Mga Magtatan-aw ug Ministeryal nga mga Alagad Gitudlo sa Teokratikanhong Paagi

“Tagda ang inyong kaugalingon ug ang tibuok panon, nga niana kamo gitudlo sa balaang espiritu nga mga magtatan-aw.”—BUHAT 20:28.

1, 2. Sa unsang paagi nagakatuman ang Isaias 60:22?

 SI Jehova dugay nang nagtagna nga dunay talagsaong mahitabo sa panahon sa kataposan. Pinaagi sa manalagnang Isaias, kini giingon: “Ang diyutay mahimong usa ka libo, ug ang gamay usa ka gamhanang nasod. Ako, si Jehova, magpadali niini sa kaugalingong panahon niini.”—Isaias 60:22.

² Duna bay pamatuod nga kining tagnaa nagakatuman karong adlawa? Oo, aduna gayod! Panahon sa dekada 1870, usa ka kongregasyon sa katawhan ni Jehova ang natukod sa Allegheny, Pennsylvania, T.B.A. Gikan sa maong gamay nga sinugdanan, tinagpulo ka libong kongregasyon ang natukod ug nag-uswag sa tibuok kalibotan. Milyonmilyong magmamantala sa Gingharian—usa ka gamhanang nasod—ang nakig-uban karon sa kapin sa 91,000 ka kongregasyon diha sa 235 ka nasod sa tibuok yuta. Sa walay duhaduha, nagpamatuod kini nga si Jehova nagapadali sa pagtigom sa matuod nga mga magsisimba sa dili pa mobuto ang “dakong kasakitan,” nga haduol na kaayo karon.—Mateo 24:21; Pinadayag 7:9-14.

3. Unsay kahulogan sa pagkanabawtismohan ‘sa ngalan sa Amahan, sa Anak, ug sa balaang espiritu’?

³ Human mohimog personal nga pahinungod kang Jehova, ug kaharmonya sa mga instruksiyon ni Jesus, kining minilyon nabawtismohan “sa ngalan sa Amahan ug sa Anak ug sa balaang espiritu.” (Mateo 28:19) Ang pagkanabawtismohan “sa ngalan sa Amahan” nagpasabot nga kining napahinungod nga mga indibiduwal nag-ila kang Jehova ingong ilang langitnong Amahan ug Maghahatag-Kinabuhi ug nagpasakop sa iyang pagkasoberano. Ang bawtismo ‘sa ngalan sa Anak’ nagpasabot nga ilang gidawat si Jesu-Kristo ingong ilang Manlulukat, Lider, ug Hari. Giila usab nila ang papel sa balaang espiritu sa Diyos, o aktibong puwersa, sa pagtultol sa ilang kinabuhi. Kini nagpakita nga sila nabawtismohan ‘sa ngalan sa balaang espiritu.’

4. Sa unsang paagi giordinahan ang Kristohanong mga ministro?

⁴ Sa pagbawtismo kanila, ang bag-ong mga tinun-an giordinahan ingong mga ministro ni Jehova nga Diyos. Kinsay nag-ordinar kanila? Sa prinsipyo, ang mga pulong nga nasulat sa 2 Corinto 3:5 mapadapat kanila: “Ang among pagkabaton ug igong katakos [ingong mga ministro] nagagikan sa Diyos.” Wala nay laing kadungganan nga ilang pangandoyon pa kay sa pagkahimong giordinahan mismo ni Jehova nga Diyos! Human sa pagbawtismo kanila, magpadayon sila sa pagtubo sa espirituwal ingong mga ministro sa “maayong balita” basta dawaton nila ang mga pagtultol sa espiritu sa Diyos ug magpadayon sa pagpadapat sa iyang Pulong.—Mateo 24:14; Buhat 9:31.

Teokratikanhon—Dili Demokratikanhon—Nga Pagtudlo

5. Ang Kristohanong mga magtatan-aw ug ministeryal nga mga alagad gipili ba sa demokratikanhong paagi? Ipatin-aw.

⁵ Ang hamtong nga pagdumala pinaagi sa kuwalipikadong mga magtatan-aw ug ang hanas nga pag-abag sa ministeryal nga mga alagad gikinahanglan sa pag-atiman sa espirituwal nga mga panginahanglan sa nagkadaghan nga aktibong mga ministro. (Filipos 1:1) Sa unsang paagi gitudlo ang maong espirituwal nga mga lalaki? Dili pinaagi sa mga pamaagi nga gigamit sa Kakristiyanohan. Pananglitan, ang Kristohanong mga magtatan-aw wala pilia sa demokratikanhong paagi, sa ato pa, pinaagi sa pagdawat sa mga boto sa mayoriya sa mga tawo nga sakop sa usa ka kongregasyon. Hinunoa, kini nga pagkatinudlo gihimo sa teokratikanhong paagi. Unsay buot ipasabot niana?

6. (a) Unsa ang tinuod nga teokrasya? (b) Nganong teokratikanhon man ang pagtudlo ug mga magtatan-aw ug ministeryal nga mga alagad?

 ⁶ Sa yanong pagkasulti, ang tinuod nga teokrasya maoy pagmando nga iya sa Diyos. Ang mga Saksi ni Jehova boluntaryong magpasakop sa iyang pagmando ug makigtambayayong aron tumanon ang kabubut-on sa Diyos. (Salmo 143:10; Mateo 6:9, 10) Ang pagtudlo ug Kristohanong mga magtatan-aw, o mga ansiyano, ug ministeryal nga mga alagad maoy teokratikanhon tungod kay ang paagi sa pagrekomendar ug pagtudlo sa maong responsableng mga lalaki gihimo sumala sa kahikayan sa Diyos nga gihatag diha sa Balaang Kasulatan. Ug ingong “pangulo ibabaw sa tanan,” natural nga si Jehova adunay katungod sa pagtino kon sa unsang paagi magalihok ang iyang makitang organisasyon.—1 Cronicas 29:11; Salmo 97:9.

7. Sa unsang paagi gimandoan ang mga Saksi ni Jehova?

⁷ Kasukwahi sa daghang relihiyosong mga grupo sa Kakristiyanohan, ang mga Saksi ni Jehova dili mohukom nga silasila ra sa matang sa espirituwal nga kagamhanan nga ilalom niana sila nagalihok. Kining sinserong mga Kristohanon naningkamot sa pagsunod sa mga sukdanan ni Jehova. Ang mga magtatan-aw sa ilang taliwala wala palingkora sa katungdanan pinaagi sa kongregasyonal, sa herarkiyal, o presbiteryano nga matang sa kagamhanan sa iglesya. Kon ang mga elemento sa kalibotan maningkamot sa pagbabag niining paagiha sa pagtudlo, ang katawhan ni Jehova dili mokompromiso. Sa kamaunongon, huptan nila ang baroganan nga maayong pagkapahayag sa mga apostol sa unang siglo sa dihang miingon sila: “Kinahanglang among sugton ang Diyos ingong magmamando inay ang mga tawo.” (Buhat 5:29) Busa, ang mga Saksi nagpasakop sa Diyos sa tanang butang. (Hebreohanon 12:9; Santiago 4:7) Ang pagsunod sa teokratikanhong pamaagi makapahimuot sa Diyos.

8. Sa unsang paagi magkalahi ang demokratikanhon ug teokratikanhon nga mga pamaagi?

⁸ Ingong mga alagad sa Dakong Teokrata, si Jehova, maayong hinumdoman nato ang kalainan tali sa demokratikanhon ug teokratikanhon nga mga pamaagi. Ang demokratikanhong mga paagi nagkinahanglan ug managsamang representasyon sa magkaatbang nga mga partido ug kasagarang mailhan pinaagi sa pagpangampanya alang sa maong katungdanan ug sa piniliay pinaagi sa pagbotar sa mayoriya. Ang maong mga pamaagi wala buhata diha sa teokratikanhong pagtudlo. Wala kini maggikan sa mga tawo; ni maggikan kini sa usa ka legal nga ahensiya. Dayag nga nagtumong sa pagtudlo kaniya ni Jesus ug ni Jehova ingong “apostol alang sa kanasoran,” giingnan ni Pablo ang mga taga-Galacia nga siya gitudlo “dili gikan sa mga tawo ni pinaagi sa usa ka tawo, kondili pinaagi kang Jesu-Kristo ug sa Diyos nga Amahan, kinsa nagbangon kaniya gikan sa mga patay.”—Roma 11:13; Galacia 1:1.

Gitudlo sa Balaang Espiritu

9. Unsay giingon sa Buhat 20:28 bahin sa pagtudlo ug Kristohanong mga magtatan-aw?

⁹ Gipahinumdoman ni Pablo ang mga magtatan-aw nga nagpuyo sa Efeso nga sila gitudlo sa Diyos pinaagi sa balaang espiritu. Siya miingon: “Tagda ang inyong kaugalingon ug ang tibuok panon, nga niana kamo gitudlo sa balaang espiritu nga mga magtatan-aw, aron magbantay sa kongregasyon sa Diyos, nga iyang gipalit pinaagi sa dugo sa iyang kaugalingong Anak.” (Buhat 20:28) Kadtong Kristohanong mga magtatan-aw kinahanglang padayon nga tultolan sa balaang espiritu samtang ginatuman nila ang ilang mga katungdanan ingong mga magbalantay sa panon sa Diyos. Kon ang usa ka lalaki nga gitudlo sa usa ka katungdanan dili na makakab-ot sa sukdanan sa Diyos, ngadtongadto ang balaang espiritu molihok sa pagtangtang kaniya gikan sa iyang katungdanan.

10. Sa unsang paagi ang balaang espiritu nagdula ug hinungdanon kaayong papel diha sa teokratikanhong pagtudlo?

¹⁰ Sa unsang paagi ang balaang espiritu nagdula ug hinungdanon kaayong papel? Una sa tanan, ang talaan nga naghatag sa mga kinahanglanon alang sa espirituwal nga pagdumala gidasig sa balaang espiritu. Sa iyang mga sulat kang Timoteo ug Tito, gilatid ni Pablo ang mga sukdanan nga angayng kab-oton sa mga magtatan-aw ug ministeryal nga mga alagad. Tanantanan, gihisgotan niya ang mga 16 ka lainlaing mga kinahanglanon. Pananglitan, ang mga magtatan-aw kinahanglang dili salawayon, makasaranganon sa batasan, mabuot sa hunahuna, mahusay, maabiabihon, kuwalipikado sa pagpanudlo, ug maayog panig-ingnan  ingong mga ulo sa pamilya. Kinahanglang timbang sila sa paggamit ug alkoholikong mga ilimnon, dili mga mahigugmaon sa salapi, ug magpasundayag ug pagpugong-sa-kaugalingon. Sa susama, ang taas nga mga sukdanan gihatag alang sa mga lalaki nga nagapangab-ot alang sa pagkatinudlo ingong ministeryal nga mga alagad.—1 Timoteo 3:1-10, 12, 13; Tito 1:5-9.

11. Unsa ang pipila sa mga kuwalipikasyon nga kinahanglang makab-ot sa mga lalaki nga nagapangab-ot ug responsibilidad sa kongregasyon?

¹¹ Ang pagsubli niining maong mga kuwalipikasyon nagpakita nga kadtong nanguna sa pagsimba kang Jehova kinahanglang maoy sumbanan sa Kristohanong panggawi. Ang mga lalaki nga nagapangab-ot ug responsibilidad sa kongregasyon kinahanglang maghatag ug ebidensiya nga ang balaang espiritu nagalihok diha kanila. (2 Timoteo 1:14) Kinahanglang dayag nga ang espiritu sa Diyos nagapatungha diha niining mga lalakiha sa mga bunga nga mao ang “gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.” (Galacia 5:22, 23) Ang maong mga bunga mapasundayag diha sa ilang mga pakiglabot sa mga isigkamagtutuo ug sa uban. Siyempre, ang uban tingali molabaw sa pagpasundayag sa pipila ka bunga sa espiritu, samtang ang uban makakab-ot tingali sa ubang mga kuwalipikasyon alang sa mga magtatan-aw sa labaw kaayong sukod. Apan, sa ilang katibuk-ang paagi sa pagkinabuhi, ang tanan nga naglaom nga mahimong tinudlong mga magtatan-aw o ministeryal nga mga alagad kinahanglang magpasundayag nga sila maoy espirituwal nga mga lalaki, nga nakaabot sa mga sukdanan sa Pulong sa Diyos.

12. Kinsay mahimong ikaingon nga gitudlo sa balaang espiritu?

¹² Sa dihang gitambagan ni Pablo ang uban nga mahimong mga tigsundog kaniya, mahimo niya kana uban ang kagawasan sa pagsulti tungod kay siya mismo nagsundog kang Jesu-Kristo, kinsa ‘nagbilin kanato ug sulondan aron atong sundon pag-ayo ang iyang mga tunob.’ (1 Pedro 2:21; 1 Corinto 11:1) Kadtong nakakab-ot sa Kasulatanhong mga sukdanan sa panahon sa pagtudlo kanila ingong mga magtatan-aw o ministeryal nga mga alagad mahimong ikaingon nga gitudlo sa balaang espiritu.

13. Sa unsang paagi ang balaang espiritu motabang niadtong nagrekomendar sa mga lalaki nga moalagad sa kongregasyon?

¹³ Adunay laing butang nga nagpakita kon sa unsang paagi nagalihok ang balaang espiritu diha sa pagrekomendar ug pagtudlo ug mga magtatan-aw. Si Jesus miingon nga ‘ang Amahan sa langit mohatag ug balaang espiritu niadtong nagapangayo kaniya.’ (Lucas 11:13) Busa sa dihang ang mga ansiyano sa lokal nga kongregasyon magtigom aron sa pagrekomendar ug mga lalaki alang sa responsibilidad sa kongregasyon, sila mag-ampo alang sa espiritu sa Diyos nga mogiya kanila. Ilang ipasukad ang ilang mga rekomendasyon sa kon unsay gisulti diha sa dinasig nga Pulong sa Diyos, ug ang balaang espiritu magpaarang kanila sa pag-ila kon ang usa ka lalaki nga gihunahunang itudlo nakakab-ot ba sa Kasulatanhong mga kinahanglanon. Kadtong nagrekomendar dili angayng maimpluwensiyahan sa panggawas nga panagway, nakab-ot nga edukasyon, o kinaiyanhong mga katakos. Kinahanglan nga pangunang tagdon nila kon ang maong indibiduwal ba maoy usa ka espirituwal nga tawo, usa kinsa ang mga membro sa kongregasyon dili magpanuko sa pagduol alang sa espirituwal nga tambag.

14. Unsay atong makat-onan sa Buhat 6:1-3?

¹⁴ Bisan tuod ang mga lawas sa mga ansiyano duyogan sa nagapanawng mga magtatan-aw sa pagrekomendar ug mga igsoong lalaki nga mag-alagad ingong mga ansiyano ug ministeryal nga mga alagad, ang aktuwal nga pagtudlo gihimo sumala sa sumbanan nga gihatag sa unang siglo. Sa usa ka higayon, mitungha ang panginahanglan alang sa kuwalipikado sa espirituwal nga mga lalaki aron sa pag-atiman sa usa ka hinungdanong asaynment. Ang nagamandong lawas naghatag sa mosunod nga instruksiyon: “Pangita ug pito ka lalaki sa inyong taliwala nga napanghimatud-ang maayo, puno sa espiritu ug kaalam, aron among itudlo sila ibabaw niining hinungdanong atimanonon.” (Buhat 6:1-3) Bisan tuod ang mga lalaki nga direktang nagdumala sa maong kahimtang mao ang nagrekomendar, ang pagtudlo gihimo sa responsableng mga lalaki didto sa Jerusalem. Ang susamang sumbanan gisunod karon.

15. Sa unsang paagi ang Nagamandong Lawas nalangkit sa pagtudlo ug mga lalaki?

¹⁵ Ang Nagamandong Lawas sa mga Saksi ni Jehova  direktang magtudlo sa tanang membro sa mga Komite sa Sanga. Sa dihang desisyonan kon kinsay moabaga nianang bug-at nga responsibilidad, ang Nagamandong Lawas naghunahuna sa gisulti ni Jesus: “Ang matag usa nga gihatagan ug daghan, daghan usab ang pangayoon kaniya; ug ang usa nga gitugyanan ug daghan sa mga tawo, sila mangayo kaniya ug labaw kay sa kasagaran.” (Lucas 12:48) Dugang pa sa pagtudlo ug mga membro sa Komite sa Sanga, ang Nagamandong Lawas maoy magtudlo ug mga ansiyano sa Bethel ug nagapanawng mga magtatan-aw. Bisan pa niana, sila mag-awtorisar usab ug kasaligang mga igsoong lalaki nga mohawas kanila sa paghimog pipila ka ubang pagtudlo. Dunay Kasulatanhon usab nga sumbanan alang niini.

‘Magtudlo ug mga Ansiyano, Sumala sa Akong Gisugo Kanimo’

16. Nganong gibilin ni Pablo si Tito sa Creta, ug unsay gipakita niini maylabot sa teokratikanhong pagtudlo karon?

¹⁶ Giingnan ni Pablo ang iyang isigkamagbubuhat nga si Tito: “Tungod niini ako nagbilin kanimo sa Creta, aron ikaw magtul-id sa mga butang nga depektoso ug magtudlo ug mga ansiyano sa matag siyudad, sumala sa akong gisugo kanimo.” (Tito 1:5) Dayon gilatid ni Pablo ang mga kuwalipikasyon nga pangitaon ni Tito diha sa mga lalaki nga mokuwalipikar alang sa maong pagtudlo. Busa, karon ang Nagamandong Lawas nagtudlo ug kuwalipikadong mga igsoon diha sa mga sangang buhatan sa paghawas kanila sa pagtudlo ug mga ansiyano ug ministeryal nga mga alagad. Gitino nga kadtong nagalihok ingong hawas sa Nagamandong Lawas tatawng nakasabot ug nagsunod sa Kasulatanhong mga lagda sa paghimo sa maong pagtudlo. Busa, maoy ilalom sa pagtultol sa Nagamandong Lawas nga ang kuwalipikadong mga lalaki ginatudlo sa pag-alagad sa mga kongregasyon sa mga Saksi ni Jehova sa tibuok kalibotan.

17. Sa unsang paagi ang mga rekomendasyon alang sa pagtudlo ug mga magtatan-aw ug ministeryal nga mga alagad ginadumala sa sangang buhatan?

¹⁷ Sa dihang ang mga rekomendasyon sa pagtudlo ug mga magtatan-aw ug ministeryal nga mga alagad ipadala ngadto sa sangang buhatan sa Watch Tower Society, ang eksperyensiyadong mga lalaki mosalig sa espiritu sa Diyos nga maoy mogiya sa paghimo sa pagtudlo. Kining maong mga lalaki mibating sila ang manubag, nga nakaamgo nga kinahanglang dili sila magdalidali sa pagpandong sa ilang mga kamot kang bisan kinsang lalaki,  basin mahimo silang umalambit sa iyang mga sala.—1 Timoteo 5:22.

18, 19. (a) Sa unsang paagi ipahibalo ang pipila ka pagtudlo? (b) Sa unsang paagi ginapatuman ang tibuok proseso sa pagrekomendar ug pagtudlo?

¹⁸ Ang pipila ka pagtudlo ipahibalo tingali pinaagi sa sulat nga dunay opisyal nga timre gikan sa usa ka legal nga ahensiya. Ang maong sulat mahimong gamiton sa pagtudlo ug kapin sa usa ka igsoon diha sa kongregasyon.

¹⁹ Ang teokratikanhong pagtudlo naggikan kang Jehova pinaagi sa iyang Anak ug sa makita nga yutan-ong galamiton sa Diyos, “ang matinumanon ug maalamong ulipon” ug ang Nagamandong Lawas niini. (Mateo 24:45-47) Ang tibuok proseso sa maong pagrekomendar ug pagtudlo gitultolan, o gigiyahan, sa balaang espiritu. Mao kini ang kahimtang tungod kay ang mga kuwalipikasyon gihatag diha sa Pulong sa Diyos, nga gidasig sa balaang espiritu, ug ang indibiduwal nga gitudlo naghatag ug pamatuod nga nagpatungha sa mga bunga sa maong espiritu. Busa, ang pagtudlo angayng isipon nga gihimo sa balaang espiritu. Maingon nga ang mga magtatan-aw ug ministeryal nga mga alagad gitudlo sa teokratikanhong paagi sa unang siglo, mao usab kana ang kahimtang karon.

Mapasalamaton Tungod sa Paggiya ni Jehova

20. Nganong susama ang atong gibati sa kang David nga nasulat diha sa Salmo 133:1?

²⁰ Niining panahon sa espirituwal nga paglambo ug teokratikanhon nga pag-uswag sa kalihokan nga pagsangyaw sa Gingharian, mapasalamaton kita nga si Jehova sa panguna mao ang responsable sa pagtudlo ug mga magtatan-aw ug ministeryal nga mga alagad. Kining Kasulatanhong kahikayan motabang sa pagmentinar sa taas nga mga sukdanan sa Diyos sa pagkamatarong sa atong taliwala ingong mga Saksi ni Jehova. Dugang pa, ang Kristohanong espiritu ug mainitong mga paningkamot niining mga lalakiha nakatampo ug dako sa atong kahibulongang pakigdait ug panaghiusa ingong mga alagad ni Jehova. Sama ni salmistang David, kita sa ingon matukmod sa pagpahayag: “Tan-awa! Pagkamaayo ug pagkamakalilipay nga ang mga igsoon mag-uban pagpuyo diha sa panaghiusa!”—Salmo 133:1.

21. Sa unsang paagi nagakatuman karon ang Isaias 60:17?

²¹ Pagkamapasalamaton nato sa pagtultol ni Jehova pinaagi sa iyang Pulong ug balaang espiritu! Ug makahuloganon gayod ang mga pulong nga nasulat sa Isaias 60:17: “Inay tumbaga ako magdalag bulawan, ug inay puthaw ako magdalag plata, ug inay kahoy, tumbaga, ug inay mga bato, puthaw; ug igatudlo ko ang pakigdait ingong imong mga magtatan-aw ug ang pagkamatarong ingong imong mga tighatag ug buluhaton.” Samtang ang teokratikanhong mga pamaagi sa inanay mas bug-os pa nga gipatuman taliwala sa mga Saksi ni Jehova, nasinati nato kining bulahan nga mga kahimtang sa tibuok yutan-ong organisasyon sa Diyos.

22. Sa unsa kita angayng magpasalamat, ug determinado kita nga buhaton ang unsa?

²² Kita mapasalamaton gayod sa teokratikanhong mga kahikayan nga gipatuman sa atong taliwala. Ug gipabilhan nato ug dako ang hago apan makapatagbaw nga buluhaton nga gihimo sa mga magtatan-aw ug ministeryal nga mga alagad nga gitudlo sa teokratikanhong paagi. Kita tibuok-kasingkasing nga maghimaya sa atong mahigugmaong langitnong Amahan, kinsa naghatag kanato ug espirituwal nga kalamboan ug nagpanalangin kanato nga madagayaon gayod. (Proverbio 10:22) Busa, magmadeterminado kita sa pagnunot sa organisasyon ni Jehova. Labaw sa tanan, magpadayon kita sa pag-alagad nga nahiusa alang sa kadungganan, kadayeganan, ug kahimayaan sa dako ug balaang ngalan ni Jehova.

Unsaon Nimo Pagtubag?

• Nganong makaingon kita nga ang pagtudlo ug mga magtatan-aw ug ministeryal nga mga alagad maoy teokratikanhon, dili demokratikanhon?

• Sa unsang paagi ang responsableng Kristohanong mga lalaki gitudlo sa balaang espiritu?

• Sa unsang paagi ang Nagamandong Lawas nalangkit sa pagtudlo ug mga magtatan-aw ug ministeryal nga mga alagad?

• Mahitungod sa teokratikanhong pagtudlo, nganong angay kitang magpasalamat kang Jehova?

[Mga Pangutana sa Pagtuon]

[Mga hulagway sa panid 15]

Ang mga ansiyano ug ministeryal nga mga alagad may pribilehiyo nga mag-alagad pinaagi sa teokratikanhong pagtudlo