Usa ka Espesyal nga Pahibalo

SA KONKLUSYON sa tinuig nga tigom sa Watch Tower Bible and Tract Society of Pennsylvania sa Oktubre 7, 2000, usa ka espesyal nga pahibalo ang gihimo sa tsirman, si John E. Barr sa Nagamandong Lawas. Kining pahibaloa gipasukad sa mga pakigpulong nga gihatag sayosayo nianang adlawa ni Theodore Jaracz ug Daniel Sydlik.—Tan-awa ang mga panid 12-16 ug 28-31 niining magasina.

Nagpasiugda sa usa ka hinungdanon kaayong punto, si Brader Barr nag-ingon: “‘Ang matinumanon ug maalamong ulipon’ ug ang Nagamandong Lawas niini maoy gipiyalan sa intereses nga mas labaw ug mas malangkobon pa kay sa gipiyal ngadto sa legal nga mga korporasyon. Ang gipakita diha sa mga katuyoan sa karta sa matag usa sa maong mga korporasyon maoy mga butang nga may limitadong gilapdon. Hinunoa, ang atong Agalon, si Jesu-Kristo, nagtudlo sa matinumanong ulipon nga matang ibabaw sa tanan niyang ‘mga kabtangan,’ o intereses sa Gingharian dinhi sa yuta.”—Mateo 24:45-47.

Maylabot sa korporasyon sa Pennsylvania, si Brader Barr midugang: “Sukad pa sa pagkahimong korporasyon niini sa 1884, ang Watch Tower Bible and Tract Society of Pennsylvania nagdulag importanteng papel sa atong modernong-adlawng kasaysayan. Bisan pa niana, kini maoy legal nga instrumento lamang nga magamit sa ‘matinumanon ug maalamong ulipon’ kon kini kinahanglanon.”

Sa ilang mga pakigpulong, si Brader Sydlik ug Jaracz nagpatin-aw nga ang kamatuoran nga ang “matinumanon ug maalamong ulipon” gipiyalan sa tanang yutan-ong kabtangan sa Ginoo wala magpugong sa ulipon nga matang sa pagtugot ug kuwalipikadong mga lalaki gikan sa “ubang mga karnero” aron atimanon ang pipila ka naandang administratibong mga responsibilidad. (Juan 10:16) Ni adunay bisan unsang Kasulatanhong rason nga kinahanglang ang tanan o bisan kinsa sa mga direktor sa legal nga mga korporasyon nga gigamit sa mga Saksi ni Jehova maoy dinihogang mga Kristohanon.

Giingnan ni Brader Barr ang mamiminaw nga di pa dugay ang pipila ka membro sa Nagamandong Lawas sa mga Saksi ni Jehova nga nag-alagad ingong mga direktor ug mga opisyales boluntaryong mikanaog gikan sa mga hunta direktiba sa tanang korporasyon nga gigamit sa “matinumanon ug maalamong ulipon” sa Tinipong Bansa. Ang kasaligang mga igsoong lalaki nga iya sa ubang mga karnero nga matang gipili isip mga kapuli.

Kining desisyona mapuslanon gayod. Nagtugot kini sa mga membro sa Nagamandong Lawas sa paggugol ug dugang panahon sa pag-andam ug espirituwal nga pagkaon ug sa pag-atiman sa espirituwal nga mga panginahanglan sa tibuok-kalibotang panag-igsoonay.

Sa pagtiklop, ang tsirman miingon sa iyang nalipayng mamiminaw: “Bisan tuod ang nagkalainlaing legal ug administratibong mga kaakohan giasayn ngadto sa eksperyensiyadong mga magtatan-aw, . . . silang tanan mag-alagad ubos sa espirituwal nga pagtultol sa Nagamandong Lawas. . . . Kitang tanan maampoong mosalig kang Jehova sa iyang panalangin sa atong hiniusang mga paningkamot sa pagbuhat sa iyang kabubut-on, sa kadungganan ug kahimayaan sa iyang dakong ngalan.”