmaon ang Diyos.

Usa ka Basahon nga Mohatag ug Katuyoan

Ang Awtor sa Bibliya, si Jehova nga Diyos, ‘nasinati sa tanan natong mga dalan.’ Mas nahibalo siya bahin sa atong pisikal, emosyonal, ug espirituwal nga mga panginahanglan kay kanato. (Salmo 139:1-3) Siya mahunahunaong nagtakda ug klarong mga utlanan alang sa panggawi sa tawo. (Miqueas 6:8) Makataronganong maningkamot nga makasabot sa maong mga utlanan ug mga pagtultol ug mokat-on sa pagkinabuhi subay niini. Malipayon ang tawo kansang “kalipay anaa sa balaod ni Jehova,” nag-ingon ang salmista. “Ang tanan nga ginabuhat niya magmalamposon.” (Salmo 1:1-3) Kana nga posibilidad takos gayod nga atong susihon.

Si Maurice, usa ka retiradong maestro, nagtuo gayod nga ang Bibliya makasaysayanhon ug maayong pagkasulat. Apan, nagduhaduha siya nga kini dinasig sa Diyos. Human maminaw sa katin-awan kon nganong gihatag sa Diyos ang iyang sinulat nga Pulong ngadto sa mga tawo, gituki ni Maurice ang lainlaing mga tagna sa Bibliya. Sa batan-on pa, nagtuon siya bahin sa kasaysayan sa karaang kapanahonan, literatura, siyensiya, ug geograpiya. Iyang giangkon nga hawod ra kaayo ang iyang paglantaw sa iyang kaugalingon mao nga wala niya ilha ang daghang pananglitan nga nagsuportar sa pagkatinuod sa Bibliya. “Napuliki ako sa binuta nga pagpangagpas alang sa kaharuhay, bahandi, ug sa mga kalipayan sa kinabuhi.  Ikasubo, nagpabilin akong walay-alamag ug ignorante sa katahom ug pagkamatinud-anon sa labing bantogang basahon nga nasulat sukad.”

Nagpangedaron na karon ug mga 70, si Maurice, nga nagpasumbingay sa asoy bahin sa pagpakita ni Jesus kang apostol Tomas, mapasalamaton nga nag-ingon: “Ang akong kamot natultolan ngadto sa ‘nagdugo nga samad’ nga bug-os gayod nga nagwagtang sa tanang pagduhaduha gikan sa akong hunahuna nga ang Bibliya mao ang kamatuoran.” (Juan 20:24-29) Sama sa tukma nga giingon ni apostol Pablo, ang Bibliya moyagyag sa mga intensiyon sa kasingkasing, ug mohatag kini ug kahulogan sa kinabuhi. Usa gayod kini ka librong tun-anan alang sa pagkinabuhi.

Naghatag ug Dugang Kalig-on sa Gubot nga Kinabuhi

Ang Bibliya naghatag usab ug tambag nga motabang sa mga tawo sa pagwagtang sa ilang daotang mga batasan. Nabuntog ni Daniel ang hugaw nga batasan sa pagpanabako, maingon man nahunong ang mapatuyangong mga parti ug pag-abuso sa alkoholikong ilimnon. (Roma 13:13; 2 Corinto 7:1; Galacia 5:19-21) Sa pagkatinuod, ang bug-os nga pagwagtang sa maong mga batasan ug ang pagsul-ob “sa bag-ong pagkatawo” nagkinahanglan ug determinadong paningkamot. (Efeso 4:22-24) “Usa kadto ka hagit,” matod pa ni Daniel, “tungod kay kita dili gayod hingpit.” Bisan pa niana, siya milampos. Karon si Daniel adlaw-adlaw nga nagbasa sa Pulong sa Diyos, ug padayon kini nga nagpasuod kaniya kang Jehova.

Sa nagtubo pa siya, si Daniel may halalom gayod nga pagtahod sa Bibliya—bisan tuod wala gayod niya kini mabasa—ug mag-ampo siya sa Diyos kada gabii. Apan, duna gihapoy kulang. Wala siyay kalipay. Nahitabo ang dakong kausaban sa dihang iyang nakita ang ngalan sa Diyos diha sa Bibliya sa unang higayon. (Exodo 6:3; Salmo 83:18) Pagkahuman niadto, iyang gigamit ang ngalang Jehova sa dihang siya moampo, ug ang iyang mga pag-ampo nahimong mas personal. “Si Jehova nahimong kinasuorang persona kanako, ug siya gihapon ang akong kinasuorang higala.”

Sa wala pa magtuon bahin sa Bibliya, mangiob ang panglantaw ni Daniel sa umaabot. “Bisan kinsang ordinaryong tawo makasabot nga nagkagrabe ang kahimtang sa kalibotan,” siya nag-ingon. “Nahadlok ko, ug naningkamot ko nga mahimong puliki aron wala koy panahong maghunahuna bahin niini.” Dayon iyang nahibaloan nga ang Diyos magpatuman unya sa hustisya alang sa tanan dinhi sa nahinloang yuta, diin ang matinumanong mga tawo makatagamtam ug walay kataposang pakigdait ug kalipay. (Salmo 37:10, 11; Daniel 2:44; Pinadayag 21:3, 4) Karon si Daniel aduna nay seguradong paglaom. Kining makapalig-ong impluwensiya sa Bibliya nakapaarang kaniya sa paghupot ug positibong panglantaw sa kinabuhi.

Tabang Alang sa Pagbuntog sa Emosyonal nga mga Problema

Siyete anyos pa lang si George sa dihang namatay ang iyang inahan. Mahadlok siya nga matulog magabii tungod kay siya dili segurado kon makamata pa ba pagkasunod nga adlaw. Dayon iyang nabasa ang gisulti ni Jesus bahin sa kamatayon ug pagkabanhaw: “Ang takna nagasingabot diin kadtong tanan nga anaa sa handomanang mga lubnganan makadungog sa tingog [ni Jesus] ug managpanggula.” Natandog usab siya sa mga pulong ni Jesus: “Ako ang pagkabanhaw ug ang kinabuhi. Siya nga nagapasundayag ug pagtuo kanako, bisan pa siya mamatay, makadangat sa kinabuhi.” (Juan 5:28, 29; 11:25) Ang maong mga panghunahuna makataronganon, lohikal, ug makahupay. “Kini nga kamatuoran,” matod pa ni George, “dili lamang makadani sa hunahuna kondili makatandog usab sa kasingkasing.”

Si Daniel, nga gihisgotan ganiha, may kahadlok usab. Dili siya mamatuto sa iyang inahan nga walay tabang sa uban, busa gipapuyo siya sa daghang balay amomahan. Siya kanunayng mobati nga morag dili bahin sa pamilya ug nangandoy sa seguridad nga bation sa usa nga bahin sa usa ka mahigugmaong pamilya. Sa ngadtongadto, iyang nakaplagan ang iyang gipangita pinaagi sa iyang pagtuon sa Bibliya. Si Daniel nakapakig-uban sa Kristohanong kongregasyon sa mga Saksi ni Jehova ug nahimong bahin sa usa ka espirituwal nga pamilya, diin iyang natagamtam ang pagbati nga dawaton ug higugmaon  sa uban. Sa pagkatinuod, ang Bibliya mapuslanon sa praktikal ug makapatagbaw sa emosyonal nga paagi.

Hinumdomi, si Jehova makakita kon unsay anaa sa atong kasingkasing ug mahibalo kon unsay atong gipangita. Ang Diyos “nagatimbang sa mga kasingkasing,” ug mohatag siya “sa matag usa sumala sa iyang mga dalan.”—Proverbio 21:2; Jeremias 17:10.

Praktikal nga Tambag Bahin sa Pamilyahanong Kinabuhi

Ang Bibliya mohatag ug praktikal nga tambag kon mahitungod sa tawhanong mga relasyon. Si George miingon: “Ang panagbingkil tungod sa magkalahi nga mga personalidad o di-pagsinabtanay maoy lakip sa labing makapapit-os nga mga kahimtang sa kinabuhi.” Giunsa niya kini pag-atubang? “Kon akong gibati nga dunay tawong nasilo kanako, akong ipadapat ang prangkang tambag sa Mateo 5:23, 24: ‘Makigdait sa imong igsoon.’ Ang yanong kamatuoran nga makahimo ako sa pagpakig-estorya bahin sa panagbangi makapatunghag mga resulta. Akong mabati ang kalinaw sa Diyos nga gihisgotan sa Bibliya. Kini epektibo. Kini praktikal kaayo.”—Filipos 4:6, 7.

Kon magkasumpaki ang bana ug asawa, silang duha kinahanglan nga “magmaabtik sa pagpaminaw, magmahinay sa pagsulti, magmahinay sa kapungot.” (Santiago 1:19) Kanang tambaga makapauswag sa komunikasyon. Si George midugang: “Sa dihang akong ipadapat ang tambag sa paghigugma ug pagtratar sa akong asawa sama sa akong paghigugma ug pagtratar sa akong kaugalingon, akong makita ang dihadiha nga mga resulta. Mas masayon alang kaniya ang pagtahod kanako.” (Efeso 5:28-33) Oo, ang Bibliya nagtudlo kanato kon unsaon sa pag-ila ug pag-atubang sa atong kaugalingong pagkadili-hingpit ug kon sa unsang paagi molampos sa pagsagubang sa pagkadili-hingpit sa uban.

Tambag nga Modurar

Ang maalamong Haring Solomon nag-ingon: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.” (Proverbio 3:5, 6) Pagkayano, apan pagkalalom, nianang mga pulonga!

Ang Bibliya maoy puwersa alang sa ikaayo. Magpaarang kini sa mga mahigugmaon sa Diyos sa pagpahiuyon sa ilang kinabuhi ngadto sa iyang kabubut-on ug sa pagkakaplag ug kalipay sa “pagsubay sa balaod ni Jehova.” (Salmo 119:1) Bisag unsa pa ang atong mga kahimtang, ang Bibliya naundan sa pagtultol ug tambag nga atong gikinahanglan. (Isaias 48:17, 18) Basaha kini sa adlaw-adlaw, pamalandonga ang imong ginabasa, ug ipadapat kini. Maghimo kini sa imong hunahuna nga tin-aw ug nasentro diha sa mga butang nga putli ug maayo. (Filipos 4:8, 9) Ikaw makakat-on dili lamang kon sa unsang paagi magkinabuhi ug magkalipay sa kinabuhi kondili kon sa unsang paagi usab higugmaon ang Maglalalang sa kinabuhi.

Pinaagi sa pagsubay sa maong dalan, ang Bibliya imong pagaisipon—sama sa pag-isip sa minilyong uban pa—nga dili lang kay usa ka maayong basahon. Kini maoy usa gayod ka librong tun-anan alang sa pagkinabuhi!

[Hulagway sa panid 6]

Ang Bibliya makapalig-on sa imong determinasyon sa pagbuntog sa makadaot nga mga batasan

[Hulagway sa panid 7]

Ang Bibliya motudlo kanimo kon sa unsang paagi makigsuod sa Diyos