Gihimo ba Nimo ang Kamatuoran nga Imo Na?

“Mag-usab kamo pinaagi sa pagbag-o sa inyong hunahuna, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.”—ROMA 12:2.

1, 2. Nganong dili sayon ang pagkahimong tinuod nga Kristohanon karon?

 DILI sayon ang pagkahimong tinuod nga Kristohanon niining kataposang mga adlaw—niining “makuyaw nga mga panahong lisod sagubangon.” (2 Timoteo 3:1) Sa pagkatinuod, aron masunod ang panig-ingnan ni Kristo, kinahanglang buntogon sa usa ang kalibotan. (1 Juan 5:4) Hinumdomi kon unsay giingon ni Jesus bahin sa Kristohanong dalan: “Sulod kamo agi sa sigpit nga ganghaan; tungod kay lapad ug luag ang dalan padulong ngadto sa kalaglagan, ug daghan ang mga nanagpanulod agi niini; samtang sigpit ang ganghaan ug hagip-ot ang dalan padulong ngadto sa kinabuhi, ug diyutay ra ang mga nakakaplag niini.” Miingon usab siya: “Kon si bisan kinsa buot mosunod kanako, padumilia siya sa iyang kaugalingon ug ipapas-an ang iyang estaka sa pagsakit sa adlaw-adlaw ug magpadayon pagsunod kanako.”—Mateo 7:13, 14; Lucas 9:23.

² Sanglit nakaplagan na ang sigpit nga dalan sa kinabuhi, ang sunod nga hagit sa usa ka Kristohanon mao ang pagpabilin diha niana. Nganong usa man kana ka hagit? Tungod kay ang atong pagpahinungod ug pagpabawtismo naghimo kanatong puntirya sa malipatlipatong mga kaugdahan o malansisong mga paagi ni Satanas. (Efeso 6:11; potnot) Timan-an niya ang atong mga kahuyangan ug maningkamot sa pagpahimulos niana sa panlimbasog nga daoton ang atong espirituwalidad. Kon buot hunahunaon, gipaningkamotan niya pagpahuyang si Jesus, busa may katarongan bang dili niya kita hilabtan?—Mateo 4:1-11.

Ang Malipatlipatong mga Taktika ni Satanas

3. Sa unsang paagi si Satanas nagtisok ug mga pagduhaduha diha sa hunahuna ni Eva?

³ Usa ka paagi nga gigamit ni Satanas mao ang pagtisok ug mga pagduhaduha diha sa atong hunahuna. Mangita siyag kahuyangan diha sa atong espirituwal nga armadora. Sa sinugdan pa lang, gigamit niya kanang maong taktika kang Eva, nga nangutana: ‘Tinuod ba nga miingon ang Diyos nga kinahanglang dili kamo mokaon gikan sa tanang kahoy sa tanaman?’ (Genesis 3:1) Sa laing pagkasulti, si Satanas nag-ingon, ‘Posible ba gayod nga did-an kamo sa Diyos? Ihikaw ba niya kaninyo ang usa ka butang nga maayo? Aw, nahibalo ang Diyos nga sa adlaw nga mokaon kamo gikan sa maong kahoy ang inyong mga mata mangabuka ug mahisama kamo sa Diyos, nga mahibalo kon unsay maayo ug daotan!’ Nagtisok si Satanas ug binhi sa pagduhaduha ug naghulat nga moturok kini.—Genesis 3:5.

4. Unsang mga pagduhaduha ang mahimong makaapektar sa pipila karon?

⁴ Sa unsang paagi gigamit ni Satanas kining maong taktika karon? Kon magpabaya kita sa atong pagbasa sa Bibliya, sa atong personal nga pagtuon, sa atong mga pag-ampo, ug sa atong Kristohanong ministeryo ug mga tigom, basin dali kitang madaog sa mga pagduhaduha nga gipatungha sa uban. Pananglitan: “Giunsa nato pagkahibalo nga mao kini ang kamatuoran nga gitudlo ni Jesus?” “Mao na ba gayod kini ang kataposang mga adlaw? Kon buot hunahunaon, ania na kita sa ika-21ng siglo.” “Ania na ba kita sa ganghaan sa Armagedon, o dugay pa ba kini?” Kon motungha ang maong mga pagduhaduha, unsay atong mahimo sa pagwagtang niana?

5, 6. Unsay angay natong buhaton kon motungha ang mga pagduhaduha?

⁵ Si Santiago naghatag ug praktikal nga tambag sa dihang siya misulat: “Kon aduna man kaninyoy nakulangan ug kaalam, magpadayon siya sa pagpangayo sa Diyos, kay siya nagahatag nga madagayaon ngadto sa tanan ug dili mamuyboy; ug kini igahatag kaniya. Apan magpadayon siya sa pagpangayo diha sa pagtuo, nga dili gayod magduhaduha, kay  siya nga nagduhaduha maoy sama sa balod sa dagat nga ginakusokuso ug ginapadpad sa hangin. Sa pagkatinuod, dili angay nga maghunahuna kanang tawhana nga siya adunay madawat gikan kang Jehova; siya usa ka tawong maduhaduhaon, mabalhinon sa tanan niyang mga dalan.”—Santiago 1:5-8.

⁶ Nan, unsay angay natong buhaton? Angay kitang ‘magpadayon sa pagpangayo sa Diyos’ pinaagi sa pag-ampo alang sa pagtuo ug pagsabot ug palig-onon ang atong mga paningkamot diha sa personal nga pagtuon bahin sa bisan unsang mga pangutana o mga pagduhaduha. Makapangayo usab kita ug tabang gikan niadtong lig-on ug pagtuo, nga dili gayod magduhaduha nga si Jehova mohatag kanato sa pagpaluyo nga atong gikinahanglan. Miingon usab si Santiago: “Magpasakop kamo sa Diyos; apan sukli ang Yawa, ug siya mokalagiw gikan kaninyo. Duol sa Diyos, ug siya moduol kaninyo.” Oo, ang atong mga pagduhaduha mahanaw sa dihang moduol kita sa Diyos pinaagi sa pagtuon ug pag-ampo.—Santiago 4:7, 8.

7, 8. Unsa ang pipila sa sukaranang mga sukdanan sa pagtino sa matang sa pagsimba nga gitudlo ni Jesus, ug kinsay nakakab-ot niini nga mga sukdanan?

⁷ Tagda, pananglitan, ang pangutana: Unsaon nato pagkahibalo nga atong ginatuman ang matang sa pagsimba nga gitudlo ni Jesus? Sa pagtubag niini, unsang sukdanan ang kinahanglang konsiderahon? Ang Bibliya nagpunting nga ang tinuod nga mga Kristohanon kinahanglang dunay tinuod nga gugma sa ilang taliwala. (Juan 13:34, 35) Kinahanglang balaanon nila ang ngalan sa Diyos, si Jehova. (Isaias 12:4, 5; Mateo 6:9) Ug kinahanglang ipaila nila ang maong ngalan.—Exodo 3:15; Juan 17:26.

⁸ Ang laing timailhan sa matuod nga pagsimba mao ang pagtahod sa Pulong sa Diyos, ang Bibliya. Kini mao ang talagsaong basahon nga nagpadayag sa personalidad sa Diyos ug sa iyang mga katuyoan. (Juan 17:17; 2 Timoteo 3:16, 17) Dugang pa, ang tinuod nga mga Kristohanon nagmantala sa Gingharian sa Diyos ingong bugtong paglaom sa tawo alang sa walay-kataposang kinabuhi sa paraisong yuta. (Marcos 13:10; Pinadayag 21:1-4) Sila nagpabiling bulag sa dunot nga politika niining kalibotana ug sa makahugaw nga paagi sa pagkinabuhi niini. (Juan 15:19; Santiago 1:27; 4:4) Kinsa karon ang tinuod nga nakakab-ot niining mga sukdanana? Ang mga kamatuoran nagpalig-on nga dunay usa lamang ka tubag—ang mga Saksi ni Jehova.

Komosta Kon Magpabilin ang mga Pagduhaduha?

9, 10. Unsay atong mahimo sa pagbuntog sa nagpabilin nga mga pagduhaduha?

⁹ Komosta kon madaog kita sa mga pagduhaduha? Nan unsay atong buhaton? Ang maalamong Haring Solomon nagtagana sa tubag: “Anak ko, kon dawaton mo ang akong mga pulong ug tipigan mo ang akong mga sugo diha kanimo, aron sa paghatag ug pagtagad sa kaalam pinaagi sa imong igdulungog, aron ikiling mo ang imong kasingkasing sa katakos sa pag-ila; dugang pa, kon ikaw magasangpit sa pagsabot ug ikaw magapatugbaw sa imong tingog alang sa katakos sa pag-ila, kon ikaw magapadayon sa pagpangita  niini ingon sa plata, ug ingon sa tinagong mga bahandi ikaw magapadayon sa pagpangita niini, nan imong masabtan ang pagkahadlok kang Jehova, ug imong makaplagan ang mismong kahibalo sa Diyos.”—Proverbio 2:1-5.

¹⁰ Dili ba katingalahan kanang maong ideya? Kon kita andam nga magpatalinghog pag-ayo sa kaalam sa Diyos, atong “makaplagan ang mismong kahibalo sa Diyos.” Oo, ang kahibalo sa Soberanong Ginoo sa uniberso dali ra natong mabatonan kon andam kitang modawat ug magpabili sa iyang mga pulong. Nagpasabot kana nga kita modangop kang Jehova diha sa pag-ampo ug pinaagi sa personal nga pagtuon. Ang tinagong mga bahandi sa iyang Pulong makawagtang sa bisan unsang mga pagduhaduha ug makatabang kanato sa pagkakita sa kahayag sa kamatuoran.

11. Sa unsang paagi ang sulugoon ni Eliseo naapektahan sa pagduhaduha?

¹¹ Usa ka tatawng pananglitan kon sa unsang paagi ang pag-ampo nakatabang sa mahinadlokon ug maduhaduhaon nga alagad sa Diyos makaplagan diha sa 2 Hari 6:11-18. Ang sulugoon ni Eliseo nakulangan sa espirituwal nga panabot. Wala siya makaagpas nga dihay langitnong mga panon nga motabang sa manalagna sa Diyos, kinsa gilibotan sa kasundalohan sa Sirya. Sa kahadlok ang sulugoon misinggit: ‘Pastilan agalon ko! Unsay atong buhaton?’ Unsay tubag ni Eliseo? ‘Ayaw kahadlok, kay sila nga ania uban kanato mas daghan pa kay sa nagauban kanila.’ Apan sa unsang paagi makombinsir ang sulugoon? Wala niya makita ang langitnong mga panon.

12. (a) Sa unsang paagi nawagtang ang mga pagduhaduha sa sulugoon? (b) Sa unsang paagi mawagtang nato ang atong mga pagduhaduha?

¹² ‘Si Eliseo nag-ampo ug miingon: “Oh Jehova, palihog, bukha ang iyang mga mata aron siya makakita.” Dihadiha gibuka ni Jehova ang mga mata sa sulugoon, mao nga siya nakakita; ug, tan-awa! ang bukid napuno sa mga kabayo ug sa mga karong iggugubat nga kalayo nga naglibot kang Eliseo.’ Nianang kahimtanga gipahinabo ni Jehova nga makita sa sulugoon ang langitnong kasundalohan nga nanalipod kang Eliseo. Apan, dili nato angayng dahomon ang susamang matang sa langitnong tabang karon. Hinumdomi, wala pa mabatoni sa maong sulugoon sa manalagna ang bug-os nga Bibliya nga matun-an aron palig-onon ang iyang pagtuo. Nabatonan na nato ang Bibliya. Kon kanunay natong gamiton kini, ang atong pagtuo mapalig-on usab. Pananglitan, mahimong palandongon nato ang ubay-ubayng asoy nga naghubit kang Jehova diha sa iyang langitnong sawang. Dili kini makapaduhaduha nga si Jehova adunay langitnong organisasyon nga nagpaluyo sa iyang mga alagad sa tibuok-kalibotang edukasyonal nga buluhaton karon.—Isaias 6:1-4; Ezequiel 1:4-28; Daniel 7:9, 10; Pinadayag 4:1-11; 14:6, 7.

 Pagbantay sa mga Kaugdahan sa Yawa!

13. Sa unsang mga paagi naningkamot si Satanas sa pagpahuyang sa atong paghawid sa kamatuoran?

¹³ Unsa ang pipila sa ubang mga paagi ni Satanas nga magpahuyang sa atong espirituwalidad ug sa atong paghawid sa kamatuoran? Ang usa niana mao ang imoralidad, sa tanang matang sa nagkadaiyang mga pagpasundayag niini. Diha sa nabuang-sa-sekso nga kalibotan karon, ang gitawag ug sekretong relasyon (usa ka kapuli nga pulong sa pagluib sa kaminyoon) o usa lamang ka higayong seksuwal nga relasyon (wala-sa-buot nga pakighilawas) nahimong adlaw-adlaw nga panghitabo alang sa mahigugmaog-kalingawan nga kaliwatan nga determinadong maglipaylipay bisag unsa pay dangatan. Ang mga salida sa sine, TV, ug mga video nagpasiugda niini nga estilo sa kinabuhi. Ang pornograpiya kaylap kaayo diha sa palaumagian sa balita, ilabina sa Internet. Ang tentasyon naghulat sa mga maukiton.—1 Tesalonica 4:3-5; Santiago 1:13-15.

14. Nganong ang pipila ka Kristohanon nabiktima sa mga kaugdahan ni Satanas?

¹⁴ Ang ubang mga Kristohanon nadaog sa ilang pagkamaukiton ug naghugaw sa ilang hunahuna ug kasingkasing pinaagi sa pagtan-aw sa dili tantong law-ay o bisan sa law-ay kaayo nga pornograpikong mga hulagway. Gitugotan nila ang ilang kaugalingon nga mahulog sa makapadaning bitik ni Satanas. Ang pagbuhat niana kasagarang mitultol sa espirituwal nga kadaot. Ang maong mga tawo wala makapabilin ingong ‘mga bata sa pagkadaotan.’ Wala sila mahimong ‘hingkod diha sa mga kagahom sa pagsabot.’ (1 Corinto 14:20) Kada tuig, libolibo ang nag-antos sa mga sangpotanan tungod kay wala nila sunda ang mga prinsipyo ug mga sukdanan sa Pulong sa Diyos. Wala nila isul-ob ug mentinaha ang ilang “kompletong armadura gikan sa Diyos.”—Efeso 6:10-13; Colosas 3:5-10; 1 Timoteo 1:18, 19.

Pabilhi ang Atong Nabatonan

15. Nganong ang uban malisdan tingali sa pagpabili sa ilang espirituwal nga panulondon?

¹⁵ “Kamo mahibalo sa kamatuoran, ug ang kamatuoran magpagawas kaninyo,” matod ni Jesus. (Juan 8:32) Kadaghanang Saksi kinahanglang mobiya sa ilang kanhing estilo sa kinabuhi ug relihiyosong mga panag-uban. Busa, sila basin mas andam mopabili sa kagawasan nga ipatungha sa kamatuoran. Sa laing bahin, ang ubang mga batan-on nga gimatuto sa mga ginikanan nga anaa sa kamatuoran malisdan tingali sa pagpabili sa ilang espirituwal nga panulondon. Sila wala gayod mahimong bahin sa bakak nga relihiyon o bahin niining kalibotana nga nagpasiugda sa pagpangitag kalipayan, pagkagiyan sa droga, ug imoralidad. Ingong sangpotanan, wala tingali sila makasabot sa dakong kalainan tali sa atong espirituwal nga paraiso ug sa dunot nga kalibotan ni Satanas. Ang uban madaog pa gani tingali sa tentasyon nga tilawan ang hilo sa kalibotan aron maeksperyensiyahan kon unsay ilang nasayloan!—1 Juan 2:15-17; Pinadayag 18:1-5.

16. (a) Unsang mga pangutana ang mahimo natong isukna sa atong kaugalingon? (b) Unsay gitudlo ug gidasig kanato nga buhaton?

¹⁶ Kinahanglan ba gayod nga pasoan nato ang atong mga tudlo aron masinati nato ang kasakit ug pag-antos? Dili ba kita makakat-on gikan sa dili maayong mga eksperyensiya sa uban? Kinahanglan bang moadto kita sa “lapok” niining kalibotana aron matino kon duna ba kitay nasayloan? (2 Pedro 2:20-22) Gipahinumdoman ni Pedro ang unang-siglong mga Kristohanon nga bahin kanhi sa kalibotan ni Satanas: “Igo na ang nangaging panahon sa inyong paghimo sa kabubut-on sa kanasoran sa nanagpadayon kamo diha sa mga buhat sa malaw-ayng panggawi, daotang mga pangibog, mga pagpatuyang sa bino, mga hudyaka, mga palabwanayg  inom, ug sa ginadili nga mga idolatriya.” Sa pagkatinuod, dili na kinahanglang sulayan pa nato ang “paglunang sa unodnong pagpatuyang” niining kalibotana aron matino kon unsa kini ka daotan. (1 Pedro 4:3, 4) Sa kasukwahi, kita gitudloan sa taas nga moral nga mga sukdanan ni Jehova diha sa atong mga Kingdom Hall, nga maoy mga sentro sa edukasyon bahin sa Bibliya. Ug kita gidasig sa paggamit sa atong gahom sa pagpangatarongan aron atong mapamatud-an sa atong kaugalingon nga atong nabatonan ang kamatuoran ug sa ingon maghimo sa kamatuoran nga ato na.—Josue 1:8; Roma 12:1, 2; 2 Timoteo 3:14-17.

Ang Atong Ngalan Dili Lamang Magpaila Kanato

17. Sa unsang paagi kita mahimong epektibong mga Saksi ni Jehova?

¹⁷ Kon himoon nato ang kamatuoran nga ato na, maningkamot kita sa pagpaambit niana sa uban sa matag angay nga okasyon. Wala kini magpasabot nga maningkamot kitang ipugos kana niadtong wala magpakita ug interes. (Mateo 7:6) Hinunoa, dili kita maulaw sa pagpaila sa atong kaugalingon ingong mga Saksi ni Jehova. Kon ang usa ka tawo magpakita ug diyutayng interes pinaagi sa pagpatungha ug sinserong pangutana o pinaagi sa pagdawat ug usa ka publikasyon sa Bibliya, andam kita sa pagpaambit sa atong paglaom. Siyempre, nagsugyot kini nga kita kanunayng magdala ug usa ka matang sa literatura bisan asa kita—sa balay, sa trabahoan, sa eskuylahan, sa tindahan, o sa mga dapit sa kalingawan.—1 Pedro 3:15.

18. Sa unsang paagi ang atong klaro nga pagpaila sa atong kaugalingon ingong mga Kristohanon dakog benepisyo sa atong kinabuhi?

¹⁸ Kon klaro natong ipaila ang atong kaugalingon ingong mga Kristohanon, atong gipalig-on ang atong depensa batok sa malipotong mga pag-atake ni Satanas. Kon dunay salosalo alang sa adlawng natawhan o sa Pasko o loteriya sa opisina, ang mga kauban sa trabaho kasagarang moingon, “Ayaw na siyag hilabti. Usa siya sa mga Saksi ni Jehova.” Sa mao gihapong katarongan, ang mga tawo tingali dili kaayo moestorya ug law-ay nga mga komedya kon kita kauban nila. Busa, ang atong pagpahibalo sa atong Kristohanong baroganan dakog benepisyo sa atong kinabuhi, sama sa gisulti ni apostol Pedro: “Sa pagkatinuod, kinsang tawhana ang magdaot kaninyo kon kamo magmasiboton sa kon unsay maayo? Apan bisan kon kamo mag-antos tungod sa pagkamatarong, kamo malipayon.”—1 Pedro 3:13, 14.

19. Giunsa nato pagkahibalo nga kita anaa na sa ulahing bahin sa kataposang mga adlaw?

¹⁹ Ang laing benepisyo sa paghimo sa kamatuoran nga ato na mao nga makombinsir kita nga kini mao na gayod ang kataposang mga adlaw niining sistemaha sa mga butang. Mahibalo kita nga daghan sa mga tagna sa Bibliya hapit nang matuman sa atong panahon. a Ang pasidaan ni Pablo nga “sa kataposang mga adlaw moabot ang makuyaw nga mga panahong lisod sagubangon” gipamatud-an gayod sa makalilisang nga mga hitabo sa miaging siglo. (2 Timoteo 3:1-5; Marcos 13:3-37) Ang usa ka di pa dugayng artikulo sa mantalaan mahitungod sa ika-20ng siglo nag-ulohang “Mahinumdoman Kini Ingong Panahon sa Barbarismo.” Ang artikulo nag-ingon: “Ang 1999 nahimong labing mamumuno nga tuig sa ikaduhang bahin sa labing mamumuno nga siglo.”

20. Karon na ang panahon sa unsang lihok?

²⁰ Dili na karon panahon sa pagpalingpaling. Ang panalangin ni Jehova dayag kaayo diha sa kinadak-ang edukasyonal nga buluhaton bahin sa Bibliya nga nahimo sukad masukad sa tibuok kalibotan ingong pagpamatuod ngadto sa mga nasod. (Mateo 24:14) Himoang imo na ang kamatuoran, ug ipaambit kana sa uban. Ang imong walay-kataposang umaabot nagdepende sa imong ginabuhat karon. Ang paglangaylangay dili takos sa panalangin ni Jehova. (Lucas 9:62) Hinunoa, panahon na kini nga “magmalig-on, dili-matarog, nga kanunayng puliki diha sa buluhaton sa Ginoo, nga nahibalo nga ang inyong paghago dili makawang may kalabotan sa Ginoo.”—1 Corinto 15:58.

[Footnote]

Nahinumdom Ka Ba?

• Sa unsang paagi mawagtang nato ang mga pagduhaduha?

• Unsay atong makat-onan gikan sa panig-ingnan sa sulugoon ni Eliseo?

• Batok sa unsang moral nga mga tentasyon nga kita angayng magbantay kanunay?

• Nganong klaro natong ipaila ang atong kaugalingon ingong mga Saksi ni Jehova?

[Mga Pangutana sa Pagtuon]

[Mga hulagway sa panid 10]

Ang regular nga pagtuon sa Bibliya ug pag-ampo makatabang kanato sa pagwagtang sa mga pagduhaduha

[Hulagway sa panid 11]

Nawagtang ang mga pagduhaduha sa sulugoon ni Eliseo pinaagi sa usa ka panan-awon

[Hulagway sa panid 12]

Kita gitudloan sa taas nga moral nga mga sukdanan ni Jehova diha sa mga Kingdom Hall sama niining tigomanan sa Benin