Mga Saksi ni Jehova—Padayong Nagaabante nga May Hugot nga Pagtuo!

Taho sa Tinuig nga Tigom

NIINING mga adlaw sa pagkamaduhaduhaon ug pagkawalay-pagsalig, ang mga Saksi ni Jehova nailhan ingong mga Kristohanon nga may hugot nga pagtuo. Gipatin-aw kini sa tinuig nga tigom sa Watch Tower Bible and Tract Society of Pennsylvania, nga gipahigayon sa Jersey City, New Jersey, Assembly Hall of Jehovah’s Witnesses sa Sabado, Oktubre 7, 2000. a

Sa iyang pangbukas nga mga komento, ang tsirman, si John E. Barr, usa ka membro sa Nagamandong Lawas sa mga Saksi ni Jehova, miingon: “Sa tanang bilyonbilyong tawo sa yuta, kita nahibalo ug nagtuo nga ang pinalanggang Anak ni Jehova, si Kristo Jesus, naentrono na karon sa mga langit, nga naghari taliwala sa iyang mga kaaway.” Ang ebidensiya sa maong hugot nga pagtuo gipresentar diha sa unom ka makapahinam nga mga taho gikan sa tibuok yuta.

Pagbuntog sa Espiritismo Pinaagi sa Kamatuoran sa Bibliya sa Haiti

Ang espiritismo kaylap kaayo sa Haiti. “Kasagaran ang mga tawo magtuman sa voodoo sa pagpanalipod sa ilang kaugalingon,” miasoy ang koordinetor sa Komite sa Sanga nga si John Norman. Usa ka tambalan mibatig mga pagduhaduha sa dihang naputol ang iyang bitiis sa usa ka aksidente. ‘Sa unsang paagi nahitabo kini kanako kon ako gipanalipdan sa mga espiritu?’ siya nangutana. Sama sa daghan pang uban, kining tawhana natudloan sa kamatuoran pinaagi sa mga Saksi ni Jehova ug natabangan sa pagbiya sa espiritismo. Ang purohan sa pag-uswag sa Haiti gipakita sa kamatuoran nga sa Abril 19, 2000, upat ka pilo sa gidaghanon sa mga magmamantala sa Gingharian sa maong nasod ang mitambong sa Memoryal sa kamatayon ni Kristo.

Kasibot Diha sa Dakong Teritoryo sa Korea

Sa Korea, 40 porsiyento sa mga Saksi ni Jehova ang anaa sa bug-os-panahong pag-alagad. “Pinaagi niining dako kaayong panon sa mga magmamantala,” misaysay ang koordinetor sa Komite sa Sanga nga si Milton Hamilton, “ang among teritoryo nga dunay kapin sa 47 ka milyong tawo makobrehan halos kas-a sa usa ka bulan.” Ang pag-uswag sa mga kongregasyon sa senyas nga pinulongan maoy ilabinang talagsaon. Diha sa usa ka sirkito sa senyas nga pinulongan, 800 ka pagtuon sa Bibliya sa balay ang ginadumala. Kini maoy sa aberids nga usa ka pagtuon kada magmamantala. Ikasubo, ang batan-ong mga igsoong lalaki nabilanggo pa gihapon tungod sa ilang neyutralidad. Bisan pa niana, maayo ang pagtratar sa mga awtoridad sa bilanggoan niining matinumanong mga Kristohanon, ug sila sagad nga hatagan ug mga trabaho nga nanginahanglan ug pagkakasaligan.

 Pagkab-ot sa mga Kinahanglanon sa Pag-uswag sa Mexico

Ang kinatas-ang ihap nga 533,665 ka magmamantala sa Gingharian ang nagtaho sa pag-alagad sa kanataran sa Mexico sa Agosto 2000. Kapin sa tulo ka pilo nianang gidaghanona sa mga indibiduwal ang mitambong sa Memoryal. “Ang among tumong niining tuiga mao ang pagtukod ug 240 pa ka mga Kingdom Hall,” miingon ang koordinetor sa Komite sa Sanga nga si Robert Tracy. “Sa gihapon,” siya midugang, “kami nanginahanglan ug daghan pa.”

Ang mga batan-on taliwala sa mga Saksi ni Jehova sa Mexico maoy sulondan. Mahitungod sa usa ka batan-on, usa ka paring Katoliko miingon: “Buot kong makabaton ug usa lang nga sama kaniya taliwala sa akong mga sumusunod. Akong gidayeg kining mga tawhana tungod sa ilang kusganong tinguha ug maalamong paggamit sa Bibliya. Ilang gilabanan ang Diyos, bisan nameligro ang ilang kinabuhi.”

Integridad Taliwala sa Kagubot sa Sierra Leone

Sukad sa Abril 1991, sa dihang mibuto ang sibil nga gubat sa Sierra Leone, libolibong tawo ang namatay, naangol, o nabaldado. “Ang gubat ug kalisod aduna gayoy dakong epekto sa mga tawo,” mitaho ang koordinetor sa Komite sa Sanga nga si Bill Cowan. “Daghan nga walay interes sa among mensahe kaniadto karon maminaw na nga may interes. Dili talagsaon alang sa mga tawo nga kinabubut-ong mosulod sa among mga Kingdom Hall aron motambong sa ilang unang tigom. Ang mga igsoon sagad pahunongon diha sa dalan ug hangyoon ug usa ka pagtuon sa Bibliya.” Bisan pag huyang gihapon ang nasod, ang buluhatong pagsangyaw sa Gingharian nagapamunga sa Sierra Leone.

Dako Kaayong Programa sa Pagpanukod sa Habagatang Aprika

Sa pagkakaron, adunay panginahanglan sa linibo ka Kingdom Hall sa teritoryo nga giatiman sa sangang buhatan sa Habagatang Aprika. Gatosan ka tigomanan ang natukod na. “Inay kay magtigom sa barongbarong o ilalom sa kahoy, sama sa gibuhat kaniadto, ang atong mga igsoon mahimo nang magtigom diha sa hustong dapit nga dunay haom nga mga lingkoranan,” miingon ang membro sa Komite sa Sanga nga si John Kikot. “Bisan kon ang kadaghanan niini nga mga Kingdom Hall kasarangan rag disenyo, kini kasagaran nang nailhan ingong labing nindot nga mga tinukod sa ilang dapit. Sa ubang mga dapit, nakaplagan nga human matukod ang usa ka Kingdom Hall, ang kongregasyon mouswag ug kapin sa duha ka pilo sulod sa mosunod nga tuig.”

Bag-ong Kaliwatan sa mga Saksi sa Ukraine

Sulod sa 2000 nga tuig sa pag-alagad, kini nga nasod adunay kinatas-ang ihap nga 112,720 ka magmamantala. Kapin sa 50,000 niini ang nakakat-on sa kamatuoran sa Bibliya sulod sa milabayng lima ka tuig. “Sa pagkatinuod, si Jehova nagpatungha ug usa ka bag-o, batan-ong kaliwatan sa mga Saksi aron imantala ang iyang ngalan!” mipahayag si John Didur, koordinetor sa Komite sa Sanga. “Sulod sa milabayng duha ka tuig,” siya midugang, “kami nakapahimutang ug kapin sa 50 ka milyong magasin, nga katumbas sa populasyon sa nasod. Matag bulan, sa aberids, makadawat kami ug libolibong sulat gikan sa interesadong mga tawo nga nangayog dugang nga impormasyon.”

Laing Makapadasig nga mga Bahin sa Programa

Si Daniel Sydlik, membro sa Nagamandong Lawas, mihatag ug usa ka makapadasig nga pakigpulong. Ang artikulong “Kon sa Unsang Paagi ang Nagamandong Lawas Lahi sa Legal nga Korporasyon,” nga migula niini nga magasin, gipasukad nianang matulon-anong presentasyon.

Si Theodore Jaracz sa Nagamandong Lawas mipahayag ug usa ka makapukaw-sa-hunahuna nga pakigpulong nga nag-ulohang “Mga Magtatan-aw ug Ministeryal nga mga Alagad Gitudlo sa Teokratikanhong Paagi.” Ang usa sa mga artikulo nga makita niining magasina gipasukad nianang ulohana.

Ang tinuig nga tigom naglakip usab sa usa ka makapadasig nga pakigpulong nga gipahayag sa membro sa Nagamandong Lawas nga si David Splane bahin sa tinuig nga teksto sa tuig 2001. Pinasukad sa mga pulong ni apostol Pablo, kini maoy: ‘Barog nga bug-os ug may hugot nga pagtuo sa bug-os nga kabubut-on sa Diyos.’ (Colosas 4:12) Ang mga Saksi ni Jehova sa tibuok yuta determinado sa pagbuhat niana samtang matinumanon nilang gisangyaw ang maayong balita sa Gingharian sa Diyos sa tibuok yuta.—Mateo 24:14.

[Footnote]