Tabangi ang Uban Aron Makalakaw nga Takos Kang Jehova

“Kami . . . wala mohunong sa pag-ampo alang kaninyo ug sa paghangyo nga kamo unta . . . magalakaw nga takos kang Jehova sa katuyoan nga makapahimuot kaniya sa bug-os samtang padayon kamong magapamunga sa tanang maayong buhat.”—COLOSAS 1:9, 10.

1, 2. Unsa gayod ang mahimong tuboran sa kalipay ug katagbawan?

 “KAMI nagpuyo sa usa ka treyler diha sa uma. Tungod kay gipayano man namo ang among kinabuhi, mas daghan kami ug panahon sa pagduaw sa mga tawo dala ang maayong balita. Kami tugob nga gipanalanginan sa pribilehiyo nga matabangan ang daghan aron ilang ipahinungod ang ilang mga kinabuhi kang Jehova.”—Usa ka magtiayon nga bug-os-panahong mga ministro sa Habagatang Aprika.

² Dili ka ba mouyon nga ang pagtabang sa uban mohatag ug kalipay? Ang uban naningkamot nga matabangan kanunay ang mga masakiton, ang hinikawan, o ang nagmamingawon—nga nakatagamtam ug katagbawan sa paghimo niini. Ang tinuod nga mga Kristohanon masaligon nga ang ilang pagpaambit ngadto sa uban sa kahibalo bahin kang Jehova nga Diyos ug kang Jesu-Kristo mahimong labing dakong tabang nga ilang ikahatag. Pinaagi lamang niini nga maagak ang uban sa pagdawat sa lukat ni Jesus, pag-ugmad ug maayong relasyon sa Diyos, ug sa ingon makabaton ug kinabuhing walay kataposan.—Buhat 3:19-21; 13:48.

3. Unsang matanga sa tabang ang angay natong tagdon?

³ Apan, komosta ang bahin sa pagtabang sa mga tawo nga nag-alagad na sa Diyos, kinsa naglakaw na sa “Dalan”? (Buhat 19:9) Segurado nga maikagon gihapon ka kaayo kanila, apan basin naglibog ka kon unsa pay imong mahimo o mahatag nga gikinahanglang tabang. O tingali tungod sa imong kahimtang ikaw dili kaayo makatabang kanila, busa dili kaayo bug-os ang imong katagbawan. (Buhat 20:35) Mahitungod niining duha, kita dunay makat-onan gikan sa basahon sa Colosas.

4. (a) Sa unsang mga kahimtang nga si Pablo misulat sa mga taga-Colosas? (b) Sa unsang paagi nalangkit si Epafras?

⁴ Sa dihang nagsulat si apostol Pablo ngadto sa mga Kristohanon sa Colosas, didto siya sa Roma ingong priso kabalyero, apan siya makadawat ug mga bisita. Ingon sa imong madahom, gigamit ni Pablo ang iyang limitadong kagawasan sa pagsangyaw bahin sa Gingharian sa Diyos. (Buhat 28:16-31) Ang kaubang mga Kristohanon makabisita kang Pablo, ang pipila tingali binilanggo uban kaniya usahay. (Colosas 1:7, 8; 4:10) Ang usa mao ang madasigong ebanghelisador nga si Epafras sa siyudad sa Colosas sa Phrygia, sa tagaytay sa sidlakan sa Efeso sa Asia Minor (modernong-adlaw nga Turkey). Si Epafras nahimong kasangkapan sa pagtukod sa kongregasyon sa Colosas, ug siya nagkugi alang sa mga kongregasyon sa kanait nga Laodicea ug Hierapolis. (Colosas 4:12, 13) Nganong si Epafras mipanaw sa pagpakigkita kang Pablo sa Roma, ug unsay atong makat-onan gikan sa tubag ni Pablo?

Epektibong Tabang Alang sa mga Taga-Colosas

5. Nganong gisulatan ni Pablo ug ingon niadto ang mga taga-Colosas?

⁵ Kay may ipangutana kang Pablo bahin sa kahimtang sa kongregasyon sa Colosas, gisugdan ni Epafras ang malisod kaayong panaw paingon sa Roma. Iyang gitaho ang bahin sa pagtuo, gugma, ug mga paningkamot sa maong mga Kristohanon sa pagsangyaw. (Colosas 1:4-8) Bisan pa, seguradong gisulti usab niya ang iyang mga kabalaka bahin sa daotang mga impluwensiya nga nagpameligro sa espirituwalidad sa mga taga-Colosas. Si Pablo mitubag pinaagig usa ka dinasig nga sulat nga naghagit sa pipila ka hunahuna nga gipakaylap sa mini nga mga magtutudlo. Iyang gipasiugda ilabina ang bahin sa pangunang papel nga gidula ni Jesu-Kristo. a Pulos pagpasiugda ba lamang sa pangunang mga kamatuoran sa Bibliya ang iyang  gitanyag nga tabang? Sa unsang paagi pa niya matabangan ang mga taga-Colosas, ug unsang mga pagtulon-an ang atong makat-onan bahin sa pagtabang sa uban?

6. Unsay gipasiugda ni Pablo diha sa iyang sulat ngadto sa mga taga-Colosas?

⁶ Sa unang bahin sa iyang sulat, gipatin-aw ni Pablo ang usa ka matang sa tabang nga tingali atong mataligam-an. Kadto mao ang paagi sa paghatag ug tabang nga epektibo kon halayo, kay si Pablo ug Epafras halayo man gikan sa Colosas. Si Pablo nag-ingon: “Nagpasalamat kami kanunay sa Diyos nga Amahan sa atong Ginoong Jesu-Kristo sa dihang nagaampo [potnot, “nagaampo kanunay”] kami alang kaninyo.” Oo, kini maoy espesipikong mga pag-ampo alang sa mga Kristohanon sa Colosas. Si Pablo midugang: ‘Mao usab kana kon nganong kami, sukad sa adlaw nga kami nakadungog niini, wala mohunong sa pag-ampo alang kaninyo ug sa paghangyo nga kamo unta mapuno sa tukmang kahibalo sa iyang kabubut-on diha sa tanang kaalam ug espirituwal nga panabot.’—Colosas 1:3, 9.

7, 8. Ang atong personal ug kongregasyonal nga mga pag-ampo kasagarang maglakip sa unsa?

⁷ Kita nahibalo nga si Jehova mao ang “Tigpatalinghog sa pag-ampo,” busa kita makasalig sa iyang pagkamainandamon sa pagpatalinghog sa atong mga pag-ampo nga gitanyag nga nahiuyon sa iyang kabubut-on. (Salmo 65:2; 86:6; Proverbio 15:8, 29; 1 Juan 5:14) Apan, kon bahin sa atong pag-ampo alang sa uban, sama sa unsa ang atong mga pag-ampo?

⁸ Tingali kita kanunayng naghunahuna ug nag-ampo sa ‘tibuok kapunongan sa atong mga igsoon dinhi sa kalibotan.’ (1 Pedro 5:9) O tingali moduol kita kang Jehova labot sa mga Kristohanon ug sa uban diha sa usa ka lugar nga giagian ug kalamidad o katalagman. Sa dihang nadunggan sa unang-siglong mga tinun-an sa laing dapit ang kagutom sa Judea, tino nga nagtanyag sila ug daghang pag-ampo alang sa ilang mga igsoon bisan sa wala pa sila magpadalag mga hinabang. (Buhat 11:27-30) Sa atong panahon, ang mga pag-ampo labot sa tibuok panag-igsoonay o labot sa usa ka dakong pundok sa mga igsoon kanunayng madunggan diha sa Kristohanong mga tigom, diin kinahanglang makasabot ang daghan ug makaingong “Amen.”—1 Corinto 14:16.

Magmaespesipiko sa Pag-ampo

9, 10. (a) Unsang mga pananglitan ang nagpakita nga ang pag-ampo labot sa espesipikong mga tawo haom? (b) Sa unsang paagi si Pablo nahimong dugokan sa espesipikong pag-ampo?

⁹ Bisan pa niana, ang Bibliya naghatag kanato ug mga pananglitan sa mga pag-ampo alang sa uban nga mas espesipiko, segun sa panginahanglan sa indibiduwal. Palandonga ang komento ni Jesus nga natala sa Lucas 22:31, 32. Gilibotan siya sa 11 ka matinumanong mga apostoles. Silang tanan nagkinahanglag tabang sa Diyos sa malisod nga panahon sa unahan, ug si Jesus miampo alang kanila. (Juan 17:9-14) Bisan pa, ginganlan gayod ni Jesus si Pedro, nga espesipikong nangamuyo alang nianang usa ka disipulo. Ubang mga pananglitan: Si Eliseo nag-ampo nga tabangan unta sa Diyos ang usa ka espesipikong tawo, ang iyang tig-alagad. (2 Hari 6:15-17) Si apostol Juan nag-ampo nga si Gayo magpadayon unta nga maayog kahimtang sa panglawas ug sa espirituwal. (3 Juan 1, 2) Ug ang ubang mga pag-ampo nagpasiugda sa espesipikong mga pundok.—Job 42:7, 8; Lucas 6:28; Buhat 7:60; 1 Timoteo 2:1, 2.

¹⁰ Ang mga sulat ni Pablo nagpasiugda sa espesipiko kaayong mga pag-ampo. Siya mihangyo nga siya iampo o mag-ampo alang kaniya ug sa iyang mga kauban. Ang Colosas 4:2, 3 mabasa: ‘Magmalahutayon sa pag-ampo, nga magtukaw diha niini uban ang pagpasalamat, sa samang panahon magaampo usab alang kanamo, nga unta buksan sa Diyos ang usa ka pultahan sa pagpamulong alang kanamo, sa pagsulti sa sagradong tinago bahin kang Kristo, nga tungod niini, sa pagkatinuod, ako binilanggo nga may talikala.’ Palandonga, usab, kining ubang mga pananglitan: Roma 15:30; 1 Tesalonica 5:25; 2 Tesalonica 3:1; Hebreohanon 13:18.

11. Samtang didto sa Roma, alang kang kinsa nag-ampo si Epafras?

¹¹ Tinuod usab kini sa kauban ni Pablo didto sa Roma. ‘Si Epafras, nga gikan sa inyong taliwala, . . . nangomosta kaninyo, nga kanunay nanglimbasog alang kaninyo diha sa iyang mga pag-ampo.’ (Colosas 4:12) Ang pulong nga gihubad nga “nanglimbasog” mahimong magpasabot nga “nangusog,” sama sa usa ka magdudulang gymnast sa karaang mga dula. Si Epafras kinasingkasing nga nag-ampo ba lamang labot  sa tibuok-kalibotan nga lawas sa mga magtutuo o sa matuod nga mga magsisimba sa tibuok bahin sa Asia Minor? Gipakita ni Pablo nga si Epafras espesipikong nag-ampo alang niadtong atua sa Colosas. Si Epafras nahibalo sa ilang kahimtang. Kita wala makaila sa ngalan nilang tanan, ni nahibalo kita kon unsay ilang mga problema nga giatubang, apan handurawa ang pipila ka posibilidad. Tingali ang batan-ong si Lino nakigbisog batok sa impluwensiya sa naglungtad nga mga pilosopiya, ug tingali gikinahanglan ni Rufo ang kalig-on aron makasukol nga maganoy sa mga buhat niya kanhi sa Hudaismo. Tungod kay dili magtutuo ang bana, si Persida ba nagkinahanglag pagkamalahutayon ug kaalam aron makamatuto sa iyang mga anak diha sa Ginoo, ug si Asinkrito ba, kinsa nag-antos sa sakit nga ikamatay, nagkinahanglan ug dugang paglipay? Oo, si Epafras sinati sa mga membro sa iyang kaugalingong kongregasyon, ug kinasingkasing siya nga nag-ampo labot kanila tungod kay siya ug si Pablo nagtinguha nga kining debotadong mga tawo magalakaw nga takos kang Jehova.

12. Sa unsang paagi kita mahimong mas espesipiko sa atong pribadong mga pag-ampo?

¹² Nakita ba nimo ang sumbanan alang kanato—usa ka paagi aron kita makatabang sa uban? Ingon sa nahisgotan na, ang publikong mga pag-ampo diha sa Kristohanong mga tigom dili sama ka espesipiko, tungod kay nagkalainlain ang tumatambong. Apan ang atong personal o pamilyahanon nga mga pag-ampo puwedeng himoong espesipiko. Samtang kita usahay mohangyo sa Diyos nga bantayan ug panalanginan ang tanang nagapanawng mga magtatan-aw o espirituwal nga mga magbalantay, dili ba mahimong magmaespesipiko kita usahay? Pananglitan, nganong dili mag-ampo nga isulti ang ngalan sa magtatan-aw sa sirkito nga nagduaw sa inyong kongregasyon o ang konduktor sa inyong Pagtuon sa Libro sa Kongregasyon? Ang Filipos 2:25-28 ug 1 Timoteo 5:23 nagpakita sa personal nga kabalaka ni Pablo bahin sa panglawas ni Timoteo ug Epafrodito. Kita ba usab makahimo sa pagbanaag ug kaikag alang sa mga masakiton nga atong nailhan ang ngalan?

13. Unsang matanga sa mga kahimtang ang angayng ilakip nato sa personal nga mga pag-ampo?

¹³ Tinuod, maglikay gayod kita sa pagpanghilabot sa pribadong mga butang sa uban, apan angay nga ang atong mga pag-ampo magpakitag tinuod nga kaikag alang niadtong atong kaila ug minahal. (1 Timoteo 5:13; 1 Pedro 4:15) Usa ka igsoon tingali nawad-an sa iyang trabaho, ug kita dili makahatag kaniya ug laing trabaho. Bisan pa niana, kita makahisgot sa iyang ngalan ug hatagan ug pagtagad ang iyang kalisod diha sa atong personal nga mga pag-ampo. (Salmo 37:25; Proverbio 10:3) May nailhan ba kitang sister nga gulanggulang na nga walay bana ug mga anak tungod kay determinado siya nga magminyo ‘diha lamang sa Ginoo’? (1 Corinto 7:39) Diha sa imong pribadong mga pag-ampo, nganong dili mohangyo kang Jehova nga panalanginan siya ug tabangan siya aron makapadayon nga maunongon sa iyang pag-alagad? Ingong laing pananglitan, tingali ang duha ka ansiyano nagtambag sa usa ka igsoong lalaki nga nakasala. Nganong dili siya hisgotan pinaagig ngalan sa matag usa kanila diha sa ilang pribadong mga pag-ampo matag karon ug unya?

14. Sa unsang paagi ang espesipikong mga pag-ampo nalangkit sa pagtabang sa uban?

¹⁴ Daghan kaayo ang mga posibilidad aron imong malakip diha sa imong personal nga mga pag-ampo ang mga tawong imong kaila nga nagkinahanglan ug tabang, paghupay, kaalam, ug balaang espiritu ni Jehova, o sa bisan unsay moresultang bunga niini. Tungod sa distansiya o ubang mga kahimtang, tingali maglibog ka kon unsang materyal o direktang tabang ang imong ikahatag. Apan ayaw kalimot sa pag-ampo alang sa imong mga igsoong lalaki ug mga igsoong babaye. Ikaw nahibalo nga buot nila nga molakaw nga takos kang Jehova, apan tingalig nagkinahanglan pa gayod sila ug tabang aron makahimo niana sa dayon. Ang sekreto sa pagtabang mao ang imong mga pag-ampo.—Salmo 18:2; 20:1, 2; 34:15; 46:1; 121:1-3.

 Pagkugi Aron Malig-on ang Uban

15. Nganong interesado kita sa panghinapos nga bahin sa Colosas?

¹⁵ Siyempre, ang kinasingkasing, espesipikong pag-ampo dili lamang maoy bugtong paagi aron makatabang sa uban, ilabina niadtong suod nimo. Gipatin-aw kana sa basahon sa Colosas. Daghang eskolar nag-ingon nga human mihatag si Pablo ug giya bahin sa doktrina ug praktikal nga tambag, nagdugang siya ug yanong mga pangomosta. (Colosas 4:7-18) Sa kasukwahi, nakita na nato nga kining kataposang bahin sa basahon nasudlan ug mapuslanong tambag, ug daghan pa kaayo ang atong makat-onan gikan niining bahina.

16, 17. Unsay atong ikasulti bahin sa mga igsoon nga gihisgotan sa Colosas 4:10, 11?

¹⁶ Si Pablo nagsulat: ‘Si Aristarko nga akong kaubang binihag nangomosta kaninyo, ug ingon man si Marcos nga ig-agaw ni Bernabe, (nga mahitungod kaniya kamo gisugo sa pagdawat kaniya kon ugaling siya mahianha kaninyo,) ug si Jesus nga gitawag ug Justo, sila maoy sa mga tinuli. Kini lamang sila ang akong mga isigkamagbubuhat sa gingharian sa Diyos, ug sila mismo nahimong makapalig-on nga tabang kanako.’—Colosas 4:10, 11.

¹⁷ Gipaila ni Pablo didto ang pipila ka igsoon nga takos sa linaing pagtagad. Siya miingon nga lakip sila sa mga tinuli, nga Hudiyohanon ug kagikan. Dihay daghang tinuli nga mga Hudiyo sa Roma, ug ang uban maoy mga Kristohanon na niadtong tungora. Bisan pa niana, kadtong gihisgotan ni Pablo mitabang kaniya. Lagmit, sila wala magpanuko sa pagpakig-uban sa mga Kristohanon nga Hentil ug kagikan, ug seguradong malipayon sila nga nagpakigbahin uban ni Pablo sa pagsangyaw ngadto sa mga Hentil.—Roma 11:13; Galacia 1:16; 2:11-14.

18. Sa unsang paagi gihatagan ug komendasyon ni Pablo ang pipila nga nakauban niya?

¹⁸ Matikdi ang komento ni Pablo: “Sila mismo nahimong makapalig-on nga tabang kanako.” Iyang gigamit ang Gregong pulong nga kausa lamang makita diha sa Bibliya. Gihubad kini sa daghang maghuhubad nga “paghupay.” Apan, adunay laing Gregong pulong (pa·ra·ka·le’o) nga kasagarang gihubad nga “paghupay.”  Gigamit ni Pablo kini sa laing bahin niining sulata mismo apan dili sa Colosas 4:11.—Mateo 5:4; Buhat 4:36; 9:31; 2 Corinto 1:4; Colosas 2:2; 4:8.

19, 20. (a) Unsay diwa sa ekspresyon nga giaplikar ni Pablo ngadto sa mga igsoon nga mitabang kaniya sa Roma? (b) Sa unsang mga paagi kaha kadtong mga igsoona nakatabang kang Pablo?

¹⁹ Kadtong ginganlan ni Pablo lagmit nakahatag ug labaw pa kay sa pagsulti ug mga pulong sa paghupay. Ang Gregong pulong nga gihubad ug “makapalig-on nga tabang” sa Colosas 4:11 gigamit usahay sa sekular nga mga libro alang sa usa ka tambal nga moalibyo sa tensiyon. Ang New Life Version mabasa: “Pagkadako nila nga tabang kanako!” Ang Today’s English Version migamit sa mga pulong: “Dako kaayo silang tabang nako.” Unsa kahay nahimo niadtong Kristohanong mga igsoon nga nagpuyo duol kang Pablo sa pagtabang kaniya?

²⁰ Si Pablo mahimong modawat ug mga bisita, apan daghang butang nga dili niya mahimo, sama sa pagpamalit sa iyang pangunang mga panginahanglan—pagkaon ug besti alang sa tingtugnaw. Sa unsang paagi siya makabaton ug mga linukot alang sa pagtuon o makapalit ug mga gamit sa pagsulat? (2 Timoteo 4:13) Dili ba nimo mahanduraw kadtong mga igsoona nga nagtabang kang Pablo sa iyang mga panginahanglan, nga nagbuhat sa simpleng mga butang sama sa pagpamalit o tigdagan alang sa iyang mga panginahanglan? Basig gusto niyang susihon ug lig-onon ang usa ka kongregasyon. Kay binilanggo, dili niya kini mahimo, busa kadtong mga igsoona malagmit maoy mihimo sa mga pagduaw alang kang Pablo, nga nagdalag mga mensahe, naghatod ug mga taho. Pagkamakapalig-on!

21, 22. (a) Nganong ang mga pulong sa Colosas 4:11 makapaikag kanato? (b) Unsa ang pipila ka paagi nga makasunod kita sa panig-ingnan niadtong nakauban ni Pablo?

²¹ Ang gisulat ni Pablo bahin sa pagkahimong “makapalig-on nga tabang” naghatag ug katin-awan kon sa unsang paagi kita makatabang sa uban. Sila tingali nagalakaw nga takos kang Jehova kon bahin sa iyang moral nga mga sukdanan, nagatambong sa Kristohanong mga tigom, ug nagapakigbahin sa buluhatong pagsangyaw. Tungod niana angay nato silang dayegon. Apan, kita ba makahimo ug labaw pa, ingong ‘makapalig-on nga mga tabang’ sama niadtong mga kauban ni Pablo?

²² Kon may nailhan kang sister nga maalamong nagsunod sa 1 Corinto 7:37 apan karon walay pamilya nga duol kaniya, mahimo mo ba siyang iapil sa pipila  ka kalihokan sa pamilya, tingali dapiton siya sa pagpangaon o pagtambong sa gamayng mga salosalo sa mga higala o mga paryente? Unsa kahay maayo kon imo siyang dapiton sa pagbiyahe uban sa imong pamilya ngadto sa usa ka kombensiyon o sa bakasyon? O dapita siya sa pag-uban kanimo sa kombenyenteng panahon kon mamalit ka ug pagkaon. Imong mahimo usab kini ngadto sa mga biyuda ug biyudo, o tingali niadtong karon dili na makamaneho. Makabaton ka ug kaayohan sa pagpamati sa ilang mga eksperyensiya o makakat-on kag mga butang nga sama ka simple sa kon unsaon sa pagpilig maayong klase sa prutas o pagpilig mga besti sa mga bata. (Levitico 19:32; Proverbio 16:31) Ang resulta mao nga mas mosuod ang panaghigalaay. Tungod niini sila dili na magpanuko sa pagpangayo kanimo ug tabang kon magkinahanglan sila ug pipila ka medisina gikan sa parmasya, o sa susama niini. Ang mga igsoon nga kauban ni Pablo sa Roma lagmit nakahatag ug praktikal, makapalig-on nga tabang, sama sa imong mahimo. Kaniadto ug karon ang dugang nga panalangin mao nga mapalig-on ang bugkos sa gugma, ug kita mas determinado nga magkauban sa pag-alagad kang Jehova nga maunongon.

23. Maayo nga ang matag usa kanato mogugol ug panahon sa pagbuhat ug unsa?

²³ Ang matag usa kanato makapamalandong sa mga kahimtang nga gihisgotan niining artikuloha. Kini maoy yanong mga pananglitan lamang, apan kini makapahinumdom kanato sa tinuod nga mga kahimtang diin kita mahimong mas “makapalig-on nga tabang” sa atong mga igsoong lalaki ug mga igsoong babaye. Ang punto mao nga dili nato ugmaron ang tinamdan sa mga makitawhanon. Dili kana ang tumong sa mga igsoon nga gihisgotan sa Colosas 4:10, 11. Sila maoy “mga isigkamagbubuhat sa gingharian sa Diyos.” Ang makapalig-ong epekto direktang nalangkit niana. Hinaot nga tinuod kana diha sa atong kahimtang.

24. Unsay pangunang katarongan nga atong iampo ug tinguhaon nga mapalig-on ang uban?

²⁴ Atong hisgotan ang uban pinaagig ngalan diha sa atong pribadong mga pag-ampo ug maningkamot nga mapalig-on sila tungod niini: Kita nagtuo nga ang atong mga igsoong lalaki ug mga igsoong babaye buot “magalakaw nga takos kang Jehova sa katuyoan nga makapahimuot kaniya sa bug-os.” (Colosas 1:10) Nalangkit kanang kamatuorana labot sa usa ka butang nga gihisgotan ni Pablo sa dihang nagsulat bahin sa mga pag-ampo ni Epafras mahitungod sa mga taga-Colosas, aron sila ‘makabarog nga bug-os ug may hugot nga pagtuo sa bug-os nga kabubut-on sa Diyos.’ (Colosas 4:12) Sa unsang paagi atong makab-ot kana? Atong susihon.

[Footnote]

Nakamatikod Ka Ba?

• Sa unsang paagi kita makatabang pa ug maayo diha sa atong pribadong mga pag-ampo?

• Sa unsang diwa nga ang pipila ka Kristohanon nahimong ‘makapalig-on nga mga tabang’ kang Pablo?

• Unsang matanga sa mga kahimtang nga kita mahimong ‘makapalig-on nga mga tabang’?

• Unsay tumong sa atong pag-ampo ug sa pagtinguha nga mapalig-on ang atong mga igsoong lalaki ug mga igsoong babaye?

[Mga Pangutana sa Pagtuon]

[Hulagway sa panid 18]

Makadapit ka ba ug laing Kristohanon sa mga suroy-suroy sa imong pamilya?

[Credit Line]

Courtesy of Green Chimney’s Farm