Barog nga Bug-os nga May Hugot nga Pagtuo
Barog nga Bug-os nga May Hugot nga Pagtuo
‘[Siya] kanunayng nanlimbasog alang kaninyo diha sa iyang mga pag-ampo, aron kamo sa kataposan makabarog nga bug-os ug may hugot nga pagtuo sa bug-os nga kabubut-on sa Diyos.’—COLOSAS 4:12.
1, 2. (a) Unsay namatikdan sa mga tagagawas bahin sa unang mga Kristohanon? (b) Sa unsang paagi ang basahon sa Colosas nagpabanaag ug mahigugmaong kaikag?
ANG mga sumusunod ni Jesus maikagon kaayo sa mga isigkamagsisimba. Si Tertullian (magsusulat sa ikaduha ug ikatulo nga siglo K.P.) nag-asoy bahin sa kalulot nga ilang gipakita ngadto sa mga ilo, sa mga kabos, ug sa mga tigulang. Ang maong mga pamatuod sa gugma nga naglihok nakapadayeg kaayo sa mga dili-magtutuo nga ang pipila nakaingon bahin sa mga Kristohanon, ‘Tan-awa kon unsa ka dako ang ilang paghigugma sa usag usa.’
2 Ang basahon sa Colosas nagpabanaag sa mahigugmaong kaikag ni apostol Pablo ug sa iyang kaubang si Epafras sa mga igsoong lalaki ug babaye sa Colosas. Si Pablo nagsulat kanila: Si Epafras ‘kanunayng nanlimbasog alang kaninyo diha sa iyang mga pag-ampo, aron kamo sa kataposan makabarog nga bug-os ug may hugot nga pagtuo sa bug-os nga kabubut-on sa Diyos.’ Sulod sa 2001, ang mga Saksi ni Jehova nagkuha sa ilang teksto sa tuig niining mga pulonga sa Colosas 4:12: ‘Barog nga bug-os ug may hugot nga pagtuo sa bug-os nga kabubut-on sa Diyos.’
3. Unsang duha ka butang ang giampo ni Epafras?
3 Imong masabtan nga ang mga pag-ampo ni Epafras alang sa iyang mga hinigugma dunay duha ka bahin: (1) nga sila ‘sa kataposan makabarog nga bug-os’ ug (2) nga sila makabarog nga “may hugot nga pagtuo sa bug-os nga kabubut-on sa Diyos.” Gilakip kining impormasyona diha sa Kasulatan alang sa atong kaayohan. Busa pangutan-a ang imong kaugalingon, ‘Unsay akong kinahanglang buhaton aron sa kataposan makabarog nga bug-os ug may hugot nga pagtuo sa bug-os nga kabubut-on sa Diyos? Ug samtang magbarog ako, unsa kahay epekto niini?’ Atong susihon.
Paningkamot nga ‘Makabarog nga Bug-os’
4. Sa unsang diwa nga ang mga taga-Colosas kinahanglang mahimong ‘bug-os’?
4 Nagtinguha gayod si Epafras nga ang iyang espirituwal nga mga igsoong lalaki ug babaye sa Colosas sa ‘kataposan makabarog nga bug-os.’ Ang pulong nga gigamit ni Pablo, nga gihubad dinhi nga ‘bug-os,’ mahimong magkahulogang hingpit, hingkod, o hamtong. (Mateo 19:21; Hebreohanon 5:14; Santiago 1:4, 25) Lagmit nahibalo ka nga ang pagkahimong bawtismadong Saksi ni Jehova wala magpasabot nga siya maoy usa na ka hingkod nga Kristohanon. Gisulatan ni Pablo ang mga taga-Efeso, nga nagpuyo sa kasadpan sa Colosas, nga ang mga magbalantay ug mga magtutudlo maningkamot sa pagtabang sa ‘tanan nga makadangat sa pagkausa sa pagtuo ug sa tukmang kahibalo sa Anak sa Diyos, sa pagkahingkod nga tawo, sa gidak-on nga iya sa kabug-osan ni Kristo.’ Sa laing bahin giawhag ni Pablo ang mga Kristohanon nga mahimong ‘hingkod diha sa mga gahom sa pagsabot.’—Efeso 4:8-13; 1 Corinto 14:20.
5. Sa unsang paagi ang pagkabug-os mahimong atong pangunang tumong?
5 Kon ang uban sa Colosas dili pa hingkod, o hamtong sa espirituwal, kinahanglang himoon nila kanang tumong. Dili ba angay nga tinuod usab kana karon? Bisan pag kita bawtismado na sa daghan nang katuigang milabay o ning bag-o pa, dayag ba natong makita nga kita miuswag na sa atong katakos sa pagpangatarongan ug mga hunahuna? Pamalandongon ba nato ang mga prinsipyo sa Bibliya una pa kita mohimo ug mga desisyon? Ang mga butang may kalabotan sa intereses sa Diyos ug sa kongregasyon nagkadako bang bahin sa atong kinabuhi, imbes nagkagamay? Dili nato malarawan dinhi ang tanang paagi diin atong mapasundayag ang maong pagtubo hangtod sa pagkabug-os, apan palandonga ang duha ka pananglitan.
6. Unsang usa ka dapit diin ang usa mahimong mouswag paingon sa pagkahingpit, sama kang Jehova?
6 Pananglitan uno: Ingnon ta nga nagdako kita sa usa ka palibot nga naglabi ang pagpinig o kasuko ngadto sa mga tawo nga lahi ug rasa, nasyonalidad, o lugar. Kita nahibalo na nga ang Diyos dili mapihigon ug dili angay nga kita may pagpihig. (Buhat 10:14, 15, 34, 35) Diha sa atong kongregasyon o sirkito, may mga tawo nga lahi ug kagikan, busa kita anaa sa ilang palibot. Bisan pa, sa unsang sukod nga magbaton kita sa sulod nato ug negatibong pagbati o madudahon sa mga tawo nga ingon niana ug kagikan? Kita ba masuko, nga maghunahuna dayon ug dili maayo kon ang tawo nga ingon niana ug kagikan masayop o makasilo kanatog gamay? Pangutan-a ang imong kaugalingon, ‘Kinahanglan ko bang pauswagon pa ang akong pagbaton ug dili-mapihigong hunahuna sa Diyos?’
7. Ang pagkahimong bug-os ingong Kristohanon mahimong maglakip sa pagbaton ug unsang panglantaw sa uban?
7 Pananglitan dos: Sumala sa Filipos 2:3, kita kinahanglang ‘dili magbuhat ug bisan unsa tungod sa pagkamakiawayon o tungod sa pagkamagarbohon sa kaugalingon, kondili uban sa pagpaubos sa hunahuna nga magaisip nga mas maayo ang uban.’ Unsay atong pag-uswag niining bahina? Ang matag tawo dunay mga kahuyangan ug mga katakos. Kon sa nangagi kita makakita dayon sa mga kahuyangan sa uban, kita ba miuswag nga dili na magdahom kanila nga mahimong halos “hingpit”? (Santiago 3:2) Karon, mas labaw na kay sa miagi, kita ba makakita—mangita pa gani—ug mga paagi diin mas maayo ang uban? ‘Dawaton ko nga kining maong sister mas mapailobon kay kanako.’ ‘Kana siya nagpasundayag ug mas lig-ong pagtuo.’ ‘Sa pagkatinuod, mas maayo siya nga magtutudlo kay kanako.’ ‘Maayo kaayo siyang mokontrolar sa iyang kasuko.’ Tingali ang ubang mga taga-Colosas kinahanglang mouswag niining bahina. Kita kinahanglan ba?
8, 9. (a) Sa unsang diwa nga si Epafras nag-ampo alang sa mga taga-Colosas aron “makabarog” nga bug-os? (b) Unsay kahulogan sa ‘pagbarog nga bug-os’ may kalabotan sa umaabot?
8 Si Epafras nag-ampo nga ang mga taga-Colosas ‘makabarog nga bug-os.’ Matin-aw, si Epafras nag-ampo sa Diyos nga sa gilapdon nga ang mga taga-Colosas nahimo nang bug-os, hamtong, hingkod nga mga Kristohanon, sila “makabarog,” o makapabiling hamtong.
9 Dili nato dahomon nga ang matag usa nga nahimong Kristohanon, bisag hamtong pa, magpabiling ingon niana. Si Jesus miingon nga usa ka manulondang anak sa Diyos “wala mobarog nga lig-on diha sa kamatuoran.” (Juan 8:44) Ug gipahinumdoman ni Pablo ang mga taga-Corinto bahin sa pipila kanhi nga nag-alagad kang Jehova sa usa ka panahon apan mihunong na. Iyang gipasidan-an ang dinihogan-sa-espriritu nga mga igsoon: ‘Siya nga naghunahuna nga siya nagabarog magbantay nga siya dili mapukan.’ (1 Corinto 10:12) Kini nakahatag ug puwersa sa pag-ampo nga ang mga taga-Colosas ‘sa kataposan nakabarog nga bug-os.’ Sa dihang sila nahimo nang bug-os, nahimo nang hingkod, sila kinahanglang molahutay, nga dili mosibog, maluya, o maanod. (Hebreohanon 2:1; 3:12; 6:6; 10:39; 12:25) Busa sila mahimong ‘bug-os’ sa adlaw sa pagsusi ug sa kataposang pag-uyon kanila.—2 Corinto 5:10; 1 Pedro 2:12.
10, 11. (a) Unsang sumbanan ang gihatag ni Epafras alang kanato mahitungod sa pag-ampo? (b) Ingon sa gihimo ni Epafras, unsay ihukom nimo nga himoon?
10 Atong nahisgotan na ang bili sa pag-ampo alang sa uban nga hisgotan ang ngalan, nga magmaespesipiko sa paghangyo kang Jehova nga tabangan sila, hupayon sila, panalanginan sila, ug hatagan silag balaang espiritu. Ingon niana ang mga pag-ampo ni Epafras alang sa mga taga-Colosas. Ug kita makakita—sa pagkatinuod angay nga makakita—niadtong mga pulonga ug maayong sugyot bahin sa kon unsay atong ihisgot kang Jehova diha sa pag-ampo bahin sa atong kaugalingon. Sa walay duhaduha, kita angayng mangayog tabang ni Jehova sa tuyo nga aron kita mismo sa ‘kataposan makabarog nga bug-os.’ Ikaw ba nagabuhat niana?
11 Nganong dili hisgotan ang imong kahimtang diha sa pag-ampo? Isulti sa Diyos kon diin kutob nga ikaw nakahimog kauswagan sa pagkahimong ‘bug-os,’ hingkod, hamtong. Pangaliyupo kaniya nga tabangan ka nga makakita kon unsa pay angay nimong pauswagon sa espirituwal. (Salmo 17:3; 139:23, 24) Sa walay duhaduha, duna ka pay kinahanglang pauswagon. Unya, imbes maluya tungod niini, pangamuyo sa Diyos diha sa matin-aw, laktod nga paagi nga mangayog tabang aron mouswag. Himoa kini sa makadaghan. Sa pagkatinuod, nganong dili nimo ihukom nga niining umaabot nga semana moampo ka ug dugaydugay aron ikaw sa ‘kataposan makabarog nga bug-os.’ Ug planoha nga himoon kini sa makadaghan sa magpalandong ka sa teksto sa tuig. Sa imong mga pag-ampo, hatagig pagtagad ang imong mga tendensiya sa pagsibog, pagbatig kalaay, o pagkaanod gikan sa pag-alagad sa Diyos ug kon sa unsang paagi ikaw makalikay niana.—Efeso 6:11, 13, 14, 18.
Pag-ampo nga Makabaton ug Hugot nga Pagtuo
12. Nganong gikinahanglan gayod sa mga taga-Colosas ang “hugot nga pagtuo”?
12 Si Epafras nag-ampo usab ug laing butang nga hinungdanon aron ang mga taga-Colosas makaplagan sa kataposan nga nagbarog nga dalawaton sa Diyos. Hinungdanon usab kini kanato. Unsa man kadto? Siya nag-ampo nga sila makabarog nga “may hugot nga pagtuo sa bug-os nga kabubut-on sa Diyos.” Sila gilibotan sa sayop nga mga pagtulon-an ug makadaot nga mga pilosopiya, nga ang pipila niini adunay malimbongong dagway sa matuod nga pagsimba. Pananglitan, sila gipugos sa pagsaulog sa espesyal nga mga adlaw pinaagi sa pagpuasa o pagkombira, nga gikinahanglan niadto sa Hudiyohanong pagsimba. Gipasiugda sa mini nga mga magtutudlo ang mga manulonda, kadtong gamhanang mga espiritu nga gigamit sa pagpasa sa Balaod ngadto kang Moises. Handurawa lang nga mailalom nianang matanga sa kalisod! Dihay daghan kaayong makalibog nga nagkasumpakiayng mga ideya.—Galacia 3:19; Colosas 2:8, 16-18.
13. Ang pag-ila sa unsang butang ang makatabang sa mga taga-Colosas, ug sa unsang paagi kini makatabang kanato?
13 Si Pablo nangatarongan pinaagi sa pagpasiugda sa papel ni Jesu-Kristo. ‘Maingon nga inyong gidawat si Kristo Jesus nga Ginoo, padayon sa paglakaw nga nahiusa kaniya, nakagamot ug natukod diha kaniya ug nalig-on sa pagtuo, ingon sa gitudlo kaninyo.’ Oo, dihay panginahanglan (sa mga taga-Colosas ug kanato) sa bug-os nga pagtuo bahin sa papel ni Kristo diha sa katuyoan sa Diyos ug sa atong kinabuhi. Si Pablo nagpatin-aw: ‘Diha kaniya nagpuyo nga lawasnon ang tanang bug-os nga hiyas nga diyosnon. Ug busa kamo nakabaton sa kabug-osan pinaagi kaniya, nga mao ang ulo sa tanang kagamhanan ug awtoridad.’—Colosas 2:6-10.
14. Nganong ang paglaom maoy usa ka tinuod nga butang alang sa mga taga-Colosas?
14 Ang mga taga-Colosas maoy dinihogan-sa-espiritu nga mga Kristohanon. Sila dunay lahi nga paglaom, kinabuhi didto sa langit, ug sila dunay dakong katarongan sa paghupot niana nga paglaom nga masanagon. (Colosas 1:5) “Kabubut-on sa Diyos” nga sila adunay malig-ong pagtuo bahin sa pagkatino sa ilang paglaom. Aduna bay nagduhaduha kanila bahin nianang paglaoma? Wala gayod! Angay bang lahi na kini karon alang sa tanan nga adunay hinatag-sa-Diyos nga palaaboton nga kinabuhi diha sa usa ka yutan-ong paraiso? Dili gayod! Kanang tinuod nga paglaom maoy bahin gayod sa “kabubut-on sa Diyos.” Karon palandonga kining mga pangutanaha: Kon ikaw naningkamot nga mahimong usa sa “dakong panon” nga makalabang buhi “sa dakong kasakitan,” unsa ka tinuod ang imong paglaom? (Pinadayag 7:9, 14) Bahin ba kini sa imong “hugot nga pagtuo sa bug-os nga kabubut-on sa Diyos”?
15. Si Pablo naglatid ug unsang sunodsunod nga punto nga naglakip sa paglaom?
15 Sa maghisgot ug “paglaom” wala kita magtumong sa walay kasegurohang tinguha o damgo. Atong makita kini gikan sa sunodsunod nga mga punto nga unang gipresentar ni Pablo ngadto sa mga taga-Roma. Niana nga pagkasunodsunod, ang matag punto nga gihisgotan mosumpay o motultol sa sunod. Matikdi kon diin gibutang ni Pablo ang “paglaom” diha sa iyang pangatarongan: ‘Magsadya kita samtang anaa sa kasakitan, kay kita nahibalo nga ang kasakitan magpatungha ug paglahutay; ang paglahutay, sa baylo, ug inuyonang kahimtang; ang inuyonang kahimtang, sa baylo, ug paglaom, ug ang paglaom dili motultol sa pagkahigawad; tungod kay ang gugma sa Diyos gibubo man nganhi sa atong mga kasingkasing pinaagi sa balaang espiritu.’—Roma 5:3-5.
16. Sa dihang nakakat-on ka sa kamatuoran sa Bibliya, unsang paglaom ang imong nabatonan?
16 Sa dihang unang gipakig-ambit sa mga Saksi ni Jehova ang mensahe sa Bibliya diha kanimo, lagmit nakuha ang imong pagtagad sa usa ka kamatuoran, sama sa kahimtang sa mga patay o sa pagkabanhaw. Alang sa kadaghanan, ang unang bag-ong kahibalo mao ang pinasukad-sa-Bibliya nga posibilidad nga mabuhi diha sa usa ka yutan-ong paraiso. Hinumdomi sa dihang una nimong nadungog kana nga pagtulon-an. Pagkanindot nga paglaom—ang sakit ug pagkatigulang mawala na, ikaw mabuhi sa dayon nga kalipayan ang mga bunga sa imong kahago, ug adunay pakigdait uban sa mga mananap! (Ecclesiastes 9:5, 10; Isaias 65:17-25; Juan 5:28, 29; Pinadayag 21:3, 4) Ikaw nakabaton ug maanindot nga paglaom!
17, 18. (a) Sa unsang paagi ang sunodsunod nga punto nga gipresentar ni Pablo ngadto sa mga taga-Roma mipatungha ug paglaom? (b) Unsang matanga sa paglaom ang gipasabot diha sa Roma 5:4, 5, ug ingon ba niini ang imong paglaom?
17 Sa ulahi, lagmit nakaatubang ka ug pagsupak o paglutos. (Mateo 10:34-39; 24:9) Bisan ning bag-ong kapanahonan, ang mga balay sa mga Saksi sa lainlaing kayutaan gipanglungkab o gipugos sila sa pagkalagiw. Ang uban gani giamong-amongan, giilogan sa ilang literatura sa Bibliya, o gipuntirya sa bakak nga mga taho diha sa palaumagian sa balita. Bisan unsang matang sa paglutos ang imo tingaling giatubang, ingon sa gipamulong sa Roma 5:3, makabaton ka ug kalipay bisan sa kasakit, ug kini nagbunga ug maayo. Sama sa gisulat ni Pablo, ang kasakit nagpatungha diha kanimo ug paglahutay. Dayon ang paglahutay nagpatungha ug inuyonan nga kahimtang. Nahibalo ka nga husto ang imong ginahimo, nga nagtuman sa kabubut-on sa Diyos, busa nakapaneguro ka nga ikaw iyang giuyonan. Diha sa mga pulong ni Pablo, imong namatikdan nga anaa ka sa “inuyonang kahimtang.” Sa pagpadayon, si Pablo nagsulat nga ang “inuyonang kahimtang, sa baylo, [mopatungha] ug paglaom.” Morag medyo katingad-anan kana. Nganong gilista ni Pablo ang “paglaom” nga halayo diha sa sunodsunod nga lista? Dili ba ikaw dugay na nga dunay paglaom, sukad nga una nimong nadunggan ang maayong balita?
18 Tin-aw, si Pablo wala maghisgot dinhi sa atong unang pagbatig paglaom labot sa hingpit nga kinabuhi. Ang iyang gipunting maoy saylo pa niana; kini mas lalom, mas makapadasig. Kon kita mag-antos nga matinumanon ug sa ingon makaamgo nga kita giuyonan sa Diyos, kini dunay dakong epekto nga makadugang ug makapalig-on sa atong unang paglaom. Ang paglaom nga atong nabatonan sa pagkakaron mahimong mas tinuod, mas lig-on, mas personal. Kining nagkalalom nga paglaom modan-ag nga mas hayag. Kini motuhop sa atong pagkatawo, sa atong matag pagbati. ‘Ug ang paglaom dili motultol sa pagkahigawad; tungod kay ang gugma sa Diyos gibubo man nganhi sa atong mga kasingkasing pinaagi sa balaang espiritu.’
19. Sa unsang paagi ang imong paglaom mahimong bahin sa imong regular nga mga pag-ampo?
19 Kinasingkasing nga giampo ni Epafras nga ang iyang mga igsoong lalaki ug babaye sa Colosas magpabilin nga natandog ug nakombinsir nianang naghulat kanila sa unahan, nga may “hugot nga pagtuo sa bug-os nga kabubut-on sa Diyos.” Pasagdi nga ang matag usa kanato moduol kanunay sa Diyos sa samang paagi bahin sa atong paglaom. Diha sa imong pribadong mga pag-ampo, ilakip ang imong paglaom bahin sa bag-ong kalibotan. Isulti kang Jehova nga ikaw nangandoy gayod niana, uban ang hugot nga pagtuo nga kini moabot. Pangaliyupo kaniya alang sa tabang nga paladmon ug padak-on ang imong pagtuo. Sama kang Epafras nga nag-ampo nga ang mga taga-Colosas makabaton ug “hugot nga pagtuo sa bug-os nga kabubut-on sa Diyos,” mag-ampo ka usab. Pag-ampo kanunay.
20. Kon ang pipila mobulag sa Kristohanong dalan, nganong dili kini angay nga mahimong hinungdan sa pagkaluya?
20 Dili ka angayng magpalinga o maluya sa kamatuoran nga dili tanan nagbarog nga bug-os ug may hugot nga pagtuo. Ang uban tingali dili makabarog, mobulag, o mohunong na lang. Nahitabo kana taliwala sa labing suod ni Jesus, sa iyang mga apostoles. Apan sa dihang nahimong mabudhion si Judas, ang uban bang mga apostoles mihinay o mihunong? Wala gayod! Gikutlo ni Pedro ang Salmo 109:8 sa pagpakita nga dunay lain nga mopuli sa dapit ni Judas. Usa ka kapuli ang gipili, ug ang mga maunongon sa Diyos aktibong nagpadayon sa ilang buluhatong pagwali. (Buhat 1:15-26) Sila determinado nga magbarog nga bug-os nga may hugot nga pagtuo.
21, 22. Sa unsang diwa nga ang imong pagbarog nga bug-os nga may hugot nga pagtuo mamatikdan?
21 Ikaw makaseguro gayod nga ang imong pagbarog nga bug-os ug may hugot nga pagtuo diha sa tanang kabubut-on sa Diyos mamatikdan. Kini makita ug pabilhan. Pabilhan ni kinsa?
22 Aw, ang imong mga igsoong lalaki ug babaye, kinsa nakaila ug nahigugma kanimo, makamatikod. Bisan pa kon dili kini isulti sa kadaghanan, ang epekto mahisama nianang atong mabasa sa 1 Tesalonica 1:2-6: ‘Kami nagpasalamat kanunay sa Diyos sa dihang hisgotan namo kamong tanan diha sa among mga pag-ampo, kay kami nahinumdom kanunay sa inyong buhat sa pagtuo ug sa inyong mahigugmaong paghago ug sa inyong pag-antos tungod sa inyong paglaom diha sa atong Ginoong Jesu-Kristo atubangan sa atong Diyos ug Amahan. Kay . . . ang maayong balita nga among giwali midangat kaninyo dili sa pulong lamang kondili usab sa gahom ug sa balaang espiritu ug sa hugot nga pagtuo . . . ; ug kamo nahimong mga tigsundog namo ug sa Ginoo.’ Ang maunongong mga Kristohanon sa imong palibot sama usab ug bation samtang ilang makita nga ikaw ‘nakabarog nga bug-os ug may hugot nga pagtuo sa bug-os nga kabubut-on sa Diyos.’—Colosas 1:23.
23. Sa panahon niining umaabot nga tuig, unsa ang imong determinasyon?
23 Sa pagkatinuod, ang imong langitnong Amahan makakita ug malipay. Makasalig ka niana. Ngano? Tungod kay ikaw nagbarog nga bug-os ug may hugot nga pagtuo “sa bug-os nga kabubut-on sa Diyos.” Madasigong gisulatan ni Pablo ang mga taga-Colosas bahin sa ilang paglakaw nga “takos kang Jehova sa katuyoan nga makapahimuot kaniya sa bug-os.” (Colosas 1:10) Oo, posible nga ang dili-hingpit nga mga tawo makapahimuot kaniya sa bug-os. Ang imong mga igsoong lalaki ug babaye sa Colosas nakapahimuot kaniya sa bug-os. Ang mga Kristohanon sa imong palibot karon mismo nakapahimuot kaniya sa bug-os. Ikaw usab makapahimuot kaniya sa bug-os! Busa, sa pagdagan niining umaabot nga tuig, himoa nga ang imong adlaw-adlaw nga mga pag-ampo ug ang imong regular nga mga buhat magpamatuod nga ikaw determinado nga ‘sa kataposan makabarog nga bug-os ug may hugot nga pagtuo sa bug-os nga kabubut-on sa Diyos.’
Makahinumdom Ka Ba?
• Unsay nalangkit sa imong ‘pagbarog nga bug-os’?
• Unsang mga butang bahin sa imong kaugalingon ang angay nimong ilakip diha sa pag-ampo?
• Ingon sa gipasabot sa Roma 5:4, 5, unsang matanga sa paglaom ang buot nimong mabatonan?
• Ang atong pagtuon nakapukaw kanimo sa pagkab-ot sa unsang tumong panahon sa umaabot nga tuig?
[Mga Pangutana sa Pagtuon]
[Hulagway sa panid 20]
Si Epafras nag-ampo nga ang iyang mga igsoon makabarog nga bug-os, nga may hugot nga pagtuo bahin kang Kristo ug sa ilang paglaom
[Mga hulagway sa panid 23]
Ang imong seguradong paglaom ug hugot nga pagtuo giambitan sa minilyon pang uban