Gihigugma ba Nimo Pag-ayo ang mga Pahinumdom ni Jehova?
Gihigugma ba Nimo Pag-ayo ang mga Pahinumdom ni Jehova?
“Ang akong kalag nagbantay sa imong mga pahinumdom, ug gihigugma ko kini pag-ayo.”—SALMO 119:167.
1. Asa nato ilabinang makita ang masubsob nga mga paghisgot sa mga pahinumdom ni Jehova?
BUOT ni Jehova nga magmalipayon ang iyang katawhan. Siyempre, aron matagamtam ang tinuod nga kalipay, kita kinahanglang motuman sa balaod sa Diyos ug mosunod sa iyang mga sugo. Aron matagamtam kana, siya naghatag kanato ug mga pahinumdom. Kini masubsob nga gihisgotan sa Kasulatan, ilabina sa Salmo 119, nga lagmit gihimo sa batan-on nga Prinsipeng Hezekias sa Juda. Kining matahom nga awit nagsugod sa mga pulong: “Malipayon ang mga walay-ikasaway diha sa ilang dalan, ang mga nagsubay sa balaod ni Jehova. Malipayon ang mga nagsunod sa iyang mga pahinumdom; sila nagpadayon pagpangita kaniya sa bug-os nga kasingkasing.”—Salmo 119:1, 2.
2. Sa unsang paagi ang mga pahinumdom sa Diyos nalangkit sa kalipay?
2 Kita “nagsubay sa balaod ni Jehova” pinaagi sa pagkuhag tukmang kahibalo sa iyang Pulong ug sa pagpadapat niini sa kinabuhi. Apan, kay dili man kita hingpit, kita nagkinahanglan ug mga pahinumdom. Ang Hebreohanong pulong nga gihubad ug “mga pahinumdom” nagpaila nga gipasilsil sa Diyos diha sa atong mga hunahuna ang iyang balaod, mga mando, reglamento, sugo, ug mga lagda. (Mateo 10:18-20) Magmalipayon lamang kita kon kita magpadayon sa pagtuman sa mga pahinumdom, kay kini motabang kanato nga makalikay sa espirituwal nga mga lit-ag nga moresultag kadaot ug kaguol.
Hawid sa mga Pahinumdom ni Jehova
3. Sumala sa Salmo 119:60, 61, nganong kita masaligon?
3 Gipakabahandi sa salmista ang mga pahinumdom sa Diyos kinsa miawit: “Nagdali ako, ug wala ako maglangan sa pagtuman sa imong kasugoan. Ang mga pisi sa mga daotan gilikos kanako. Ang imong balaod wala nako kalimti.” (Salmo 119:60, 61) Ang mga pahinumdom ni Jehova motabang kanato sa pag-antos sa paglutos tungod kay kita masaligon nga ang atong langitnong Amahan makaputol sa mga pisi nga gigapos kanato sa mga kaaway. Sa nahiangayng panahon, pagabadbaran niya kita gikan sa mga kababagan aron atong mahimo ang buluhatong pagsangyaw sa Gingharian.—Marcos 13:10.
4. Unsa ang angay natong pagsanong sa mga pahinumdom sa Diyos?
4 Usahay, kita ginabadlong sa mga pahinumdom ni Jehova. Hinaot nga kanunay natong pabilhan ang mga pagbadlong, sama sa salmista. Siya mainampoon nga miingon sa Diyos: “Ang imong pahinumdom maoy akong gikalipayan . . . Gihigugma ko ang imong mga pahinumdom.” (Salmo 119:24, 119) Mas daghan kita ug mga pahinumdom sa Diyos kay sa salmista. Ang ginatos ka kinutlo gikan sa Hebreohanong Kasulatan nga makita diha sa Gregong Kasulatan nagpahinumdom kanato dili lamang sa mga instruksiyon ni Jehova sa iyang katawhan ilalom sa Balaod kondili sa iyang mga katuyoan usab maylabot sa Kristohanong kongregasyon. Sa dihang makita sa Diyos nga angay kitang pahinumdoman sa mga butang labot sa iyang mga balaod, kita mapasalamaton sa maong paggiya. Ug pinaagi sa ‘paghawid sa mga pahinumdom ni Jehova,’ atong malikayan ang daotang mga pangdani nga dili-makapahimuot sa atong Maglalalang ug makawala sa atong kalipay.—Salmo 119:31.
5. Sa unsang paagi makakat-on kita sa paghigugma pag-ayo sa mga pahinumdom ni Jehova?
5 Unsa ka dako ang atong paghigugma sa mga pahinumdom ni Jehova? “Ang akong kalag nagbantay sa imong mga pahinumdom, ug gihigugma ko kini pag-ayo,” miawit ang salmista. (Salmo 119:167) Kita makakat-on sa paghigugma pag-ayo sa mga pahinumdom ni Jehova kon atong isipon ug dawaton kini ingong tambag sa usa ka Amahan nga tinuod nga nagmahal kanato. (1 Pedro 5:6, 7) Atong gikinahanglan ang iyang mga pahinumdom, ug ang atong gugma alang niini motubo sa dihang makita nato nga nakahatag kini kanato ug kaayohan.
Kon Nganong Gikinahanglan Nato ang mga Pahinumdom sa Diyos
6. Unsa ang usa ka katarongan kon nganong gikinahanglan nato ang mga pahinumdom ni Jehova, ug unsay makatabang kanato sa paghinumdom niini?
6 Ang usa ka katarongan kon nganong gikinahanglan nato ang mga pahinumdom ni Jehova maoy tungod sa atong pagkamalimtanon. Ang The World Book Encyclopedia nag-ingon: “Kasagaran, ang mga tawo mas dali nga makalimot sa pagdagan sa panahon. . . . Tingali nakaagi ka na nga dili makahunahuna sa usa ka ngalan o pipila ka impormasyon nga anaa lang sa tumoy sa imong dila. . . . Ang lumalabay nga pagkalimot, nga mahitabo kanunay, gitawag ug kalisod sa paghinumdom. Gitandi kini sa mga siyentipiko sa pagpangita sa usa ka nawalang butang diha sa nagkayamukat nga kuwarto. . . . Ang usa ka paagi aron mahinumdoman dayon ang usa ka impormasyon mao ang pagbalikbalik ug tuon niini hangtod nga sa imong hunahuna bug-os na nimo kining nahibaloan.” Ang kugi nga pagtuon ug pagsublisubli makatabang kanato sa paghinumdom sa mga pahinumdom sa Diyos ug pagsunod niini alang sa atong kaugalingong kaayohan.
7. Nganong ang mga pahinumdom sa Diyos labaw nang gikinahanglan karon kay sa kaniadto?
7 Mas labaw na natong gikinahanglan ang mga pahinumdom ni Jehova karon kay sa kaniadto tungod kay ang pagkadaotan misamot ka grabe diha sa tawhanong kasaysayan. Kon mamati kita sa mga pahinumdom sa Diyos, atong mabatonan ang pagsabot nga gikinahanglan aron dili madala sa daotang mga paagi sa kalibotan. “Ako nakabaton ug hait nga salabotan nga labaw pa kay sa tanan kong mga magtutudlo,” miingon ang salmista, “kay maoy akong gipalandong ang imong mga pahinumdom. Labi pang masinaboton ako sa akong paggawi kay sa mga tigulang, kay gituman ko ang imong mga sugo. Gipugngan ko ang akong mga tiil gikan sa tanang daotan nga alagianan, aron makatuman ako sa imong pulong.” (Salmo 119:99-101) Pinaagi sa pagtuman sa mga pahinumdom sa Diyos, kita magpalayo gikan sa “tanang daotan nga alagianan” ug maglikay nga mahimong sama sa masa sa katawhan, kinsa “anaa sa kangitngit sa kaisipan, ug nahimulag gikan sa kinabuhi nga iya sa Diyos.”—Efeso 4:17-19.
8. Sa unsang paagi mas masangkapan kita sa pagsagubang sa mga pagsulay sa pagtuo nga malamposon?
8 Ang mga pahinumdom sa Diyos gikinahanglan usab tungod kay kini makapalig-on kanato aron makalahutay sa atong daghang pagsulay niining “panahon sa kataposan.” (Daniel 12:4) Kon wala kining mga pahinumdoma kita mahimo nga ‘malimtanong mga tigpaminaw.’ (Santiago 1:25) Apan ang makugihong pagtuon sa Kasulatan sa personal ug sa kongregasyon uban sa tabang sa mga publikasyon gikan sa ‘matinumanon ug maalamong ulipon’ makatabang kanato sa pagsagubang sa mga pagsulay sa pagtuo nga malamposon. (Mateo 24:45-47) Kining espirituwal nga mga tagana magpaarang kanato sa pagkakita kon unsay atong kinahanglang himoon aron mapahimut-an si Jehova sa panahong anaa kita sa mga kahimtang nga malisod kaayo.
Ang Hinungdanong Papel sa Atong mga Tigom
9. Kinsa ang “mga gasa nga mga tawo,” ug sa unsang paagi sila makatabang sa mga isigkamagtutuo?
9 Ang atong panginahanglan alang sa mga pahinumdom sa Diyos matagana sa usa ka paagi diha sa Kristohanong mga tigom, diin ang instruksiyon gitagana sa tinudlong mga igsoon. Si apostol Pablo nagsulat nga sa dihang si Jesus ‘mikayab sa itaas siya nagdala ug mga binihag; siya mihatag ug mga gasa nga mga tawo.’ Si Pablo midugang: ‘[Si Kristo] mihatag ug gasa sa pipila ingong mga apostol, sa pipila ingong manalagna, sa pipila ingong mga tig-ebanghelyo, sa pipila ingong mga magbalantay ug mga magtutudlo, alang sa pagpasibo ug balik sa mga balaan, alang sa ministeryal nga buluhaton, alang sa pagpalig-on sa lawas ni Kristo.’ (Efeso 4:8, 11, 12) Pagkamapasalamaton nato nga kining “mga gasa nga mga tawo”—ang tinudlong mga ansiyano—nagpunting sa atong pagtagad ngadto sa mga pahinumdom ni Jehova sa dihang magtigom kita alang sa pagsimba!
10. Unsa ang pangunang punto sa Hebreohanon 10:24, 25?
10 Ang pagkamapasalamaton alang sa mga tagana sa Diyos mopalihok kanato sa pagtambong sa atong lima ka tigom sa kongregasyon matag semana. Ang panginahanglan sa pagtigom nga regular gipasiugda ni Pablo. Siya misulat: ‘Magmahunahunaon kita sa usag usa aron sa pagdasig sa paghigugma ug sa maayong mga buhat, nga dili talikdan ang atong panagkatigom, sama sa nabatasan sa pipila, apan magdinasigay sa usag usa, ug ilabina gayod sa makita ninyo nga ang adlaw nagkaduol na.’—Hebreohanon 10:24, 25.
11. Sa unsang paagi ang matag usa sa atong senemanang mga tigom makahatag ug kaayohan kanato?
11 Ikaw ba nagpabili sa mahimo alang kanato sa atong mga tigom? Ang senemanang Pagtuon sa Bantayanang Torre mopalig-on sa atong pagtuo, motabang kanato sa pagsunod sa mga pahinumdom ni Jehova, ug mopanalipod kanato batok sa “espiritu sa kalibotan.” (1 Corinto 2:12; Buhat 15:31) Diha sa Pakigpulong Publiko, ginapahayag sa mga mamumulong ang instruksiyon gikan sa Pulong sa Diyos, apil ang mga pahinumdom ni Jehova ug ang iya ni Jesus nga maanindot nga ‘mga pulong mahitungod sa kinabuhing walay kataposan.’ (Juan 6:68; 7:46; Mateo 5:1–7:29) Ang atong mga katakos sa pagpanudlo mahanas diha sa Tunghaan sa Teokratikanhong Ministeryo. Ang Tigom sa Pag-alagad hinungdanon kaayo sa pagtabang kanato sa pagpauswag sa atong pagpahayag sa maayong balita sa balay ug balay, sa mga pagbalikduaw, sa mga pagtuon sa Bibliya diha sa balay, ug sa ubang natad sa atong ministeryo. Ang gamay-gamayng grupo diha sa Pagtuon sa Libro sa Kongregasyon naghatag kanato ug mas daghang higayon sa pagkomento nga kasagarang naglangkit sa mga pahinumdom sa Diyos.
12, 13. Giunsa pagpasundayag sa katawhan sa Diyos diha sa usa ka nasod sa Asia ang pagpabili sa Kristohanong mga tigom?
12 Ang regular nga pagtambong sa mga tigom sa kongregasyon magpahinumdom kanato sa mga sugo sa Diyos ug motabang kanato nga makapabiling malig-on sa espirituwal panahon sa panaggubat, kalisod sa panalapi, ug ubang mga pagsulay sa atong pagtuo. Ang pagkahinungdanon sa mga tigom nabati gayod sa mga 70 ka Kristohanon diha sa usa ka nasod sa Asia nga gipapahawa gikan sa ilang mga balay ug napugos sa pagpuyo sa baga nga lasang. Determinado nga makapadayon sa pagtigom nga regular, sila namalik sa ilang gigusbat sa gubat nga lungsod, nanangtang sa nahibilin sa ilang Kingdom Hall, ug gitukod kini pag-usab didto sa lasang.
13 Human sa pag-antos sa daghang tuig sa panaggubat sa laing bahin sa mao gihapong nasod, ang katawhan ni Jehova nag-alagad gihapon nga madasigon. Usa sa mga ansiyano nianang lugara gipangutana: “Unsa gayoy nakatabang aron ang mga igsoon dili magkabulagbulag?” Ang iyang tubag? “Sulod sa 19 ka tuig, kami wala gayoy napaltahang tigom. Usahay tungod sa pagpamomba ug ubang mga kalisod, ang ubang mga igsoon dili makaadto sa tigomanan, apan wala gayod kami sukad magkanselar ug tigom.” Kining minahal nga mga igsoong lalaki ug mga igsoong babaye nagpabili gayod sa pagkahinungdanon sa ‘dili pagtalikod sa ilang panagkatigom.’
14. Unsay atong makat-onan sa batasan sa tigulang nga Ana?
14 Ang 84-anyos nga balo nga si Ana ‘wala gayod makapalta sa templo.’ Tungod niini, presente siya sa dihang gidala ang masuso nga si Jesus wala magdugay human nga siya gihimugso. (Lucas 2:36-38) Gipaneguro mo ba nga dili ka makapalta sa mga tigom? Naningkamot ka ba nga makatambong sa matag sesyon sa atong mga asembliya ug mga kombensiyon? Ang mapuslanong espirituwal nga instruksiyon nga madawat diha niining mga tigoma naghatag kanato ug klarong pamatuod nga ang atong langitnong Amahan nagtagad sa iyang katawhan. (Isaias 40:11) Kining mga okasyona mohatag usab ug kalipay, ug ang atong presensiya nagpasundayag sa atong apresasyon sa mga pahinumdom ni Jehova.—Nehemias 8:5-8, 12.
Napalain Pinaagi sa mga Pahinumdom ni Jehova
15, 16. Sa unsang paagi ang pagtuman sa mga pahinumdom ni Jehova makaapekto sa atong panggawi?
15 Ang pagtuman sa mga pahinumdom sa Diyos motabang kanato nga mapalain gikan niining daotang kalibotan. Pananglitan, ang pagpatalinghog sa mga pahinumdom sa Diyos magpugong kanato sa pagpakigbahin sa seksuwal nga imoralidad. (Deuteronomio 5:18; Proverbio 6:29-35; Hebreohanon 13:4) Ang tentasyon sa pagpamakak, sa pagpanglimbong, o pagpangawat malamposong mapugngan pinaagi sa pagsunod sa mga pahinumdom sa Diyos. (Exodo 20:15, 16; Levitico 19:11; Proverbio 30:7-9; Efeso 4:25, 28; Hebreohanon 13:18) Ang pagtuman sa mga pahinumdom ni Jehova magpugong usab kanato sa pagpanimalos, sa paghambin ug kasuko, o pagbutangbutang kang bisan kinsa.—Levitico 19:16, 18; Salmo 15:1, 3.
16 Pinaagi sa pagpamati sa mga pahinumdom sa Diyos, kita makapabiling binalaan, o napalain, alang sa iyang pag-alagad. Ug pagkahinungdanon nga mahimulag gikan niining kalibotana! Diha sa pag-ampo ngadto kang Jehova sa kataposang gabii sa iyang yutan-ong kinabuhi, nangaliyupo si Jesus alang sa iyang mga sumusunod: ‘Gihatag ko ang imong pulong ngadto kanila, apan ang kalibotan nagdumot kanila, tungod kay sila dili bahin sa kalibotan, ingon nga ako dili bahin sa kalibotan. Naghangyo ako kanimo, dili nga kuhaon sila gikan sa kalibotan, kondili nga bantayan sila tungod sa usa nga daotan. Sila dili bahin sa kalibotan, ingon nga ako dili bahin sa kalibotan. Balaana sila pinaagi sa kamatuoran; ang imong pulong maoy kamatuoran.’ (Juan 17:14-17) Magpadayon kita sa pagmahal sa Pulong sa Diyos, nga nagpalain kanato alang sa iyang balaang pag-alagad.
17. Unsay mahitabo kon kita dili magtagad sa mga pahinumdom sa Diyos, busa unsay angay natong himoon?
17 Ingong mga alagad ni Jehova, kita buot nga magpabiling dalawaton alang sa iyang pag-alagad. Apan, kon dili nato tagdon ang mga pahinumdom sa Diyos, kita madaog sa espiritu niining kalibotana, nga gipasiugda sa kadaghanan sa sinultihan, basahon, kalingawan, ug panggawi niini. Ug kita dili gayod buot nga mahimong mga mahigugmaon sa salapi, mapasiatabon sa kaugalingon, hambogiro, dili-mapasalamaton, mabudhion, mabangis, gahig-ulo, nangaburot sa garbo, mga mahigugmaon sa kalipayan inay nga mahigugmaon sa Diyos—sa paghisgot lamang ug pipila sa mga taras nga gipakita niadtong nahimulag sa Diyos. (2 Timoteo 3:1-5) Sanglit kita nagkinabuhi na sa ulahing bahin sa kataposang mga adlaw niining daotang sistema sa mga butang, mag-ampo kita kanunay alang sa tabang sa Diyos aron kita makapadayon sa pagtuman sa mga pahinumdom ni Jehova ug sa ingon ‘makapadayon sa pagtuman subay sa iyang pulong.’—Salmo 119:9.
18. Ang pagtuman sa mga pahinumdom sa Diyos magtukmod kanato sa paghimog unsang positibong mga lakang?
18 Labaw pa ang mahimo sa pahinumdom ni Jehova kay sa pagpabantay kanato sa mga butang nga kinahanglang dili nato buhaton. Ang pagtuman sa iyang mga pahinumdom magtukmod kanato sa paghimog positibong lakang, nga magpalihok kanato sa pagsalig gayod kang Jehova ug sa paghigugma kaniya uban sa atong bug-os kasingkasing, kalag, hunahuna, ug kusog. (Deuteronomio 6:5; Salmo 4:5; Proverbio 3:5, 6; Mateo 22:37; Marcos 12:30) Ang mga pahinumdom sa Diyos mag-agda usab kanato sa paghigugma sa atong isigkatawo. (Levitico 19:18; Mateo 22:39) Ilabina natong ipakita ang atong gugma sa Diyos ug sa isigkatawo pinaagi sa pagtuman sa kabubut-on sa Diyos ug sa pagpakig-ambit ngadto sa uban sa makahatag ug kinabuhi nga “kahibalo sa Diyos.”—Proverbio 2:1-5.
Pagtuman sa mga Pahinumdom ni Jehova Makahatag ug Kinabuhi!
19. Sa unsang paagi atong ikapakita sa uban nga praktikal ug mapuslanon ang pagpatalinghog sa mga pahinumdom ni Jehova?
19 Kon atong tumanon ang mga pahinumdom ni Jehova ug tabangan ang uban nga motuman niini, atong maluwas ang atong kaugalingon ug kadtong mamati kanato. (1 Timoteo 4:16) Sa unsang paagi atong ikapasundayag ngadto sa uban nga ang pagpatalinghog sa mga pahinumdom ni Jehova praktikal ug mapuslanon kaayo? Pinaagi sa pagpadapat sa mga prinsipyo sa Bibliya diha sa atong kaugalingong kinabuhi. Busa kadtong ‘hustong nakiling alang sa kinabuhing walay kataposan’ makapamatuod nga ang dalan nga gilatid diha sa Pulong sa Diyos mao gayod ang labing maayong dalan nga subayon. (Buhat 13:48) Ilang makita usab nga ang ‘Diyos anaa gayod sa atong taliwala’ ug mapalihok sa pagduyog kanato sa pagsimba sa Soberanong Ginoong Jehova.—1 Corinto 14:24, 25.
20, 21. Ang mga pahinumdom sa Diyos ug ang iyang espiritu mopalihok kanato sa paghimog unsa?
20 Pinaagi sa pagpadayon sa pagtuon sa Kasulatan, pagpadapat sa atong makat-onan, ug pagpahimulos sa bug-os sa espirituwal nga mga tagana ni Jehova, kita makakat-on sa paghigugma pag-ayo sa iyang mga pahinumdom. Kon patalinghogan, kining mga pahinumdoma makatabang kanato sa pagsul-ob sa “bag-ong pagkatawo nga gilalang sumala sa kabubut-on sa Diyos diha sa matuod nga pagkamatarong ug pagkamaunongon.” (Efeso 4:20-24) Ang mga pahinumdom ni Jehova ug ang iyang balaang espiritu mopalihok kanato sa pagpasundayag sa gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon—mga hiyas nga lahi kaayo sa mga taras sa kalibotan nga nailalom sa gahom ni Satanas! (Galacia 5:22, 23; 1 Juan 5:19) Busa, kita mapasalamaton sa dihang kita pahinumdoman sa mga kinahanglanon ni Jehova panahon sa atong personal nga pagtuon sa Bibliya, pinaagi sa tinudlong mga ansiyano, ug diha sa atong mga tigom, mga asembliya, ug mga kombensiyon.
21 Tungod kay nagtuman man kita sa mga pahinumdom ni Jehova, kita makahimo gihapon sa pagkalipay bisan sa dihang mag-antos alang sa pagkamatarong. (Lucas 6:22, 23) Kita modangop sa Diyos sa pagluwas kanato sa makuyaw kaayo nga mga kahimtang. Hinungdanon kana ilabina karon nga ang tanang nasod ginatigom alang sa “gubat sa dakong adlaw sa Diyos nga Labing Gamhanan” sa Har–Magedon.—Pinadayag 16:14-16.
22. Unsa ang angay natong determinasyon bahin sa mga pahinumdom ni Jehova?
22 Aron atong madawat ang dili-takos nga gasa sa kinabuhing walay kataposan, kinahanglang atong higugmaon pag-ayo ang mga pahinumdom ni Jehova ug tumanon kini sa bug-os-kasingkasing. Hinaot nga aduna kitay espiritu sama sa salmista kinsa miawit: “Ang pagkamatarong sa imong mga pahinumdom maoy hangtod sa panahong walay tino. Pasabta ako, aron ako magpadayong buhi.” (Salmo 119:144) Ug hinaot nga ipasundayag nato ang determinasyon nga makita diha sa mga pulong sa salmista: “Mitawag ako kanimo [Jehova]. Oh luwasa ako! Ug pagatumanon ko ang imong mga pahinumdom.” (Salmo 119:146) Oo, pinaagi sa pulong ug sa buhat, atong pamatud-an nga atong gihigugma pag-ayo ang mga pahinumdom ni Jehova.
Unsaon Nimo Pagtubag?
• Sa unsang paagi gilantaw sa salmista ang mga pahinumdom ni Jehova?
• Nganong atong gikinahanglan ang mga pahinumdom sa Diyos?
• Unsang papel ang gidula sa atong mga tigom mahitungod sa mga pahinumdom sa Diyos?
• Sa unsang paagi ang mga pahinumdom ni Jehova nagpalain kanato gikan niining kalibotana?
[Mga Pangutana sa Pagtuon]
[Hulagway sa panid 15]
Gihigugma pag-ayo sa salmista ang mga pahinumdom ni Jehova
[Mga hulagway sa panid 16, 17]
Agig pagsunod sa panig-ingnan ni Ana, gipaneguro mo ba nga dili ka makapalta sa mga tigom?
[Hulagway sa panid 18]
Ang pagpamati sa mga pahinumdom ni Jehova nagpalain kanato ingong mahinlo ug dalawaton alang sa iyang pag-alagad