Ang Maayong Balita sa Pakigdait Nakaabot sa Kabukiran sa Chiapas

“Sa kinangil-arang masaker nga mahinumdoman ni bisan kinsa sa estado sa Chiapas, 45 ka way-depensang mga mag-uuma, lakip ang 13 ka masuso, gipamatay sa usa ka grupo sa . . . armadong mga lalaki.” Kini ang gitaho sa mantalaang “El Universal” bahin sa nahitabo sa Acteal, Chiapas State, niadtong Disyembre 22, 1997.

ANG Chiapas mao ang kinalay-ang habagatan nga estado sa Mexico, nga kasikbit sa Guatemala. Nga may taas nga kasaysayan sa kakabos ug paghikaw, usa ka grupo sa lumad nga Maya nga mga Indian nag-organisar ug armadong pag-alsa sa Enero 1994, ilalom sa bandera nga Ejército Zapatista de Liberación Nacional (EZLN, National Liberation Zapatista Army). Ang mga negosasyon alang sa malinawong solusyon walay epekto. Ang mga pagronda ug mga pag-atake sa mga rebelde ug sa mga tropa sa kagamhanan, miresulta sa pagbanaw sa dugo ug kamatayon. Ang kagubot nagpahinabo sa daghang mag-uuma nianang dapita nga mokalagiw ngadto sa luwas nga dapit.

Taliwala sa maong walay-pihong mga kahimtang, adunay usa ka grupo sa mga mahigugmaon sa pakigdait nga nagpabiling neyutral kon bahin sa politikanhong pakigbisog. Sa pagkamasiboton, ilang gitumong ang pagtagad ngadto sa Gingharian sa Diyos ingong ang bugtong paglaom sa pagsulbad sa mga problema nga giatubang sa mga tawo, sa lokal ug sa tibuok kalibotan. (Daniel 2:44) Kinsa sila? Mga Saksi ni Jehova. Agig pagsugot sa sugo ni Jesus, gipanlimbasogan nila ang pagdala sa maayong balita sa Gingharian sa Diyos ngadto sa kinahilitang mga bahin sa kabukiran sa Chiapas. (Mateo 24:14) Sa unsang paagi gihimo ang pagsangyaw ilalom sa maong mga kahimtang, ug unsa ang mga resulta?

“Usa Ako sa mga Saksi ni Jehova”

Si Adolfo, usa ka batan-ong lalaki kinsa di pa dugayng nahimong usa ka magmamantala sa Gingharian, nagtrabaho usa ka adlaw niana diha sa estasyon sa radyo sa Ocosingo. Sa kalit, dihay nanuktok nga kusog sa pultahan. Usa ka grupo sa nagmaskarang mga lalaki kalit nga misulod ug gition ang ilang mga pusil sa iyang ulo. Midali sila pag-adto sa transmission room, giilog ang kahimanan, ug gisibya sa radyo nga sila mideklarar ug gubat batok sa kagamhanan.

Miliso kang Adolfo, ang armadong mga lalaki nagmando kaniya sa pagduyog sa ilang kalihokan. “Usa ako sa mga Saksi ni Jehova,” mitubag si Adolfo, bisan pag siya dili pa bawtismado. Iyang gisaysay nga ang bugtong paglaom alang sa pakigdait mao ang Gingharian sa Diyos, ug siya hugot nga midumili sa uniporme ug pusil nga ilang gitanyag kaniya. Kay nakita ang iyang lig-ong baroganan, gibuhian nila siya. Nahinumdom sa panghitabo, si Adolfo miingon: “Kadtong hitaboa nakapalig-on gayod sa akong pagtuo.”

Ngadtongadto ang kahimtang nahibalik sa normal, apan ang dapit ilalom pa gihapon sa pagkontrolar sa militar. Bisan pa niana, malipayong gidawat ni Adolfo ang imbitasyon sa mga ansiyano sa lokal nga kongregasyon nga motabang sa nahilit nga grupo sa mga Kristohanon nianang dapita. Diha sa mga checkpoint nga kinahanglan niyang agian, ang mga sundalo  nagpakitag pagtahod kaniya sa dihang iyang gipaila ang iyang kaugalingon ingong usa sa mga Saksi ni Jehova. Sa ulahi siya nabawtismohan ug nakabaton gayod ug katagbawan sa pagtabang nianang nahilit nga grupo nga mahimong usa ka kongregasyon sa mga Saksi ni Jehova. “Karon nga ako bawtismado na,” si Adolfo miingon, “makasulti na ako nga may kombiksiyon nga usa ako sa mga Saksi ni Jehova!”

“Si Jehova Nagpalig-on Kanamo”

Wala magdugay human ang EZLN misibya sa radyo sa pagpakiggubat batok sa kagamhanan, ang mga lungsoranon mikalagiw. Si Francisco, usa ka bug-os-panahong ministro, o payunir, misaysay kon sa unsang paagi si Jehova nagpalig-on kaniya ug sa iyang asawa sa ilang naagoman.

“Nakahukom kami sa pagdangop sa usa ka dapit nga tulo ka oras ang gilay-on kon lakwon. Usa ka kongregasyon ang atua didto, busa among makauban ang mga igsoon. Sa wala madugay panahon na sa among sirkitong asembliya nga ipahigayon sa Palenque. Dili namo buot sa akong asawa nga masayloan ang linaing tigom alang sa mga payunir, apan among nahibaloan nga gibabagan sa EZLN ang dalan paingon sa asembliya. Nakahukom kami sa paglakaw agi sa lasang, nga gidangtan kami ug siyam ka oras. Eksakto lang ang pag-abot namo aron matambongan ang tigom sa payunir,  nga gikalipay namo pag-ayo, maingon man ang tibuok programa sa asembliya.

“Sa among pagpauli, among nakaplagan nga ang among balay gisunog ug ang among mga hayop gipangawat. Ang nahibilin lamang mao ang usa ka gamayng bag sa mga sinina. Nasubo kami tungod sa mga nawala kanamo, apan ang mga igsoon sa Ocosingo mabinationg mipapuyo kanamo ngadto sa ilang mga balay. Gitudloan usab nila kami kon unsaon namo sa paghimo ang mga butang nga wala pa gayod sukad namo himoa ingong mga mag-uuma. Gitudloan ako sa usa ka igsoong lalaki bahin sa pagpangletrato, ang lain sa pagpang-ayo ug mga sapatos. Gisuportaran namo nianang paagiha ang among kaugalingon hangtod karon, nga dili na kinahanglang moundang pa sa pagpayunir. Namalandong bahin sa nahitabo, among nakita nga bisag dili sayon alang kanamo ang paglahutay, si Jehova nagpalig-on kanamo.”

Mga Bunga sa Buluhatong Pagsangyaw

Wala tugoti sa mga Saksi sa Chiapas State ang kalisdanan ug kapeligrohan nga mopugong kanila sa pagpakigbahin sa linaing paningkamot sa pagdala sa maayong balita ngadto sa mga tawo sa maong dapit. Pananglitan, balik niadtong Abril ug Mayo 1995, miduyog sila sa ilang mga isigka-Kristohanon sa tibuok yuta sa usa ka kampanya sa pagpang-apod-apod sa Kingdom News Num. 34, nga may labing haom nga ulohan nga Nganong Puno Kaayog Suliran ang Kinabuhi?

Panahon sa kampanya—diha sa usa ka dapit nga gitawag ug Pueblo Nuevo—nakaplagan ni Ciro, usa ka regular payunir, ang usa ka pamilya nga nagpakitag interes. Mibalik tulo ka adlaw sa ulahi, siya nakasugod ug usa ka pagtuon sa Bibliya uban kanila. Apan sa dihang si Ciro ug ang iyang kauban mibalik aron ipadayon ang pagtuon uban sa pamilya, ang ulo sa panimalay wala sa balay. Hinunoa, usa ka grupo sa nagmaskarang mga lalaki ang naghulat kaniya aron sa paghimog daotan kaniya. Ilang gipangutana si Ciro ug ang iyang kauban kon unsay ilang gipangita ug mihulga nga patyon sila. Human makaampo kang Jehova sa hilom, ang duha ka Kristohanon maisogong misaysay nga sila miadto aron tudloan ang pamilya sa Bibliya. Tungod niana gibuhian sila sa nagmaskarang mga lalaki. Tungod sa pipila ka hinungdan, ang ulo sa pamilya wala gayod mouli sa balay nianang adlawa.

Usa ka adlaw niana halos tulo ka tuig sa ulahi, si Ciro nakurat sa pagbutho sa lalaki diha sa iyang pultahan. Pagkamalipayon ni Ciro sa pagkahibalo nga ang tibuok pamilya nabawtismohan na ug karon sila nakig-uban sa usa ka kongregasyon sa Guatemala! Ang usa sa mga anak nga babaye nag-alagad pa gani ingong usa ka regular payunir.

Pagpabili sa Espirituwal nga Pagkaon

Bisan pa sa padayong kalisdanan sa Chiapas, usa ka magtatan-aw sa distrito nagtaho nga ang mga Saksi nianang dapita nagpabili gayod sa kahinungdanon sa panagkatigom. (Hebreohanon 10:24, 25) Iyang giasoy kon unsay nahitabo sa di pa dugayng adlaw  sa espesyal nga asembliya, nga gieskedyul nga sugdan sayo sa buntag aron kadtong mga manambong makapauli sa balay nga luwas samtang adlawan pa. Bisan kon ang kadaghanan kanila kinahanglang mobaktas ug kapin sa tulo ka oras latas sa lasang aron makaabot sa dapit sa asembliya, ang tanan nakalingkod na sa alas 7:00 s.b. Lakip sa mga mamiminaw mao ang unom ka membro sa EZLN nga grupo, nga naminaw ug namalakpak, nga dayag nga nahimuot sa programa. Sila usab mibaktas ug tulo ka oras aron makatambong sa asembliya. Kawhaan ka membro mitambong usab sa Memoryal sa kamatayon ni Kristo, nga gipahigayon diha sa usa ka lokal nga Kingdom Hall.

Ang lain pang batan-ong lalaki nga kauban sa gerilya nga kalihokan giasayn sa iyang mga labaw sa pagpatrolya sa usa ka tinong dapit sa lasang. Sa paghiabot sa maong komunidad, iyang nakaplagan nga ang tanang mga molupyo didto mikalagiw na, nga kadaghanan kanila maoy mga Saksi ni Jehova. Busa siya mipuyo diha sa usa sa mga biniyaang balay. Kay wala kaayoy gimbuhaton, iyang gipunit ang pipila ka basahon nga iyang nakaplagan sa palibot sa balay ug misugod sa pagbasa. Kadto diay maoy mga publikasyon sa Watch Tower nga nabilin sa mga Saksi. Sa iyang pag-inusara, ang batan-ong lalaki nakahigayon sa pagpamalandong bahin sa iyang nabasa. Nakahukom siya nga kinahanglan niyang bag-ohon ang iyang kinabuhi ug isurender ang iyang mga hinagiban. Sa labing sayo nga panahon nga iyang mahimo, iyang nakaplagan ang mga Saksi ug misugod sa pagtuon sa Bibliya. Sulod sa unom ka bulan, iya nang gipakigsulti sa uban ang maayong balita. Siya ug tulo pa ka laing membro sa iyang pamilya kinsa kaniadto mga dumadapig sa gerilya nga kalihokan maoy bawtismadong mga Kristohanon na karon.

Paglantaw sa Positibong Bahin

Bisan pag kini nagkahulogan ug dakong kalisdanan, ang panagbangi sa aktuwal adunay positibong impluwensiya diha sa tinamdan sa mga tawo bahin sa buluhatong pagsangyaw. Ang usa ka ansiyano sa mismong siyudad diin ang pagpakigbisog nagsugod miasoy: “Mga lima ka adlaw human nga mibuto ang panag-away, among giorganisar ang buluhatong pagsangyaw sa sulod ug gawas sa siyudad. Ang mga tawo maikagong maminaw kanamo. Nakapahimutang kami ug daghang literatura sa Bibliya ug nakasugod ug ubay-ubayng pagtuon sa Bibliya. Sa usa ka dapit, daghan ang misupak sa kamatuoran, apan tungod sa kagubot, sila karon naminaw na, mituon sa Bibliya, mitambong sa mga tigom ug mga asembliya.”

Ang mga igsoon malipayon tungod kay sila nakapadayon sa ilang teokratikanhong mga kalihokan bisan pa sa dili maayo kaayong mga kahimtang. Nga nahibaloan sa mga puwersa sa kagamhanan ug sa EZLN, sila padayong nagpahigayon sa ilang mga asembliya, nga nagpalig-on kanila sa espirituwal. Ang mga duaw sa nagapanawng mga magtatan-aw nahimo usab nga epektibong panukmod aron mopadayon sa buluhatong pagsangyaw. Makaiikag, ang pagdasig nagsumikad bisan gikan niadtong nalangkit sa panagbangi, kinsa kanunayng nag-agda sa mga Saksi nga ipadayon ang ilang buluhatong pagsangyaw.

Bisan kon ang mga pagsulay ug kalisdanan nga naagoman sa mga tawo sa Chiapas daw namenosan paglabay sa panahon, kini wala matapos. Bisan pa niana, usa ka butang ang tino—ang mga Saksi ni Jehova determinado nga mopadayon nga walay hunong sa ilang mga paningkamot sa pagdala ngadto sa mga tawo sa maayong balita sa pakigdait gikan sa Pulong sa Diyos, ang Bibliya. (Buhat 10:34-36; Efeso 6:15) Sama sa gisulti sa manalagnang si Jeremias, ilang giila nga “dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Ang Gingharian sa Diyos lamang diha sa mga kamot sa iyang Anak, si Jesu-Kristo, ang makapatunghag solusyon sa inhustisya ug kakabos sa kalibotan.—Mateo 6:10.

[Mapa sa panid 9]

(Alang sa aktuwal nga pagkahan-ay, tan-awa ang publikasyon)

Gulpo sa Mexico

CHIAPAS

GUATEMALA

Dagat Pasipiko

[Credit Line]

Mountain High Maps® Copyright © 1997 Digital Wisdom, Inc.

[Hulagway sa panid 9]

Mga Saksi paingon sa ministeryo sa kabukiran sa Chiapas