Ang Pagpakigbugno Batok sa Kakabos—Usa ba ka Gubat nga Kapildihon?

ANG mga turista nga nagaduaw sa Hiniusang Kanasoran sa New York City nakakita sa Economic and Social Council Chamber, nga dunay nadayag nga mga tubo diha sa kisame ibabaw sa publikong galeriya. Ang giya sa tour misaysay: “Ang ‘wala pa mahuman’ nga kisame sagad nga gilantaw ingong usa ka simbolikong pahinumdom nga ang ekonomikanhon ug katilingbanon nga buluhaton sa Hiniusang Kanasoran dili gayod mahuman; kanunayng adunay daghang puwede pang buhaton aron mapauswag ang mga kahimtang sa pagkinabuhi sa mga tawo sa kalibotan.”

Bisan kon ang Council komitido sa hinungdanong kawsa sa pagdasig ug mas taas nga sukdanan sa pagkinabuhi alang sa tanan, ang buluhaton daw walay kataposan. Makaiikag, sa panahon sa ministeryo ni Jesu-Kristo sa yuta sa unang siglo K.P., siya miingon: “Ang espiritu ni Jehova ania kanako, tungod kay siya nagdihog kanako aron sa pagpahayag sa maayong balita ngadto sa mga kabos.” (Lucas 4:18) Unsa man ang “maayong balita” nga iyang gimantala? Kadto mao ang mensahe mahitungod sa Gingharian nga tukoron ni Jehova nga Diyos, kinsa nahimong “usa ka salipdanan sa kabos diha sa . . . kasakit,” uban ni Jesu-Kristo ingong Hari. Unsay palamposon sa maong Gingharian? Si Isaias mitagna: “Si Jehova sa mga panon maghikay gayod alang sa tanang katawhan . . . ug usa ka bangkete sa mantikaon kaayo nga pagkaon, usa ka bangkete sa bino nga pinalugdang, sa mantikaon kaayo nga pagkaon nga puno sa utok sa bukog, sa bino nga pinalugdang, sinala. Iyang lamyon gayod ang kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nawong.”—Isaias 25:4-6, 8.

Buot ka bang masayod ug dugang kon sa unsang paagi “mapauswag [sa Gingharian sa Diyos] ang mga kahimtang sa pagkinabuhi sa mga tawo sa kalibotan,” aron wala nay kawalad-on? Tan-awa sa ubos aron imong mahibaloan kon sa unsang paagi ikaw maduaw sa usa ka kuwalipikadong magtutudlo aron ipakita kanimo ang dugang pa bahin sa giingon sa Bibliya sa maong mga butang.