Kon sa Unsang Paagi ang Nagamandong Lawas Lahi sa Legal nga Korporasyon

ANG tinuig nga mga tigom sa Watch Tower Bible and Tract Society of Pennsylvania ginahimo na sukad pa sa Enero 1885. Sa dihang ang pagtigom sa dinihogang mga Kristohanon gipahigayon sa ulahing bahin sa ika-19ng siglo, ang mga direktor ug mga opisyales niini nga korporasyon adunay langitnong paglaom. Sa pagkatinuod, halos ingon niini kanunay ang kahimtang.

Dihay usa ka eksepsiyon. Sa 1940, si Hayden C. Covington—kanhi maoy abogado sa Sosyedad ug usa sa “ubang mga karnero,” nga may yutan-ong paglaom—napili nga direktor sa Sosyedad. (Juan 10:16) Nag-alagad siya ingong bise presidente sa Sosyedad gikan sa 1942 hangtod sa 1945. Nianang panahona, si Brader Covington miluwat ingong direktor aron sa pagsunod sa daw maoy kabubut-on ni Jehova kaniadto—nga ang tanang direktor ug mga opisyales sa korporasyon sa Pennsylvania angay nga dinihogang mga Kristohanon. Si Lyman A. Swingle maoy gipuli kang Hayden C. Covington diha sa hunta direktiba, ug si Frederick W. Franz ang gipiling bise presidente.

Nganong ang mga alagad ni Jehova nagtuo nga ang tanang direktor ug mga opisyales sa Watch Tower Bible and Tract Society of Pennsylvania kinahanglan gayod nga dinihogang mga Kristohanon? Kay niadtong panahona, ang hunta direktiba ug mga opisyales sa korporasyon sa Pennsylvania halos parehas ra sa Nagamandong Lawas sa mga Saksi ni Jehova, nga kanunayng gilangkoban sa dinihogan-sa-espiritung mga lalaki.

Usa ka Makasaysayanhong Tinuig nga Tigom

Sa tinuig nga tigom nga gihimo sa Oktubre 2, 1944, sa Pittsburgh, ang mga membro sa korporasyon sa Pennsylvania misagop ug unom ka resolusyon nga nag-usab sa karta niini. Ang karta nag-ingon nga ang mga katungod sa pagbotar ihatag ngadto sa mga tig-amot sa pondong salapi alang sa buluhaton sa Sosyedad, apan ang ikatulong kausaban nagpapas sa maong probisyon. Ang taho bahin nianang tinuig nga tigom nag-ingon: “Ang pagkamembro sa Sosyedad limitehan nga dili molapas sa 500 ka tawo . . . Ang matag usa nga pilion kinahanglang usa ka bug-os-panahong alagad sa Sosyedad o dili bug-os-panahon nga alagad sa kompaniya [kongregasyon] sa mga saksi ni Jehova ug kinahanglang magpakitag espiritu sa Ginoo.”

Human niana, ang mga direktor sa Sosyedad kinahanglang iboto sa katungdanan pinaagi sa mga indibiduwal nga bug-os nga debotado kang Jehova, walay sapayan sa kantidad sa salapi nga ilang giamot sa pagpalambo sa buluhaton sa Gingharian. Nahiuyon diay hinuon kini sa inanayng mga kalamboan nga gitagna sa Isaias 60:17, nga atong mabasa: “Inay tumbaga ako magdalag bulawan, ug inay puthaw ako magdalag plata, ug inay kahoy, tumbaga, ug inay mga bato, puthaw; ug igatudlo ko ang pakigdait ingong imong mga magtatan-aw ug ang pagkamatarong ingong imong mga tighatag ug buluhaton.” Sa paghisgot sa “mga magtatan-aw” ug “mga tighatag ug buluhaton,” kining tagnaa nagtumong sa organisasyonal nga mga pamaagi taliwala sa katawhan ni Jehova.

Kining importanteng tikang nga ipasignunot ang organisasyon sa teokratikanhong kahikayan nahitabo sa pagkatapos sa “duha ka libo tulo ka gatos ka gabii ug mga buntag,” nga gihisgotan sa Daniel 8:14. Nianang panahona, ang “balaang dapit” ‘gipasig-uli ngadto sa hustong kahimtang niini.’

Hinunoa, human sa makasaysayanhong tinuig nga tigom sa 1944, ang usa ka hinungdanong pangutana nagpabilin. Sanglit ang Nagamandong Lawas kaniadto halos parehas ra sa pitog-membro nga hunta direktiba sa korporasyon sa Pennsylvania, nagpasabot ba kini nga ang Nagamandong Lawas dili gayod mahimong langkoban ug kapin sa pito ka dinihogang mga Kristohanon? Dugang pa, sanglit ang mga direktor pilion man pinaagig mga membro sa korporasyon, ang mga membro sa korporasyon  mao bay mopili sa mga membro sa Nagamandong Lawas atol sa tinuig nga tigom? Ang mga direktor ug mga opisyales ba sa Watch Tower Bible and Tract Society of Pennsylvania ug ang mga membro sa Nagamandong Lawas parehas ra, o sila magkalahi?

Laing Halandomong Tinuig nga Tigom

Kining mga pangutanaha gitubag sa tinuig nga tigom nga gihimo sa Oktubre 1, 1971. Sa maong okasyon, usa sa mga mamumulong nagpunting nga ang nagamandong lawas sa “matinumanon ug maalamong ulipon” naglungtad nag ginatos ka tuig una pa ang Watch Tower Bible and Tract Society of Pennsylvania. (Mateo 24:45-47) Usa ka nagamandong lawas ang natukod sa Pentekostes 33 K.P., kapin sa 18 ka siglo sa wala pa maglungtad ang korporasyon sa Pennsylvania. Sa sinugdanan, ang nagamandong lawas gilangkoban, dili sa 7 ka lalaki, kondili sa 12 ka apostoles. Tin-aw, ang gidaghanon niini gidugangan sa ulahi, kay ang ‘mga apostoles ug mga ansiyano sa Jerusalem’ maoy nanguna.—Buhat 15:2.

Sa 1971 ang mao gihapong mamumulong nagpatin-aw nga ang mga membro sa Watch Tower Society dili makapili ug mga membro sa dinihogang Nagamandong Lawas. Ngano? “Tungod kay,” matod niya, “ang nagamandong lawas sa ‘ulipon’ nga matang wala itudlo ni bisan kinsang tawo. Kini gitudlo ni . . . Jesu-Kristo, ang Ulo sa tinuod nga Kristohanong kongregasyon ug ang Ginoo ug Agalon sa ‘matinumanon ug maalamong ulipon’ nga matang.” Nan, tin-aw, ang mga membro sa Nagamandong Lawas dili mahimong iboto alang sa maong katungdanan pinaagi sa membro sa bisan unsang legal nga korporasyon.

Sa pagpadayon, ang mamumulong naghimo niining talagsaon kaayong pahayag: “Ang nagamandong lawas walay mga opisyales sama nianang iya sa Hunta Direktiba sa Sosyedad, nga mao, may presidente, bise presidente, sekretaryo-tesorero ug katabang nga sekretaryo-tesorero. Kini duna lamay tsirman.” Sa daghang tuig, ang presidente sa korporasyon sa Pennsylvania mao ra usab ang pangunang membro sa Nagamandong Lawas. Dili na ingon niini ang kahimtang. Bisan tuod dili managsama ang eksperyensiya o katakos, ang mga membro sa Nagamandong Lawas kinahanglang managsama ug responsibilidad. Ang mamumulong midugang: “Si bisan kinsang membro sa nagamandong lawas mahimo usab nga tsirman bisan tuod nga sa samang panahon dili maoy presidente sa . . . Sosyedad . . . Mag-agad kini sa turnoturno nga sistema sa pagkahimong tsirman sa nagamandong lawas.”

Niadtong halandomong tinuig nga tigom sa 1971, nadayag pag-ayo ang kalainan tali sa dinihogan-sa-espiritung mga membro sa Nagamandong Lawas ug sa mga direktor sa korporasyon sa Pennsylvania. Sa gihapon, ang mga membro sa Nagamandong Lawas nagpadayon sa pag-alagad isip mga direktor ug mga opisyales sa Sosyedad. Apan, karon, ang pangutana motungha: Duna bay Kasulatanhong rason nga ang mga direktor sa Watch Tower Bible and Tract Society of Pennsylvania kinahanglan gayod nga maoy mga membro sa Nagamandong Lawas?

Ang tubag maoy wala. Ang korporasyon sa Pennsylvania dili mao lamang ang legal nga ahensiya nga gigamit sa mga Saksi ni Jehova. Duna pay lain. Ang usa mao ang Watchtower Bible and Tract Society of New York, Incorporated. Nagpasayon kini sa atong buluhaton sa Tinipong Bansa. Dayag kaayo ang panalangin ni Jehova niana nga korporasyon, bisan tuod ang kadaghanan sa mga direktor ug mga opisyales niini maoy sakop sa “ubang mga karnero.” Ang International Bible Students Association gigamit sa Britanya. Ang ubang legal nga mga ahensiya gigamit usab aron sa pagpalambo sa intereses sa Gingharian sa ubang kayutaan. Kining tanan sa kaharmonya nagaabag ug may papel nga ginadula aron ikawali ang maayong balita sa tibuok yuta. Walay sapayan kon diin sila mahimutang o kon kinsay naglingkod isip mga direktor o mga opisyales, kining maong mga ahensiya gigiyahan ug gigamit sa teokratikanhong paagi sa Nagamandong Lawas. Busa, ang maong mga ahensiya adunay tinudlong mga buluhaton nga pagahimoon sa pagpauswag sa intereses sa Gingharian.

Mapuslanon nga kita adunay legal nga mga ahensiya. Sa ingon kita nagasunod sa lokal ug nasodnong mga balaod, sumala sa gibaod sa Pulong sa Diyos. (Jeremias 32:11; Roma 13:1) Ang legal nga mga ahensiya nagpasayon sa atong buluhaton sa pagpakaylap sa mensahe sa Gingharian pinaagi sa pagpatik ug mga Bibliya, libro, magasin, brosyur, ug uban pang materyal. Ang maong mga  ahensiya nagsilbi usab nga legal nga mga instrumento aron sa pagdumala sa mga butang maylabot sa pagpanag-iyag propiedad, paghatag ug mga hinabang, pagkuhag mga kontrata sa paggamit sa mga pasilidad sa kombensiyon, ug uban pa. Mapasalamaton kita sa mga serbisyo niining legal nga mga ahensiya.

Ngalan ni Jehova Gibayaw

Sa 1944, ang Artikulo II sa karta sa Watch Tower Bible and Tract Society of Pennsylvania giusab aron ipasiugda ang mga tumong niini nga korporasyon. Sumala sa maong karta, ang mga katuyoan sa Sosyedad naglakip niining pangunang katuyoan: “Aron iwali ang ebanghelyo sa gingharian sa Diyos ubos ni Kristo Jesus ngadto sa tanang kanasoran ingong pamatuod sa ngalan, pulong ug pagkasupremo sa Labing Gamhanang Diyos nga si JEHOVA.”

Sukad sa 1926 ‘ang matinumanong ulipon’ nagbayaw sa ngalan ni Jehova. Ilabinang takos tagdon ang tuig 1931 sa dihang ang mga Estudyante sa Bibliya misagop sa ngalang mga Saksi ni Jehova. (Isaias 43:10-12) Ang mga publikasyon sa Sosyedad nga nagpasiugda sa ngalan sa Diyos naglakip sa mga librong Jehovah (1934), “Let Your Name Be Sanctified” (1961), ug sa “The Nations Shall Know That I Am Jehovah”—How? (1971).

Angayng hisgotan usab ang Bag-ong Kalibotang Hubad sa Balaang Kasulatan, nga gipatik sa kinatibuk-an niini sa Ingles sa 1960. Gigamit niini ang ngalan ni Jehova diha sa tanang dapit nga ang Tetragrammaton makita sa Hebreohanong Kasulatan. Kini nga hubad naglakip usab sa balaang ngalan diha sa 237 ka dapit sa Kristohanon Gregong Kasulatan diin ang maampingong pagsusi nagpakita nga kini awtorisado. Pagkamapasalamaton nato nga, sa nagkalainlaing paagi, si Jehova nagtugot sa “ulipon” ug sa Nagamandong Lawas niini sa paggamit sa ilang mga kahinguhaan sa pagpatik ug sa legal nga mga ahensiya aron sa pagpaila sa iyang ngalan sa tibuok yuta!

Pag-apod-apod sa Pulong sa Diyos Gipalambo

Ang katawhan ni Jehova kanunayng nagpamatuod sa iyang ngalan ug nagbayaw sa iyang Pulong pinaagi sa pagpatik ug pag-apod-apod ug milyonmilyong gipasukad-sa-Bibliya nga mga publikasyon ug sa Bibliya mismo. Sayo sa katuigang 1900, ang Watch Tower Society nakabatog legal nga katungod sa pagpatik sa The Emphatic Diaglott, ang Grego-Ingles nga interlinear nga edisyon sa Kristohanon Gregong Kasulatan ni Benjamin Wilson. Ang Sosyedad nagpatik sa edisyon sa mga Estudyante sa Bibliya sa King James Version, nga naglakip sa 500-panid nga apendise. Sa 1942 gipatik niini ang King James Version nga may panaplin nga mga reperensiya. Dayon sa 1944 ang Sosyedad misugod pagpatik sa 1901 nga American Standard Version, nga naggamit sa balaang ngalan. Ang ngalan ni Jehova makita usab diha sa The Bible in Living English, ni Stephen T. Byington, nga gipatik sa Sosyedad sa 1972.

Ang legal nga mga ahensiya nga gigamit sa mga Saksi ni Jehova nakaabag sa pagpatik ug pag-apod-apod niining tanang hubad sa Bibliya. Hinuon, dayag gayod ang suod kaayong pagtambayayongay tali sa Watch Tower Society ug sa grupo sa dinihogang mga Saksi ni Jehova nga naglangkob sa New World Bible Translation Committee. Kita nagmaya nga, sa bug-os o sa bahin, sa pagkakaron duna nay kapin sa 106,400,000 ka kopya niini nga hubad nga gipatik diha sa 38 ka pinulongan. Ang Watch Tower Bible and Tract Society of Pennsylvania sa tinuoray usa gayod ka sosyedad sa Bibliya!

‘Ang matinumanong ulipon’ ‘gitudlo ibabaw sa tanang kabtangan sa iyang agalon.’ Naglakip kini sa mga pasilidad sa hedkuwarter sa New York State, T.B.A., ug sa 110 ka sangang buhatan nga karon nagalihok sa tibuok kalibotan. Ang mga membro sa ulipon nga matang nahibalo nga sila paatubangon unya aron manubag sa paagi nga ilang gigamit ang gipiyal kanila. (Mateo 25:14-30) Apan, wala kini magpugong sa ‘ulipon’ sa pagtugot  ug kuwalipikadong mga magtatan-aw gikan sa “ubang mga karnero” aron maatiman ang legal ug administratibong mga kaakohan. Sa tinuoray, nagtugot kini sa mga membro sa Nagamandong Lawas sa paggahin ug dugang panahon “sa pag-ampo ug sa pagministeryo sa pulong.”—Buhat 6:4.

Hangtod nga ang mga kahimtang niining kalibotana motugot, ang Nagamandong Lawas, nga maoy naghawas sa “matinumanon ug maalamong ulipon,” mogamit sa legal nga mga ahensiya. Kombenyente kini, apan dili kini kinahanglanon kaayo. Kon ang usa ka legal nga ahensiya bungkagon pinaagig dekreto sa kagamhanan, ang buluhatong pagsangyaw magpadayon gihapon. Bisan karon, sa kayutaan diin ang mga pagdili gipatuman ug walay gigamit nga legal nga mga ahensiya, ang mensahe sa Gingharian ginawali, ang paghimog mga tinun-an ginabuhat, ug ang pag-uswag sa teokrasya nagpadayon. Nagakahitabo kana kay ang mga Saksi ni Jehova nagatanom ug nagabisibis, ug ang ‘Diyos padayong nagapatubo niini.’—1 Corinto 3:6, 7.

Samtang kita molantaw sa umaabot, kita masaligon nga si Jehova mag-atiman sa espirituwal ug materyal nga mga panginahanglan sa iyang katawhan. Siya ug ang iyang Anak, si Jesu-Kristo, magpadayon sa pagtaganag langitnong pagtultol ug pagpaluyo nga gikinahanglan aron sa paghuman sa buluhaton sa pagsangyaw sa Gingharian. Siyempre, bisan unsay atong malampos ingong mga alagad sa Diyos nahimo ‘dili pinaagi sa kasundalohan, ni pinaagi sa gahom, kondili pinaagi sa espiritu ni Jehova.’ (Zacarias 4:6) Busa kita mag-ampo alang sa tabang sa Diyos, kay nahibalo nga sa kusog nga itagana ni Jehova, makahimo kita sa paghuman sa buluhaton nga iyang gipabuhat kanato niining panahon sa kataposan!