Mahimo Nimong Masagubang ang Pagkaluya!

USA ka maalamong tawo misulat kanhi: “Naluya ka ba sa adlaw sa kasakit? Ang imong kusog diyutay ra.” (Proverbio 24:10) Kon nasulayan na nimong maluya, ikaw lagmit mouyon nianang pahayaga.

Walay makalingkawas sa mga epekto sa pagkaluya. Ang kasarangang atake sa pagkaluya tingali dangtag usa o duha ka adlaw ug dayon mahanaw na. Apan kon nalangkit ang mga kahiubos o kalagot, ang problema hayan molungtad pa ug dugay. Ang pipila ka Kristohanon nga matinumanon sulod sa katuigan nawad-an gayod ug kadasig nga mihunong pa gani sila sa pagtambong sa mga tigom sa kongregasyon ug sa pagpakig-ambit sa ministeryo sa kanataran.

Kon ikaw mibatig kaluya, magmadasigon! Ang matinumanong mga alagad sa kanhing kapanahonan malamposong nakasagubang sa pagkaluya, ug sa tabang sa Diyos, ikaw makasagubang usab.

Sa Dihang ang Uban Nakapahiubos Kanimo

Dili ka makadahom nga mapanalipdan ka gikan sa wala hunahunaa nga pulong o lihok. Apan, ikaw makahimo sa pagdumili nga tugotan ang mga dili-kahingpitan sa uban nga mobalda sa imong pag-alagad kang Jehova. Kon dunay nakapahiubos kanimo, tingali makaplagan nimong makatabang ang pagkonsiderar kon sa unsang paagi giatubang ni Ana, nga inahan ni Samuel, ang makapaluyang kahimtang.

Si Ana nangandoy pag-ayo nga makabaton ug mga anak, apan siya apuli. Ang ikaduhang asawa sa iyang bana, si Penina, nakabaton na ug mga anak nga lalaki ug babaye. Inay magmasensitibo sa kahimtang ni Ana, si Penina naglantaw kaniya ingong usa ka kaindig ug nagpasundayag sa maong tinamdan ngadto kaniya nga tungod niana si Ana “mohilak ug dili mokaon.”—1 Samuel 1:2, 4-7.

Usa ka adlaw niana si Ana miadto sa tabernakulo aron mag-ampo. Si Eli, ang hataas nga saserdote sa Israel, nakamatikod nga nagkibotkibot ang iyang mga ngabil. Kay wala makaamgo nga si Ana nag-ampo, si Eli mihinapos nga lagmit hubog siya. “Hangtod kanus-a nga maghinubog ka?” siya misukna. “Kuhaa ang bino gikan kanimo.” (1 Samuel 1:12-14) Mahanduraw ba nimo kon unsa gayod kaha ang gibati ni Ana? Siya miadto sa tabernakulo aron madasig. Dayag nga wala siya magdahom nga masaypan siya pag-akusar sa usa sa labing impluwensiyado nga mga tawo sa Israel!

Kining kahimtanga mahimong makapaluya unta kang Ana. Mahimong mobiya dayon siya sa tabernakulo, nga manaad nga dili na gayod mobalik samtang si Eli mag-alagad pa didto ingong hataas nga saserdote. Hinunoa, dayag nga gipabilhan ni Ana ang iyang relasyon kang Jehova. Nahibalo siya nga dili mahimuot si Jehova kon iyang pilion ang maong dalan. Ang tabernakulo maoy sentro sa putling pagsimba. Gibutang ni Jehova ang iyang ngalan didto. Ug bisan pag siya dili-hingpit, si Eli ang gipiling hawas ni Jehova.

Ang maunongong tubag ni Ana sa akusasyon ni Eli nagtaganag usa ka maayong panig-ingnan alang kanato karong adlawa. Wala niya tugoti ang iyang kaugalingon nga masaypan pag-akusar, apan siya mitubag sa matinahuron kaayong paagi. “Dili, akong ginoo!” siya mitubag. “Usa ako ka babaye nga nagmasulub-on sa espiritu; ug wala ako makainom ug bino ug makahubog nga ilimnon, hinunoa akong gibubo ang akong kalag sa atubangan ni Jehova. Ayaw pag-isipa ang imong ulipong babaye nga usa ka babayeng walay-silbi, kay tungod sa kadaghan sa akong kabalaka ug kahasol nga ako nagsulti hangtod karon.”—1 Samuel 1:15, 16.

Napatin-aw ba ni Ana ang iyang buot ipasabot? Tino. Bisan pa niana, nakigsulti siya nga mataktikanhon kang Eli, nga wala mangahas sa pagsaway kaniya tungod sa iyang sayop nga akusasyon. Siya, sa baylo, malulotong mitubag kaniya,  nga nag-ingon: “Lakaw sa kalinaw, ug hinaot ang Diyos sa Israel maghatag kanimo sa imong gipangaliya kaniya.” Sa dihang ang maong butang nahusay na, si Ana “milakaw ug mikaon, ug ang iyang nawong wala na magmasulub-on.”—1 Samuel 1:17, 18.

Unsay atong makat-onan gikan niini nga asoy? Milihok dayon si Ana sa pagtul-id sa sayop nga pagsabot, apan gibuhat niya kana uban ang halalom nga pagtahod. Ingong resulta, iyang natipigan ang usa ka maayong relasyon uban kang Jehova ug kang Eli. Pagkasubsob gayod nga ang maayong komunikasyon ug diyutayng pagkamataktikanhon makapugong nga modako pa ang gagmayng mga problema!

Kinahanglang ilhon nato nga ang pagsulbad sa atong mga kasungian sa uban nagkinahanglan ug pagkamapainubsanon ug pagkamapasiboon sa duha ka bahin. Kon ang usa ka isigkamagtutuo dili mosanong sa imong mga paningkamot sa pagsulbad sa kasungian, tingali kinahanglang itugyan na lang nimo ang maong butang sa mga kamot ni Jehova, nga nagsalig nga iyang sulbaron kini sa iyang kaugalingong panahon ug iyang kaugalingong paagi.

Nawad-an Ka ba ug Pribilehiyo sa Pag-alagad?

Ang pipila naguol tungod kay kinahanglang luwatan ang gimahal nga pribilehiyo diha sa pag-alagad sa Diyos. Gikalipay nila nga mag-alagad sa ilang mga igsoon, ug sa dihang ang maong pribilehiyo mawala, bation nila nga dili na sila mapuslanon kang Jehova o sa iyang organisasyon. Kon mao kana ang imong gibati, ikaw tingali makabaton ug hait nga panabot pinaagi sa pagkonsiderar sa panig-ingnan sa magsusulat sa Bibliya nga si Marcos, nga gitawag usab ug Juan Marcos.—Buhat 12:12.

Mikuyog si Marcos kang Pablo ug Bernabe sa ilang unang misyonaryong panaw, apan sa tungatunga sa panaw, gibiyaan niya sila ug mibalik sa Jerusalem. (Buhat 13:13) Sa ulahi, buot ni Bernabe nga ikuyog nila si Marcos sa lain pang panaw. Apan, ang Bibliya nag-ingon: “Si Pablo naghunahuna nga dili angayng paubanon siya kanila, sanglit mibiya man siya kanila sa Pamfilia ug wala mokuyog kanila sa buluhaton.” Misupak si Bernabe. “Tungod niini,” nagpadayon ang asoy, “dihay nahitabong pagsilaob sa kasuko, mao nga [si Pablo ug Bernabe] nagbulag; ug giuban ni Bernabe si Marcos ug milawig paingon sa Cipro. Gipili ni Pablo si Silas ug migikan.”—Buhat 15:36-40.

Malagmit nga naguol pag-ayo si Marcos sa pagkahibalo nga ang tinahod nga apostol nga si Pablo dili buot makig-uban kaniya sa buluhaton ug nga ang panaglalis bahin sa iyang mga kuwalipikasyon mitultol sa panagbulag ni Pablo ug Bernabe. Apan wala pa matapos diha ang maong butang.

Si Pablo ug Silas nanginahanglan gihapon ug kauban sa biyahe. Sa pag-abot nila sa Listra, nakakaplag sila ug kapuli ni Marcos, usa ka batan-ong lalaki nga ginganlag Timoteo. Niining tungora si Timoteo bawtismado tingali sulod pa lamang sa duha o tulo ka tuig sa panahon nga siya gipili. Sa laing bahin, si Marcos nakig-uban na sa Kristohanong kongregasyon sukad sa pagkatukod niini—sa pagkamatuod, mas dugay pa kay kang Pablo mismo. Bisan pa niana, si Timoteo ang nakadawat sa pribilehiyadong asaynment.—Buhat 16:1-3.

Unsay reaksiyon ni Marcos sa dihang iyang nahibaloan nga gipulihan siya ug mas bata, menos ug kasinatian nga lalaki? Ang Bibliya walay gisulti. Hinunoa, gipakita niini nga si Marcos nagpabiling aktibo diha sa pag-alagad kang Jehova. Iyang gipahimuslan ang mga pribilehiyo nga mahimo niyang kab-oton. Bisan pag wala makaalagad kauban ni Pablo ug Silas, siya nakabiyahe kauban ni Bernabe sa Cipro, nga mao ang pinuy-anang teritoryo ni Bernabe. Nag-alagad usab si Marcos kauban ni Pedro sa Babilonya. Sa kataposan, nakahigayon siya sa pagbuhat duyog kang Pablo—ug Timoteo—sa Roma. (Colosas 1:1; 4:10; 1 Pedro 5:13) Sa ulahi si Marcos gidasig pa gani sa pagsulat sa usa sa upat ka Ebanghelyo!

Adunay hinungdanong pagtulon-an niining tanan. Si Marcos wala mabalaka pag-ayo bahin sa nawalang pribilehiyo nga wala na siya magpabili sa mga pribilehiyo nga mahimo pa niyang kab-oton. Nagpabiling puliki si Marcos sa pag-alagad kang Jehova, ug gipanalanginan siya ni Jehova.

Busa kon nawad-an ka ug pribilehiyo, ayawg kaluya. Kon mentinahon nimo ang positibong tinamdan ug magpabiling puliki, ang ubang mga pribilehiyo mahimong ihatag kanimo.  Adunay daghang buluhaton sa Ginoo.—1 Corinto 15:58.

Usa ka Matinumanong Alagad Naluya

Dili sayon nga kusganong makigbugno alang sa pagtuo. Usahay, ikaw tingali maluya. Dayon bation pa gani nimo tingali ang pagkasad-an tungod sa pagkaluya, nga mohinapos nga ang usa ka matinumanong alagad sa Diyos dili gayod angayng mobati niana. Hunahunaa si Elias, usa sa talagsaong mga propeta sa Israel.

Sa dihang si Rayna Jezebel sa Israel, usa ka panatikong tigpasiugda sa pagsimba kang Baal, nahibalo nga ang mga propeta ni Baal gipamatay ni Elias, siya nanumpa nga ipapatay si Elias. Nakaatubang na si Elias ug mga kaaway nga mas labaw pa kang Jezebel, apan sa kalit lang siya naluya pag-ayo nga buot na niyang mamatay. (1 Hari 19:1-4) Sa unsang paagi nahitabo kana? May nalimtan siya.

Nalimot si Elias sa pagdangop kang Jehova ingong Tuboran sa iyang kusog. Kinsay naghatag kang Elias sa gahom sa pagbanhaw sa patay ug sa pag-atubang sa mga propeta ni Baal? Si Jehova. Tino, si Jehova makahatag kaniya sa kusog sa pag-atubang sa kapungot ni Rayna Jezebel.—1 Hari 17:17-24; 18:21-40; 2 Corinto 4:7.

Si bisan kinsa mahimong temporaryong maluya sa iyang pagsalig kang Jehova. Sama kang Elias, ikaw tingali usahay moatubang sa usa ka suliran gikan sa tawhanong panglantaw inay gamiton ang “kaalam gikan sa itaas” sa pagsulbad niana. (Santiago 3:17) Bisan pa niana, wala isalikway ni Jehova si Elias tungod niining temporaryo nga gamayng kasaypanan.

Si Elias mikalagiw ngadto sa Beer-seba ug dayon ngadto sa kamingawan, diin iyang gihunahuna nga walay makakita kaniya. Apan nakita siya ni Jehova. Iyang gipadala ang usa ka manulonda sa paghupay kaniya. Giseguro sa manulonda nga makakaon si Elias ug bag-ong luto nga tinapay ug makainom ug bugnawng tubig. Human makapahulay si Elias, ang manulonda nagsugo kaniya sa pagbiyahe ug halos 300 kilometros paingon sa Bukid sa Horeb, diin siya dugang nga gipalig-on ni Jehova.—1 Hari 19:5-8.

Sa Bukid sa Horeb, si Elias nakasaksi sa usa ka makapalig-on-sa-pagtuo nga pasundayag sa gahom ni Jehova. Dayon, sa kalmado, hinayng tingog, si Jehova nagpasalig kaniya nga siya wala mag-inusara. Si Jehova nag-uban kaniya, ug kauban usab niya ang 7,000 ka igsoon niya, nga wala kini mahibaloi ni Elias. Sa kataposan, si Jehova may gipabuhat kaniya. Wala niya isalikway si Elias ingong iyang propeta!—1 Hari 19:11-18.

Mabatonan ang Tabang

Kon ikaw sa popanahon makaagom sa kasarangang atake sa pagkaluya, hayan imong makaplagan nga moarang-arang ang imong gibati kon dugangan nimo ang imong pahulay o mokaon ka ug sustansiyadong pagkaon. Si Nathan H. Knorr, kinsa nag-alagad ingong membro sa Nagamandong Lawas sa mga Saksi ni Jehova hangtod sa iyang kamatayon sa 1977, kas-a miingon nga ang dagkong mga problema sagad mopatim-aw nga mas gamay ra diay human sa igong pagkatulog sa gabii. Apan, kon ang problema magpadayon gayod, ang maong sulbad tingali dili pa igo—nagkinahanglan ka ug tabang sa pagpakigbugno sa kaluya.

Gipadala ni Jehova ang usa ka manulonda aron palig-onon si Elias. Karon, ang Diyos nagtaganag pagdasig pinaagi sa mga ansiyano ug ubang hamtong nga mga Kristohanon. Ang mga ansiyano sa pagkatinuod mahimong “sama sa usa ka tagoanang dapit gikan sa hangin.” (Isaias 32:1, 2) Apan aron makadawat ug pagdasig gikan kanila, gikinahanglan tingali nga ikaw ang unang mohimog lakang. Bisan pag naluya si Elias, siya mibiyahe paingon sa Bukid sa Horeb aron dawaton ang instruksiyon gikan kang Jehova. Atong madawat ang makapalig-ong instruksiyon pinaagi sa Kristohanong kongregasyon.

Kon atong dawaton ang tabang ug maisogong atubangon ang mga pagsulay, sama sa mga kahiubos o pagkawala sa mga pribilehiyo, atong gituboy ang usa ka hinungdanong isyu dapig kang Jehova. Unsang isyuha? Nangangkon si Satanas nga ang mga tawo moalagad lamang kang Jehova tungod sa kaugalingong kaayohan. Wala ipanghimakak ni Satanas nga moalagad kita sa Diyos kon ang tanang bahin sa atong kinabuhi maayo ug dagan, apan nangangkon siya nga kita mohunong sa pag-alagad sa Diyos kon kita makaagom sa mga suliran. (Job, kapitulo 1 ug 2) Pinaagi sa lig-ong pagbarog dapig kang Jehova bisan pa sa pagkaluya, makatabang kita sa pagtubag sa mabutangbutangong akusasyon sa Yawa.—Proverbio 27:11.

 Si Ana, Marcos, ug Elias ngatanan dihay mga suliran nga sa makadiyot naghikaw kanila sa ilang kalipay. Apan, ilang nasagubang ang ilang mga problema ug nagmabungahon sa ilang kinabuhi. Sa tabang ni Jehova, ikaw usab makasagubang sa pagkaluya!