Kalipay Alang Niadtong Nagalakaw Diha sa Kahayag
Kalipay Alang Niadtong Nagalakaw Diha sa Kahayag
“Umari kamo ug manglakaw kita sa kahayag ni Jehova.”—ISAIAS 2:5.
1, 2. (a) Unsa ka hinungdanon ang kahayag? (b) Nganong makuyaw kaayo ang pasidaan nga matabonan sa kangitngit ang yuta?
SI Jehova mao ang Tuboran sa kahayag. Ang Bibliya nagtawag kaniya nga “ang Maghahatag sa adlaw sa paghatag ug kahayag sa maadlaw, sa mga lagda sa bulan ug sa mga bituon sa paghatag ug kahayag sa magabii.” (Jeremias 31:35; Salmo 8:3) Siya mao ang Usa nga naglalang sa atong adlaw, nga sa pagkatinuod, maoy usa ka dako kaayong nukleyar nga hudno nga nagabuga ngadto sa kawanangan ug hilabihan ka daghang enerhiya, ang uban niini sa matang nga kahayag ug kainit. Ang gamay kaayong bahin nianang maong enerhiya moabot kanato ingong hayag sa adlaw nga nagpalungtad sa kinabuhi dinhi niining yutaa. Kon walay hayag sa adlaw, kita dili mabuhi. Ang yuta mahimong usa ka walay-kinabuhing planeta.
2 Sa hunahunaon kini, atong masabtan nga makuyaw ang kahimtang nga gibatbat ni manalagnang Isaias. Siya miingon: “Tan-awa! ang kangitngit mismo motabon sa yuta, ug ang bagang kangiob sa nasodnong mga pundok.” (Isaias 60:2) Siyempre, wala kini magpunting sa kangitngit sa pisikal nga diwa. Si Isaias wala maghisgot nga moabot ang panahon nga ang adlaw, bulan, ug mga bituon mohunong na sa pagsidlak. (Salmo 89:36, 37; 136:7-9) Hinunoa, siya naghisgot sa espirituwal nga kangitngit. Apan ang espirituwal nga kangitngit makamatay. Sa ngadtongadto, kita dili mabuhi nga walay espirituwal nga kahayag sama nga kita dili mabuhi nga walay pisikal nga kahayag.—Lucas 1:79.
3. Tungod sa mga pulong ni Isaias, unsay angayng buhaton sa mga Kristohanon?
3 Tungod niini, hinungdanong matikdan nga ang mga pulong ni Isaias, bisan pag natuman sa karaang Juda, dunay mas dakong katumanan karong panahona. Oo, sa atong panahon ang kalibotan natabonan sa espirituwal nga kangitngit. Sa ingon niini nga makuyaw nga kahimtang, ang espirituwal nga kahayag hinungdanon kaayo. Maoy hinungdan kon nganong ang mga Kristohanon angayng mamati sa tambag ni Jesus: “Palamdaga ang inyong kahayag atubangan sa mga tawo.” (Mateo 5:16) Ang matinumanong mga Kristohanon makahatag ug kahayag sa kangitngit alang sa mga maaghop, sa ingon naghatag kanila ug higayon nga makabaton ug kinabuhi.—Juan 8:12.
Mangitngit nga Panahon sa Israel
4. Kanus-a unang natuman ang matagnaong mga pulong ni Isaias, apan unsang kahimtang ang naglungtad na sa iyang panahon mismo?
4 Ang mga pulong ni Isaias bahin sa kangitngit nga motabon sa yuta unang natuman sa dihang ang Juda naawaaw ug ang iyang katawhan nabihag sa Babilonya. Apan, una pa nianang panahona, sa panahon mismo ni Isaias, ang dakong bahin sa nasod natabonan na sa espirituwal nga kangitngit, usa ka hitabo nga nakatukmod kaniya sa pag-awhag sa iyang katagilungsod: “Oh mga tawo sa balay ni Jacob, umari kamo ug manglakaw kita sa kahayag ni Jehova”!—Isaias 2:5; 5:20.
5, 6. Unsang mga butanga ang nakahatag ug kangitngit sa panahon ni Isaias?
5 Si Isaias nanagna sa Juda “sa mga adlaw ni Uzzias, Jotam, Ahaz ug Ezequias, nga mga hari sa Juda.” (Isaias 1:1) Magubot kadto nga panahon sa pagkawalay kasegurohan sa politika, relihiyosong pagkasalingkapaw, dili-makataronganong pagpanghukom, ug pagdaogdaog sa mga kabos. Bisan sa panahon sa pagmando sa matinumanong mga hari, sama kang Jotam, ang mga halaran sa bakak nga diyos makita ibabaw sa daghang bungtod. Ilalom sa dili-matinumanong mga hari, ang kahimtang mas grabe pa. Ang daotang Haring Ahaz, pananglitan, nakaako pa sa paghalad sa iyang anak diha sa rituwal nga paghalad ngadto sa diyos nga si Molek. Mangitngit gayod kadtong panahona!—2 Hari 15:32-34; 16:2-4.
6 Ang kahimtang sa ubang mga nasod mangiob usab. Ang Moab, Edom, ug Filistia mahulgaong nahimutang diha sa mga utlanan sa Juda. Ang amihanang gingharian sa Israel, bisan pag kadugo, maoy usa ka dakong kaaway. Sa halayo nga amihanan, ang Sirya naghulga sa kalinaw sa Juda. Labaw pang makuyaw mao ang mapintas nga Asirya, nga naghulat kanunay ug mga higayon nga makapadako sa iyang gahom. Sa panahon sa pagpanagna ni Isaias, bug-os nga gipapas sa Asirya ang nasod sa Israel diha sa mapa ug halos gipukan niini ang Juda. Sa usa ka higayon ang matag kinutaang siyudad sa Juda gawas sa Jerusalem nasakop sa mga Asiryanhon.—Isaias 1:7, 8; 36:1.
7. Unsang dalan ang gipili sa Israel ug Juda, ug sa unsang paagi si Jehova misanong?
7 Giantos sa katawhang may pakigsaad sa Diyos kini nga mga katalagman tungod kay ang Israel ug Juda wala magmaunongon kaniya. Sama niadtong gihisgotan sa basahon sa Proverbio, ilang “gibiyaan ang mga alagianan sa katul-id aron sa paglakaw sa mga dalan sa kangitngit.” (Proverbio 2:13) Apan, bisag nasuko si Jehova sa iyang katawhan, wala niya sila talikdi sa bug-os. Hinunoa, iyang gipatungha si Isaias ug ang ubang mga manalagna aron maoy motagana sa espirituwal nga kahayag alang kang bisan kinsa diha sa nasod nga naningkamot gihapon sa pag-alagad kang Jehova nga matinumanon. Ang kahayag nga gitagana niining maong mga manalagna tinuod gayod nga bililhon. Kini nakahatag ug kinabuhi.
Mga Panahon sa Kangitngit Karong Panahona
8, 9. Unsang mga butanga ang nakahatag ug kangitngit sa kalibotan karong panahona?
8 Ang kahimtang sa panahon ni Isaias sama gayod kaayo sa mga kahimtang karong panahona. Sa atong panahon, gisalikway sa tawhanong mga pangulo si Jehova ug ang iyang naentronong Hari, si Jesu-Kristo. (Salmo 2:2, 3) Gilimbongan sa mga pangulo sa relihiyon sa Kakristiyanohan ang ilang mga panon. Kini nga mga pangulo nangangkon nga nag-alagad sa Diyos, apan ang tinuod, giduso sa kadaghanan kanila ang mga diyos niining kalibotana—nasyonalismo, militarismo, bahandi, ug prominenteng mga tawo—gawas pa sa pagpanudlo ug paganong mga doktrina.
9 Diha sa nagkalainlaing mga lugar, ang mga relihiyon sa Kakristiyanohan nag-apil-apil sa mga gubat ug panagbangi sa katilingban nga nagpasiugda sa pagpamatay sa minoriya nga mga pundok ug ubang makalilisang nga mga buhat. Dugang pa, imbes barogan ang binase-sa-Bibliya nga moralidad, gipasagdan o aktibong gisuportahan sa daghang simbahan ang imoral nga mga buhat sama sa pakighilawas ug homoseksuwalidad. Tungod sa pagsalikway sa mga sukdanan sa Bibliya, ang mga panon sa Kakristiyanohan kaamgid sa mga tawo nga gihisgotan sa karaang salmista: “Sila wala mahibalo, ug sila wala makasabot; nagalakawlakaw sila sa kangitngit.” (Salmo 82:5) Sa pagkatinuod, ang Kakristiyanohan, sama sa karaang Juda, anaa sa dakong kangitngit.—Pinadayag 8:12.
10. Sa unsang paagi ang kahayag nagadan-ag diha sa kangitngit karong panahona, ug sa unsang paagi ang mga maaghop makapahimulos?
10 Bisan pa sa maong kangitngit, si Jehova nagpadan-ag sa kahayag alang sa mga maaghop. Alang niini, iyang gigamit ang iyang dinihogang mga alagad sa yuta, “ang matinumanon ug maalamong ulipon,” ug sila “nagasidlak ingong mga magbabanwag sa kalibotan.” (Mateo 24:45; Filipos 2:15) Kana nga ulipon nga matang, nga gipaluyohan sa minilyon sa “ubang mga karnero” nga mga kauban, nagpabanaag sa espirituwal nga kahayag pinasukad sa Pulong sa Diyos, ang Bibliya. (Juan 10:16) Niining nangitngitan nga kalibotan, kini nga kahayag mohatag sa mga maaghop ug paglaom, motabang kanila nga makabaton ug relasyon uban sa Diyos, ug moabag kanila sa paglikay sa espirituwal nga mga lit-ag. Kini bililhon, makahatag ug kinabuhi.
“Dayegon Ko ang Imong Ngalan”
11. Unsang impormasyon ang gihatag ni Jehova sa panahon ni Isaias?
11 Sa mangitngit nga mga adlaw sa panahong gikinabuhian ni Isaias ug bisan sa panahon sa mas mangiob pa nga mga adlaw sa dihang gibihag sa mga Babilonyanhon ang nasod ni Jehova, unsang matang sa giya ang gihatag ni Jehova? Gawas sa paghatag ug moral nga giya, klaro niyang gilatid sa dugay nang panahong miagi kon sa unsang paagi pagatumanon niya ang iyang mga katuyoan maylabot sa iyang katawhan. Palandonga, pananglitan, ang katingalahang mga tagna nga anaa sa Isaias mga kapitulo 25 ngadto sa 27. Ang mga pulong niining mga kapituloha nagpaila kon giunsa pagdumala ni Jehova ang mga butang balik niadto ug kon giunsa niya pagdumala ang mga butang karong panahona.
12. Unsang tim-os nga mga pulong ang gisulti ni Isaias?
12 Una, si Isaias miingon: “Oh Jehova, ikaw ang akong Diyos. Bayawon ko ikaw, dayegon ko ang imong ngalan.” Pagkatim-os nga mga pulong sa pagdayeg! Apan unsay nagtukmod sa manalagna sa pagpamulong sa maong pag-ampo? Usa ka dakong katarongan ang gipadayag sa ikaduhang katunga sa bersikulo, diin atong mabasa: “Kay ikaw [Jehova] nakabuhat ug katingalahang mga butang, mga laraw sukad sa unang kapanahonan, sa pagkamatinumanon, sa pagkakasaligan.”—Isaias 25:1.
13. (a) Unsang kahibalo ang nakapalig-on sa pagpabili ni Isaias kang Jehova? (b) Sa unsang paagi makakat-on kita sa panig-ingnan ni Isaias?
13 Sa panahon ni Isaias, si Jehova nakahimog daghang katingalahang mga butang alang sa Israel, ug kini nahisulat. Dayag nga pamilyar si Isaias niining mga sinulat. Siya nahibalo, pananglitan, nga gihatagan ni Jehova ang iyang katawhan ug kagawasan gikan sa pagkaulipon sa Ehipto ug giluwas sila batok sa kasuko sa kasundalohan ni Paraon diha sa Pulang Dagat. Siya nahibalo nga si Jehova nag-agak sa iyang katawhan latas sa kamingawan ug gidala sila ngadto sa Yutang Saad. (Salmo 136:1, 10-26) Ang mga asoy sa kasaysayan nga sama niana nagpakita nga si Jehova nga Diyos matinumanon ug kasaligan. Ang iyang “mga laraw”—ang tanan nga iyang gimbut-an—matuman. Ang gitagana sa Diyos nga tukmang kahibalo nakahatag ug kalig-on kang Isaias sa pagpadayon sa paglakaw diha sa kahayag. Sa ingon, siya maoy usa ka maayong panig-ingnan alang kanato. Kon magtuon kita ug maayo sa sinulat nga Pulong sa Diyos ug ipadapat kini sa atong mga kinabuhi, kita usab makapabilin diha sa kahayag.—Salmo 119:105; 2 Corinto 4:6.
Usa ka Siyudad Nalaglag
14. Unsay gitagna bahin sa usa ka siyudad, ug lagmit, unsa kining siyudara?
14 Usa ka pananglitan sa laraw sa Diyos makita diha sa Isaias 25:2, diin atong mabasa: “Imong gihimo ang usa ka siyudad ingong tapok sa mga bato, ang usa ka kinutaang lungsod gihimong kagun-oban, ang usa ka puloy-anang torre sa mga estranyo dili na mahimong siyudad, nga dili na matukod pag-usab bisan hangtod sa panahong walay tino.” Unsa kining siyudara? Si Isaias lagmit matagnaong naghisgot sa Babilonya. Sa pagkatinuod, miabot gayod ang panahon nga ang Babilonya nahimong tinapok na lamang sa mga bato.
15. Unsang “dakong siyudad” ang naglungtad karong panahona, ug unsay mahitabo niini?
15 Ang siyudad nga gihisgotan ni Isaias aduna bay katugbang karong panahona? Oo. Ang basahon sa Pinadayag naghisgot bahin sa “dakong siyudad nga adunay gingharian ibabaw sa mga hari sa yuta.” (Pinadayag 17:18) Kanang dakong siyudad mao ang “Dakong Babilonya,” ang tibuok-kalibotan nga imperyo sa bakak nga relihiyon. (Pinadayag 17:5) Karong panahona, ang pangunang bahin sa Dakong Babilonya mao ang Kakristiyanohan, kansang klero maoy nanguna sa pagsupak sa pagsangyaw sa Gingharian nga buluhaton sa katawhan ni Jehova. (Mateo 24:14) Apan, sama sa karaang Babilonya, ang Dakong Babilonya laglagon sa dili madugay, nga dili na gayod motindog pag-usab.
16, 17. Sa unsang paagi ang mga kaaway ni Jehova naghimaya kaniya sa karaan ug sa modernong panahon?
16 Unsa pay gitagna ni Isaias bahin sa “kinutaang lungsod”? Namulong kang Jehova, si Isaias miingon: “Kadtong usa ka katawhang kusganon maghimaya kanimo; ang lungsod sa malupigong kanasoran, mahadlok kanimo.” (Isaias 25:3) Sa unsang paagi kining kaaway nga siyudad, “ang lungsod sa malupigong kanasoran,” maghimaya kang Jehova? Buweno, hinumdomi kon unsay nahitabo sa labing gamhanang hari sa Babilonya, si Nabucodonosor. Human sa makapatukbil sa hunahuna nga kasinatian nga nagpasundayag sa iyang kaugalingong kahuyangan, siya napugos sa pagdawat sa pagkadako ni Jehova ug sa Iyang gahom nga gamhanan sa tanan. (Daniel 4:34, 35) Sa dihang ipasundayag ni Jehova ang iyang gahom, bisan ang iyang mga kaaway mapugos sa pag-ila, nga kontra sa buut, sa iyang gamhanang mga buhat.
17 Ang Dakong Babilonya napugos ba sa pag-ila sa gamhanang mga buhat ni Jehova? Oo. Sa panahon sa unang gubat sa kalibotan, ang dinihogang mga alagad ni Jehova nagsangyaw bisan sa kalisod. Sa 1918 sila nabihag sa espirituwal nga paagi sa dihang ang pangunang mga opisyales sa Watch Tower Society gipriso. Ang organisadong buluhaton sa pagsangyaw halos nahunong. Dayon, sa 1919, gipasig-uli sila ni Jehova ug gipalagsik sila pag-usab pinaagi sa iyang espiritu, diin gisugdan dayon nila ang pagtuman sa sugo sa pagsangyaw sa maayong balita sa tanang gipuy-ang yuta. (Marcos 13:10) Kining tanan gitagna diha sa basahon sa Pinadayag, maingon man ang gidangatan sa ilang mga kaaway. Sila ‘nangalisang ug naghimaya sa Diyos sa langit.’ (Pinadayag 11:3, 7, 11-13) Wala kini magpasabot nga silang tanan nakabig, kondili sila napugos sa pag-ila sa gamhanang buhat ni Jehova niining higayona, ingon gayod sa gitagna ni Isaias.
“Usa ka Salipdanan sa Timawa”
18, 19. (a) Nganong ang mga kaaway napakyas sa pagbungkag sa integridad sa katawhan ni Jehova? (b) Sa unsang paagi ang “awit sa mga malupigon” masugpo?
18 Naghisgot niining tungora sa maluloton nga pagpakiglabot ni Jehova uban niadtong nagalakaw diha sa kahayag, si Isaias miingon kang Jehova: “Ikaw nahimong usa ka salipdanan sa timawa, usa ka salipdanan sa kabos diha sa iyang kasakit, usa ka dalangpanan gikan sa bagyo, usa ka landong gikan sa kainit, sa dihang ang huros sa mga malupigon maoy sama sa bagyo nganha sa paril. Sama sa kainit diha sa walay-tubig nga yuta, ang kabanha sa mga estranyo imong gibuntog, ang kainit pinaagi sa landong sa usa ka panganod. Ang awit sa mga malupigon nasugpo.”—Isaias 25:4, 5.
19 Sukad sa 1919, gisulayan sa mga malupigon ang tanang paagi aron sa pagbungkag sa integridad sa matuod nga mga magsisimba, apan sila napakyas. Ngano? Tungod kay si Jehova mao ang salipdanan ug dalangpanan sa iyang katawhan. Siya naghatag ug bugnawng kapasilongan gikan sa naglagiting nga kainit sa paglutos ug nagbarog samag malig-ong paril batok sa bagyo sa pagsupak. Kita nga nagalakaw diha sa kahayag sa Diyos masaligong makapaabot sa panahon sa dihang ‘ang awit sa mga malupigon masugpo.’ Oo, kita maikagong naghulat sa adlaw sa dihang mangawagtang na unya ang mga kaaway ni Jehova.
20, 21. Unsang bangkete ang itagana ni Jehova, ug unsay malakip nianang maong bangkete diha sa bag-ong kalibotan?
20 Si Jehova mohimo ug labaw pa kay sa pagpanalipod sa iyang mga alagad. Siya motagana alang kanila ingong ilang mahigugmaong Amahan. Human sa paghatag ug kagawasan sa iyang katawhan gikan sa Dakong Babilonya sa 1919, naghikay siya ug bangkete sa kadaogan sa ilang atubangan, usa ka dagayang abiyo sa espirituwal nga pagkaon. Kini ang gitagna sa Isaias 25:6, diin atong mabasa: “Si Jehova sa mga panon maghikay gayod alang sa tanang katawhan, niining bukira, ug usa ka bangkete sa mantikaon nga pagkaon, usa ka bangkete sa bino nga pinalugdang, sa mantikaon nga pagkaon nga puno sa uyok, sa bino nga pinalugdang, sinala.” Pagkabulahan nato nga makaambit niini nga kombira! (Mateo 4:4) “Ang lamesa ni Jehova” tinuod nga puno sa lamiang mga pagkaon nga pagakan-on. (1 Corinto 10:21) Pinaagi sa ‘matinumanon ug maalamong ulipon,’ kita gihatagan sa tanang butang nga atong gikinahanglan sa espirituwal nga diwa.
21 Ug dunay nalakip pa niining bangkete nga gitagana sa Diyos. Ang espirituwal nga kombira nga atong ginatagamtam karong panahona nagpahinumdom kanato sa dagayang materyal nga pagkaon nga mabatonan diha sa gisaad sa Diyos nga bag-ong kalibotan. Niana unyang panahona, ang “bangkete sa mantikaon nga pagkaon” maglakip sa materyal nga pagkaon nga dagaya kaayo. Wala nay gutmon sa pisikal o sa espirituwal nga diwa. Pagkadakong kahupayan unya kana alang niadtong minahal nga mga matinumanon kinsa nag-antos karon tungod sa gitagnang “kakulang sa pagkaon” nga maoy bahin sa “ilhanan” sa presensiya ni Jesus! (Mateo 24:3, 7) Alang kanila, ang mga pulong sa salmista tinuod gayod nga makapahupay. Siya nag-ingon: “Daghan na unyay mga lugas ibabaw sa yuta; diha sa tumoy sa kabukiran dagaya unya ang abot.”—Salmo 72:16.
22, 23. (a) Unsang “hinabol,” o “tabon,” ang pagawagtangon, ug sa unsang paagi? (b) Sa unsang paagi ang ‘kaulawan sa katawhan ni Jehova’ pagawagtangon?
22 Karon pamati sa mas katingalahan pang saad. Nagtandi sa sala ug kamatayon sa usa ka “hinabol,” o usa ka “tabon,” si Isaias miingon: “Niining bukira lamyon gayod [ni Jehova] ang nawong sa tabon nga nagtabon sa tanang katawhan, ug ang hinabol nga nalala diha sa tanang kanasoran.” (Isaias 25:7) Hunahunaa lang! Ang sala ug kamatayon, nga naghatag ug kabug-at sa katawhan sama sa habol nga makatuok, mawala na. Pagkadugay na natong gipangandoy ang adlaw sa dihang ang mga kaayohan sa halad lukat ni Jesus bug-os nga mapadapat diha sa masinugtanon ug matinumanong katawhan!—Pinadayag 21:3, 4.
23 Naghisgot nianang matahom kaayo nga panahon, ang dinasig nga manalagna nagpasalig kanato: “Lamyon gayod [sa Diyos] ang kamatayon hangtod sa hangtod, ug ang Soberanong Ginoong Jehova magapahid gayod sa mga luha gikan sa tanang nawong. Ug ang kaulawan sa iyang katawhan iyang kuhaon gikan sa tibuok yuta, kay si Jehova maoy nagsulti niini.” (Isaias 25:8) Wala nay mamatay tungod sa kinaiyanhong mga hinungdan o mohilak tungod sa kamatayon sa usa ka minahal. Pagkabulahan nga kausaban! Dugang pa, wala na gayoy dapit sa yuta nga madunggan pa ang pagpakaulaw ug bakak nga propaganda nga dugay nang giantos sa Diyos ug sa iyang mga alagad. Nganong wala? Tungod kay pagawagtangon ni Jehova ang tuboran niini—ang amahan sa bakak, si Satanas nga Yawa, uban sa tanang binhi ni Satanas.—Juan 8:44.
24. Unsay pagsanong niadtong nagalakaw diha sa kahayag sa gamhanang mga buhat ni Jehova alang kanila?
24 Sa magpalandong niining mga pagpasundayag ni Jehova sa gahom, kadtong nagalakaw diha sa kahayag mapukaw sa pag-ingon: “Tan-awa! Kini mao ang atong Diyos. Kita naglaom kaniya, ug siya magluwas kanato. Kini mao si Jehova. Kita naglaom kaniya. Managlipay kita ug managmaya sa kaluwasan pinaagi kaniya.” (Isaias 25:9) Sa dili madugay, ang matarong nga katawhan may katarongan sa pagkalipay. Ang kangitngit bug-os nang wagtangon, ug ang mga matinumanon madan-agan sa kahayag ni Jehova sa walay kataposan. Aduna pa bay laing paglaom nga mas mahimayaon? Siyempre, wala na gayod!
Makapatin-aw Ka Ba?
• Nganong hinungdanong maglakaw karong panahona diha sa kahayag?
• Nganong si Isaias nagdayeg sa ngalan ni Jehova?
• Nganong ang mga kaaway dili gayod makabungkag sa integridad sa katawhan sa Diyos?
• Unsang dagayang mga panalangin ang naghulat alang niadtong nagalakaw diha sa kahayag?
[Mga Pangutana sa Pagtuon]
[Hulagway sa panid 12, 13]
Gihalad sa mga molupyo sa Juda ang kabataan ngadto kang Molek
[Mga hulagway sa panid 15]
Ang pagkahibalo sa gamhanang mga buhat ni Jehova nagpalihok kang Isaias sa pagdayeg sa ngalan ni Jehova
[Hulagway sa panid 16]
Ang mga matarong madan-agan sa kahayag ni Jehova sa walay kataposan