Mapalig-on sa Gugma

“Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.”—MATEO 22:37.

1. (a) Unsa ang pipila ka butang nga ugmaron sa usa ka Kristohanon? (b) Unsa ang labing bililhon nga Kristohanong hiyas, ug ngano?

 UGMARON sa usa ka Kristohanon ang daghang butang aron mahimong epektibong ministro. Ang basahon sa Proverbio nagpasiugda sa bili sa kahibalo, pagsabot, ug kaalam. (Proverbio 2:1-10) Si apostol Pablo naghisgot sa panginahanglan ug bug-os nga pagtuo ug lig-ong paglaom. (Roma 1:16, 17; Colosas 1:5; Hebreohanon 10:39) Ang pagkamalahutayon ug pagpugong-sa-kaugalingon hinungdanon usab. (Buhat 24:25; Hebreohanon 10:36) Apan, adunay usa ka hiyas nga kon wala kini ang uban pang mga hiyas madaot ug maghimo gani niini nga walay bili. Kanang hiyasa mao ang gugma.—1 Corinto 13:1-3, 13.

2. Sa unsang paagi gipakita ni Jesus ang pagkahinungdanon sa gugma, ug makapatungha kini ug unsang mga pangutana?

² Gipakita ni Jesus ang pagkahinungdanon sa gugma sa dihang siya miingon: “Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.” (Juan 13:35) Sanglit ang gugma mao ang timaan sa matuod nga Kristohanon, angayng isukna nato ang mga pangutanang sama sa, Unsa ang gugma? Nganong bililhon kaayo kini nga si Jesus miingon nga kini, labaw sa tanan, magpaila sa iyang mga tinun-an? Sa unsang paagi maugmad nato ang gugma? Kinsa ang angay natong higugmaon? Atong hisgotan kining mga pangutanaha.

Unsa ang Gugma?

3. Sa unsang paagi mahubit ang gugma, ug nganong nalangkit niini ang hunahuna ug ang kasingkasing?

³ Ang usa ka paghubit sa gugma maoy ‘usa ka mainit nga personal nga pagbati o lalom nga pagmahal, usa ka mainit nga pagkasuod o pagkagusto alang sa usa ka tawo.’ Kini maoy usa ka hiyas nga motukmod sa mga tawo sa paglihok alang sa ikaayo sa uban, usahay sa dakong pagsakripisyo sa kaugalingon. Ang gugma, ingon sa pagkahubit niini sa Bibliya, naglangkit sa hunahuna ug kasingkasing. Ang hunahuna, o salabotan, nagdula ug usa ka papel tungod kay ang tawo nga nahigugma, nahigugma nga bukas ang iyang mga mata, nga makakita nga siya ug ang ubang mga tawo nga iyang gihigugma dunay mga kahuyangan maingon man maayong mga hiyas. Ang salabotan dugang nga nalangkit tungod kay may mga tawo nga higugmaon sa usa ka Kristohanon—usahay, tingali, bisag kontra sa iyang buut—tungod kay siya nahibalo gikan sa iyang pagbasa sa Bibliya nga buot sa Diyos nga siya magmahigugmaon. (Mateo 5:44; 1 Corinto 16:14) Bisan pa niana, ang gugma nagatubod gayod sa kasingkasing. Ang gugmang tiunay ingon sa pagkapadayag niini sa Bibliya dili kay may kalabotan lamang sa salabotan. Nalangkit niini ang dulot nga katim-os ug bug-os emosyonal nga panaad.—1 Pedro 1:22.

4. Sa unsang paagi nga ang gugma maoy usa ka gamhanang bugkos?

⁴ Ang mga tawong hakog talagsa rang makabaton ug tinuod nga mahigugmaong relasyon tungod kay ang tawo nga nahigugma andam sa pag-una sa kaayohan sa uban kay sa iyang kaugalingong kaayohan. (Filipos 2:2-4) Ang mga pulong ni Jesus nga “adunay labaw nga kalipay sa paghatag kay sa pagdawat” tinuod gayod kon ang paghatag himoon ingong usa ka buhat sa gugma. (Buhat 20:35) Ang gugma maoy usa ka gamhanang bugkos.  (Colosas 3:14) Kasagarang nalangkit niini ang panaghigalaay, apan ang bugkos sa gugma mas lig-on kay sa panaghigalaay. Ang romantikong relasyon sa bana ug sa iyang asawa usahay gihubit ingong gugma; apan, ang gugma nga gidasig sa Bibliya nga atong ugmaron maoy mas dumalayon kay sa pisikal nga kaibog. Kon ang magtiayon tinuod nga naghigugmaay sa usag usa, sila mag-ipon gihapon ug puyo bisan pag dili na mahimo ang pisikal nga relasyon tungod sa mga sakit sa pagkatigulang o tungod kay ang usa kanila dili na makagahom.

Gugma—Usa ka Hinungdanong Hiyas

5. Nganong ang gugma maoy usa ka hinungdanong hiyas alang sa usa ka Kristohanon?

⁵ Nganong ang gugma maoy usa ka hinungdanong hiyas alang sa usa ka Kristohanon? Una, tungod kay gisugo ni Jesus ang iyang mga sumusunod nga maghigugmaay sa usag usa. Siya miingon: “Kamo akong mga higala kon inyong buhaton ang ginasugo ko kaninyo. Ako nagasugo kaninyo niining mga butanga, nga kamo maghigugmaay sa usag usa.” (Juan 15:14, 17) Ikaduha, tungod kay si Jehova mao ang larawan sa gugma, ug ingong iyang mga magsisimba kita angay mosundog kaniya. (Efeso 5:1; 1 Juan 4:16) Ang Bibliya nag-ingon nga ang pagkuhag kahibalo bahin kang Jehova ug kang Jesus nagkahulogan ug kinabuhing dayon. Sa unsang paagi kita makaingon nga nakaila kita sa Diyos kon kita dili maningkamot nga mahisama kaniya? Si apostol Juan nangatarongan: “Siya nga wala mahigugma wala makaila sa Diyos, tungod kay ang Diyos gugma.”—1 Juan 4:8.

6. Sa unsang paagi ang gugma makatimbang sa nagkalainlaing mga bahin sa atong kinabuhi?

⁶ Ang gugma hinungdanon sa ikatulong katarongan: Kini makatabang kanato sa pagtimbang sa nagkalainlaing mga bahin sa atong kinabuhi ug makadugang ug maayong motibo sa atong ginahimo. Pananglitan, hinungdanon nga magpadayon sa pagkuhag kahibalo bahin sa Pulong sa Diyos. Alang sa usa ka Kristohanon, ang maong kahibalo nahisamag pagkaon. Kini motabang kaniya sa pagtubo sa pagkahamtong ug sa paglihok sumala sa kabubut-on sa Diyos. (Salmo 119:105; Mateo 4:4; 2 Timoteo 3:15, 16) Apan, si Pablo nagpasidaan: “Ang kahibalo nagapaburot, apan ang gugma nagapalig-on.” (1 Corinto 8:1) Wala, walay daotan sa tukmang kahibalo. Kita ang problema—kita dunay mga tendensiya nga makasala. (Genesis 8:21) Kon wala ang makatimbang nga impluwensiya sa gugma, ang kahibalo mopaburot sa tawo, nga maghunahuna sa iyang kaugalingon nga mas maayo kay sa uban. Kana dili mahitabo kon siya gipalihok gayod sa gugma. “Ang gugma . . . dili magapanghambog, dili magapaburot.” (1 Corinto 13:4) Ang usa ka Kristohanon nga gipalihok sa gugma dili mahimong mapahitas-on, bisan pag makabaton siya ug lalom nga kahibalo. Ang gugma maghimo kaniya nga mapainubsanon ug magpugong kaniya sa pagtinguha nga mahimong inila.—Salmo 138:6; Santiago 4:6.

7, 8. Sa unsang paagi ang gugma makatabang kanato sa paghatag ug pagtagad sa mas hinungdanong mga butang?

⁷ Gisulatan ni Pablo ang mga taga-Filipos: “Mao kini ang padayon kong ginaampo, nga ang inyong gugma mosamot pa sa pagdagaya sa tukmang kahibalo ug bug-os nga katakos sa pag-ila; aron inyong matino ang mas hinungdanong mga butang.” (Filipos 1:9, 10) Ang Kristohanong gugma makatabang kanato sa pagsunod niini nga pagdasig aron matino ang mas hinungdanong mga butang. Ingong pananglitan, palandonga ang mga pulong ni Pablo ngadto kang Timoteo: “Kon adunay magapangab-ot sa katungdanan sa pagkamagtatan-aw, siya matinguhaon sa usa ka maayong buhat.” (1 Timoteo 3:1) Sulod sa 2000 nga tuig sa pag-alagad, ang gidaghanon sa mga kongregasyon sa tibuok kalibotan miuswag ug 1,502, nga nakaabot sa bag-ong total nga 91,487. Busa, dunay dakong panginahanglan alang sa dugang mga ansiyano, ug kadtong nagapangab-ot alang sa pribilehiyo angayng pagadayegon.

⁸ Apan, kadtong nagapangab-ot alang sa pribilehiyo sa pagdumala maayo ug panimbang kon ilang ibutang sa hunahuna ang katuyoan sa maong pribilehiyo. Ang pagkabaton lamang ug awtoridad o pagkainila dili mao ang hinungdanon. Ang mga ansiyano nga nagpahimuot kang Jehova gipalihok sa gugma alang kaniya ug alang sa ilang mga igsoon. Sila wala maningkamot nga mahimong inila o makabaton ug impluwensiya. Si apostol Pedro, human manambag sa mga ansiyano sa kongregasyon nga magbaton ug maayong tinamdan, nagpasiugda nga gikinahanglan ang “pagkamapainubsanon ug hunahuna.” Iyang gitambagan ang tanan diha sa kongregasyon: “Ipaubos ang inyong kaugalingon . . . ilalom sa gamhanang kamot sa Diyos.” (1 Pedro 5:1-6) Ang tanan nga nagapangab-ot maayong mamalandong sa panig-ingnan sa daghan kaayong ansiyano sa tibuok kalibotan kinsa mga kugihan, mapainubsanon, ug busa usa ka panalangin sa ilang mga kongregasyon.—Hebreohanon 13:7.

 Ang Maayong Motibo Makatabang Kanato nga Makalahutay

9. Nganong gibutang sa hunahuna sa mga Kristohanon ang gisaad ni Jehova nga mga panalangin?

⁹ Ang bili sa pagkahimong napalihok sa gugma makita sa laing paagi. Niadtong nagtinguha nga makabaton ug diyosnong debosyon tungod sa gugma, ang Bibliya nagsaad ug dagayang mga panalangin karon ug dili-mahanduraw nga maanindot nga mga panalangin sa umaabot. (1 Timoteo 4:8) Ang usa ka Kristohanon nga nagtuo gayod niining mga saara ug kombinsido nga si Jehova “maoy tigganti sa mga matinuorong nagapangita kaniya” matabangan nga makabarog nga malig-on sa pagtuo. (Hebreohanon 11:6) Ang kadaghanan kanato nangandoy nga matuman ang mga saad sa Diyos ug nagpalanog sa pagbati ni apostol Juan: “Amen! Umari ka, Ginoong Jesus.” (Pinadayag 22:20) Oo, ang pagpamalandong sa mga panalangin nga anaa sa unahan kon kita matinumanon makapalig-on kanato sa paglahutay, sama nga ang pagbutang diha sa hunahuna sa “kalipay nga gibutang sa iyang atubangan” nakatabang kang Jesus sa paglahutay.—Hebreohanon 12:1, 2.

10, 11. Sa unsang paagi ang pagkahimong napalihok sa gugma makatabang kanato sa paglahutay?

¹⁰ Apan, unsa man kaha kon ang atong tinguha nga mabuhi diha sa bag-ong kalibotan maoy atong bugtong motibo sa pag-alagad kang Jehova? Nan mahimong mawad-an dayon kita ug pailob o mawad-an ug kalipay kon molisod ang mga kahimtang o kon wala gihapoy mahitabo o kon ang atong gilaoman dili moabot. Kita mameligro gayod nga mapadpad. (Hebreohanon 2:1; 3:12) Si Pablo naghisgot bahin sa usa ka kauban kanhi nga ginganlag Demas, kinsa mibiya kaniya. Ngano? Tungod kay “iyang gihigugma kining sistema sa mga butang.” (2 Timoteo 4:10) Si bisan kinsa nga moalagad tungod lamang sa hinakog nga mga katarongan peligrong mobiya. Basin madani sila sa kahigayonan nga itanyag sa kalibotan niini mismong panahona ug dili na andam nga mohimog mga sakripisyo karon sa paglaom sa umaabot nga mga panalangin.

¹¹ Bisag dili daotan ug kinaiyanhon ang pagpangandoy nga makadawat ug umaabot nga mga panalangin ug sa gipaabot nga kahupayan sa mga pagsulay, ang gugma molig-on sa atong pagpabili kon unsa ang labing hinungdanon sa atong kinabuhi. Ang kabubut-on ni Jehova, dili ang atoa, ang hinungdanon. (Lucas 22:41, 42) Oo, ang gugma nagapalig-on. Kini mohatag kanato ug katagbawan sa paghulat nga mapailobon sa atong Diyos, malipayon sa bisan unsang mga panalangin nga iyang ihatag ug masaligon nga sa iyang tinakdang panahon atong madawat ang tanan nga iyang gisaad—ug daghan pa. (Salmo 145:16; 2 Corinto 12:8, 9) Kasamtangan, ang gugma motabang kanato sa pagpadayon sa pag-alagad nga walay kahakog tungod kay “ang gugma . . . dili mangita sa kaugalingong kaayohan niini.”—1 Corinto 13:4, 5.

Kinsa ang Angayng Higugmaon sa mga Kristohanon?

12. Sumala kang Jesus, kinsa ang angay natong higugmaon?

¹² Si Jesus mihatag ug lagda nga aplikado sa tanan may kalabotan sa kon kinsa ang angay natong higugmaon sa dihang iyang gikutlo ang duha ka pahayag sa Moisesnong Balaod. Siya miingon: “Higugmaon mo gayod si Jehova nga imong Diyos sa tibuok mong kasingkasing ug sa tibuok mong kalag  ug sa tibuok mong kaisipan” ug, “Higugmaon mo gayod ang imong silingan sama sa imong kaugalingon.”—Mateo 22:37-39.

13. Sa unsang paagi makakat-on kita sa paghigugma kang Jehova, bisan pag dili nato siya makita?

¹³ Gikan sa mga pulong ni Jesus, tin-aw nga una ug labaw sa tanan kinahanglang higugmaon nato si Jehova. Ugaling, kita wala matawo nga dunay bug-os nga naugmad nga gugma kang Jehova. Usa kana ka butang nga kinahanglan natong ugmaron. Sa atong unang pagkadungog bahin kaniya, kita nadani kaniya tungod sa atong nadunggan. Sa hinayhinay, atong nakat-onan kon giunsa niya pag-andam ang yuta alang sa tawo. (Genesis 2:5-23) Atong nakat-onan kon giunsa niya pagpakiglabot sa katawhan, nga wala niya kita talikdi sa dihang ang sala unang misulod sa tawhanong pamilya, apan naghimog mga paagi aron kita malukat. (Genesis 3:1-5, 15) Maluloton niyang gipakiglabotan ang nagmatinumanon, ug sa ulahi iyang gihatag ang iyang bugtong Anak aron mapasaylo ang atong mga sala. (Juan 3:16, 36) Kining nag-uswag nga kahibalo nagpadako sa atong pagpabili kang Jehova. (Isaias 25:1) Si Haring David miingon nga iyang gihigugma si Jehova tungod sa Iyang mahigugmaong pagtagad. (Salmo 116:1-9) Karon, si Jehova nagtagad kanato, naggiya kanato, naglig-on kanato, ug nagdasig kanato. Sa nagkadaghan ang atong nakat-onan bahin kaniya, nagkalalom ang atong gugma kaniya.—Salmo 31:23; Sofonias 3:17; Roma 8:28.

Sa Unsang Paagi Atong Ikapasundayag ang Atong Gugma?

14. Sa unsang paagi atong ikapasundayag nga tinuod ang atong gugma alang sa Diyos?

¹⁴ Sa pagkatinuod, daghan sa tibuok kalibotan moingon nga ilang gihigugma ang Diyos, apan ang ilang panggawi nagpanghimakak sa ilang pangangkon. Unsaon nato sa pagkasayod nga tinuod gayod natong gihigugma si Jehova? Kita mahimong makigsulti kaniya diha sa pag-ampo ug sultihan siya sa atong gibati. Ug kita makalihok sa paagi nga magpasundayag sa atong gugma. Si apostol Juan miingon: “Si bisan kinsa nga magbantay sa pulong [sa Diyos], sa pagkatinuod nahingpit niining tawhana ang gugma sa Diyos. Pinaagi niini kita nahibalo nga kita nahiusa uban kaniya.” (1 Juan 2:5; 5:3) Lakip sa ubang mga butang, ang Pulong sa Diyos nagsugo kanato nga makig-uban sa usag usa ug magbaton ug mahinlo, matarong nga mga kinabuhi. Atong likayan ang pagkasalingkapaw, mosulti sa tinuod, ug huptang mahinlo ang atong hunahuna. (2 Corinto 7:1; Efeso 4:15; 1 Timoteo 1:5; Hebreohanon 10:23-25) Atong ipasundayag ang gugma pinaagi sa paghatag ug materyal nga tabang sa mga nanginahanglan. (1 Juan 3:17, 18) Ug dili kita magpugong sa pagsulti sa uban bahin kang Jehova. Naglakip kana sa pagpakigbahin sa tibuok-kalibotang pagsangyaw sa maayong balita sa Gingharian. (Mateo 24:14; Roma 10:10) Ang pagsunod sa Pulong sa Diyos may kalabotan niining mga butanga maoy pamatuod nga tinuod ang atong gugma alang kang Jehova.

15, 16. Sa unsang paagi ang gugma alang kang Jehova nakaapektar ug daghang kinabuhi sa miaging tuig?

¹⁵ Ang gugma alang kang Jehova motabang kanato sa paghimog maayong mga desisyon. Sa miaging tuig, ang maong gugma nagpalihok sa 288,907 ka tawo sa pagpahinungod sa ilang kinabuhi ngadto kaniya ug pagpasimbolo nianang desisyona pinaagi sa bawtismo sa tubig. (Mateo 28:19, 20) Ang ilang pagpahinungod makahuloganon. Kini nagtimaan ug usa ka kausaban sa ilang kinabuhi. Pananglitan, si Gazmend maoy usa sa iladong mga magdudula sa basketbol sa Albania. Sulod sa daghang tuig, siya ug ang iyang asawa nagtuon sa Bibliya ug bisan pa sa mga kababagan sa ngadtongadto nahimong kuwalipikado ingong mga magmamantala sa Gingharian. Sa miaging tuig, si Gazmend gibawtismohan, nga usa sa 366 nga nabawtismohan sa Albania sa 2000 nga tuig sa pag-alagad. Usa ka mantalaan nagpatik ug artikulo bahin kaniya ug miingon: “Ang iyang kinabuhi dunay katuyoan, ug tungod niini, gitagamtam  niya ug sa iyang pamilya ang labing malipayong mga adlaw sa ilang kinabuhi. Alang kaniya, dili na importante kon pilay iyang masapi, kondili, kon pilay iyang ikahatag aron makatabang sa ubang mga tawo.”

¹⁶ Sa susama, ang usa ka bag-ong nabawtismohang sister nga nagtrabaho sa usa ka kompaniya sa aseite sa Guam nakadawat ug makadani kaayong tanyag. Human maabot niya ang taastaas nga posisyon sa daghang tuig, siya sa kataposan gihatagan ug higayon nga mahimong unang babaye nga bise presidente sukad nga natukod ang kompaniya. Apan, siya nakapahinungod na sa iyang kinabuhi ngadto kang Jehova. Busa human nga giestoryahan kining mga butanga uban sa iyang bana, gibalibaran sa bag-ong sister ang tanyag ug naghikay hinuon ug partaym nga trabaho aron mouswag siya sa pagkahimong bug-os-panahong ministro, usa ka payunir. Ang gugma alang kang Jehova nagpalihok kaniya sa pagtinguha nga moalagad kaniya ingong payunir imbes mangagpas ug pinansiyal nga mga kaayohan niining kalibotana. Sa pagkatinuod, sa tibuok kalibotan kini nga gugma nagpalihok sa 805,205 sa pagpakigbahin sa lainlaing mga natad sa payunir nga pag-alagad sulod sa 2000 nga tuig sa pag-alagad. Pagkatalagsaong pagpasundayag sa gugma ug pagtuo ang gihimo niadtong mga payunira!

Napalihok sa Paghigugma Kang Jesus

17. Unsang maayong panig-ingnan sa gugma ang atong makita diha kang Jesus?

¹⁷ Si Jesus maoy usa ka maayo kaayong panig-ingnan sa usa ka persona nga napalihok sa gugma. Sa wala pa siya maglungtad ingong tawo, iyang gihigugma ang iyang Amahan ug iyang gihigugma ang katawhan. Ingong larawan sa kaalam, siya miingon: “Didto ako tupad [ni Jehova] ingon nga batid nga magbubuhat, ug ako iyang gikahinangpan pag-ayo sa matag adlaw, ako nagakalipay sa iyang atubangan sa tanang panahon, nga nagakalipay sa mabungahong yuta sa iyang yuta, ug ang mga butang nga akong gikahinangpan maoy uban sa mga anak sa mga tawo.” (Proverbio 8:30, 31) Ang gugma ni Jesus nagpalihok kaniya sa pagbiya sa iyang pinuy-anan sa langit ug nagpakatawo ingong walay mahimo nga masuso. Mapailobon ug maluloton siyang nakiglabot sa mga maaghop ug mga timawa ug nag-antos sa mga kamot sa mga kaaway ni Jehova. Sa kataposan, siya namatay alang sa tanang katawhan diha sa kahoy sa pagsakit. (Juan 3:35; 14:30, 31; 15:12, 13; Filipos 2:5-11) Pagkamaayong panig-ingnan sa pagkabaton ug hustong motibo!

18. (a) Sa unsang paagi maugmad nato ang gugma alang kang Jesus? (b) Sa unsang paagi atong mapasundayag nga atong gihigugma si Jesus?

¹⁸ Kon basahon niadtong matinud-anon ug kasingkasing ang mga asoy sa kinabuhi ni Jesus diha sa mga Ebanghelyo ug palandongon ang daghang  panalangin nga nahatag kanila sa iyang matinumanong dalan, mas magpalalom pa kini sa ilang gugma alang kaniya. Karong panahona kita kaamgid niadtong gisultihan ni Pedro sa iyang pag-ingon: “Bisan pag kamo wala makakita [kang Jesus], kamo nahigugma kaniya.” (1 Pedro 1:8) Ang atong gugma mapakita kon kita magpasundayag ug pagtuo kaniya ug mosundog sa iyang kinabuhi nga nagsakripisyo sa kaugalingon. (1 Corinto 11:1; 1 Tesalonica 1:6; 1 Pedro 2:21-25) Sa Abril 19, 2000, may bug-os nga gidaghanon nga 14,872,086 ang napahinumdoman sa atong mga katarongan sa paghigugma kang Jesus sa dihang sila mitambong sa tinuig nga Memoryal sa iyang kamatayon. Pagkadaghan ang nanambong niadto! Ug pagkamakapalig-on ang pagkasayod nga daghan kaayo ang interesado sa kaluwasan pinaagi sa halad ni Jesus! Sa pagkatinuod, kita mapalig-on sa gugma ni Jehova ug Jesus alang kanato ug sa atong gugma alang kanila.

19. Unsang mga pangutana bahin sa gugma ang hisgotan sa sunod nga artikulo?

¹⁹ Si Jesus miingon nga kinahanglang higugmaon nato si Jehova uban sa bug-os natong kasingkasing, kalag, hunahuna, ug kusog. Apan siya miingon usab nga kinahanglang higugmaon nato ang atong isigkatawo sama sa atong kaugalingon. (Marcos 12:29-31) Kinsay nalakip niana? Ug sa unsang paagi ang paghigugma sa isigkatawo makatabang kanato nga makabaton ug maayong panimbang ug hustong motibo? Kining mga pangutanaha ang pagahisgotan sa sunod nga artikulo.

Nahinumdom Ka Ba?

• Nganong ang gugma maoy usa ka hinungdanong hiyas?

• Sa unsang paagi kita makakat-on sa paghigugma kang Jehova?

• Sa unsang paagi ang atong panggawi magpamatuod nga gihigugma nato si Jehova?

•Sa unsang paagi atong mapasundayag ang atong gugma alang kang Jesus?

[Mga Pangutana sa Pagtuon]

[Mga hulagway sa panid 10, 11]

Ang gugma motabang kanato sa paghulat nga mapailobon alang sa kahupayan

[Hulagway sa panid 12]

Ang dakong pagsakripisyo ni Jesus mopalihok kanato sa paghigugma kaniya