Nahinumdom Ka Ba?

Imo bang gipabilhan ang pagbasa sa di pa dugayng mga isyu sa Ang Bantayanang Torre? Buweno, sulayi kon imo bang matubag ang mosunod nga mga pangutana:

• Unsay hinungdanon aron atong masulbad ang panagbingkil batok sa usa ka tawo?

Kinahanglang ilhon una nato nga kitang tanan daling masayop sa hunahuna ug tinamdan. Dayon kinahanglang atong palandongon ug maayo kon kita ba ang hinungdan sa problema imbes nga ang laing tawo.—8/15, panid 23.

• Kanus-a mahitabo ang “mga panahon sa pagpasig-uli sa tanang butang,” nga gihisgotan sa Buhat 3:21?

Ang pagpasig-uli moabot sa duha ka hugna. Una, adunay pagpasig-uli ngadto sa espirituwal nga paraiso nga nahitabo sukad sa 1919. Ang dugang nga pagpasig-uli moabot sa dihang ang atong yuta ipasig-uli ngadto sa usa ka pisikal nga paraiso.—9/1, mga panid 17, 18.

• Sa unsang paagi ang olmigas bisag walay magmamando, sumala sa giingon sa Proverbio 6:6-8, naghatag ug maayong panig-ingnan alang kanato?

Diha sa kolonya sa olmigas, anaa ang rayna, apan rayna lamang siya sa diwa nga siya mangitlog ug maoy inahan sa kolonya. Kugihan ang mga olmigas, ug angay nga ingon usab kita niana, nga maningkamot sa pagpauswag sa atong trabaho, bisag walay magbantay.—9/15, panid 26.

• Tukma ba ang tagna ni Hulda, ingon sa gitala diha sa 2 Hari 22:20, nga si Josias mamatay “diha sa kalinaw,” sanglit siya nasamdan man ug namatay sa gubat?

Oo, siya namatay diha sa kalinaw sa diwa nga siya namatay una pa ang kalamidad sa 609-607 W.K.P., sa dihang ang mga Babilonyanhon misulong ug naglaglag sa Jerusalem.—9/15, panid 30.

• Sa unsang paagi si Solomon nagsultig pagdayeg sa dihang naghubit sa usa ka asawa ingong “usa ka makabibihag nga kanding sa bukid”? (Proverbio 5:18, 19)

Ang bayeng ihalas nga kanding, o kanding sa bukid, may hilomong kinaiya ug matahom nga porma. Bisan pa niana, kini mabuhi ug manganak diha sa batoon, dili daling maabot nga mga dapit diin nihit ang pagkaon.—10/1, mga panid 30, 31.

• Kinsa si Henry Grew ug George Storrs?

Kining duha ka lalaki nagkinabuhi sa katuigang 1800 ug maoy mainitong mga estudyante sa Bibliya. Natun-an ni Grew nga ang Trinidad dili kasulatanhon, maingon man ang mga doktrina sa pagkadili-mamatay sa kalag ug impiyernong-kalayo. Nasabtan ni Storrs nga ang uban magbaton unya ug kinabuhing walay kataposan sa yuta. Silang duha nag-una kang Charles Taze Russell, kinsa nagsugod sa pagpatik niining magasina niadtong 1879.—10/15, mga panid 26-30.

• Unsay panglantaw sa mga Saksi ni Jehova sa medikal nga mga pamaagi nga naggamit sa iyang kaugalingong dugo?

Sanglit nagbase sa ilang mga pagtulon-an diha sa Bibliya, dili nila ideposito ang ilang kaugalingong dugo ug sa ulahi mosugot nga kini iabono kanila. Ang matag Kristohanon mohukom alang sa iyang kaugalingon kon sa unsang paagi gamiton ang iyang dugo panahon sa pag-opera, medikal nga pagsusi, o padayong pagtambal. Kinahanglang iyang tagdon kon unsay gisulti sa Bibliya bahin sa dugo ug hinumdoman nga siya bug-os nga nagpahinungod ngadto sa Diyos.—10/15, mga panid 30, 31.

• Ang usa ka surbi nga gidumala sayo niining tuiga nagpadayag ug unsang dakong panginahanglan taliwala sa mga Saksi ni Jehova sa tibuok kalibotan?

Nanginahanglan ug kapin sa 11,000 ka Kingdom Hall ang kabos nga mga nasod, diin limitado ang panalapi. Ang mga kontribusyon gikan sa mga Kristohanon sa daghang nasod gigamit sa pagtabang sa pagtukod ug igong mga dapit nga tigomanan.—11/1, panid 30.

• Unsa ang pipila sa mga pulong sa orihinal nga pinulongan nga gigamit diha sa Bibliya may kalabotan sa pagsimba?

Ang usa mao ang lei·tour·giʹa, nga gihubad nga “publikong pag-alagad.” Ang lain mao ang la·treiʹa, nga gihubad nga “sagradong pag-alagad.” (Hebreohanon 10:11; Lucas 2:36, 37)—11/15, mga panid 11, 12.

• Unsang hinungdanong pagtulon-an ang atong makat-onan gikan sa asoy sa Bibliya bahin kang Adan ug Eva?

Ang pagtinguha sa pagkaindependente gikan kang Jehova nga Diyos maoy bug-os nga kabuangan.—11/15, mga panid 24-7.

• Unsang Kasulatanhong pamatuod nga ang Diyos mohatag ug gahom sa iyang mga alagad?

Si David, Habacuc, ug si apostol Pablo naghatag tanan ug personal nga mga testimonya nga si Jehova nga Diyos naghatag ug kusog, o gahom, kanila. (Salmo 60:12; Habacuc 3:19; Filipos 4:13) Busa, makasalig kita nga ang Diyos andam ug makahimo sa pagpalig-on kanato.—12/1, mga panid 10, 11.