Napalihok sa Pag-alagad

UNSAY magpalihok sa 24 ka magtiayon nga anaa sa kinahupngang bahin sa kinabuhi nga mobiya sa ilang mga pamilya, mga higala, ug naandang mga palibot aron mosulod sa misyonaryong buluhaton diha sa langyawng kayutaan? Nganong sila malipay nga moadto sa mga dapit sama sa Papua New Guinea ug Taiwan, ingon man sa mga nasod sa Aprika ug Latin Amerika? Gugma kaha sa adbentura? Dili. Hinunoa, sila gipalihok sa tiunay nga gugma sa Diyos ug sa silingan.—Mateo 22:37-39.

Kinsa kining mga tawhana? Sila ang mga graduwado sa ika-109 nga klase sa Watchtower Bible School of Gilead. Sa Sabado, Septiyembre 9, 2000, ang total nga 5,198 ka tawo nagtigom didto sa Watchtower Educational Center—nga nahimutang sa Patterson, New York—ug sa kasikbit nga mga dapit aron sa pagpaminaw sa mahigugmaong tambag nga makatabang sa mga graduwado nga mahimong malamposong mga misyonaryo.

Ang tsirman sa programa mao si Stephen Lett, membro sa Komite sa Pagtudlo sa Nagamandong Lawas sa mga Saksi ni Jehova. Gipasukad niya ang iyang pang-abling mga komento diha sa Mateo 5:13, “Kamo mao ang asin sa yuta.” Gipatin-aw ni Brader Lett nga ang mga pulong ni Jesus mapadapat gayod sa mograduwar nga mga estudyante. Pananglitan, ang asin makapalami sa mga pagkaon. Sa ingon usab, pinaagi sa ilang epektibong pagsangyaw nga buluhaton, ang mga misyonaryo maoy samag asin sa mahulagwayong paagi.

Panamilit nga Pagdasig

Dayon gipailaila ni Brader Lett ang pipila ka dugay nang mga alagad ni Jehova nga mihatag ug mugbo apan puwersadong Kasulatanhong mga pakigpulong. Ang una mao si John Wischuk, nga nag-alagad sa Departamento sa Pagsulat. Ang iyang tema, “Ang Kinamub-ang Salmo Nagpalambo sa Misyonaryong Espiritu,” gipasukad sa Salmo 117. Karon, dunay tibuok-kalibotang panginahanglan sa pagpamatuod ngadto sa “mga nasod” ug “kabanayan” bahin kang Jehova ug sa iyang Gingharian. Ang mga estudyante gidasig sa pagtuman sa giingon sa Salmo 117 pinaagi sa pag-awhag sa uban nga ‘Dayegon si Jah.’

Sunod nga gipailaila sa tsirman mao si Guy Pierce sa Nagamandong Lawas. Siya nagpakigpulong bahin sa ulohang “Magmapasiboon, Apan Malig-on.” Ang Pulong sa Diyos lig-on. Si Jehova nga Diyos gitawag nga Bato diha sa Deuteronomio 32:4, apan ang iyang Pulong nagtugot sa pagkamapasiboon kay kini gisulat alang sa tanang grupo sa pinulongan ug mga kultura—oo, alang sa tanang tawo. Gitambagan ang mga estudyante sa pagsangyaw sa Pulong sa Diyos, nga magtugot sa mensahe niini sa pagtukbil sa kasingkasing ug tanlag sa mga tawo. (2 Corinto 4:2) “Magmalig-on maylabot sa hustong mga prinsipyo, apan magmapasiboon. Ayaw tamaya ang mga tawo sa inyong asaynment tungod kay lahi ang ilang kultura,” tambag pa ni Brader Pierce.

Si Karl Adams, usa sa mga instruktor sa Gilead, nga nag-alagad sa tibuok-kalibotang hedkuwarter sulod na sa halos 53 ka tuig, nagpakigpulong bahin sa makapukaw sa hunahuna nga temang “Asa Kamo Moadto Gikan Dinhi?” Tinuod, ang 24 ka magtiayon nakadawat ug misyonaryong mga asaynment diha sa 20 ka nagkalainlaing mga nasod sa tibuok kalibotan, apan ang  pangutana gipatugbaw, Inig-abot ninyo didto ug makita na ninyo kana, nan unsa na man? Nagkinabuhi kita sa usa ka kalibotan nga adunay kiling nga dili mapondo sa usa ka dapit. Ang mga tawo buot moadto sa bag-ong mga dapit ug mobuhat ug bag-ong mga butang sa paningkamot nga pahimut-an ang ilang kaugalingon. Sa laing bahin, ang mga estudyante nakadawat ug asaynment gikan kang Jehova ngadto sa dapit nga buot niyang ilang adtoan aron atimanon sa di-hinakog nga paagi ang iyang “mga karnero.” Dili sila angayng mahisama sa mga tawo sa karaang Israel kinsa tungod sa kahakog nawad-an sa kahigayonan nga magamit ni Jehova sa pagpanalangin sa tanang tawo. Hinunoa, angay nilang sundogon si Jesu-Kristo, kinsa kanunayng nagbuhat sa kabubut-on sa iyang Amahan sa di-hinakog nga paagi ug nagmasinugtanon sa tanang kahimtang nga iyang giatubang.—Juan 8:29; 10:16.

“Pabilhi ang Lawom nga mga Butang sa Diyos” maoy tema ni Wallace Liverance, ang tigrehistro sa Tunghaang Gilead. Sublisubli, ang Kasulatan naghisgot sa Pulong sa Diyos nga nagpakasama niini sa mga bahandi, hamiling mga mutya, bililhong mga metal, ug mga butang nga mahal kaayo ug pinangita. Gipakita sa Proverbio 2:1-5 nga aron makaplagan “ang mismong kahibalo sa Diyos,” kinahanglang atong pangitaon kini samag “natagong mga bahandi.” Gidasig sa mamumulong ang mga estudyante  nga magpadayon sa pagkubkob sa lawom nga mga butang sa Diyos samtang mag-alagad sila sa ilang bag-ong mga asaynment. Si Brader Liverance nangatarongan: “Praktikal kini, kay padakoon niini ang pagtuo ug pagsalig kang Jehova ug palig-onon ang inyong determinasyon nga magpabilin sa inyong asaynment. Motabang kini kaninyo sa pagsulti uban ang hugot nga pagtuo ug sa pagkahimong mas epektibong magtutudlo samtang ipatin-aw ninyo ang mga katuyoan sa Diyos ngadto sa uban.”

Ginamit ang situwasyon sa klase, ang laing instruktor sa Tunghaang Gilead nagrepaso kon sa unsang paagi gipanalanginan ni Jehova ang kalihokan sa pag-alagad sa kanataran sa mga estudyante sa miaging lima ka bulan. Gipunting ni Lawrence Bowen ang mga pulong ni apostol Pablo sa Buhat 20:20 bahin sa iyang publikong ministeryo sa Efeso, nga nagpasiugda nga gipahimuslan ni Pablo ang tanang kahigayonan sa pagpamatuod. Ang mga eksperyensiya sa mga estudyante nag-ilustrar nga, sama kang apostol Pablo, kadtong gipalihok sa gugma alang sa Diyos ug sa silingan sa atong panahon dili gayod mohunong sa pagsulti sa kamatuoran ug sa pagtugot sa gahom sa Pulong sa Diyos sa pag-impluwensiya sa ubang tawo. Mosangpot kini sa dagayang panalangin ni Jehova.

Mga Eksperyensiyado Misulti

Sa ilang semestre sa tunghaan, ang mga estudyante niining klaseha sa Gilead ilabinang nakabaton ug kaayohan kay nakapakig-uban sila sa mga membro sa Komite sa Sangang Buhatan gikan sa 23 ka nasod, nga didto usab sa Patterson Educational Center alang sa espesyal nga pagbansay. Si Leon Weaver ug Merton Campbell sa Departamento sa Pag-alagad nag-interbiyo sa nagkalainlaing membro sa Komite sa Sangang Buhatan, nga ang uban kanila mga graduwado usab sa Gilead. Makapalig-on gayod para sa mga estudyante ug sa ilang mga pamilya ug mga higala ang pagpatalinghog gikan niining eksperyensiyadong mga misyonaryo.

Ang tambag ngadto sa mograduwar nga klase aron matabangan sila sa pagpasibo diha sa ilang langyawng mga asaynment naglakip sa mga komento sama niini: “Magmapositibo. Kon makasinati kamog usa ka butang nga dili gayod pamilyar kaninyo ug dili ninyo masabtan, ayawg hunong. Salig kang Jehova”; “kat-oni nga malipay kon unsay anaa, ug salig nga si Jehova motagana sa inyong mga panginahanglan sa kinabuhi.” Ang ubang mga komento nagtumong sa pagtabang sa mga estudyante sa pagmentinar sa kalipay diha sa ilang asaynment. Ang pipila ka ekspresyon maoy: “Ayaw itandi ang asaynment nga imong adtoan sa dapit nga imong gigikanan”; “tun-i ang lokal nga pinulongan ug isulti kana sa hustong paagi aron makapakigsulti kamo sa mga tawo”; “tun-i ang mga kostumbre ug kultura sa mga tawo, kay motabang kini kaninyo sa pagpabilin diha sa inyong asaynment.” Kining mga komentoha nakadasig pag-ayo sa bag-ong mga misyonaryo.

Human sa mga interbiyo, si David Splane, kanhi misyonaryo ug graduwado sa ika-42 nga klase sa Gilead nga karon nagaalagad ingong membro sa Nagamandong Lawas sa mga Saksi ni Jehova, nagtagik sa hinungdanon kaayo nga pakigpulong nga naghisgot sa makapadaning tema nga “Mga Estudyante o mga Graduwado—Hain Ka Man Niana?” Gipangutana niya ang mograduwar nga klase: “Unsay pag-isip ninyo sa inyong kaugalingon inig-adto ninyo sa inyong misyonaryong asaynment? Ingong mga graduwado nga nahibalo sa tanan bahin sa misyonaryong buluhaton o ingong mga estudyante nga daghan pa ug angayng tun-an?” Gipunting ni Brader Splane nga ang maalamong graduwado mag-isip sa iyang kaugalingon ingong estudyante. Kinahanglang isipon sa mga misyonaryo nga ang tanang tawo nga ilang ikahibalag diha sa ilang misyonaryong asaynment dunay potensiyal nga makatudlo nilag usa ka butang. (Filipos 2:3) Gidasig ang mga estudyante nga makigtambayayong pag-ayo sa ilang mga isigkamisyonaryo, sa sangang buhatan, ug sa lokal nga kongregasyon. “Nakapasar kamo sa inyong kataposang pasulit, apan mga estudyante gihapon kamo. Ipatin-aw sa tanan nga atua kamo didto aron mokat-on,” awhag pa ni Brader Splane.

Human niining pakigpulonga, gidawat sa mga estudyante ang ilang mga diploma, ug ang ilang mga asaynment gipahibalo sa mamiminaw. Makapahinuklog kadto nga gutlo alang sa mograduwar nga mga estudyante samtang ang usa ka hawas sa klase human niana mibasa sa resolusyon nga naghisgot sa determinasyon sa migraduwar nga mga estudyante sa pagtugot sa ilang nakat-onan gikan sa Pulong sa Diyos nga magpalihok kanila sa pagbuhat ug labaw pa nga sagradong pag-alagad.

Ang tanang nanambong miuyon nga ang nadawat nga tambag nagpalig-on sa desisyon sa mga estudyante nga ipakita ang gugma sa Diyos ug sa silingan. Kini naghimo usab kanilang mas determinado kay sukad masukad nga tabangan ang mga tawo sa espirituwal nga paagi diha sa ilang misyonaryong asaynment.

[Kahon sa panid 25]

ESTADISTIKA SA KLASE

Gidaghanon sa mga nasod nga gihawasan: 10

Gidaghanon sa mga nasod nga gipadalhan: 20

Gidaghanon sa mga estudyante: 48

Aberids nga edad: 33.7

Aberids nga katuigan sa kamatuoran: 16.2

Aberids nga katuigan sa bug-os-panahong ministeryo: 12.5

[Hulagway sa panid 26]

Ika-109 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Collins, E.; Miles, L.; Alvarado, A.; Lake, J. (2) Van Dusen, L.; Biharie, A.; Heikkinen, H.; Koós, S.; Smith, H. (3) Ashford, J.; Ashford, C.; Boor, C.; Richard, L.; Wilburn, D.; Lake, J. (4) Chichii, K.; Chichii, H.; Ramirez, M.; Baumann, D.; Becker, G.; Biharie, S.; Ramirez, A. (5) Van Dusen, W.; Lemâtre, H.; Pisko, J.; Cutts, L.; Russell, H.; Johnson, R. (6) Becker, F.; Baumann, D.; Johnson, K.; Pifer, A.; Madsen, C.; Lemâtre, J.; Heikkinen, P. (7) Smith, R.; Russell, J.; Collins, A.; Pisko, D.; Wilburn, R.; Koós, G. (8) Cutts, B.; Boor, J.; Madsen, N.; Pifer, S.; Richard, E.; Miles, B.; Alvarado, R.