Pag-alim sa mga Samad sa Gubat

SI Abraham sakop sa gerilya sulod sa 20 ka tuig. a Apan mihunong na siya sa pagpakiggubat ug dili na gayod makiggubat pa. Sa pagkatinuod, ang pipila sa iyang kanhing mga kaaway sa pagkakaron maoy suod kaayo niyang mga higala. Unsay nakapausab kaniya? Ang Bibliya. Naghatag kini kang Abraham ug paglaom ug hait nga panabot, nga nagtabang kaniya sa paglantaw sa mga kalihokan sa tawo sumala sa panglantaw sa Diyos. Tungod sa Bibliya nawala ang iyang tinguha nga makiggubat, ug nagsugod pagkaalim ang iyang kasubo, kaguol, pagdumot, ug kayugot. Iyang nakaplagan nga ang Bibliya naundan ug epektibong tambal alang sa kasingkasing.

Sa unsang paagi motabang ang Bibliya sa usa ka tawo sa pag-alim sa emosyonal nga mga samad? Dili kini makausab sa nahitabo kang Abraham. Sa gihapon, tungod sa pagbasa ug pagpalandong sa Pulong sa Diyos, ang iyang hunahuna nahiuyon nianang sa Maglalalang. Karon duna na siyay paglaom alang sa umaabot, ug siya duna nay bag-ong mga prioridad. Ang mga butang nga hinungdanon sa Diyos nahimong hinungdanon kaniya. Sa dihang nagsugod kini pagkahitabo, ang mga samad sa iyang kasingkasing nagsugod pagkaalim. Sa ingon niana nga si Abraham natabangan sa pag-usab.

Nabanlod sa Sibil nga Gubat

Si Abraham natawo sa Aprika sa katuigang 1930. Human sa ikaduhang gubat sa kalibotan, ang iyang nasod gimandoan sa usa ka gamhanang kasikbit nga nasod, apan daghan sa mga tagilungsod ni Abraham buot ug independensiya. Sa 1961, mianib si Abraham sa kalihokan alang sa kagawasan nga nakiggubat isip mga gerilya batok sa gamhanang kasikbit nga nasod.

“Sila among mga kaaway. Nagplano sila sa pagpatay kanamo, busa gipamatay namo sila,” misaysay si Abraham.

Kasagarang mameligro ang kinabuhi ni Abraham, busa sa 1982, human sa 20 ka tuig nga armadong pakiggubat, mikalagiw siya paingon sa Uropa. Nianang tungora hapit na siyang mag-50 anyos, ug may panahon na sa pagpamalandong bahin sa dalan sa kinabuhi nga iyang gisubay. Unsay nahitabo sa iyang mga damgo? Unsay anaa sa umaabot? Nahimamat ni Abraham ang pipila ka Saksi ni Jehova ug misugod sa pagtambong sa ilang mga tigom. Nahinumdom siya nga sa Aprika katuigan kanhi, nakabasa siya ug tract nga gihatag kaniya sa usa ka Saksi. Ang tract naghubit sa usa ka umaabot nga paraiso sa  yuta ug sa usa ka langitnong kagamhanan nga magmando sa katawhan. Matinuod ba gayod kaha kana?

Miingon si Abraham: “Gikan sa Bibliya, akong nakat-onan nga nausik kadtong tanang katuigan nga gigugol sa pagpakiggubat. Ang bugtong kagamhanan nga magtratar sa tanan nga walay pagpihig mao ang Gingharian sa Diyos.”

Wala madugay human mabawtismohi si Abraham ingong Saksi ni Jehova, usa ka tawo nga ginganlag Robert mikalagiw gikan sa Aprika paingon sa siyudad sa Uropa diin nagpuyo si Abraham. Si Robert ug Abraham nakig-away sa mao gihapong gubat apan sa magkaatbang nga pundok. Kasagarang maghunahuna si Robert bahin sa tinuod nga katuyoan sa kinabuhi. Siya usa ka relihiyoso nga tawo, ug kay nakabasa ug mga bahin sa Bibliya, nahibalo siya nga ang ngalan sa Diyos mao si Jehova. Sa dihang ang mga Saksi gikan sa kongregasyon ni Abraham mitanyag sa pagtabang kang Robert nga mas masabtan pa ang Bibliya, miuyon dayon siya.

Si Robert misaysay: “Sukad sa sinugdanan, nakadayeg ako sa paagi nga ang mga Saksi naggamit sa mga ngalan ni Jehova ug Jesus, nga nag-ila nga sila maoy bulag nga mga persona. Kaharmonya kana sa ako nang nahibaloan gikan sa Bibliya. Ang mga Saksi hapsay usab magsinina ug maluloton sa uban, bisan unsa pay nasyonalidad. Ang maong mga butang dako kaayog epekto kanako.”

Ang Magkaaway Nagkahigalaay

Si Robert ug Abraham, nga kanhing magkaaway, karon maoy suod nga managhigala. Nag-alagad sila ingong bug-os-panahong mga ebanghelisador sa mao gihapong kongregasyon sa mga Saksi ni Jehova. “Panahon sa gubat, kasagarang maghunahuna ko kon unsang hitaboa nga ang mga tawo gikan sa kasikbit nga mga nasod—daghan kanila sakop sa mao gihapong relihiyon—magdumtanay,” misaysay si Abraham. “Si Robert ug ako membro sa mao gihapong iglesya, bisan pa niana naggubatay kami. Karon kaming duha mga Saksi ni Jehova na, ug ang among pagtuo naghiusa kanamo.”

“Mao kana ang kalainan,” midugang si Robert. “Karon kami sakop na sa usa ka relihiyon nga naghimo kanamo nga bahin sa usa ka tinuod nga panag-igsoonay. Dili na gayod kami makiggubat pa.” Ang Bibliya adunay gamhanang impluwensiya diha sa kasingkasing niining kanhing magkaaway. Ang pagdumot ug kayugot inanayng napulihan sa pagsalig ug panaghigalaay.

Sa samang higayon nga si Abraham ug Robert nakiggubat, duha pa ka laing mga lalaki ang anaa sa magkaatbang nga pundok sa laing paggubatay sa duha ka magkasikbit nga mga nasod. Sa wala madugay ang Bibliya milihok sama sa usa ka epektibong tambal nga nag-alim usab sa ilang kasingkasing. Sa unsang paagi?

Mopatay—Unya Mamatay Ingong Martir

Si Gabriel, kinsa gimatuto diha sa usa ka relihiyosong pamilya, gipasabot nga ang iyang yutang natawhan nag-antos tungod sa balaang gubat. Busa, sa edad nga 19 anyos, miboluntaryo siya sa serbisyo militar ug mihangyo nga ipadala sa panggubatan. Sulod sa 13 ka bulan diha siya sa kinainitan sa mga gubat, usahay usa ka kilometro ug tunga na lang ang gilay-on gikan sa kaaway. “Nahinumdom ko ilabina sa usa ka higayon,” siya miingon. “Giingnan kami sa among komander nga ang kaaway moatake nianang gabhiona. Ginerbiyos kami pag-ayo mao nga nagpabuto kami sa among mga kanyon sa tibuok gabii.”  Giisip niya ang mga tawo gikan sa kasikbit nga nasod ingong iyang mga kaaway, nga angayang mamatay. “Ang akong hunahuna mao ang pagpatay ug daghan kutob sa mahimo. Unya, sama sa daghan nakong mga higala, buot nakong mamatay ingong martir.”

Apan, ngadtongadto si Gabriel nahigawad. Mikalagiw siya ngadto sa kabukiran, milighot tabok sa utlanan ngadto sa usa ka neyutral nga nasod, ug mibiyahe paingon sa Uropa. Nagsige siyag pangutana sa Diyos kon nganong lisod kaayo ang kinabuhi, kon kaha ang mga suliran maoy silot gikan sa Diyos. Nahimamat niya ang mga Saksi ni Jehova, kinsa nagpakita kaniya gikan sa Bibliya kon nganong ang kinabuhi karon puno kaayo sa mga suliran.—Mateo 24:3-14; 2 Timoteo 3:1-5.

Sa nagkadaghan ang nakat-onan ni Gabriel sa Bibliya, mas nasabtan niya nga naundan kini sa kamatuoran. “Akong nahibaloan nga mahimo kitang mabuhi sa walay kataposan sa paraisong yuta. Katingad-an, mao kanay akong gipangandoy sa bata pa ako.” Ang Bibliya naglipay kang Gabriel ug naghupay sa iyang magul-anong kasingkasing. Ang iyang kinailadmang emosyonal nga mga samad nagsugod sa pag-alim. Busa sa dihang nahimamat na niya si Daniel, usa ka kanhing kaaway, wala na mobatig pagdumot si Gabriel. Apan unsay nagtukmod kang Daniel nga moadto sa Uropa?

“Kon Tinuod Kang Naglungtad, Palihog Tabangi Ako!”

Si Daniel gimatuto ingong Katoliko ug sa edad nga 18 girekluta alang sa serbisyo militar. Gipadala siya sa pagpakiggubat sa mao gihapong gubat nga giapilan ni Gabriel apan sa kaatbang nga pundok. Duol sa panggubatan, si Daniel nagsakay sa usa ka tangke sa dihang naigo kini sa usa ka misil. Ang iyang mga higala nangamatay, ug siya grabeng nasamdan ug gidala ingong binilanggo. Migugol siyag mga bulan sa ospital ug sa usa ka kampo una pa ipadala sa usa ka neyutral nga nasod. Kay nag-inusara ug nag-ilaid sa kakabos, naghunahuna siyang maghikog. Si Daniel nag-ampo sa Diyos: “Kon tinuod kang naglungtad, palihog tabangi ako!” Pagkasunod adlaw, ang mga Saksi ni Jehova miduaw kaniya ug nakatubag ug daghan sa iyang mga pangutana. Sa kataposan, mibiyahe siya paingon sa Uropa ingong kagiw. Si Daniel nakig-uban na usab sa mga Saksi ug nagtuon sa Bibliya. Ang iyang nakat-onan naghupay sa iyang kabalaka ug kayugot.

Si Gabriel ug Daniel karon maoy suod nga managhigala, nga nahiusa diha sa usa ka espirituwal nga panag-igsoonay ingong bawtismadong mga Saksi ni Jehova. “Ang akong gugma kang Jehova ug kahibalo sa Bibliya nakatabang kanako sa paglantaw sa mga butang sama sa iyang panglantaw. Si Daniel dili na nako kaaway. Katuigan kanhi andam kong mopatay kaniya. Ang Bibliya nagtudlo kanako sa kaatbang gayod—andam magpakamatay alang kaniya,” matod ni Gabriel.

“Nakita nako ang mga tawo sa lainlaing mga relihiyon ug nasyonalidad nga nagpinatyanay,” matod ni Daniel. “Ug dihay mga tawo sa mao gihapong relihiyon nga diha sa magkaatbang nga pundok sa gubat nga nagpinatyanay. Sa dihang nakita ko kini, gibati nako nga ang Diyos maoy mabasol. Karon nahibalo na ko nga si Satanas maoy nagpaluyo sa tanang gubat. Si Gabriel ug ako karon maoy mga isigkamagtutuo. Dili na gayod kami makiggubat pa!”

 “Ang Pulong sa Diyos Buhi ug Gamhanang Nagalihok”

Nganong si Abraham, Robert, Gabriel, ug Daniel nausab pag-ayo? Sa unsang paagi nila giwala ang dulot-sa-bukog nga pagdumot ug kaguol gikan sa ilang kasingkasing?

Ang matag usa niining mga tawhana nagbasa, namalandong, ug nagtuon sa kamatuoran gikan sa Bibliya, nga “buhi ug gamhanang nagalihok.” (Hebreohanon 4:12) Ang Awtor sa Bibliya mao ang Maglalalang sa katawhan, kinsa nahibalo kon unsaon pag-impluwensiya alang sa maayo ang kasingkasing sa usa ka tawo nga andam mamati ug mokat-on. “Ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagtul-id sa mga butang, sa pagdisiplina diha sa pagkamatarong.” Sa dihang ang usa nga nagbasa magpagiya sa Bibliya, makabaton siya ug bag-ong mga prinsipyo ug mga sukdanan. Makat-onan niya kon unsay panglantaw ni Jehova sa mga butang. Kining maong proseso maghatag ug daghang kaayohan, lakip na ang pag-alim sa mga samad sa gubat.—2 Timoteo 3:16.

Ang Pulong sa Diyos nagsaysay nga walay nasodnon, rasanhon, o etniko nga pundok nga mas maayo o mas ngil-ad kay sa lain. “Ang Diyos dili mapihigon, apan sa matag nasod ang tawo nga magakahadlok kaniya ug magabuhat ug pagkamatarong dalawaton kaniya.” Ang magbabasa nga modawat niini inanayng matabangan sa pagbuntog sa mga pagbati sa rasanhon o nasodnong pagdumot.—Buhat 10:34, 35.

Ang mga tagna sa Bibliya nagpakita nga sa dili madugay pulihan sa Diyos ang presenteng sistema sa tawhanong pagmando sa iyang Mesiyanikong Gingharian. Pinaagi niining maong kagamhanan, ‘pahunongon [sa Diyos] ang mga gubat hangtod sa kinatumyan sa yuta.’ Ang mga institusyon nga nagpasiugda sa mga gubat ug nag-awhag sa mga tawo sa pag-apil niana pagawagtangon. Ang mga biktima sa gubat pagabanhawon ug hatagan ug kahigayonan nga mabuhi sa paraisong yuta. Wala nay kinahanglang mokalagiw gikan sa usa ka manunulong o sa usa ka tigdaogdaog.—Salmo 46:9; Daniel 2:44; Buhat 24:15.

Sa mga tawo nga magkinabuhi nianang panahona, ang Bibliya nag-ingon: “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo . . . Dili sila magbudlay sa walay kapuslanan, ni sila manganak alang sa kahasol.” Walay kadaot o samad nga dili maalim. Ang pagtuo sa maong paglaom inanayng magwagtang sa kaguol ug kasubo gikan sa kasingkasing sa usa ka tawo.—Isaias 65:21-23.

Sa pagkatinuod ang Bibliya maoy epektibong tambal alang sa kasingkasing. Ang mga pagtulon-an niini nagaalim na sa mga samad sa gubat. Ang kanhing magkaaway nahiusa na diha sa usa ka internasyonal nga panag-igsoonay. Kining proseso sa pag-alim magpadayon sa bag-ong sistema sa Diyos hangtod nga wala nay pagdumot ug kayugot, kasubo ug kaguol diha sa kasingkasing sa mga tawo. Ang Maglalalang nagsaad nga “ang unang mga butang dili na pagahinumdoman, ni kini mosantop pa sa kasingkasing.”—Isaias 65:17.

[Footnote]

[Blurb sa panid 4]

“Gikan sa Bibliya, akong nakat-onan nga nausik kadtong tanang katuigan nga gigugol sa pagpakiggubat”

[Blurb sa panid 5]

Ang Bibliya mahimong adunay gamhanang impluwensiya diha sa kasingkasing sa kanhing magkaaway

[Blurb sa panid 6]

Ang pagdumot ug kayugot inanayng napulihan sa pagsalig ug panaghigalaay

[Blurb sa panid 6]

Sa dihang ang usa nga nagbasa magpagiya sa Bibliya, makabaton siya ug bag-ong mga prinsipyo ug mga sukdanan

[Hulagway sa panid 7]

Ang kanhing magkaaway sa pagkakaron nahiusa na diha sa internasyonal nga panag-igsoonay

[Picture Credit Line sa panid 4]

Kampo sa kagiw: UN PHOTO 186811/J. Isaac