Ikaw ba Magmalipayon Gayod?

GITIMBAYA ni George ang tanan pinaagig pahiyom. Para kaniya, ang kinabuhi maoy bililhong gasa nga angayng pahimuslan. Ang iyang pagkamalipayon ug pagkamalaomon maoy iyang ilhanan nga kinaiya—labi na gayod kay nagsugod na siya pag-antos sa mga kasakit sa pagkatigulang. Hangtod sa adlaw sa iyang kamatayon, si George nailhan ingong malipayon nga tawo. Malipayon ka ba sama kang George? Giisip ba nimo ang matag bag-ong adlaw ingong gasa nga angayng pahimuslan? O ang pagpaabot ba sa usa ka bag-ong adlaw naghimo kanimong dili-mabination o mahadlokon pa gani? Duna bay naghikaw kanimo sa kalipay?

Ang kalipay gihubit ingong maayong kahimtang nga may pagkapermanente. Mailhan kini pinaagi sa lainlaing mga pagbati gikan sa katagbawan ngadto sa dulot ug hilabihang kangaya ug sa kinaiyanhong tinguha nga magpadayon ang maayong kahimtang. Tinuod bang naglungtad ang ingon niana nga kalipay?

Karon, ang katilingban nagpasiugda sa panglantaw nga ang mga tawo magmalipayon lamang kon sila dato. Giapas sa milyonmilyon ang paspas kaayo nga kinabuhi sa ilang hilabihang paningkamot nga modato. Sa pagbuhat niana, gisakripisyo sa daghan ang personal nga mga relasyon ug ubang hinungdanong mga butang sa kinabuhi. Sama sa mga hulmigas diha sa balay niini, sila kanunayng nagdali, ug diyutay na lang silag panahon sa pagpamalandong ni aduna silay dakong panahon alang sa usag usa. Masabot nga “nagkadaghan ang mga tawo nga nadayagnos nga dunay grabeng kaguol,” matod pa sa usa ka taho sa Los Angeles Times, “ug ang mga tawo nagsugod pag-antos [sa kaguol] nga mas bata pa. . . . Ang mga panghupay sa depresyon maoy labing himalitang mga tambal.” Minilyon ang mogamit sa gidiling mga droga o mosulay paglumos sa ilang mga problema pinaagi sa alkoholikong ilimnon. Ang uban magpatuyang pagpamalit sa dihang sila mobati ug dakong  kaguol. Sa usa ka surbi, “ang mga babaye mao ang mipatim-aw nga mas dakog tendensiya nga magpatuyang ug pagpamalit agig pang-alibyo sa gibati,” matod sa Britanikong mantalaan nga The Guardian. “Sila maoy tulo ka pilo nga lagmit mamalit sa dihang mobati ug dakong kaguol.”

Apan, ang matuod nga kalipay dili makita diha sa tindahan, alkoholikong ilimnon, pildoras, heringgilya, o pondo sa bangko. Ang kalipay dili baligya; kini libre. Asa nato makaplagi ang maong bililhong gasa? Hisgotan nato kana sa sunod nga artikulo.