Unsa ang Espirituwal nga Paraiso?

SI Gustavo gimatuto diha sa gamayng siyudad sa Brazil. a Sukad sa pagkabata siya natudloan nga ang maayong mga tawo moadto sa langit human sa kamatayon. Wala siyay kasayoran bahin sa katuyoan sa Diyos nga sa umaabot ang matinumanong katawhan makatagamtam ug hingpit nga kinabuhi diha sa usa ka paraisong yuta. (Pinadayag 21:3, 4) Ug aduna pay butang nga wala niya mahibaloi. Wala siya makaamgo nga bisan karon, mahimo siyang maanaa sa usa ka espirituwal nga paraiso.

Nakadungog ka na ba sukad bahin nianang espirituwal nga paraiso? Nahibalo ka ba kon unsa kana ug kon unsay gikinahanglan aron mahimong bahin niana? Si bisan kinsa nga buot gayod magmalipayon kinahanglang mahibalo bahin niana nga paraiso.

Pagkaplag sa Espirituwal nga Paraiso

Ang pag-ingon nga bisan karon ang usa ka tawo makapuyo diha sa usa ka paraiso mahimong dili-realistikanhon paminawon. Kining kalibotana dili gayod usa ka paraiso. Daghan kaayong tawo ang nakasinati sa gihubit sa usa ka karaang Hebreohanong hari: “Tan-awa! ang mga luha niadtong mga gilupigan, apan sila walay maghuhupay; ug sa mga nanglupig kanila diha ang gahom, mao nga sila walay maghuhupay.” (Ecclesiastes 4:1) Ginatos ka milyon ang nag-antos ilalom sa dunot nga mga sistema sa politika, relihiyon, ug ekonomiya, ug sila walay kahupayan, walay “maghuhupay.” Daghan pang uban ang nanglimbasog aron mabayran ang ilang mga balayronon, mapadako ang ilang mga anak, ug naghimog daghan pang ubang mga butang nga gikinahanglan aron makasugakod. Kini sila lagmit nga manginahanglan usab ug usa ka maghuhupay, usa nga magpagaan ug diyutay sa palas-anon. Alang kanilang tanan, ang kinabuhi maoy halayo kaayo sa paraisonhong kahimtang.

Nan, hain man ang espirituwal nga paraiso? Aw, ang Iningles nga pulong alang sa “paraiso” nalangkit sa Grego, Persianhon, ug Hebreohanong mga pulong nga ang tanan may ideya bahin sa usa ka parke o hardin, usa ka malinawon, makapahayahay nga dapit. Nagsaad ang Bibliya nga sa umaabot ang yuta mahimong usa ka pisikal nga paraiso, usa ka samag-hardin nga puy-anan alang sa walay-sala nga tawhanong rasa. (Salmo 37:10, 11) Nga naghunahuna bahin niini, atong masabtan nga ang espirituwal nga paraiso maoy usa ka palibot nga makapahimuot sa mga mata ug makapahupay sa kaunoran, nga magtugot sa usa nga matagamtam ang pakigdait uban sa isigkatawo ug uban sa Diyos. Karon, ingon sa nakaplagan ni Gustavo, ang maong paraiso naglungtad, ug kini naglangkob sa nagatubong gidaghanon sa mga tawo.

Sa edad nga 12, nakahukom si Gustavo nga buot niyang mahimong usa ka Romano Katolikong pari. Kay miuyon ang iyang mga ginikanan, misulod siya sa relihiyosong seminaryo. Didto siya nalangkit sa musika, teatro, ug politika, nga gipasiugda sa simbahan aron madani ang mga batan-on. Nahibalo siya nga ang pari gidahom nga mogugol sa iyang kinabuhi ngadto sa mga tawo ug nga siya dili mahimong magminyo. Bisan pa niana, ang pipila sa mga pari ug mga seminarista nga nailhan ni Gustavo nakigbahin sa imoral nga mga buhat. Sa ingon niana nga kahimtang, si Gustavo wala madugay nagsugod sa paghuboghubog. Tataw, wala pa gayod niya makaplagi ang usa ka espirituwal nga paraiso.

Usa ka adlaw niana, nabasa ni Gustavo ang usa ka tract sa Bibliya nga naghisgot bahin sa usa ka yutan-ong paraiso. Nagpahunahuna kini kaniya bahin sa katuyoan sa kinabuhi. Siya miingon: “Nagsugod na ako sa pagbasa kanunay sa Bibliya, apan wala ko kini masabti. Wala gani ko mahibalo  nga ang Diyos adunay ngalan.” Mibiya siya sa seminaryo ug miduol sa mga Saksi ni Jehova, nga nangayog tabang aron masabtan ang Bibliya. Human niadto, siya daling miuswag ug wala madugay gidedikar ang iyang kinabuhi ngadto sa Diyos. Nakakat-on si Gustavo bahin sa espirituwal nga paraiso.

Usa ka Katawhan Alang sa Ngalan sa Diyos

Nahibaloan ni Gustavo nga ang ngalan sa Diyos, nga Jehova, dili usa ka yanong impormasyon lamang nga pagatun-an sa usa ka estudyante sa Bibliya. (Exodo 6:3) Kini maoy usa ka hinungdanong bahin sa tinuod nga pagsimba. Gitudloan ni Jesus ang iyang mga sumusunod nga mag-ampo: “Amahan namo nga anaa sa mga langit, pagabalaanon unta ang imong ngalan.” (Mateo 6:9) Naghisgot bahin sa mga Hentil nga nahimong mga Kristohanon, ang tinun-an nga si Santiago miingon: ‘Giliso sa Diyos ang iyang pagtagad ngadto sa kanasoran aron sa pagkuha gikan kanila ug usa ka katawhan alang sa iyang ngalan.’ (Buhat 15:14) Sa unang siglo, ang “katawhan alang sa iyang ngalan” mao ang Kristohanong kongregasyon. Aduna bay katawhan alang sa ngalan sa Diyos karon? Oo, ug nakaamgo si Gustavo nga ang mga Saksi ni Jehova mao kanang mga tawhana.

Ang mga Saksi ni Jehova aktibo diha sa 235 ka nasod ug mga teritoryo. Sila miabot na ug kapin sa unom ka milyong ministro, ug laing walo ka milyong interesadong mga tawo ang nagtambongan sa ilang mga tigom. Nailado pag-ayo sa ilang publikong ministeryo, ilang ginatuman ang mga pulong ni Jesus: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran.” (Mateo 24:14) Apan, nganong gibati ni Gustavo nga iyang nakaplagan ang usa ka espirituwal nga paraiso diha sa pagpakig-uban sa mga Saksi ni Jehova? Siya miingon: “Gitandi ko ang akong nakita sa kalibotan ug ilabina diha sa seminaryo sa akong nakaplagan taliwala sa mga Saksi ni Jehova. Ang dakong kalainan mao ang gugma taliwala sa mga Saksi.”

Ang uban dunay susamang mga komento bahin sa mga Saksi ni Jehova. Si Miriam, usa ka batan-ong babaye nga taga-Brazil, miingon: “Dili ko mahibalo kon sa unsang paagi magmalipayon, bisan uban sa akong pamilya. Ang unang higayon nga akong nakita ang gugma nga nagalihok maoy taliwala sa mga Saksi ni Jehova.” Usa ka lalaki nga ginganlag Christian miingon: “Sa popanahon miapil ako sa espiritismo, apan dili hinungdanon kanako ang relihiyon. Mas gipabilhan ko ang akong pagkabutang sa katilingban ug ang akong trabaho ingong usa ka inhenyero. Bisan pa niana, sa dihang ang akong asawa misugod sa pagtuon sa Bibliya uban sa mga Saksi ni Jehova, akong nakita ang kabag-ohan diha kaniya. Nakadayeg usab ako sa kangaya ug kasibot sa Kristohanong mga babaye nga miduaw kaniya.” Nganong ikasulti kana sa mga tawo bahin sa mga Saksi ni Jehova?

Unsa ang Espirituwal nga Paraiso?

Ang usa ka butang nga naghimo sa mga Saksi ni Jehova nga lahi mao ang ilang pagpabili sa kahibalo sa Bibliya. Nagtuo sila nga ang Bibliya tinuod ug nga kini Pulong sa Diyos. Busa, dili sila kontento nga mahibalo lamang sa paninugdang mga pagtulon-an sa ilang relihiyon. Aduna silay nagapadayong programa sa personal nga pagtuon ug pagbasa sa Bibliya. Kon mas dugaydugay nga makig-uban ang usa ka tawo sa mga Saksi ni Jehova, mas daghan siyag makat-onan bahin sa Diyos ug sa Iyang kabubut-on sumala sa gipadayag sa Bibliya.

Ang maong kahibalo nagpahigawas sa mga Saksi ni Jehova sa mga butang nga naghikaw sa mga tawo sa kalipay, sama sa mga patuotuo ug makadaot nga mga ideya. Si Jesus miingon: “Ang kamatuoran magpagawas kaninyo,” ug nakaplagan sa mga Saksi ni Jehova nga tinuod kini. (Juan 8:32) Si Fernando, kinsa sa usa ka panahon nagbuhat sa espiritismo, miingon: “Ang pagkahibalo bahin sa kinabuhing walay kataposan maoy usa ka dako kaayong kahupayan. Nahadlok ako nga tingali ang akong mga ginikanan o ako mamatay.” Ang kamatuoran nagpahigawas kang Fernando gikan sa iyang pagkahadlok sa kalibotan sa mga espiritu ug sa ginaingong kinabuhi luyo sa kamatayon.

Diha sa Bibliya, ang kahibalo bahin sa Diyos suod nga nalangkit sa paraiso. Ang manalagnang Isaias miingon: “Dili sila magadaot ni magagun-ob sa tibuok nakong bukid nga balaan; tungod kay ang yuta mapuno sa kahibalo kang Jehova ingon  sa katubigan nga nagtabon sa dagat mismo.”—Isaias 11:9.

Siyempre, ang kahibalo mismo dili pa igo aron mahitabo ang kalinaw nga gitagna ni Isaias. Kinahanglang ipadapat sa usa ka tawo ang iyang nakat-onan. Kini ang gikomento ni Fernando: “Sa dihang ugmaron sa tawo ang mga bunga sa espiritu, makaamot siya alang sa espirituwal nga paraiso.” Si Fernando nagtumong sa mga pulong ni apostol Pablo, kinsa nagtawag sa mga hiyas nga kinahanglang ugmaron sa usa ka Kristohanon nga “mga bunga sa espiritu.” Gilista niya kini ingong “gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, pagpugong-sa-kaugalingon.”—Galacia 5:22, 23.

Masabtan ba nimo kon nganong ang pagpakig-uban sa usa ka komunidad sa mga tawo nga nanglimbasog sa pag-ugmad sa maong mga hiyas mahimo gayong sama nga anaa sa usa ka paraiso? Ang espirituwal nga paraiso nga gitagna ni manalagnang Sofonias maglungtad taliwala sa maong katawhan. Siya miingon: “Sila dili magabuhat ug pagkadili-matarong, ni magasultig bakak, ni may makaplagan sa ilang baba nga usa ka dila nga malinglahon; kay sila mangaon ug manghigda, ug walay magpakurog kanila.”—Sofonias 3:13.

Ang Hinungdanong Papel sa Gugma

Mamatikdan tingali nimo nga ang una sa mga bunga sa espiritu nga gihisgotan ni Pablo mao ang gugma. Mao kini ang hiyas nga gihisgotan pag-ayo sa Bibliya. Si Jesus miingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.” (Juan 13:35) Tinuod, ang mga Saksi ni Jehova dili hingpit. Usahay sila adunay personal nga mga kasungian taliwala kanila sama sa nahitabo sa mga apostoles ni Jesus. Apan gihigugma gayod nila ang usag usa, ug nag-ampo sila alang sa pagpaluyo sa balaang espiritu samtang ginaugmad nila kining hiyasa.

Ingong resulta, ang ilang panag-ubanay maoy talagsaon. Walay tribalismo o makapabahinbahin nga nasyonalismo taliwala kanila. Sa pagkatinuod, daghang Saksi nga nagpuyo mismo sa mga dapit nga dihay pagpuo sa kaliwat ug pagpuo sa rasa sa hinapos nga mga tuig sa ika-20ng siglo nanalipod sa usag usa bisag nameligro ang ila mismong kinabuhi. Bisag nanggula “gikan sa tanang kanasoran ug mga tribo ug katawhan ug mga pinulongan,” ginatagamtam nila ang panaghiusa nga lisod masabtan hangtod nga imong masinati kini.—Pinadayag 7:9.

Paraiso Taliwala Niadtong Nagabuhat sa Kabubut-on sa Diyos

Walay dapit diha sa espirituwal nga paraiso alang sa kadalo, imoralidad, ug kahakog. Ang mga Kristohanon gisultihan: “Hunong na sa pagpaumol sumala niining sistemaha sa mga butang, kondili mag-usab kamo pinaagi sa pagbag-o sa inyong hunahuna, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.” (Roma 12:2) Kon magsubay kita ug mahinlo, matarong nga mga kinabuhi ug magbuhat sa kabubut-on sa Diyos sa ubang mga paagi, makatabang kita nga matukod ang espirituwal nga paraiso ug makaamot kita sa atong kaugalingong kalipay. Nakaplagan ni Carla nga kini tinuod. Siya miingon: “Gitudloan ako sa akong amahan nga magkugi pagtrabaho aron mahimong independente sa pinansiyal. Apan bisan pag ang akong pagtuon sa unibersidad naghatag kanakog pagbati nga may kasegurohan, giiliw ko ang pamilyahanong panaghiusa ug ang kasegurohan nga ikahatag lamang kanato sa kahibalo sa Pulong sa Diyos.”

Siyempre, ang pagtagamtam sa espirituwal nga  paraiso dili magwagtang sa pisikal nga mga suliran sa kinabuhi. Ang mga Kristohanon masakit gihapon. Ang nasod nga ilang gipuy-an tingali malangkit sa sibil nga panag-awayay. Daghan ang nag-antos sa kakabos. Bisan pa niana, ang pagbaton ug suod nga relasyon kang Jehova nga Diyos—nga maoy usa ka hinungdanong bahin sa espirituwal nga paraiso—nagpasabot nga kita makadangop kaniya alang sa pagpaluyo. Sa pagkatinuod, gidapit niya kita nga ‘itugyan ang atong palas-anon kaniya,’ ug daghan ang makapamatuod sa talagsaong paagi nga iyang gipaluyohan sila diha sa labing malisod nga mga kahimtang. (Salmo 55:22; 86:16, 17) Nagsaad ang Diyos nga magauban sa iyang mga magsisimba bisan diha sa “walog sa mabagang kangiob.” (Salmo 23:4) Ang pagsalig sa pagkaandam sa Diyos nga mopaluyo kanato motabang sa pagmentinar sa atong “kalinaw sa Diyos nga labaw sa tanang panghunahuna,” nga maoy yawi sa espirituwal nga paraiso.—Filipos 4:7.

Nagaamot Alang sa Espirituwal nga Paraiso

Kadaghanan sa mga tawo malipay sa pagduaw sa usa ka parke o hardin. Buot nilang maglakawlakaw diha niana o lagmit molingkod sa bangko ug malingaw sa pagsud-ong sa palibot. Sa susamang paagi, daghan ang malipay sa pagpakig-uban sa mga Saksi ni Jehova. Nakaplagan nilang makapalagsik, malinawon, ug makapapiskay ang panag-ubanay. Apan, ang usa ka maanindot nga hardin kinahanglan nga mentinahon aron magpadayon kini nga paraisonhon. Sa susama, ang espirituwal nga paraiso naglungtad lamang niini mismong dili-paraisonhong kalibotan tungod kay ang mga Saksi ni Jehova nag-ugmad niana, ug ang Diyos nagpanalangin sa ilang mga paningkamot. Nan, sa unsang paagi makahimo ka ug usa ka makahuloganong amot sa maong paraiso?

Una, kinahanglan ka nga makig-uban sa kongregasyon sa mga Saksi ni Jehova, motuon sa Bibliya uban nila, ug mokuhag kahibalo sa Bibliya nga mao ang pasukaranan sa espirituwal nga paraiso. Si Carla miingon: “Walay espirituwal nga paraiso kon walay espirituwal nga pagkaon.” Naglakip kini sa pagbasa sa Pulong sa Diyos nga regular ug pagpamalandong bahin sa imong gibasa. Ang kahibalo nga nabatonan magpasuod kanimo kang Jehova nga Diyos, ug ikaw makadangat sa paghigugma kaniya. Makat-onan usab nimo ang pagpakigsulti kaniya diha sa pag-ampo ug makahangyo sa iyang giya ug sa iyang espiritu sa pagpaluyo kanimo samtang imong buhaton ang iyang kabubut-on. Gisultihan kita ni Jesus nga molahutay sa pag-ampo. (Lucas 11:9-13) Si apostol Pablo miingon: “Pag-ampo nga walay-hunong.” (1 Tesalonica 5:17) Ang pribilehiyo sa pagpakigsulti sa Diyos diha sa pag-ampo nga may bug-os nga pagsalig nga siya maminaw kanimo maoy hinungdanong bahin sa espirituwal nga paraiso.

Sa paglakat sa panahon, mabag-o ang imong kinabuhi sa ikaayo tungod sa imong nakat-onan, ug sa ngadtongadto buot na nimong makigsulti sa uban bahin niana. Dayon ikaw makahimo sa pagsugot sa sugo ni Jesus: “Palamdaga ang inyong kahayag atubangan sa mga tawo, aron ilang makita ang inyong maayong mga buhat ug maghimaya sa inyong Amahan nga anaa sa mga langit.” (Mateo 5:16) Ang pagpakig-ambit ngadto sa uban sa kahibalo bahin kang Jehova nga Diyos ug kang Jesu-Kristo ug ang paghimaya sa dakong gugma nga gipasundayag nila ngadto sa katawhan makahatag ug dakong kalipay.

Ang panahon nagasingabot sa dihang ang tibuok yuta mahimong literal nga paraiso—usa ka samag-hardin nga dapit nga walay polusyon ug usa ka haom nga puy-anan sa matinumanong katawhan. Ang paglungtad sa espirituwal nga paraiso niining “makuyaw nga mga panahong lisod sagubangon” maoy pamatuod sa gahom sa Diyos ug usa ka pasiuna sa kon unsay iyang himoon ug palamposon sa umaabot.—2 Timoteo 3:1.

Bisan karon, silang nagatagamtam sa espirituwal nga paraiso makasinati sa espirituwal nga katumanan sa Isaias 49:10: “Sila dili gutomon, ni sila uhawon, ni ang naglagiting nga kainit o ang adlaw mohampak kanila. Kay ang Usa nga adunay kaluoy kanila mag-agak kanila, ug sila tultolan niya ngadto sa daplin sa mga tubod sa tubig.” Si José makapamatuod nga tinuod kana. Nangambisyon siya nga mahimong usa ka iladong musikero, apan nakakaplag siyag labaw nga katagbawan sa pag-alagad sa Diyos uban sa Kristohanong kongregasyon. Siya miingon: “Karon natagamtam ko ang usa ka makahuloganong kinabuhi. Gibati ko ang kasegurohan sulod sa Kristohanong panag-igsoonay, ug nailhan ko si Jehova ingong usa ka mahigugmaong Amahan nga kaniya kita makasalig.” Busa ang kalipay ni José—ug sa milyonmilyon pang uban sama kaniya—gihubit pag-ayo sa Salmo 64:10: “Ang matarong magamaya diha kang Jehova ug modangop gayod kaniya.” Pagkamaayong kahubitan sa espirituwal nga paraiso!

[Footnote]

[Hulagway sa panid 10]

Samtang nagatagamtam sa espirituwal nga paraiso, angay kitang motabang sa pagpalambo niana!