Nunot sa Organisasyon ni Jehova
Nunot sa Organisasyon ni Jehova
“Hinaot nga ang Diyos sa kalinaw . . . magsangkap kaninyo sa matag maayong butang aron sa pagbuhat sa iyang kabubut-on.”—HEBREOHANON 13:20, 21.
1. Unsa ang populasyon sa kalibotan, ug pila ang giihap ingong mga membro sa pipila ka relihiyon?
SA TUIG 1999, ang populasyon sa yuta miabot ug unom ka bilyon! Ang The World Almanac nagpakita nga niining gidaghanona mga 1,165,000,000 ang Muslim; 1,030,000,000 ang Romano Katoliko; 762,000,000 ang Hindu; 354,000,000 ang Budhista; 316,000,000 ang Protestante; ug 214,000,000 ang Ortodokso.
2. Unsay ikaingon bahin sa relihiyosong kahimtang karon?
2 Tungod sa relihiyosong pagkabahinbahin ug kaguliyang karon, kini bang tanang minilyon nagalihok uyon sa kabubut-on sa Diyos? Wala, “kay ang Diyos usa ka Diyos, dili sa kasamok, kondili sa kalinaw.” (1 Corinto 14:33) Sa laing bahin, komosta ang internasyonal nga panag-igsoonay sa mga alagad ni Jehova? (1 Pedro 2:17) Ang mainampingong pagsusi nagpamatuod nga ‘ang Diyos sa kalinaw nagsangkap kanila sa tanang maayong butang aron sa pagbuhat sa iyang kabubut-on.’—Hebreohanon 13:20, 21.
3. Unsay nahitabo sa Jerusalem sa Pentekostes 33 K.P., ug ngano?
3 Siyempre, ang gidaghanon niadtong nakig-uban sa mga Saksi ni Jehova dili maoy sukdanan sa pagtino kon sila nakatagamtam ba sa pag-uyon sa Diyos; ni ang mga ihap dalayegon alang sa Diyos. Wala niya pilia ang mga Israelinhon tungod kay sila maoy “labing daghan” sa mga katawhan. Sa pagkatinuod, sila mao ang “labing diyutay” kanila. (Deuteronomio 7:7) Apan tungod kay ang Israel wala magmatinumanon, sa Pentekostes 33 K.P., gibalhin ni Jehova ang iyang pag-uyon ngadto sa bag-ong kongregasyon nga gilangkoban sa mga sumusunod ni Jesu-Kristo. Sila gidihogan sa balaang espiritu ni Jehova ug masiboton nga nagmantala ngadto sa uban sa kamatuoran bahin sa Diyos ug kang Kristo.—Buhat 2:41, 42.
Padayong Nagaabante
4. Nganong moingon ka nga ang unang Kristohanong kongregasyon padayong nagaabante?
4 Sa unang siglo, ang Kristohanong kongregasyon padayong nagaabante, nga nagbukas ug bag-ong mga teritoryo, naghimog mga tinun-an, ug nagbaton ug mas lalom nga pagsabot bahin sa mga katuyoan sa Diyos. Ang unang mga Kristohanon minunot sa espirituwal nga kalamdagan nga gitagana pinaagi sa dinasig sa Diyos nga mga sulat. Nadasig sa mga pagduaw sa mga apostol ug sa uban, ilang gituman ang ilang ministeryo. Kini gipamatud-an gayod diha sa Kristohanon Gregong Kasulatan.—Buhat 10:21, 22; 13:46, 47; 2 Timoteo 1:13; 4:5; Hebreohanon 6:1-3; 2 Pedro 3:17, 18.
5. Nganong ang organisasyon sa Diyos inanayng nagauswag karon, ug nganong angay kitang monunot niini?
5 Sama sa unang mga Kristohanon, ang presenteng-adlaw nga mga Saksi ni Jehova diyutay ra sa sinugdan. (Zacarias 4:8-10) Sukad sa ulahing bahin sa ika-19ng siglo, dunay tatawng ebidensiya nga ang espiritu sa Diyos nagauban sa iyang organisasyon. Tungod kay kita misalig, dili sa gahom sa tawo, kondili sa paggiya sa balaang espiritu, nagpadayon pag-uswag ang atong pagsabot sa Kasulatan ug sa pagbuhat sa kabubut-on sa Diyos. (Zacarias 4:6) Karon nga ania na kita sa “kataposang mga adlaw,” hinungdanon nga monunot kita sa inanayng nagauswag nga organisasyon ni Jehova. (2 Timoteo 3:1-5) Ang pagbuhat niana makapaarang kanato sa pagpabuhi sa atong paglaom ug sa pagpakig-ambit sa paghatag ug pamatuod bahin sa natukod nga Gingharian sa Diyos sa dili pa moabot ang kataposan niining sistemaha sa mga butang.—Mateo 24:3-14.
6, 7. Konsiderahon nato ang unsang tulo ka bahin diin ang organisasyon ni Jehova nagaabante?
6 Nalakip sa atong pundok kadtong nagsugod pagpakig-uban sa organisasyon ni Jehova sa mga dekada sa 1920, 30, ug 40. Panahon niadtong sayong mga katuigan, kinsa kanato ang naghanduraw sa talagsaong pag-uswag ug sa inanayng kaugmaran sa organisasyon hangtod karon? Hunahunaa ang hinungdanong mga hitabo sa atong modernong-adlaw nga kasaysayan! Sa pagkatinuod, magantihon sa espirituwal nga paagi ang pagpamalandong sa napalampos ni Jehova pinaagi sa iyang katawhan nga giorganisar sa teokratikanhong paagi.
7 Si David sa kakaraanan natandog pag-ayo sa dihang namalandong siya bahin sa kahibulongang mga buhat ni Jehova. “Sa dihang buot ko nga isaysay ug hisgotan sila,” matod niya, “daghan pa sila kay sa akong ikabatbat.” (Salmo 40:5) Nag-atubang kita sa susamang limitasyon, kay dili kita makaasoy sa daghang dagko ug takos dayegon nga mga buhat ni Jehova sa atong adlaw. Bisan pa niana, konsiderahon nato ang tulo ka bahin diin ang organisasyon ni Jehova nagaabante: (1) inanayng espirituwal nga kalamdagan, (2) napauswag ug napadako nga ministeryo, ug (3) tukma-sa-panahon nga mga pagpasibo sa organisasyonal nga mga pamaagi.
Mapasalamaton Tungod sa Espirituwal nga Kalamdagan
8. Kaharmonya sa Proverbio 4:18, ang espirituwal nga kalamdagan nakapaarang kanato sa pagsabot sa unsa maylabot sa Gingharian?
8 Bahin sa inanayng espirituwal nga kalamdagan, ang Proverbio 4:18 napamatud-ang tinuod. Kini nag-ingon: “Ang dalan sa mga matarong ingon sa masanag nga kahayag nga nagaanam kadan-ag hangtod sa pagkahingpit sa adlaw.” Pagkamapasalamaton nato sa inanayng espirituwal nga kalamdagan nga atong nasinati! Sa kombensiyon sa Cedar Point, Ohio, sa 1919, gipasiugda ang Gingharian sa Diyos. Gigamit ni Jehova ang Gingharian sa pagbalaan sa iyang ngalan ug sa pagbindikar sa iyang pagkasoberano. Sa pagkatinuod, ang espirituwal nga kalamdagan nakapaarang kanato sa pagsabot nga gikan sa Genesis ngadto sa Pinadayag, ang Bibliya nagpamatuod sa katuyoan ni Jehova sa pagbalaan sa iyang ngalan pinaagi sa Gingharian nga gimandoan sa iyang Anak. Diha niana nahasandig ang talagsaong paglaom alang sa tanang mahigugmaon sa pagkamatarong.—Mateo 12:18, 21.
9, 10. Sa dekada sa 1920, unsay nahibaloan bahin sa Gingharian ug bahin sa duha ka magkaatbang nga mga organisasyon, ug sa unsang paagi kini nakatabang?
9 Sa kombensiyon sa Cedar Point sa 1922, ang pangunang mamumulong, si J. F. Rutherford, nag-awhag sa katawhan sa Diyos nga “imantala, imantala, imantala, ang Hari ug ang iyang gingharian.” Sa artikulong “Birth of the Nation,” nga gipatik sa The Watch Tower sa Marso 1, 1925, gidani ang pagtagad ngadto sa espirituwal nga pagsabot bahin sa mga tagna nga nagpunting sa pagkatukod sa Gingharian sa Diyos sa 1914. Nasabtan usab sa dekada sa 1920 nga dunay duha ka magkaatbang nga mga organisasyon—kang Jehova ug kang Satanas. Nagpadayon ang gubat tali kanila, ug kita maanaa lamang sa madaogon nga kiliran kon kita monunot sa organisasyon ni Jehova.
10 Sa unsang paagi nakatabang kanato ang maong espirituwal nga kalamdagan? Sanglit ang Gingharian sa Diyos ug ang Hari nga si Jesu-Kristo dili bahin sa kalibotan, kita dili usab mahimong bahin niana. Pinaagi sa pagpabiling bulag sa kalibotan, atong gipakita nga kita dapig sa kamatuoran. (Juan 17:16; 18:37) Sa dihang makita nato ang daghang suliran nga nagsakit niining daotang sistema, pagkamapasalamaton nato nga kita dili bahin sa organisasyon ni Satanas! Ug pagkabulahan nato nga mabatonan ang espirituwal nga kasegurohan sulod sa organisasyon ni Jehova!
11. Unsang Kasulatanhong ngalan ang gisagop sa katawhan sa Diyos sa 1931?
11 Sa kombensiyon sa Columbus, Ohio, sa 1931, gihimo ang haom nga kapadapatan sa Isaias 43:10-12. Ang mga Estudyante sa Bibliya misagop sa talagsaong ngalan nga mga Saksi ni Jehova. Pagkadakong pribilehiyo nga ipaila ang ngalan sa Diyos aron ang uban makatawag niana ug aron maluwas!—Salmo 83:18; Roma 10:13.
12. Unsang espirituwal nga kalamdagan bahin sa dakong panon ang gitagana sa 1935?
12 Sa wala pa ang dekada sa 1930, daghan sa katawhan sa Diyos ang medyo wala makaseguro sa ilang paglaom sa umaabot nga kinabuhi. Ang uban naghunahuna bahin sa langitnong kinabuhi apan naikag sa mga pagtulon-an sa Bibliya bahin sa usa ka paraisong yuta. Sa kombensiyon sa Washington, D.C., sa 1935, kulbahinam ang pagkahibalo nga ang dakong pundok, o dakong panon, sa Pinadayag kapitulo 7 maoy usa ka matang nga dunay yutan-ong paglaom. Sukad niadto, ang pagtigom sa dakong panon mas nagakatulin pa. Dili ba kita mapasalamaton nga gipaila na kanato ang dakong panon? Ang kamatuoran nga ang mga tawo ginatigom nga tinagdaghan gikan sa tanang nasod, mga tribo, ug mga pinulongan magpalihok kanato sa pagpanglimbasog samtang kita naganunot sa organisasyon ni Jehova.
13. Unsang pangunang isyu ang gipasiugda sa kombensiyon sa St. Louis sa 1941?
13 Ang pangunang isyu nga niana angayng malangkit ang tawhanong katilingban gipasiugda sa kombensiyon sa St. Louis, Missouri, sa 1941. Kini mao ang unibersohanong pagmando, o pagkasoberano! Mao kini ang isyu nga kinahanglang husayon sa dili madugay, ug ang dako ug makalilisang nga adlaw nga kana pagahimoon tuling nagsingabot. Gipasiugda usab sa 1941 ang nalangkit nga isyu sa integridad, nga nagtugot kanato sa pagpakita kon hain kita sa tinagsatagsa nagabarog maylabot sa pagkasoberano sa Diyos.
14. Sa internasyonal nga kombensiyon sa 1950, unsay nahibaloan bahin sa mga prinsipe nga gihisgotan sa Isaias 32:1, 2?
14 Sa internasyonal nga kombensiyon sa New York City sa 1950, ang mga prinsipe sa Isaias 32:1, 2 tukmang gipaila. Kulbahinam kadto nga yugto sa dihang si Brader Frederick Franz mipakigpulong bahin niining ulohana ug misaysay nga ang mga prinsipe sa bag-ong yuta diha sa atong taliwala. Nianang maong kombensiyon ug sa misunod pa nga mga kombensiyon, dihay daghang kidlap sa espirituwal nga kahayag. (Salmo 97:11) Pagkamapasalamaton nato nga ang atong alagianan “ingon sa masanag nga kahayag nga nagaanam kadan-ag hangtod sa pagkahingpit sa adlaw”!
Pag-abante Diha sa Atong Ministeryo
15, 16. (a) Sa unsang paagi kita miabante diha sa atong ministeryo sa mga dekada sa 1920 ug 1930? (b) Unsang mga publikasyon ang naghatag ug dugang kadasig sa Kristohanong ministeryo sa di pa dugayng mga dekada?
15 Ang ikaduhang paagi nga ang organisasyon ni Jehova nagaabante adunay kalabotan sa atong pangunang buluhaton—ang pagsangyaw sa Gingharian ug paghimog tinun-an. (Mateo 28:19, 20; Marcos 13:10) Aron mapalampos kining buluhatona, ang organisasyon padayong nagpasiugda kanato sa kahinungdanon sa pagpasangkad sa atong ministeryo. Sa 1922 ang tanang Kristohanon giawhag sa pagpakig-ambit sa buluhatong pagsangyaw. Ang matag Kristohanon kinahanglang makaamgo sa personal nga kaakohan sa pagpalamdag sa iyang kahayag ug sa ingon dunay personal nga bahin sa pagpamatuod bahin sa kamatuoran. (Mateo 5:14-16) Sa 1927 gihimo ang mga tikang sa paggahin sa Dominggo ingong adlaw alang sa pagsangyaw sa kanataran. Sugod sa Pebrero 1940, nahimong kasagaran ang pagkakita sa mga Saksi diha sa kadalanan sa mga negosyohanan nga nagtanyag sa Ang Bantayanang Torre ug Consolation (karon Pagmata!).
16 Sa tuig 1937 giluwatan ang bokletang Model Study, nga nagpasiugda sa panginahanglan sa paghimog mga balikduaw aron matudloan ang uban sa kamatuoran sa Bibliya. Sa katuigan human niana, ang kalihokan sa pagtuon sa Bibliya gipasiugda pag-ayo. Gihatagag dugang kadasig kining matanga sa ministeryo pinaagi sa pagpatik sa librong “Pasagdi ang Diyos Maminatud-on” sa 1946 (sa Iningles) Ang Kamatuoran nga Motultol sa Kinabuhing Dayon sa 1968 (sa Iningles). Sa pagkakaron, gigamit nato ang librong Kahibalo nga Motultol sa Kinabuhing Walay Kataposan. Ang pagkobre sa maong materyal nagpahimutang ug lig-ong Kasulatanhong sukaranan sa paghimog mga tinun-an.
Pag-abante Uban ang Organisasyonal nga mga Pagdalisay
17. Sa pagtuman sa Isaias 60:17, sa unsang paagi nagaabante ang organisasyon ni Jehova?
17 Ang ikatulong paagi nga ang organisasyon ni Jehova nagaabante adunay kalabotan sa organisasyonal nga mga pagdalisay. Sumala sa Isaias 60:17, si Jehova nagsaad: “Inay tumbaga ako magdalag bulawan, ug inay puthaw ako magdalag plata, ug inay kahoy, tumbaga, ug inay mga bato, puthaw; ug igatudlo ko ang pakigdait ingong imong mga magtatan-aw ug ang pagkamatarong ingong imong mga tighatag ug buluhaton.” Sa pagtuman niining tagnaa, ang mga tikang ginahimo sa pagpauswag sa pagdumala sa buluhaton nga pagsangyaw sa Gingharian ug sa pagbantay sa panon.
18, 19. Unsang organisasyonal nga mga pagdalisay ang gihimo latas sa katuigan?
18 Sa 1919 usa ka direktor sa pag-alagad ang gitudlo diha sa matag kongregasyon nga mihangyo nga organisahon alang sa pag-alagad sa kanataran. Kini naghatag ug dugang kadasig sa atong ministeryo sa kanataran. Ang pagpili ug mga ansiyano ug mga diakono pinaagig botasyon gitapos sa 1932, nga nagtimaan sa atong pagbiya sa demokratikanhong mga paagi. Ang laing talagsaong hitabo nahitabo sa 1938 sa dihang ang tanang alagad sa kongregasyon sugod nga gitudlo sa paagi nga subay gayod sa mga kahikayan alang sa teokratikanhong pagkatinudlo sa unang Kristohanong kongregasyon. (Buhat 14:23; 1 Timoteo 4:14) Sa 1972 ang mga magtatan-aw ug ministeryal nga alagad gitudlo aron sa pag-alagad, sama sa gibuhat sa ingon niana nga mga lalaki taliwala sa unang mga Kristohanon. Inay kay usa ra ka tawo ang mag-alagad ingong magtatan-aw sa kongregasyon, ang Filipos 1:1 ug ang ubang mga teksto nagpakita nga kadtong nakakab-ot sa Kasulatanhong mga kinahanglanon alang sa mga magtatan-aw naglangkob sa lawas sa mga ansiyano.—Buhat 20:28; Efeso 4:11, 12.
19 Sa 1975 usa ka kahikayan ang gipatuman nga ang mga komite sa Nagamandong Lawas sa mga Saksi ni Jehova magdumala sa tibuok-kalibotang mga kalihokan sa organisasyon sa Diyos. Ang mga Komite sa Sanga gitudlo aron sa pagdumala sa buluhaton diha sa ilang tagsatagsa ka mga teritoryo. Sukad niadto, gihatagag pagtagad ang pagpayano sa buluhaton didto sa hedkuwarter ug sa mga sangang buhatan sa Watch Tower Society aron “matino ang mas hinungdanong mga butang.” (Filipos 1:9, 10) Ang mga responsibilidad nga gipas-an sa luyoluyong mga magbalantay ni Kristo naglakip sa pagpanguna sa buluhatong pag-ebanghelyo, pagtudlo diha sa kongregasyon, ug pagbantay sa panon sa Diyos sa hustong paagi.—1 Timoteo 4:16; Hebreohanon 13:7, 17; 1 Pedro 5:2, 3.
Ang Aktibong Pagpanguna ni Jesus
20. Ang pagnunot sa organisasyon ni Jehova nagkinahanglan nga atong ilhon ang unsa bahin sa posisyon ni Jesus?
20 Ang pagnunot sa inanayng nagauswag nga organisasyon ni Jehova nagkinahanglan nga atong ilhon ang tinudlo-sa-Diyos nga papel ni Jesu-Kristo ingong “ulo sa kongregasyon.” (Efeso 5:22, 23) Takos tagdon, usab, ang Isaias 55:4, diin giingnan kita: “Tan-awa! Ingong saksi ngadto sa nasodnong mga pundok akong [Jehova] gihatag siya, ingong pangulo ug komandante ngadto sa nasodnong mga pundok.” Tinong nahibalo si Jesus kon unsaon pagpanguna. Nakaila usab siya sa iyang mga karnero ug sa ilang mga buhat. Sa pagkatinuod, sa dihang gisusi niya ang pito ka kongregasyon sa Asia Minor, lima ka beses siyang miingon: “Nahibalo ako sa imong mga buhat.” (Pinadayag 2:2, 19; 3:1, 8, 15) Nahibalo usab si Jesus sa atong mga panginahanglan, sama sa iyang Amahan, si Jehova. Sa wala pa ihatag ang Modelong Pag-ampo, si Jesus nag-ingon: “Ang Diyos nga inyong Amahan nahibalo sa mga butang nga inyong gikinahanglan sa wala pa gani kamo mangayo kaniya.”—Mateo 6:8-13.
21. Sa unsang paagi gipasundayag ang pagpanguna ni Jesus sa Kristohanong kongregasyon?
21 Sa unsang paagi gipasundayag ang pagpanguna ni Jesus? Ang usa maoy pinaagi sa Kristohanong mga magtatan-aw, ang “mga gasa nga mga lalaki.” (Efeso 4:8) Ang Pinadayag 1:16 naghulagway sa dinihogang mga magtatan-aw ingong anaa sa tuong kamot ni Kristo, ilalom sa iyang pagkontrolar. Karon, si Jesus nagtultol sa kahikayan sa pagtudlog mga ansiyano, bisan pag ang maong mga lalaki dunay langitnon o kaha yutan-on nga paglaom. Sumala sa gipatin-aw sa nag-unang artikulo, sila gitudlo sa balaang espiritu kaharmonya sa Kasulatanhong mga kinahanglanon. (1 Timoteo 3:1-7; Tito 1:5-9) Sa unang siglo, usa ka grupo sa mga tigulang sa Jerusalem ang naglangkob sa nagamandong lawas nga nagdumala sa mga kongregasyon ug sa kalihokan sa pagsangyaw sa Gingharian sa katibuk-an. Ang susamang sumbanan ginasunod karon sulod sa organisasyon ni Jehova.
Nunot!
22. Unsang tabang ang gitagana sa Nagamandong Lawas?
22 Ang mga intereses sa Gingharian dinhi sa yuta gipiyal sa “matinumanon ug maalamong ulipon,” nga gihawasan sa Nagamandong Lawas sa mga Saksi ni Jehova. (Mateo 24:45-47) Ang Nagamandong Lawas sa panguna naghatag ug pagtagad sa pagtagana ug espirituwal nga instruksiyon ug pagtultol sa Kristohanong kongregasyon. (Buhat 6:1-6) Apan, sa dihang ang mga isigkamagsisimba maapektohan sa kinaiyanhong mga katalagman, ang Nagamandong Lawas mohangyo sa usa o kapin pang legal nga mga ahensiya sa pagtaganag hinabang ug sa pag-ayo o pagpasig-uli sa naguba nga mga balay ug mga Kingdom Hall. Kon ang pipila ka Kristohanon gidaogdaog o gilutos, ang mga tikang himoon sa pagpalig-on kanila sa espirituwal. Ug “sa masamok nga panahon,” gihimo ang tanang paningkamot aron magpadayon ang buluhatong pagsangyaw.—2 Timoteo 4:1, 2.
23, 24. Bisan unsa pay mahitabo sa iyang katawhan, unsay padayong gitagana ni Jehova, ug angayng unsa ang atong determinasyon?
23 Bisan unsa pay mahitabo sa iyang katawhan, si Jehova padayong nagtagana ug espirituwal nga pagkaon ug gikinahanglang pagtultol. Ang Diyos naghatag usab ug pagsabot ug kaalam ngadto sa responsableng mga igsoong lalaki aron sa pagpangandam alang sa dugang pag-uswag ug mga pagdalisay sa teokratikanhong organisasyon. (Deuteronomio 34:9; Efeso 1:16, 17) Sa walay duhaduha, si Jehova magtagana sa atong gikinahanglan aron sa pagtuman sa atong komisyon sa paghimog mga tinun-an ug sa pagpalampos sa atong ministeryo sa tibuok kalibotan.—2 Timoteo 4:5.
24 Kita adunay bug-os nga pagsalig nga si Jehova dili gayod mobiya sa iyang matinumanong katawhan; siya magaluwas kanila latas sa umaabot nga “dakong kasakitan.” (Pinadayag 7:9-14; Salmo 94:14; 2 Pedro 2:9) Kita dunay katarongan nga mentinahon ang pagsalig nga atong nabatonan sa sinugdan hangtod sa kataposan. (Hebreohanon 3:14) Busa, magmadeterminado kita sa pagnunot sa organisasyon ni Jehova.
Unsaon Nimo Pagtubag?
• Nganong makaingon kita nga ang organisasyon ni Jehova padayong nagaabante?
• Unsay pamatuod nga ang katawhan sa Diyos nakatagamtam ug inanayng espirituwal nga kalamdagan?
• Sa unsang paagi nahimo ang mga pagpauswag diha sa Kristohanong ministeryo?
• Unsang tukma-sa-panahon nga mga pagpasibo ang gihimo diha sa organisasyonal nga mga pamaagi taliwala sa mga alagad ni Jehova?
[Mga Pangutana sa Pagtuon]
[Hulagway sa panid 17]
Sama kang David, dili nato maasoy ang tanang kahibulongang mga buhat ni Jehova
[Hulagway sa panid 18]
Ang panon sa Diyos nakabenepisyo gikan sa tukma-sa-panahon nga mga pagpasibo sa organisasyonal nga mga pamaagi