Nganong Ugmaron ang Kaligdong?

USA ka edaran nga Hapones nga ginganlag Kunihito di pa dugayng milalin sa Tinipong Bansa. a Sulod lamang sa pipila ka semana human sa iyang pag-abot, nasugamak siya sa usa ka kahimtang nga makadaot unta sa iyang karera. Si Kunihito nag-asoy: “Sa dihang gipangutana ako sa akong superbisor kon mahimo ba nakong dawaton ang usa ka responsibilidad, may kompiyansa akong dawaton kana. Apan, tungod kay gimatuto ako nga isipon ang pagkamakasaranganon ingong usa ka hiyas, ako mitubag: ‘Dili ko segurado kon mahimo ko kana, apan paningkamotan kong himoon ang labing maayo.’ Para sa akong Amerikanong superbisor, morag kulang ako sa katakos ug kompiyansa. Sa dihang nahibaloan ko kana, akong naamgohan nga kinahanglang himoon nako ang pipila ka pagpasibo.”

Si Maria, nga nagpuyo sa New York City, maoy usa ka ekselenteng estudyante, nga kanunayng andam nga motabang sa iyang mga klasmet. Si Juan maoy kaubang estudyante nga mangayog tabang kang Maria matag karon ug unya. Apan naibog usab siya kaniya ug naningkamot nga maangkon niya ang pagdayeg ni Maria. Bisan pa sa iyang tinguha nga magpabiling hinlo sa moral, si Maria nahaylo sa mga pagbirigbirig ni Juan ug nalangkit sa sayop nga seksuwal nga panggawi.

Malisod gayod ang pagpakita ug kaligdong niining lainlaig kultura ug dunot ug moral nga kalibotan karon. Busa nganong ugmaron ang kaligdong? Tungod kay ang ligdong nga buhat makapahimuot sa Diyos, ug kadaghanan kanato seguradong nagtinguha nga maangkon ang iyang pag-uyon.

Ang Pulong sa Diyos, ang Bibliya, nagtambag sa mga magbabasa niini sa pag-ugmad sa kaligdong. Pananglitan, si apostol Pablo misulat: “Bisan unsang kaligdong nga anaa ug bisan unsang dalayegong butang nga anaa, padayong isipa kining mga butanga.” (Filipos 4:8) Ug si apostol Pedro nag-awhag kanato nga ‘maningkamot pag-ayo nga idugang sa atong pagtuo ang kaligdong.’ (2 Pedro 1:5) Apan unsa ba ang kaligdong? Mahimo ba kining itudlo diha sa klasehanan? Sa unsang paagi nato maugmad kini?

[Footnote]