Barog nga Bug-os nga May Hugot nga Pagtuo

“Usa ka Obra-Maestra sa Usa ka Proyekto”

SUKAD pa sa unang mga adlaw sa ilang modernong-adlaw nga kasaysayan, ang mga Saksi ni Jehova daan nang naikag pag-ayo sa usa sa mga tagna ni Jesu-Kristo: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.” (Mateo 24:14) Sa nagsingabot ang 1914—ang sinugdanan sa “kataposang mga adlaw”—uban ang hugot nga pagtuo ang masibotong mga Estudyante sa Bibliya nagbuhat sa wala-hitupngi nga tibuok-kalibotang kampanya sa edukasyon nga gipasukad sa Balaang Kasulatan.—2 Timoteo 3:1.

Aron makab-ot ang ilang tumong sa pagwali sa maayong balita sa tibuok yuta, kining mga alagad ni Jehova migamit ug usa ka metodo nga bag-o, maisogon, ug dayag. Aron mahibalog dugang bahin niini, atong balikan ang maong panahon.

Usa ka Bag-ong Paagi sa Pagpahayag sa Maayong Balita

Enero kadto sa tuig 1914. Handurawa nga naglingkod ka uban sa lain pang 5,000 ka tawo diha sa ngitngit nga awditoryum sa New York City. Sa imong atubangan anaa ang dakong telon sa pelikula. Usa ka tawong putig buhok nga nag-amerikanag taas mitungha diha sa telon. Nakatan-aw ka nag walay-tingog nga mga salida niadto, apan kining tawhana nagsulti, ug madungog mo ang iyang mga pulong. Nagtan-aw ka sa unang pagpasalida sa usa ka pelikula nga naggamit ug bag-ong teknik, ug ang mensahe talagsaon. Ang mamumulong mao si Charles Taze Russell, ang unang presidente sa Watch Tower Society, ug ang produksiyon mao ang “Photo-Drama of Creation.”

Nahunahunaan ni C. T. Russell ang potensiyal sa mga pelikula aron maabot ang kapid-ang mga tawo. Busa, sa 1912 gisugdan niya pag-andam ang “Photo-Drama of Creation.” Sa kataposan, kini nahimong produksiyon sa walo ka oras nga potograpikong eslayd ug pelikula, nga kompleto sa kolor ug tingog.

Kay gidisenyo nga ipasalida sa upat ka bahin, ang “Photo-Drama” nagpakita sa mga nanan-aw sa kahimtang gikan sa paglalang latas sa tawhanong kasaysayan hangtod sa tayuktok sa katuyoan ni Jehova nga Diyos alang sa yuta ug sa katawhan sa kataposan sa Milenyal nga Pagmando ni Kristo. Miagi una ang daghang tuig una pa gamita ang samang teknolohiya nga malamposon diha sa komersiyo. Apan, minilyon ang nakatan-aw sa “Photo-Drama of Creation” nga walay bayad!

Ang dekalidad nga mga rekording sa musika maingon man ang 96 ka plaka sa mga pakigpulong giandam alang sa “Photo-Drama.” Ang stereopticon nga mga eslayd gilangkoban sa naglungtad nga klasikal nga mga buhat sa arte nga nag-ilustrar sa kasaysayan sa kalibotan. Gikinahanglan usab ang paggamag ginatos ka bag-ong mga dibuho ug mga eskets. Ang ubang dekolor nga mga eslayd ug mga pelikula makutihong gikinamot pagdibuho. Ug kini sublisubling gihimo, kay, sa wala madugay, 20 ka reproduksiyon nga may upat ka bahin ang kada  usa ang giandam. Nagpaposible kadto sa pagpasalida sa usa ka bahin sa “Photo-Drama” diha sa 80 ka nagkalainlaing siyudad sa bisan unsang adlaw!

Sa Likod sa Telon

Unsay gikamulo sa likod sa telon panahon sa mga pagsalida sa “Photo-Drama”? “Ang Drama gisugdan nga nagpasalida kang Brader Russell,” matod sa Estudyante sa Bibliya nga si Alice Hoffman. “Sa dihang mopakita na siya sa telon ug ang iyang mga ngabil mosugod na sa pagkibot, patokaron dayon ang ponograpo . . . ug malingaw kami pagpaminaw sa iyang tingog.”

Nagtumong sa time-lapse (pagpapaspas sa lihok) nga pangletrato, si Zola Hoffman nahinumdom: “Naglingkod ako didto nga nagsiga ang mga mata sa kahibulong samtang gisud-ong namo ang paghulagway sa mga adlaw sa paglalang. Didtoy mga liryo nga inanayng namukhad sa among atubangan.”

Ang mahiligon sa musika nga si Karl F. Klein sa Nagamandong Lawas sa mga Saksi ni Jehova midugang: “Dungan sa pagpasalida niadtong mga pelikulaha, giduyogan kadto sa mananoy kaayong honi, sama sa nabantog pag-ayo nga Narcissus ug Humoreske.”

May lain pa usab nga halandomong mga kahimtang. “Usahay mahitabo ang kataw-anang mga sipyat,” nahinumdom si Clayton J. Woodworth, Jr. “Sa usa ka okasyon ang gipatokar nga plaka maoy ‘Flee as a Bird to Your Mountain,’ ug didto sa telon mitungha ang hulagway sa higanteng gigantosaurus, usa ka dako kaayong hayop sa wala pa ang Lunop”!

Gawas pa sa regular nga “Photo-Drama of Creation,” sa wala madugay dihay “Eureka Drama” nga mga salida. (Tan-awa ang kahon.) Ang usa gilangkoban sa narekord nga mga pakigpulong, ug mga rekording sa musika usab. Ang lain gilangkoban sa mga rekord ug mga eslayd. Bisan tuod ang “Eureka Drama” walay mga pelikula, kadto malamposon kaayo sa dihang gipasundayag sa menos ug populasyon nga mga dapit.

Usa ka Puwersadong Himan sa Pagsangyaw

Sa pagkatapos sa 1914, ang “Photo-Drama” napasalida na sa mga nanan-aw nga mokabat ug kapin sa 9,000,000 sa Amerika del Norte, Uropa, ug Australia. Bisan pag diyutay ra sila, ang mga Estudyante sa Bibliya may hugot nga pagtuo nga maoy gikinahanglan sa pagwali sa maayong balita ginamit kadtong bag-ong pamaagi. Malipayon silang miamot sa salapi nga gikinahanglan aron makaabang sa angayang mga dapit alang sa maong mga salida. Busa ang “Photo-Drama of Creation” dakog nahimo sa pagpasinati sa mga nanan-aw sa Pulong ug mga katuyoan sa Diyos.

Sa sulat nga gipadala ngadto kang C. T. Russell, usa ka tawo misulat: “Kadtong una nakong duaw sa imong Drama mao ang hinungdanong kausaban sa akong kinabuhi; o, ako angayng moingon, ang hinungdanong kausaban sa akong kahibalo sa Bibliya.” Matod sa laing indibiduwal: “Hapit na akong mahitumpawak sa mga lit-ag sa pagkawalay-pagtuo sa relihiyon ug gibati ko nga naluwas pinaagi sa ‘Photo-Drama of Creation’ nga gipasalida diri sa miaging ting-init. . . . Aduna na akoy kalinaw sa hunahuna nga dili ikahatag sa kalibotan diin ako dili usab mahimong bahin uban sa tanang bahandi niini.”

Si Demetrius Papageorge, dugay nang membro sa kawani sa hedkuwarter sa Sosyedad, mikomento: “Ang ‘Photo-Drama’ maoy usa ka obra-maestra sa usa ka proyekto, kon atong hunahunaon ang kadiyutay ra sa mga Estudyante sa Bibliya ug sa katumbas nga gamayng kantidad sa mabatonang salapi. Gipaluyohan gayod kadto sa espiritu ni Jehova!”

[Kahon/Mga hulagway sa panid 8, 9]

Ang “Eureka Drama”

Walo ka bulan human ang unang pagpasalida sa “Photo-Drama,” nakita sa Sosyedad ang panginahanglan nga itagana ang laing bersiyon niana nga gitawag ug “Eureka Drama.” Bisan tuod ang kompletong “Photo-Drama” padayong gipasalida diha sa dagkong mga siyudad, ang mga salida sa “Eureka” naghatag ug susamang paninugdang mensahe sa kabalangayan ug kabanikanhan. Usa ka bersiyon sa “Eureka Drama” gihubit nga naghatag ug “talagsaong kahigayonan sa mga sister” sa pagsangyaw. Ngano man? Kay ang kaha sa mga plaka mitimbang lamang ug 14 kilos. Siyempre, aron mapasalida, kinahanglan usab nga magdalag ponograpo.