Mga Magtutuman sa Pulong sa Diyos Makakaplag ug Kalipay

“Atong giila nga kining kombensiyona maoy lain na usab sa mga tagana ni Jehova aron maandam kita sa dugang buluhaton sa Gingharian,” matod sa usa sa mga mamumulong sa unang bahin sa “Mga Magtutuman sa Pulong sa Diyos” nga Distritong Kombensiyon sa mga Saksi ni Jehova. Siya nagpadayon: “Giandam nato ang atong kaugalingon aron matudloan bahin sa malipayon nga pamilyahanong kinabuhi, aron madasig sa pagpabiling suod sa organisasyon ni Jehova, aron mapalihok nga mamentinar ang atong kasibot sa buluhaton sa Gingharian, ug aron mapahinumdoman sa panginahanglan nga magpadayon sa pagbantay.”

SUKAD sa ulahing bahin sa Mayo 2000, minilyong magtutuman sa pulong sa Diyos ug ilang mga higala ang naghugop ngadto sa libolibong dapit sa tibuok kalibotan aron modawat sa hinungdanong edukasyon sa Bibliya. Unsay ilang nakat-onan sulod sa tulo ka adlaw nga kombensiyon?

Unang Adlaw—Dili Malimot sa mga Buhat ni Jehova

Sa pang-abling pakigpulong, gidapit sa tsirman ang mga mamiminaw sa pagtagamtam sa mga panalangin nga modangat tungod sa nahiusang pagsimba kang Jehova diha sa mga kombensiyon. Ang tanang nanambong gipasaligan nga ang ilang pagtuo mouswag ug ang personal nilang relasyon kang Jehova molig-on.

“Ang malipayong Diyos” nahibalo sa atong gikinahanglan alang sa atong indibiduwal nga kalipay. (1 Timoteo 1:11) Busa, ang pakigpulong nga “Ang Pagbuhat sa Kabubut-on sa Diyos Magdalag Kalipay” nagpasiugda nga ang Pulong ni Jehova, ang Bibliya, naglatid sa labing maayong dalan sa pagkinabuhi. (Juan 13:17) Daghang interbiyo sa dugay nang mga Saksi ni Jehova ang nagpakita kon sa unsang paagi ang pagtuman sa kabubut-on sa Diyos ilalom sa nagkadaiyang mga kahimtang nakadugang ug kahulogan sa ilang kinabuhi. Ang sunod nga pakigpulong, “Mosidlak Tungod sa Pagkamaayo ni Jehova,” nagpasiugda nga, ingong “mga tigsundog sa Diyos,” buot sa mga Kristohanon nga magpakita sa “tanang matang sa pagkamaayo” diha sa ilang kinabuhi. (Efeso 5:1, 9) Usa ka talagsaong paagi sa pagbuhat niini mao ang pagsangyaw sa maayong balita ug paghimog mga tinun-an.—Salmo 145:7.

Ang panaghisgot nga “Padayon nga Malig-on Ingon nga Nakakita sa Usa nga Dili Makita” nagpasundayag kon sa unsang paagi ang lig-ong pagtuo motabang nato nga “makita” ang dili-makitang Diyos. Gibatbat sa mamumulong kon sa unsang paagi ang espirituwal nga mga tawo nahibalo sa mga hiyas sa Diyos, lakip na sa iyang katakos sa pagkahibalo bisan sa atong gihunahuna. (Proverbio 5:21) Silang giinterbiyo nag-asoy sa mga tikang nga ilang gihimo aron maugmad ang mas lig-ong pagtuo ug mauna ang espirituwal nga intereses sa ilang kinabuhi.

Ang sesyon sa buntag natapos sa keynote address nga, “Dayega si Jehova—Ang Magbubuhat sa Katingalahang mga Butang.” Nagtabang kini sa mga mamiminaw sa pagsabot nga kon mas daghan ang atong makat-onan bahin kang Jehova, mas daghang rason ang atong makaplagan sa pagdayeg kaniya ingong Magbubuhat sa katingalahang mga butang. Ang mamumulong miingon: “Samtang mamalandong kita sa  kahibulongang mga buhat sa Diyos sa paglalang uban sa tanang katingalahang mga butang nga iyang gihimo alang kanato karon mismo, ang kinasingkasing nga apresasyon magpalihok kanato sa pagdayeg kaniya. Samtang mamalandong kita sa milagrosong mga butang nga iyang nahimo alang sa iyang katawhan sa nangaging panahon, buot nato siyang dayegon. Ug samtang atong pamalandongon ang mga saad labot sa katingalahang mga butang nga buhaton pa ni Jehova, kita mangita usab ug mga paagi nga makapahayag sa atong apresasyon.”

Ang sesyon sa hapon gisugdan sa pakigpulong nga “Ayaw Pag-undang sa Pagbuhat Kon Unsay Maayo,” nga nagpahinumdom sa tanang mamiminaw nga ang mga kapit-os niining kalibotana nagpamatuod nga ang kataposan haduol na. (2 Timoteo 3:1) Apan, pinaagi sa dili pag-undang, kita makapamatuod nga kita mao “ang matang nga adunay pagtuo ngadto sa pagtipig nga buhi sa kalag.”—Hebreohanon 10:39.

Unsang tambag sa Bibliya ang gihatag bahin sa pamilyahanong kinabuhi? Ang unang simposyum sa kombensiyon—“Magmasinugtanon sa Pulong sa Diyos”—nagsugod sa bahin nga “Sa Pagpili ug Kapikas sa Kaminyoon.” Ang pagpilig kapikas sa kaminyoon maoy usa sa labing ugdang nga mga desisyon nga himoon sa mga tawo. Busa, ang mga Kristohanon gustong maghulat nga magminyo inigkahamtong na nila, ug sila magminyo “lamang diha sa Ginoo.” (1 Corinto 7:39) Ang sunod nga bahin sa simposyum naghisgot sa tinguha ni Jehova nga ang tanang Kristohanong mga pamilya molampos ingong lig-ong espirituwal nga mga yunit, ug naghatag kinig praktikal nga mga paagi aron kini molampos. Ang kataposang bahin nagpahinumdom sa mga ginikanan nga ang pagtudlo sa ilang mga anak sa paghigugma sa Diyos magsugod diha sa gugma sa mga ginikanan alang kaniya.

Ang mga puntong gipresentar sa pakigpulong nga “Pagbantay sa mga Hulungihong ug Tabitabi” nakatabang sa tanan nga masabtan nga bisan tuod ang katingad-ang mga butang mahitabo, angay kitang mosanong sa maalamong paagi, dili kay motuo dayon, inigkadungog natog makapaukyab nga mga taho. Mas maayo pang mosulti ang mga Kristohanon bahin sa nahibaloan nilang tinuod—ang maayong balita sa Gingharian. Nakaplagan sa daghan nga ang sunod nga pakigpulong nga, “Pagsagubang sa ‘Tunok sa Unod,’” makapahupay ug makapadasig kaayo. Nakatabang kini kanila sa pagsabot nga bisan pa sa nagpadayong mga pagsulay nga atong maatubang, lig-onon kita ni Jehova pinaagi sa iyang balaang espiritu, sa iyang Pulong, ug sa atong Kristohanong panag-igsoonay. Dakong pagdasig ang makuha gikan sa personal nga eksperyensiya ni apostol Pablo niining bahina.—2 Corinto 12:7-10; Filipos 4:11, 13.

Ang unang adlaw natapos sa pakigpulong nga “Pasignunot sa Organisasyon ni Jehova.” Tulo ka bahin nga niana ang organisasyon  sa Diyos ilabinang nag-uswag ang gihatagag pagtagad: (1) ang nag-uswag nga pagsabot sa espirituwal nga kahayag gikan kang Jehova, (2) ang ministeryo nga gipiyal sa Diyos kanato, ug (3) ang tukma-sa-panahong mga pagpasibo sa organisasyonal nga mga pamaagi. Dayon ang mamumulong masaligong miingon: “Kita naghinamhinam sa mga palaaboton sa unahan.” Siya nangutana: “Kaduhaduhaan ba nga duna gayod kitay katarongan nga huptang malig-on hangtod sa kataposan ang pagsalig nga atong nabatonan sa sinugdan?” (Hebreohanon 3:14) Ang tubag tataw. Mitultol kadto sa pagluwat sa bag-ong brosyur nga nag-ulohang Ikaw Mahimong Higala sa Diyos! Kini magsilbing puwersadong tabang sa pagtudlo aron matabangan ang mga indibiduwal nga may limitadong edukasyon o katakos sa pagbasa nga makakat-on bahin kang Jehova.

Ikaduhang Adlaw—Padayon sa Pagsulti Bahin sa Katingalahang mga Buhat sa Diyos

Human matagad ang adlaw-adlaw nga teksto, ang ikaduhang adlaw sa kombensiyon nagpadayon sa simposyum nga “Mga Ministro sa Pulong sa Diyos.” Ang unang bahin nagsentro sa pagtagad diha sa presenteng kalamposan sa atong tibuok-kalibotang buluhaton nga pagsangyaw. Apan, ang paglahutay nato niining buluhatona gisupak sa kadaghanan, kinsa nagsalikway sa mensahe sa Gingharian. Daghang dugay nang mga magmamantala ang misaysay kon giunsa nila pagmentinar ang ilang kalipay diha sa ministeryo pinaagi sa pagpalig-on sa ilang hunahuna ug kasingkasing aron masagubang ang hagit sa kawalay-interes o pagsupak. Ang ikaduhang bahin nagpahinumdom sa mga kombensiyonista nga ang mga Saksi ni Jehova maningkamot nga maabot ang mga tawo bisan diin, sa pormal ug di-pormal nga paagi. Ug ang kataposang bahin nagbatbat sa nagkalainlaing mga paagi diin ang tanang Kristohanon makapauswag sa ilang personal nga ministeryo. Gipasiugda sa mamumulong nga aron mahimo kini, ato gayong unahon ang Gingharian sa Diyos, bisan kon ang pagbuhat sa ingon naglakip sa mga kahasol ug pagdumili-sa-kaugalingon.—Mateo 6:19-21.

Sanglit nagkinabuhi kita sa di-diyosnong kalibotan nga natuhop sa di-matagbaw nga pagpangandoy sa materyal nga mga butang, ang pakigpulong nga “Ugmara ang Diyosnong Pagkamahinalaron Uban ang Pagkatagbaw sa Kaugalingon” maoy tukma gayod sa panahon. Nga nagpasukad sa uban niyang mga komento sa 1 Timoteo 6:6-10, 18, 19, gipakita sa mamumulong kon sa unsang paagi ang diyosnong pagkamahinalaron motabang sa mga Kristohanon nga makalikay sa gugma  sa salapi, nga makapahisalaag kanila ug mosangpot sa daghang kasakit. Gipasiugda niya nga bisan unsay atong kahimtang sa panginabuhi, ang kalipay nag-agad sa atong relasyon kang Jehova ug sa atong espirituwal nga kahimsog. Daghan ang nahinuklog pag-ayo sa mga puntong gipresentar sa pakigpulong nga “Ayaw Hatagi ang Diyos ug Kaulawan.” Gipasiugda ang kamatuoran nga si Jehova dili gayod malimot sa iyang matinumanong mga Saksi. Ang walay-ingon nga panig-ingnan ni Jesu-Kristo—kinsa “mao sa gihapon kagahapon ug karon, ug hangtod sa hangtod”—motabang sa daghan nga makapadayon sa pagdagan sa lumba sa kinabuhi nga malahutayon.—Hebreohanon 13:8.

Ang paniklop nga sesyon sa buntag mao ang pakigpulong sa bawtismo—nga kanunayng haylayt sa dagkong panagkatigom sa mga Saksi ni Jehova. Pagkamakapalipay ang pagtan-aw sa bag-ong mga nagpahinungod nga nagsunod sa mga lakang ni Jesus pinaagi sa pagpabawtismo sa tubig! (Mateo 3:13-17) Ang tanang mohimo niini nga lakang daghan nag nalampos ingong mga magtutuman sa pulong sa Diyos. Dugang pa, human sa bawtismo sila mahimong ordinadong mga ministro sa maayong balita, nga makabatog dakong kalipay sa pagkahibalo nga sila nagapakigbahin sa pagbalaan sa ngalan ni Jehova.—Proverbio 27:11.

Ang pintok nga tambag gihatag sa pakigpulong nga “Pagkahamtong Gikinahanglan ‘sa Pag-ila sa Husto ug Sayop.’” Ang kalibotanong mga sukdanan sa husto ug sayop dili gayod igo. Busa angay kitang mosalig sa mga sukdanan ni Jehova. (Roma 12:2) Gidasig ang tanan nga maningkamot nga mabatonan ang tukmang pagsabot sa mga dalan sa Diyos ug motubo  sa pagkahamtong. Dayon, pinaagi sa paggamit niana ang atong mga gahom sa pagsabot mabansay ‘sa pag-ila sa husto ug sayop.’—Hebreohanon 5:11-14.

Misunod ang simposyum nga “Pagkugi sa Pag-ugmad sa Espirituwalidad.” Ang tinuod nga mga Kristohanon miila sa kahinungdanon sa pag-ugmad ug pagmentinar sa espirituwalidad. Naglakip kini ug pagkugi—sa pagbasa, pagtuon, ug pagpamalandong. (Mateo 7:13, 14; Lucas 13:24) Ang espirituwal nga mga tawo maghimo usab sa “tanang matang sa pag-ampo ug pangamuyo.” (Efeso 6:18) Kita nahibalo nga ang atong mga pag-ampo magbutyag sa kadulot sa atong pagtuo ug debosyon, kahimtang sa atong espirituwalidad, maingon man sa atong giisip nga “mas hinungdanong mga butang.” (Filipos 1:10) Gipasiugda usab ang kahinungdanon sa pag-ugmad ug mainiton, mahigugmaong relasyon kang Jehova sama nianang gitagamtam sa usa ka masinugtanong anak ngadto sa malulotong amahan. Dili lang igo nga kita dunay relihiyon—bisan tuod kini ang tinuod—kondili buot natong tukoron ang lig-ong pagtuo, ‘ingon nga nakakita sa Diyos.’—Hebreohanon 11:6, 27.

Ang bahin sa espirituwal nga pag-uswag dugang pang gihisgotan sa pakigpulong nga “Ipadayag ang Imong Pag-uswag.” Tulo ka bahin sa maong pag-uswag ang gihatagag pagtagad: (1) pag-uswag sa kahibalo, pagsabot, ug kaalam, (2) pagpatungha sa bunga sa espiritu sa Diyos, ug (3) pagtuman sa atong mga responsabilidad ingong mga membro sa pamilya.

Sa paniklop sa kataposang pakigpulong sa maong adlaw nga, “Nagalakaw Diha sa Mauswagong Kahayag sa Pulong sa Diyos,” ang mga kombensiyonista nalipay sa pagdawat sa bag-ong basahon, Tagna ni Isaias—Kahayag Alang sa Tibuok Katawhan I. Kini ang una sa duha ka tomo nga magpatin-aw sa basahon sa Bibliya sa Isaias kapitulo por kapitulo. “Ang basahon sa Isaias adunay mensahe kanato karon,” matod sa mamumulong. Siya nagpadayon: “Oo, ang kadaghanan sa tagna niini natuman na sa panahon ni Isaias. . . . Apan, daghan sa mga tagna ni Isaias nagakatuman karon, ug ang uban matuman pa diha sa gisaad nga bag-ong kalibotan sa Diyos.”

Ikatulong Adlaw—Mahimong mga Magtutuman sa Pulong ni Jehova

Ang kataposang adlaw sa kombensiyon gisugdan pinaagi sa paghisgot sa teksto sa maong adlaw. Dayon gisundan sa simposyum nga “Ang Makahuloganong Tagna ni Sofonias Alang Niadtong Nagatuman sa Kabubut-on sa Diyos.” Ang tulo ka pakigpulong niining maong simposyum nagpakita nga, sama sa iyang gibuhat sa mga adlaw sa masinupakong Juda, si Jehova magdalag kagul-anan kanilang kinsa modumili karon sa pagsunod sa iyang pasidaan. Kay nakasala sila batok sa Diyos, sila manglakaw nga way-mahimo samag mga buta, nga dili makakaplag ug kaluwasan. Apan, ang matuod nga mga Kristohanon matinumanong nagpadayon sa pagpangita kang Jehova, ug pagatagoan sa adlaw sa kasuko sa Diyos. Dugang pa, sila nagatagamtam ug  daghang panalangin bisan karon. Sila dunay gipanalanginang kahigayonan sa pagsulti sa “putli nga pinulongan” sa kamatuoran sa Bibliya. (Sofonias 3:9) Matod pa sa mamumulong: “Ang pagsulti sa putli nga pinulongan naglangkit dili lamang sa pagtuo sa kamatuoran ug pagtudlo niini ngadto sa uban kondili usab sa pagpahiuyon sa atong batasan sa balaod ug mga prinsipyo sa Diyos.”

Ang mga kombensiyonista mahinamong nagpaabot sa dramang “Mga Pasidaang Ehemplo sa Atong Adlaw.” Kining full-costume nga drama nagpakita kon sa unsang paagi ang libolibong Israelinhon nawad-an sa ilang kinabuhi diha sa utlanan sa Yutang Saad kay nalimot sila kang Jehova ug nadaldal sa paganong mga babaye sa pakighilawas ug bakak nga pagsimba. Usa sa pangunang mga karakter—si Jamin—sa sinugdan nabahin tali sa panghaylo sa Moabinhong mga babaye ug sa iyang debosyon kang Jehova. Ang sayop nga pangatarongan ug malimbongong panghunahuna sa di-diyosnong si Zimri gipatigbabaw, maingon man ang pagtuo ug debosyon ni Pinehas. Ang kapeligrohan nga malangkit niadtong wala mahigugma kang Jehova tin-awng gihulagway.

Ang drama nag-andam sa hunahuna sa misunod nga pakigpulong, “Ayaw Pagkahimong Malimtanong Mamiminaw.” Ang pagsusi sa 1 Corinto 10:1-10 nagpakita nga si Jehova mosulay sa atong pagkamasinugtanon aron matino ang atong pagkatakos nga modawat sa panulondon sa bag-ong kalibotan. Alang sa uban, ang unodnong mga tinguha makadaot sa espirituwal nga mga tumong bisan karon, nga hapit na kitang mosulod sa bag-ong sistema. Gidasig ang tanan nga dili gayod wad-on ang kahigayonan sa ‘pagsulod sa kapahulayan ni Jehova.’—Hebreohanon 4:1.

Ang pakigpulong publiko may ulohang “Kon Nganong Atong Hatagag Pagtagad ang Katingalahang mga Buhat sa Diyos.” Ang “katingalahang mga buhat” ni Jehova nagpakita sa iyang kaalam ug sa iyang awtoridad ibabaw sa pisikal nga kalalangan sa atong palibot. (Job 37:14) Ang daghang mausisahong mga pangutana gikan kang Jehova igo na aron isilsil kang Job ang gahom sa labing gamhanang Maglalalang. Sa umaabot buhaton usab ni Jehova ang “katingalahang mga buhat” alang sa iyang matinumanong mga alagad. Ang mamumulong nanghinapos: “Kita adunay daghang katarongan sa pagtagad sa katingalahang mga buhat ni Jehova—kon unsay iyang nahimo sa miagi, kon unsay iyang ginahimo sa atong palibot sa kalalangan karon, ug kon unsay iyang gisaad nga himoon sa haduol nga umaabot.”

Human ang sumaryo sa tun-anang artikulo sa Bantayanang Torre alang nianang semanaha, ang paniklop nga pakigpulong sa kombensiyon gipresentar. Nag-ulohang “Pabilhi Pag-ayo ang Imong Pribilehiyo Ingong Magtutuman sa Pulong sa Diyos,” kining makapadasig nga pakigpulong nagpasiugda nga usa ka dungog nga mahimong mga magtutuman sa pulong sa Diyos. (Santiago 1:22) Ang mga mamiminaw gipahinumdoman nga ang atong pribilehiyo ingong mga magtutuman sa pulong sa Diyos maoy talagsaon, ug kon mas taas ang panahon sa atong pagbuhat niana, mas molalom ang atong pagtamod niana. Ang tanang nanambong gidasig sa pagpalandong sa mapuslanong pagdasig niining distritong kombensiyon sa ilang tinguha nga mahimong mga magtutuman sa pulong sa Diyos sa bug-os nga gilapdon. Mao lamang kana ang bugtong paagi aron matagamtam ang kinadak-ang kalipay nga posible.

[Kahon/Hulagway sa panid 25]

Ikaw Mahimong Higala sa Diyos!

Sa Biyernes sa hapon giluwatan ang usa ka bag-ong brosyur nga nag-ulohang Ikaw Mahimong Higala sa Diyos! Dunay dakong panginahanglan sa pinayanong edukasyon sa Bibliya sa daghang bahin sa kalibotan, ug kining brosyura gamiton aron matagan-an kana nga panginahanglan. Dako unya kining panalangin alang sa mga tawong may limitadong edukasyon o katakos sa pagbasa.

[Kahon/Mga hulagway sa panid 26]

Tagna ni Isaias—Kahayag Alang sa Tibuok Katawhan

Ang mga kombensiyonista nahinam sa pagdawat sa Tomo 1 sa duha ka tomong hugpong sa Tagna ni Isaias—Kahayag Alang sa Tibuok Katawhan. Niining publikasyona, gipasiugda ang praktikal nga bili sa tagna ni Isaias alang sa atong adlaw.