Haduol na ang Adlaw ni Jehova sa Paghukom!
Haduol na ang Adlaw ni Jehova sa Paghukom!
“Ang dakong adlaw ni Jehova haduol na. Kini haduol na, ug kini nagadali sa hilabihan.”—SOFONIAS 1:14.
1. Unsang pasidaan ang gihatag sa Diyos pinaagi kang Sofonias?
SI Jehova nga Diyos hapit nang molihok batok sa daotan. Pamati! Kini ang iyang pasidaan: “Tibawason ko ang yutan-ong tawo . . . Putlon ko ang katawhan gikan sa nawong sa yuta.” (Sofonias 1:3) Kining mga pulonga sa Soberanong Ginoong Jehova gisulti pinaagi sa iyang manalagnang Sofonias, tingali ang apo sa sungkod sa matinumanong Haring Ezequias. Kana nga pahayag, nga gideklarar sa panahon sa buotang Haring Josias, dili maayog timailhan alang sa mga daotan nga nagpuyo sa yuta sa Juda.
2. Nganong ang mga buhat ni Josias wala makasanta sa adlaw ni Jehova sa paghukom?
2 Ang pagpanagna ni Sofonias sa walay duhaduha nagpaamgo gayod sa batan-ong Josias nga kinahanglang hinloan ang Juda sa mahugaw nga pagsimba. Apan ang mga lihok sa hari sa paghinlo sa yuta sa bakak nga relihiyon wala makapapha sa tanang pagkadaotan gikan sa katawhan o makatabon sa mga sala sa iyang apohan, si Haring Manases, kinsa “nagpuno sa Jerusalem sa inosenteng dugo.” (2 Hari 24:3, 4; 2 Cronicas 34:3) Mao nga ang adlaw ni Jehova sa paghukom seguradong moabot.
3. Sa unsang paagi makatino kita nga dunay posibilidad nga maluwas sa “adlaw sa kasuko ni Jehova”?
3 Bisan pa, may mga maluwas nianang makapukaw ug kahadlok nga adlaw. Busa, ang manalagna sa Diyos miawhag: “Sa dili pa ang lagda magpatunghag bisan unsa, sa dili pa molabay ang adlaw sama sa tahop, sa dili pa modangat kaninyo ang nagasilaob nga kasuko ni Jehova, sa dili pa modangat kaninyo ang adlaw sa kasuko ni Jehova, pangitaa ninyo si Jehova, kamong tanang maaghop sa yuta, nga nagbuhat sa Iyang hudisyal nga hukom. Pangitaa ang pagkamatarong, pangitaa ang pagkamaaghop. Tingali kamo pagatagoan sa adlaw sa kasuko ni Jehova.” (Sofonias 2:2, 3) Samtang maghunahuna sa paglaom nga maluwas sa adlaw ni Jehova sa paghukom, atong hisgotan ang basahon sa Sofonias diha sa Bibliya. Gisulat didto sa Juda sa wala pa ang 648 W.K.P., kini maoy bahin sa “matagnaong pulong” sa Diyos, diin angayng patalinghogan natong tanan sa kinasingkasing.—2 Pedro 1:19.
Gituy-od ang Kamot ni Jehova
4, 5. Sa unsang paagi ang Sofonias 1:1-3 natuman diha sa mga daotan sa Juda?
4 “Ang pulong ni Jehova” ngadto kang Sofonias gisugdan ug pasidaan nga gihisgotan sa sinugdanan. Ang Diyos miingon: “‘Tibawason ko gayod ang tanang butang gikan sa nawong sa yuta,’ mao ang giingon ni Jehova. ‘Tibawason ko ang yutan-ong tawo ug ang hayop. Tibawason ko ang naglupad nga linalang sa kalangitan ug ang mga isda sa dagat, ug ang mga kapandolan sa mga daotan; ug putlon ko ang katawhan gikan sa nawong sa yuta,’ mao ang giingon ni Jehova.”—Sofonias 1:1-3.
5 Oo, gitapos ni Jehova ang dayag kaayong pagkadaotan sa yuta sa Juda. Kinsay gigamit sa Diyos sa ‘pagtibawas sa tanang butang gikan sa nawong sa yuta’? Sanglit si Sofonias tingali nanagna na panahon sa unang bahin sa pagmando ni Haring Josias nga nagsugod sa 659 W.K.P., kining matagnaong mga pulong natuman sa dihang gilumpag ang Juda ug ang iyang kaulohang siyudad, ang Jerusalem, sa mga kamot sa Babilonyanhon sa 607 W.K.P. Niadtong panahona, dihay nahitabong ‘pagtibawas’ sa mga daotan sa Juda.
6-8. Unsay gitagna sa Sofonias 1:4-6, ug sa unsang paagi kanang tagnaa natuman sa karaang Juda?
6 Nagtagna bahin sa mga buhat sa Diyos batok sa bakak nga mga magsisimba, ang Sofonias 1:4-6 nag-ingon: “Pagatuy-oron ko ang akong kamot batok sa Juda ug batok sa tanang molupyo sa Jerusalem, ug putlon ko gikan niining dapita ang mga nahibilin sa Baal, ang ngalan sa mga saserdote sa langyaw nga diyos uban sa mga saserdote, ug kadtong mga nagyukbo sa panon sa kalangitan diha sa mga atop, ug kadtong mga nagyukbo, nga naghimog mga panumpa kang Jehova ug naghimog mga panumpa sa ngalan ni Malcam; ug kadtong mga mibiya sa pagsunod kang Jehova ug wala mangita kang Jehova ug wala magpakisayod kaniya.”
7 Ang kamot ni Jehova gituy-od batok sa katawhan sa Juda ug Jerusalem. Nakahukom na siya sa pagputol pinaagi sa pagpatay sa mga magsisimba sa Canaanhong diyos sa pertilidad nga si Baal. Ang nagkalainlaing lokal nga mga diyos gitawag ug mga Baal tungod kay ang ilang mga magsisimba nagtuo nga sila adunay gahom sa partikular nga mga lugar. Pananglitan, dihay Baal nga gisimba sa mga Moabihanon ug Midianhon diha sa Bukid sa Peor. (Numeros 25:1, 3, 6) Sa tibuok Juda, giputol ni Jehova ang mga saserdote ni Baal, maingon man ang dili-matinumanong mga saserdoteng Levihanon nga naglapas sa kasugoan sa Diyos pinaagi sa pagpakig-uban kanila.—Exodo 20:2, 3.
8 Giputol usab sa Diyos ang mga ‘nagyukbo sa panon sa kalangitan,’ tataw kadtong nagbatasan sa astrolohiya ug nagsimba sa adlaw. (2 Hari 23:11; Jeremias 19:13; 32:29) Ang mabangis nga kasuko sa Diyos gibuhian usab diha niadtong misulay sa pagsagol sa matuod nga pagsimba uban sa bakak nga relihiyon pinaagi sa ‘paghimog mga panumpa kang Jehova ug ni Malcam.’ Si Malcam tingali maoy laing ngalan ni Molek, ang pangunang diyos sa mga Ammonhanon. Ang mga bata gihalad diha sa pagsimba kang Molek.—1 Hari 11:5; Jeremias 32:35.
Haduol na ang Kataposan sa Kakristiyanohan!
9. (a) Sa unsa sad-an ang Kakristiyanohan? (b) Dili sama sa mga dili-matinumanon sa Juda, unsay angay natong ihukom nga himoon?
9 Kining tanan tingali nagpahinumdom kanato sa Kakristiyanohan, nga puno sa bakak nga pagsimba ug astrolohiya. Ug ang iyang papel sa paghalad ug minilyong kinabuhi diha sa halaran sa gubat nga gipaluyohan sa klero dulumtanan gayod! Dili gayod kita mosundog sa mga dili-matinumanon sa Juda, kinsa ‘misibog sa pagsunod kang Jehova,’ nga wala na magpakabana ug wala na mangita kaniya o mangita sa iyang pagtultol. Hinunoa, magpabilin kitang maunongon ngadto sa Diyos.
10. Unsaon nimo pagpatin-aw ang matagnaong kahulogan sa Sofonias 1:7?
10 Ang sunod nga mga pulong sa manalagna mohaom sa mga malapason sa Juda ug sa mga daotan sa atong panahon. Nag-ingon ang Sofonias 1:7: “Paghilom kamo sa atubangan sa Soberanong Ginoong Jehova; kay ang adlaw ni Jehova haduol na, kay si Jehova nag-andam ug usa ka halad; iyang gibalaan ang iyang mga dinapit.” Kini nga “mga dinapit” dayag mao ang Caldeanhong mga kaaway sa Juda. Ang “halad” mao ang Juda mismo, apil ang iyang kaulohang siyudad. Busa gipahayag ni Sofonias ang katuyoan sa Diyos sa paglaglag sa Jerusalem, ug kining tagnaa nagpunting usab sa kalaglagan sa Kakristiyanohan. Sa pagkatinuod, kay ang adlaw sa Diyos sa paghukom haduol na kaayo karon, ang tibuok kalibotan angay nga ‘maghilom sa atubangan sa Soberanong Ginoong Jehova’ ug magpatalinghog sa iyang isulti pinaagi sa “gamayng panon” sa dinihogang mga sumusunod ni Jesus ug sa ilang mga kauban, ang iyang “ubang mga karnero.” (Lucas 12:32; Juan 10:16) Ang kalaglagan naghulat sa tanang dili mamati ug sa ingon nagpinig sa ilang kaugalingon nga batok sa pagmando sa Gingharian sa Diyos.—Salmo 2:1, 2.
Sa Dili Madugay—Usa ka Adlaw sa Pagtiyabaw!
11. Unsay diwa sa Sofonias 1:8-11?
11 Mahitungod sa adlaw ni Jehova, ang Sofonias 1:8-11 nagdugang: “‘Ug mahitabo gayod sa adlaw sa paghalad alang kang Jehova nga akong pagatagdon ang mga prinsipe, ug ang mga anak nga lalaki sa hari, ug ang tanan nga nagasul-ob ug besti sa langyaw. Ug akong pagatagdon ang tagsatagsa nga nagasaka sa plataporma nianang adlawa, silang nagapuno sa balay sa ilang mga agalon sa kapintasan ug sa panglimbong. Ug nianang adlawa,’ mao ang giingon ni Jehova, ‘adunay tingog sa pagtuaw gikan sa Ganghaan sa Isda, ug usa ka pagtiyabaw gikan sa ikaduhang seksiyon sa siyudad, ug usa ka dakong paghagsa gikan sa kabungtoran. Tiyabaw, kamong mga molupyo sa Maktes, kay ang tanang tawo nga magpapatigayon gipahilom; ang tanan nga nagtimbang ug plata gilaglag.’”
12. Sa unsang paagi nga ang uban nakaplagan nga “nagasul-ob ug besti sa langyaw”?
12 Si Haring Josias gisundan ni Jehoahas, Jehoiakim, ug Jehoiachin. Dayon miabot ang pagmando ni Zedekias, nga gitiman-an sa pagkalaglag sa Jerusalem. Bisag nag-atubang sila ug ingon niana nga katalagman, ang uban tingali kay nagtinguha nga paboran sa sikbit nga mga nasod “nagasul-ob ug besti sa langyaw.” Sa susama, gipakita sa daghan karon ang nagkalainlaing mga paagi nga sila dili bahin sa organisasyon ni Jehova. Ingong dayag nga bahin sa organisasyon ni Satanas, sila pagasilotan.
13. Nahiuyon sa tagna ni Sofonias, unsay nahitabo sa dihang giatake sa mga Babilonyanhon ang Jerusalem?
13 ‘Kanang adlaw’ sa panudya sa Juda katumbas sa adlaw sa pagpahamtang ni Jehova sa silot diha sa iyang mga kaaway, sa pagtapos sa pagkadaotan, ug sa pagpamatuod sa iyang pagkagamhanan. Sa dihang giatake sa mga Babilonyanhon ang Jerusalem, dihay pagtiyabaw gikan sa Ganghaan sa Isda. Seguro gitawag kini niini tungod kay duol kini sa tiyanggihan sa isda. (Nehemias 13:16) Ang mga sundalo sa Babilonya misulod sa dapit nga gitawag ug ikaduhang seksiyon, ug ang “paghagsa gikan sa kabungtoran” tingali nagtumong sa tingog sa nagsingabot nga mga Caldeanhon. Dihay “usa ka pagtiyabaw” sa mga molupyo sa Maktes, tingali sa ibabawng bahin sa Walog sa Tyropoeon. Nganong mitiyabaw man sila? Tungod kay ang kalihokan sa komersiyo, apil niadtong “nagtimbang ug plata,” mihunong na didto.
14. Unsa ka bug-os ang pagsusi sa Diyos sa iyang nag-angkong mga magsisimba?
14 Unsa ka bug-os ang pagsusi ni Jehova sa iyang nag-angkong mga magsisimba? Ang tagna nagpadayon: “Ug mahitabo gayod nianang panahona nga akong susihon pag-ayo ang Jerusalem pinaagig mga lampara, ug akong pagatagdon ang mga lalaki nga samag milugdang diha sa ilang linugdang sa bino ug nga nag-ingon diha sa ilang kasingkasing, ‘Si Jehova dili magbuhat ug maayo, ug siya dili magbuhat ug daotan.’ Ug ang ilang bahandi pagailogon ug ang ilang mga balay pagalumpagon. Ug sila magatukod ug mga balay, apan dili nila pagapuy-an; ug sila magatanom ug mga parasan, apan sila dili magainom sa bino niana.”—Sofonias 1:12, 13.
15. (a) Unsay nahitabo sa apostatang mga saserdote sa Jerusalem? (b) Unsay nagpaabot alang niadtong mga nagasunod sa bakak nga relihiyon karong panahona?
15 Gisagolan sa apostatang mga saserdote sa Jerusalem ang pagsimba ni Jehova ug bakak nga relihiyon. Bisan tuod mibati sila nga may kasegurohan, gipangita sila sa Diyos nga samag nagdalag hayag nga mga lampara nga ang kahayag molusot diha sa espirituwal nga kangitngit nga diha niana sila midangop. Walay nakaikyas sa proklamasyon ug pagpahamtang sa Diyos sa paghukom. Kadtong wala magpakabana nga mga apostata milugdang samag mga linugdang ilalom sa sudlanan sa bino. Dili sila gustong magpabalda sa bisan unsang pahibalo sa pagsalga sa Diyos diha sa tawhanong mga kahikayan, apan wala sila makaikyas sa pagpahamtang sa Diyos sa paghukom batok kanila. Walay kaikyasan usab alang niadtong mga nagasunod sa bakak nga relihiyon karong panahona, apil ang mga sakop sa Kakristiyanohan ug kadtong nahimong apostata sa pagsimba ni Jehova. Kay wala magdawat nga “kataposang mga adlaw” na kining panahona, sila nag-ingon sa ilang kasingkasing, “Si Jehova dili magbuhat ug maayo, ug siya dili magbuhat ug daotan.” Pagkasayop nila!—2 Timoteo 3:1-5; 2 Pedro 3:3, 4, 10.
16. Unsay nahitabo sa dihang gipahamtang sa Diyos ang paghukom diha sa Juda, ug sa unsang paagi ang pagkahibalo niana makaapektar kanato?
16 Ang mga apostata sa Juda gipasidan-an nga ang mga Babilonyanhon maglungkab sa ilang bahandi, magagun-ob sa ilang kabalayan, ug magkuha sa bunga sa ilang mga paras. Ang materyal nga mga butang wala nay bili sa dihang gipahamtang sa Diyos ang paghukom diha sa Juda. Ingon usab niana ang mahitabo sa dihang ang adlaw ni Jehova sa paghukom modangat sa presenteng sistema sa mga butang. Busa, hinaot nga magbaton kita ug espirituwal nga panglantaw ug ‘magtigom ug mga bahandi sa langit’ pinaagi sa pag-una sa pag-alagad kang Jehova diha sa atong mga kinabuhi!—Mateo 6:19-21, 33.
“Ang Dakong Adlaw ni Jehova Haduol Na”
17. Sumala sa Sofonias 1:14-16, unsa na ka duol ang adlaw ni Jehova sa paghukom?
17 Unsa na ka duol ang adlaw ni Jehova sa paghukom? Sumala sa Sofonias 1:14-16, ang Diyos naghatag niini nga pasalig: “Ang dakong adlaw ni Jehova haduol na. Kini haduol na, ug kini nagadali sa hilabihan. Ang tingog sa adlaw ni Jehova mapait. Didto ang tawong gamhanan mosiyagit. Kanang adlawa maoy usa ka adlaw sa mabangis nga kasuko, usa ka adlaw sa kasakitan ug kagul-anan, usa ka adlaw sa bagyo ug sa kagun-oban, usa ka adlaw sa kangitngit ug kangiob, usa ka adlaw sa panganod ug sa mabagang kangiob, usa ka adlaw sa pagbudyong ug sa pagpasidaan sa gubat, batok sa mga kinutaang siyudad ug batok sa hatag-as nga mga torre sa eskina.”
18. Nganong dili kita angay moingon nga ang adlaw ni Jehova sa paghukom dugay pa kaayong moabot?
18 Ang makasasalang mga saserdote, mga prinsipe, ug katawhan sa Juda gipasidan-an nga ‘haduol na ang dakong adlaw ni Jehova.’ Alang sa Juda ‘nagadali sa hilabihan ang adlaw ni Jehova.’ Susama sa atong panahon, angay nga walay maghunahuna nga ang pagpahamtang ni Jehova sa paghukom sa mga daotan dugay pa kaayong moabot. Hinunoa, sama nga milihok ang Diyos sa madali sa Juda, sa ingon siya ‘magadali’ sa iyang adlaw sa pagpahamtang sa silot. (Pinadayag 16:14, 16) Pagkapait nga panahon unya kana alang sa tanan nga dili mamati sa mga pasidaan ni Jehova nga gihatag pinaagi sa iyang mga Saksi ug dili modawat sa matuod nga pagsimba!
19, 20. (a) Unsa ang pipila ka bahin sa pagpahamtang sa mabangis nga kasuko sa Diyos diha sa Juda ug Jerusalem? (b) Tungod kay kining sistemaha sa mga butang nagaatubang man ug pinili nga pagpanglaglag, unsang mga pangutana ang gipatungha?
19 Ang pagpahamtang sa mabangis nga kasuko sa Diyos diha sa Juda ug Jerusalem maoy “usa ka adlaw sa kasakitan ug kagul-anan.” Gipaagom sa mga manunulong nga Babilonyanhon ang mga molupyo sa Juda ug daghang pag-antos, lakip ang kasakit sa hunahuna atubangan sa kamatayon ug kalaglagan. Kadtong “adlaw sa bagyo ug sa kagun-oban” maoy usa ka adlaw sa kangitngit, sa mga panganod, ug mabagang kangiob, tingali dili lamang sa mahulagwayon kondili sa literal usab, tungod kay ang aso ug patayng mga lawas makita bisan diin. Kadto maoy “usa ka adlaw sa pagbudyong ug sa pagpasidaan sa gubat,” apan kawang lamang ang gipalanog nga mga pasidaan.
20 Ang mga tigbantay sa Jerusalem walay mahimo sa dihang gilumpag sa mga hinagiban sa gubat sa mga Babilonyanhon ang “hatag-as nga mga torre sa eskina.” Ang mga kuta sa presenteng daotang sistema sa mga butang sama usab nga dili magsilbi batok sa hinagiban diha sa tipiganan sa langitnong hinagiban sa Diyos, nga andam alang sa iyang sayo nga paggamit diha sa pinili nga pagpanglaglag. Naglaom ka ba nga maluwas? Nakadesisyon ka na ba sa pagbarog nga malig-on diha sa kiliran ni Jehova, kinsa ‘nagabantay sa tanang nahigugma kaniya apan magalaglag sa tanang daotan’?—Salmo 145:20.
21, 22. Sa unsang paagi ang Sofonias 1:17, 18 matuman sa atong adlaw?
21 Pagkamakalilisang nga adlaw sa paghukom ang gitagna sa Sofonias 1:17, 18! “Ako magpahinabog kasakit sa mga tawo,” nagaingon si Jehova nga Diyos, “ug sila magalakaw gayod sama sa mga tawong buta; tungod kay sila nakasala kang Jehova. Ug ang ilang dugo igabubo sama sa abog, ug ang ilang mga tinai sama sa kinalibang. Ang ilang salapi o ang ilang bulawan dili makaluwas kanila sa adlaw sa mabangis nga kasuko ni Jehova; apan pinaagi sa kalayo sa iyang kasibot ang tibuok yuta pagalamyon, tungod kay iyang pagapuohon, sa makalilisang gayod, ang tanang molupyo sa yuta.”
22 Sama sa iyang gihimo sa panahon ni Sofonias, sa dili madugay ipahinabo ni Jehova ang kasakit diha sa “tanang molupyo sa yuta,” ngadto niadtong dili mamati sa iyang pasidaan. Tungod kay nakasala sila sa Diyos, sila maglakawlakaw nga walay mahimo sama sa mga tawong buta, nga dili makakita ug kaluwasan. Sa adlaw ni Jehova sa paghukom, ang ilang dugo “igabubo sama sa abog,” ingong usa ka butang nga walay pulos. Makauulaw gayod unya ang ilang kamatayon, kay isabulak sa Diyos diha sa yuta ang mga lawas—bisan ang mga ginhawaan—niining mga daotan nga “sama sa kinalibang.”
23. Bisan tuod ang mga mamumuhat ug daotan dili makaikyas “sa adlaw sa mabangis nga kasuko ni Jehova,” unsang paglaom ang gipakita diha sa tagna ni Sofonias?
23 Walay makaluwas niadtong kinsa makig-away sa Diyos ug sa iyang katawhan. Ang salapi ug ang bulawan wala makaluwas sa mga mamumuhat ug daotan sa Juda, sa samang paagi ang natigom nga bahandi ug mga hiphip dili makahatag ug panalipod o kaikyasan “sa adlaw sa mabangis nga kasuko ni Jehova” diha sa Kakristiyanohan ug sa nahibilin niining sistema sa mga butang. Nianang adlaw unya sa paghukom, “ang tibuok yuta pagalamyon” sa kalayo sa kasibot sa Diyos samtang iyang laglagon ang daotan. Sanglit may pagtuo man kita sa matagnaong pulong sa Diyos, kita kombinsido nga kita ania na karon sa ulahing bahin sa “panahon sa kataposan.” (Daniel 12:4) Haduol na ang adlaw ni Jehova sa paghukom, ug sa dili madugay iyang ipahamtang ang panimalos diha sa iyang mga kaaway. Bisan pa niana, ang tagna ni Sofonias nagpakita nga dunay paglaom nga maluwas. Nan, unsay gikinahanglan diha kanato aron pagatagoan kita sa adlaw sa kasuko ni Jehova?
Unsaon Nimo Pagtubag?
• Sa unsang paagi ang tagna ni Sofonias natuman diha sa Juda ug sa Jerusalem?
• Unsay naghulat alang sa Kakristiyanohan ug sa tanang daotan sa atong adlaw?
• Nganong dili kita angay maghunahuna nga ang adlaw ni Jehova sa paghukom dugay pa kaayong moabot?
[Mga Pangutana sa Pagtuon]
[Hulagway sa panid 13]
Maisogong gipahayag ni Sofonias nga haduol na ang adlaw ni Jehova sa paghukom
[Credit Line]
Gikan sa Self-Pronouncing Edition of the Holy Bible, nga nasudlan sa King James ug sa Revised nga mga bersiyon
[Hulagway sa panid 15]
Ang adlaw ni Jehova miabot diha sa Juda ug Jerusalem pinaagi sa mga kamot sa Babilonyanhon sa 607 W.K.P.
[Hulagway sa panid 16]
Naglaom ka ba nga maluwas sa dihang laglagon ni Jehova ang daotan?