Walay-Dugo nga Pag-opera—“Giuso nga Paagi sa Pagpanambal”

UBOS sa ulohang “‘Walay-Dugo nga Pag-opera,” ang magasing Maclean’s nagtaho nga ang mga doktor sa tibuok Canada “nakaugmad ug bag-ong mga paagi nga, sulod sa miaging lima ka tuig, naghimo sa gitawag nga walay-dugo nga pag-opera ngadto sa giuso nga paagi sa pagpanambal.” Si Brian Muirhead, usa ka anestesiologo sa Health Sciences Centre sa Winnipeg, maoy usa kanila. Unsay nagtukmod sa iyang panukiduki alang sa kapiliang pagtambal nga walay dugo?

Niadtong 1986, si Dr. Muirhead mihimog malisod nga pag-opera sa 70-anyos nga lalaki nga may nagdugo nga ulser kinsa, tungod sa iyang pinasukad-sa-Bibliya nga mga pagtulon-an ingong usa sa mga Saksi ni Jehova, mihangyo ug paagi sa pagtambal nga dili magkinahanglan ug pag-abonog dugo. (Buhat 15:28, 29) Si Dr. Muirhead “migamit sa wala kaayo gamitang paagi sa pag-abonog saline solution ngadto sa pasyente aron magpabiling normal ang presyon sa iyang dugo,” nagtaho ang Maclean’s. “Milampos ang maong paagi, ug kini nagpalig-on sa nagdakong pagtuo ni Muirhead nga ‘nag-abono kitag sobra ka daghang dugo. Nagtuo ako nga panahon na nga mangitag mga kapilian.’”

Ang panukiduki labot sa walay-dugo nga pag-opera “nahimo tungod sa mga kabalaka labot sa umaabot nga suplay sa gidonar nga dugo—ug tungod sa kahadlok sa daghang pasyente nga matakdan sa kagaw sa sakit nga dala sa pag-abonog dugo.” Tungod sa panukiduki sa mapaagihong mga doktor, nakabatog kaayohan dili lamang ang mga Saksi ni Jehova kondili ang daghan pang uban. “Gawas nga mawagtang ang panginahanglan sa mga pag-abonog dugo sa daghang kaso, ang walay-dugo nga pag-opera nagpakunhod sa risgo—bisan unsa ka gamay—sa impeksiyon nga ipatungha tungod sa nahugawang dugo,” nag-ingon ang Maclean’s. Apan bisan ang “wala mahugawing” dugo makapatunghag risgo sa impeksiyon pinaagi sa temporaryong pagsugpo sa mga sistema sa imyunidad sa pasyente.

Unsay katarongan sa hugot nga pagtuo sa mga Saksi ni Jehova labot sa kapiliang pagtambal nga walay dugo? Lagmit interesado ka nga mobasa sa brosyur nga Sa Unsang Paagi ang Dugo Makaluwas sa Imong Kinabuhi? Ang mga Saksi ni Jehova malipay sa pagpakig-ambit niini uban kanimo.