Nganong Alagaron Nimo ang Diyos?

Ang usa ka mahadlokon-sa-Diyos nga hari kas-a mihatag niini nga tambag ngadto sa iyang anak lalaki: “Ilha ang Diyos sa imong amahan ug alagara siya uban ang bug-os nga kasingkasing ug uban ang malipayon nga kalag.” (1 Cronicas 28:9) Tin-aw, buot ni Jehova nga ang iyang mga alagad moalagad kaniya uban ang mapasalamaton, mapabilhong mga kasingkasing.

INGONG mga Saksi ni Jehova, kita modawat dayon nga sa dihang unang gipatin-aw ang mga saad sa Bibliya, ang atong mga kasingkasing napuno sa pagpasalamat. Matag adlaw, nakat-onan nato ang bag-ong butang bahin sa mga katuyoan sa Diyos. Sa nagkadaghan ang atong nakat-onan bahin kang Jehova, labaw nga nagmatinguhaon kita sa pag-alagad kaniya “uban ang bug-os nga kasingkasing ug uban ang malipayon nga kalag.”

Daghan niadtong nahimong mga Saksi ni Jehova nagpadayon sa pag-alagad kang Jehova nga malipayon kaayo sa tibuok nilang kinabuhi. Apan, ang ubang mga Kristohanon maayo kaayo sa pagsugod, apan ngadtongadto, ilang malimtan ang dagkong mga katarongan nga nagpalihok kanato sa pag-alagad sa Diyos. Nahitabo na ba kana kanimo? Kon mao, ayawg kaluya. Ang nawalang kalipay mahimong mahibalik pag-usab. Sa unsang paagi?

Palandonga ang Imong mga Panalangin

Una, palandonga ang adlaw-adlawng mga panalangin nga imong madawat gikan sa Diyos. Hunahunaa ang maayong mga gasa ni Jehova: ang iyang daghang buhat sa paglalang—magamit sa tanan bisan unsa pay kahimtang diha sa katilingban o panginabuhi—ang iyang kinaiyanhong mga tagana nga pagkaon ug mainom, ang sukod sa kahimsog nga imong gitagamtam, ang imong kahibalo sa kamatuoran sa Bibliya, ug sa panguna, ang gasa sa iyang Anak. Ang iyang kamatayon nag-andam sa dalan aron ikaw makaalagad sa Diyos nga may hinlong tanlag. (Juan 3:16; Santiago 1:17) Kon kanunay kang mamalandong sa pagkamaayo sa Diyos, labi pang motubo ang imong pagpabili kaniya. Dayon ang imong kasingkasing mopalihok kanimo sa pag-alagad kaniya agig pagpasalamat alang sa tanan nga iyang nahimo. Walay duhaduha ikaw mobati pag-usab sama sa gibati sa salmista kinsa misulat: “Daghang butang ang imong nabuhat, Oh Jehova nga Diyos ko, bisan ang imong katingalahang mga buhat ug ang imong mga hunahuna nganhi kanamo; walay mausa nga ikatandi kanimo. . . . Daghan pa sila kay sa akong ikabatbat.”—Salmo 40:5.

Kining mga pulonga gisulat ni David, usa ka tawo kansang kinabuhi puno sa mga suliran. Sa batan-on pa, gigugol ni David ang daghan niyang panahon ingong usa ka kagiw tungod kay ang daotang Haring Saul ug ang iyang mga guwardiya nangita kaniya aron patyon siya. (1 Samuel 23:7, 8, 19-23) Si David usab may personal nga mga kahuyangan nga gipakigbisogan. Iyang giila kini diha sa ika-40 nga Salmo: “Kay gilibotan ako ug mga katalagman hangtod nga dili na sila maihap. Naapsan ako sa mas daghan pa nakong mga kasaypanan kay sa arang nakong makita; sila nahimong daghan pa kay sa mga buhok sa akong ulo.” (Salmo 40:12) Oo, si David may mga suliran, apan wala gayod siya madaog niana. Bisan pa sa iyang mga suliran, iyang gisentro ang pagtagad sa mga paagi diin si Jehova nagpanalangin kaniya, ug iyang nakaplagan nga ang maong mga panalangin mas daghan kay sa iyang mga kabalaka.

Sa dihang ikaw mobating nalumsan sa personal nga mga suliran o mobating walay-katakos, maayong mohunong ug hunahunaon ang imong mga panalangin, sama sa gibuhat ni David. Sa walay duhaduha, ang pagpabili sa maong mga panalangin mopalihok kanimo nga ipahinungod ang imong kaugalingon ngadto kang Jehova; ang maong mga hunahuna  makatabang usab kanimo sa pagpukaw pag-usab sa nawalang kalipay ug makatabang kanimo sa pag-alagad sa Diyos gikan sa usa ka mapabilhong kasingkasing.

Ang mga Tigom sa Kongregasyon Makatabang

Dugang pa sa pribadong pagpamalandong sa mga kaayo ni Jehova, kita kinahanglang makig-uban sa mga isigka-Kristohanon. Makapadasig ang pakigtigom nga makanunayon uban sa mga lalaki, mga babaye, ug mga batan-on kinsa nahigugma sa Diyos ug kinsa determinado nga moalagad kaniya. Ang ilang panig-ingnan makapaaghat kanato alang sa tibuok-kalag nga pagkaaktibo diha sa pag-alagad kang Jehova. Ang atong presensiya sa Kingdom Hall makapadasig usab kanila.

Sa pagkatinuod, sa dihang kita mopauli sa balay human sa usa ka hagong trabaho sa adlaw o sa dihang kita naluya tungod sa pipila ka problema o kahuyangon, tingali dili sayon ang paghunahuna bahin sa pagtambong sa tigom sa Kingdom Hall. Sa maong mga panahon, tingali kinahanglan kitang magmaestrikto sa atong kaugalingon, ‘nga magamakmak sa atong lawas,’ pagaingnon pa, aron atong matuman ang sugo nga makigtigom uban sa mga isigka-Kristohanon.—1 Corinto 9:26, 27; Hebreohanon 10:23-25.

Kon mahitabong gikinahanglan kana, angay bang mohinapos kita nga wala nato higugmaa si Jehova sa tinuoray? Dili gayod. Ang hamtong nga mga Kristohanon kaniadto kansang gugma sa Diyos dili-malalis kinahanglang manlimbasog pag-ayo sa pagbuhat sa kabubut-on sa Diyos. (Lucas 13:24) Usa si apostol Pablo sa maong Kristohanon. Siya walay-lipodlipod nga mihubit sa iyang pagbati niining paagiha: “Ako nahibalo nga kanako, nga mao, sa akong unod, walay nagapuyo nga bisan unsang maayo; kay ang katakos sa pagbuot ania uban kanako, apan ang katakos sa paghimong malampos kon unsa ang maayo wala. Kay ang maayo nga buot ko wala ko buhata, apan ang daotan nga dili ko buot mao ang akong ginabuhat.” (Roma 7:18, 19) Ug iyang gisultihan ang mga taga-Corinto: “Kon, karon, akong ginapahayag ang maayong balita, dili kini katarungan alang kanako nga manghambog, kay ang panginahanglan gikapatong ibabaw kanako. . . . Kon akong ginahimo kini nga kinabubut-on, ako adunay ganti; apan kon ginabuhat ko kini batok sa akong kabubut-on, sa gihapon ako adunay pagkatinugyanan nga gipiyal kanako.”—1 Corinto 9:16, 17.

Sama sa daghan kanato, si Pablo adunay mga kiling sa pagpakasala nga nagbabag sa iyang tinguha sa pagbuhat kon unsay matarong. Apan, siya nanlimbasog sa pagpakigbugno batok niana nga mga kiling, ug sa kadaghanang higayon, siya nagmalamposon. Siyempre, si Pablo wala magmadaogon niini pinaagi sa iyang kaugalingong kusog. Siya misulat: “Sa tanang butang ako adunay kusog tungod kaniya nga nagahatag ug gahom kanako.” (Filipos 4:13) Si Jehova, ang usa nga naghatag ug gahom kang Pablo, maghatag usab ug gahom kanimo sa pagbuhat kon unsay matarong kon mohangyo ka kaniya alang sa tabang. (Filipos 4:6, 7) Busa “kusganong makigbugno alang sa pagtuo,” ug si Jehova magapanalangin kanimo.—Judas 3.

Dili ka kinahanglang makig-away nga kinaugalingon niini nga bugno. Diha sa mga kongregasyon sa mga Saksi ni Jehova, ang hamtong nga Kristohanong mga ansiyano, kinsa nagalahutay sa ilang kaugalingon sa ‘pagpakigbugno alang sa pagtuo,’ andam nga motabang kanimo. Kon moduol ka sa usa ka ansiyano alang sa tabang, siya manlimbasog sa ‘pagsulti nga mahupayon’ kanimo. (1 Tesalonica 5:14) Ang iyang tumong mao ang paglihok “sama sa usa ka tagoanang dapit gikan sa hangin ug usa ka salipdanang dapit gikan sa bagyo.”—Isaias 32:2.

“Ang Diyos gugma,” ug buot niya nga ang iyang mga alagad moalagad kaniya tungod sa gugma. (1 Juan 4:8) Kon ang imong gugma sa Diyos kinahanglang pukawon pag-usab, himoa ang tukmang lakang sa pagpukaw niana, ingon sa gilaraw sa ibabaw. Magmalipayon ka nga gibuhat mo kana.