Mga Magmamantala sa Gingharian Nagtaho

Si Jehova Nagtaganag Pahulayanan sa Iyang Katawhan

ANG usa ka nalandongan nga pahulayanan diha sa dalan-dalan sa bukid makapalipay kaayong tan-awon sa usa ka lapoy nga magpapanaw. Sa Nepal, kana nga mga pahulayanan gitawag ug chautara. Ang naandang chautara mahimong nahimutang tupad sa labong kaayong baliti, usa ka landong nga dapit nga kalingkoran ug kapahulayan. Ang pagtaganag usa ka chautara maoy usa ka buhat sa kalulot, ug ang kadaghanang mga tigtagana niini nagpabiling wala hiilhi.

Ang mga eksperyensiya gikan sa Nepal nagpakita kon sa unsang paagi si Jehova nga Diyos nahimong Tinubdan sa kalipay ug espirituwal nga kahayahay sa daghang lapoy nga “mga magpapanaw” niining sistemaha sa mga butang.—Salmo 23:2.

• Si Lil Kumari nagpuyo sa matahom nga siyudad sa Pokhara, diin nagbantaaw ang maanindot nga talan-awon sa naputos sa niyebe nga Kabukiran sa Himalaya. Apan kay nabalaka bahin sa panalapi sa pamilya, si Lil Kumari nagtuo nga wala na kaayoy mapaabot pa. Sa dihang usa sa mga Saksi ni Jehova miduaw kaniya, natandog siya sa masanag nga paglaom sa Bibliya ug dihadiha mihangyo nga magtuon sa Bibliya diha sa balay.

Bisan pag si Lil Kumari nalipay sa pagtuon, dili sayon ang pagpadayon tungod sa dakong pagsupak sa pamilya. Apan siya wala moundang. Siya regular nga nagtambongan sa Kristohanong mga tigom ug nagpadapat sa iyang nakat-onan, ilabina bahin sa pagpasakop sa asawa. Tungod niini, ang iyang bana ug ang iyang inahan nakaamgo nga ang pagtuon ni Lil Kumari sa Bibliya nakahatag ug kaayohan sa tibuok pamilya.

Ang iyang bana ug daghan sa mga paryente nagtuon na karon sa Pulong sa Diyos. Sa di pa dugayng asembliya nga gihimo sa Pokhara, si Lil Kumari nakabenepisyo sa programa uban sa iyang 15 ka paryente. Siya miingon: “Ang akong balay nahimong usa ka pahulayanan tungod kay ang among pamilya nahiusa na karon sa matuod nga pagsimba, ug akong nakaplagan ang tinuod nga kalinaw sa hunahuna.”

• Bisan tuod ang caste discrimination, o pagpihig sa pagkabutang sa usa diha sa katilingban, ilegal sa Nepal, kini aduna gihapoy dakong impluwensiya sa pagkinabuhi sa mga tawo. Busa, daghan ang interesado sa giingon sa Bibliya bahin sa panagkaangay ug pagkadi-mapihigon. Ang pagkahibalo nga ang “Diyos dili mapihigon” nakausab gayod sa kinabuhi ni Surya Maya ug sa iyang pamilya.—Buhat 10:34.

Si Surya Maya nasubo sa inhustisya sa pagpihig sa pagkabutang sa usa diha sa katilingban ug sa palas-anon sa nakagamot pag-ayong mga tradisyon ug mga kostumbre. Ingong usa ka debotada, sa daghang tuig si Surya Maya nagpakitabang sa iyang mga diyosdiyos. Apan ang iyang mga pag-ampo wala matubag. Usa ka adlaw niana sa dihang siya nangayog tabang, ang iyang sayis-anyos nga apong babaye nga si Babita miduol kaniya ug nangutana: “Lola, ngano man nga nangayo kag tabang sa mga diyosdiyos nga walay mahimo?”

Ang inahan ni Babita nagtuon diay sa Bibliya uban sa usa sa mga Saksi ni Jehova. Masibotong gidapit ni Babita ang iyang apohang babaye ngadto sa usa ka Kristohanong tigom. Sa pagtambong ni Surya Maya, nahingangha siya sa pagkakita ug mga tawo sa nagkalainlaing pagkabutang sa katilingban nga malipayong nag-ubanay nga walay pagpihig. Dihadiha siya mihangyo nga magtuon sa Bibliya sa balay. Bisan pag gisalikway siya sa iyang mga silingan, wala siya mawad-ig kadasig; ni ang iyang limitadong abilidad sa pagbasa ug pagsulat nakapugong kaniya sa pag-uswag sa espirituwal.

Milabay ang walo ka tuig, ug unom ka membro sa iyang pamilya, lakip sa iyang bana ug tulo ka anak, nahimong mga Saksi ni Jehova. Sa pagkakaron si Surya Maya maoy usa ka bug-os-panahong ministro, usa ka regular payunir, nga malipayong nagtabang sa uban sa pagbutang sa ilang bug-at nga mga palas-anon diha sa tinuod nga pahulayanan nga si Jehova lamang ang makatagana.