Kon sa Unsang Paagi Sila Makabarog sa Pagpit-os sa Isigkaingon

ANG tinguha nga madawat sa uban nag-impluwensiya sa daghan sa pagsunod sa panghunahuna ug mga lihok sa ilang mga isigkaingon. Ang mga batan-on ilabinang nanginahanglan ug kalig-on sa pagdumili sa pagpakig-ambit sa makadaot nga mga buhat, sama sa pag-abuso sa droga ug seksuwal nga imoralidad. Sa unsang paagi sila makabarog sa pagpit-os sa isigkaingon?

Duha ka tin-edyer nga mga babaye sa Polandia di pa dugayng misulat: “Ang espiritu sa kalibotan tin-awng makita taliwala sa kadaghanan sa among mga isigkaingon. Sila manikas diha sa ilang mga pasulit sa eskuylahan, mogamit ug law-ay nga sinultihan, ug mahiligon sa usong mga sinina ug banha, imoral nga musika. Pagkamalipayon namo sa pagkabaton ug mga artikulo nga nagtumong kanamong mga batan-on ug nagpanalipod kanamo gikan sa impluwensiya sa way-katagbawan ug rebelyosong mga tin-edyer!

“Dili matukib sa mga pulong aron ipahayag ang among pagpasalamat sa mga artikulo sa Bantayanang Torre nga nagsilsil diha kanamo nga kami gikinahanglan ug gipabilhan ingong mga batan-on. Ang tambag sa Bibliya nga among nadawat nakatabang kanamo sa pagtultol sa among mga lakang sa hustong paagi aron padayong pahimut-an si Jehova nga Diyos. Kombinsido kami nga ang matinumanong pag-alagad kang Jehova mao ang labing maayong paagi sa kinabuhi.”

Oo, ang mga batan-on makabarog sa pagpit-os sa isigkaingon. Pinaagi sa pagbansay sa ilang “mga kagahom sa pag-ila,” ang Kristohanong mga batan-on makakat-on sa paghimog maalamong mga desisyon nga magbanaag dili sa “espiritu sa kalibotan” kondili, hinunoa, sa “espiritu nga gikan sa Diyos.”—Hebreohanon 5:14; 1 Corinto 2:12.