Pakigdait Alang sa Bag-ong Milenyo?

ANG Internasyonal nga Tuig Alang sa Kultura sa Pakigdait giinagurahan didto sa Paris ug New York City sa Septiyembre 14, 1999. Giproklamar kini alang sa tuig 2000 sa General Assembly sa Hiniusang Kanasoran. Si Federico Mayor, kanhing direktor heneral sa UNESCO, naghimog sinserong hangyo “sa pagmugnag tibuok-kalibotang kalihokan alang sa kultura sa pakigdait ug kawalay-kapintasan.”

Ang UNESCO dunay panultihon nga “sanglit ang mga gubat magsugod diha sa hunahuna sa mga tawo, diha mismo sa hunahuna sa mga tawo kinahanglang tukoron ang mga depensa sa pakigdait.” Kaharmonya niini, buot sa organisasyon nga ipasiugda ang usa ka kultura sa pakigdait pinaagi sa “edukasyon, pagbayloay ug ideya ug kooperasyon.” Si G. Mayor nagkomento nga dili igo “nga mahimong makigdaiton, bisan mahimong mga tigsupak sa gubat, kondili mahimong mga tigpasiugda sa pakigdait.”

Ikasubo, ang tuig 2000 dili gayod malinawon. Ang modernong kasaysayan—lakip sa mga panghitabo sa tuig 2000—nagpasiugda sa kawalay-katakos sa tawo nga mapugngan ang gubat ug kapintasan bisan pa sa sinserong mga paningkamot sa pagsanta niini.

Apan, takos tagdon nga ang pakigdait nalangkit gayod sa edukasyon. Mga 2,700 ka tuig kanhi, si manalagnang Isaias nagtagna: “Ang tanan nimong mga anak mahimong mga tinudloan ni Jehova, ug dagaya unya ang pakigdait sa imong mga anak.” (Isaias 54:13) Nakita daan sa mao gihapong manalagna ang panahon sa dihang ang mga tawo sa tanang kanasoran magaganayan ngadto sa putli nga pagsimba ni Jehova nga Diyos aron sa pagtuon sa Iyang mga dalan. Uban ang unsang resulta? “Ilang pagasalsalon ang ilang mga espada nga mga punta sa daro ug ang ilang mga bangkaw nga mga galab. Usa ka nasod dili mobakyaw sa espada batok sa usa ka nasod, ni makakat-on pa sila sa gubat.” (Isaias 2:2-4) Kaharmonya nianang tagnaa, ang mga Saksi ni Jehova nakigbahin sa tibuok-kalibotang edukasyonal nga buluhaton nga nakatabang na sa minilyon sa pagbuntog sa nasyonalistikanhon ug rasanhong mga pagdumot nga mao ang gamot sa kadaghanang gubat.

Wala na unyay gubat ilalom sa Gingharian sa Diyos, nga magdalag malungtarong pakigdait ug kasegurohan sa yuta. (Salmo 72:7; Daniel 2:44) Dayon, ang mga pulong sa salmista matuman na: “Tan-awa ang mga kalihokan ni Jehova, kon giunsa niya pagpahinabo ang makapahinganghang mga hitabo sa ibabaw sa yuta. Gipahunong niya ang mga gubat hangtod sa kinatumyan sa yuta.”—Salmo 46:8, 9.