Ang Relihiyon Mohatag ba ug Pakigdait sa Kalibotan?

GIKAN sa Agosto 28 hangtod sa Agosto 31, 2000, nagtapok ang kapin sa 500 ka hawas gikan sa 73 ka nasod sa Siyudad sa New York. Nagtigom sila didto sa Hiniusang Kanasoran alang sa “The Millennium World Peace Summit of Religious and Spiritual Leaders.” Ang mga lider—nga daghan ang nagsul-ob ug mga turban, mga tag-as nga besti nga kahel ug kolor, mga purong nga balhibo, o tag-as nga itom nga mga kupo—naghawas sa daghang relihiyon. Lakip niini mao ang Baha’i, Budhismo, Hinduismo, Islam, Jainismo, Judaismo, Shinto, Sikhismo, Taoismo, Zoroastrianismo, ug mga relihiyon sa Kakristiyanohan.

Ang mga delegado nagtigom didto sa Hiniusang Kanasoran sulod sa unang duha ka adlaw sa upat ka adlaw nga komperensiya. Apan, ang komperensiya wala organisaha o gastohi sa Hiniusang Kanasoran kondili sa nagkalainlaing mga organisasyon. Bisan pa niana, ang HK ug ang mga lider sa relihiyon naghisgot sa kahinungdanon sa pagtinabangay aron sa pagsumpo sa kakabos, pagpihig sa rasa, mga suliran sa kalikopan, gubat, ug mga hinagiban sa pinakyaw nga pagpatay.

Gipirmahan sa mga delegado ang usa ka dokumento nga nag-ulohan ug “Panaad Alang sa Pakigdait sa Kalibotan.” Bisan tuod giila nga ang kapintasan ug ang gubat “usahay gihimo sa ngalan sa relihiyon,” ang dokumento nag-ingon nga ang mga mopirma kinahanglang “makigtambayayong sa Hiniusang Kanasoran . . . sa pagkab-ot sa pakigdait.” Hinunoa, walay tinong mga resolusyon nga nagpakita kon sa unsang paagi himoon kini.

Sa ikaduhang adlaw, si Bawa Jain, ang sekretaryo-heneral sa komperensiya, nagtapos sa iyang pangbukas nga pakigpulong pinaagi sa pagpahayag nga pipila ka tuig una pa niana siya nakamatikod sa usa ka dibuho diha sa Hiniusang Kanasoran. Ang dibuho naghulagway sa usa ka tawo nga mas taas pa kay sa Secretariat nga bilding sa Hiniusang Kanasoran. Siya nanuktok sa bilding nga daw ingon kini sa usa ka pultahan. Ubos sa dibuho dunay gisulat: “Prinsipe sa Pakigdait.” Matod ni G. Jain: “[Ang dibuho] nakapatandog kaayo kanako sa dihang nakita ko kini. Nangutana ako sa lainlaing mga tawo kon unsay kahulogan [niini]. Nagtuo ako nga karon nakaplagan ko na ang tubag. Ang pagtigom ninyong tanan dinhi, ang espirituwal ug relihiyoso nga mga lider sa kalibotan, nagpakita kanako nga mao [kini] ang prinsipe sa pagkigdait nga nanuktok sa pultahan sa Hiniusang Kanasoran.”

Lahi nga panghunahuna ang gihatag sa Bibliya. Kini nagpakita nga si Jesu-Kristo mao ang Prinsipe sa Pakigdait. Ipahinabo niya ang pakigdait sa tibuok yuta, dili pinaagi sa mga paningkamot niining politikal ug relihiyoso nga mga lider sa kalibotan, kondili pinaagi sa Gingharian sa Diyos. Kini nga Gingharian—ang langitnong kagamhanan sa Diyos—mao ang malamposong maghiusa sa masinugtanong katawhan ug magpatuman sa kabubut-on sa Diyos ibabaw sa yuta.—Isaias 9:6; Mateo 6:9, 10.